Cɔ̃nfɩrmmã 22

Wú fǝ̃ǝ̃ ǹ-pɩgaa-m nǝ̃ nũmǝ̃nãsǝ'n hũm'n lwaagu, gɩ̀ daraa nã́ã́ dɔtrã-i; gɩ̀ yáá gɩ̀ hlǝ yuuntasǝ'n guujirakuugɩ nã mãã Dũnnũw nǝ̃ Tũmblɩ'n kuugu,

2 gɩ̀ hũmmã̀ sɔ̃ lǝ'n hlũhanãgǝ'n sǝ̃ǝ̃gɩ nã.

Lwaa'n yanɲã hǝ̃ǝ̃lɲã nã, nũmǝ̃nãsǝ'n tubikuugɩ̀ yáá dàa gɩ̀ ŋmǝ̃ǝ̃ yin nũɔ̃sɔ̃ nǝ̃ ɲã̀ hǝ̃ǝ̃l blɩrɩ nã; gɩ̀ ŋmǝ̃ǝ̃ biiga hiraa wo hiraa, nǝ̃ gɩ̀ pɩpɩrãnɲã́ ba ɲã̀ buɔ coplaaga.

3 Nɔ̃bɩblaa'n pãllɩ̀ síì da hlo.

Dũnnũw nǝ̃ Tũmblɩ'n yuuntasǝ'n guujirakuugɩ̀ ji ba lǝ'n kusuugɩ nã; wù mããcieraabà ji ba bà ce mããcemmã bà hã-yǝ.

4 Bà ji da wù yigagu, nǝ̃ wù yiirɩ́ yal bà sãnũũgɩ nã.

5 Taagà síì cu hlo, nǝ̃ bà dugɔẁ síì ba fitɩn gbɩgbaamã nã, nǝ̃ bǝ̃ǝ̃'n mǝ̃gãmmã nã, nã̀ã wa Yitii Dũnnũẁ ji ba wù hiil wù gbɩgbaamã wù hã-ba.

Nǝ̃ bá ba bà ji jiraa yuuntasǝrɩ nã fuwɔ fɩraa.

Cɔ̃nfaalammã

6 Wù wáalá nǝ̃-m wà: «Cãwanĩɛ̃ gáà sulam-i, nǝ̃ gá ba gà saa curoẃ hũɔ̃-ga; Yitiiw, wùú mãã wù blǝ wù tanhiilaa'n yigagu, wù tĩ́ɛ̃lã́ wù mɛlɛgɛẃ juo pɩgaa wù mããcieraaba nǝ̃ dìí mãã gɩ-ń ce fiyãã dɩ̀ ji hi.»

7 Yesuẃ fǝ̃ǝ̃ ǹ-waa wà: «Ne, gɩ-ń ce fiyãã, mǝ̃̀ ga jo.

Gùú tii mãã wù blǝ Dũnnũ tanhiil'n cãwanĩɛ̃gaa mãã sɛbɛ wáá nã, wù yuugɩ̀ dwállá!»

8 Mã́ã Yuhanã mã́ã̀, mǝ̃̀ nṹɔ̃́ nã̀ã da gɩ̀ cɔ̃mmã.

Mǝ̃̀ gáa nɔ̃-mã, nã̀ã da-mã, mǝ̃́ duruu mɛlɛgɛw mãã wù yáá wù pɩgaa-m nǝ̃-mã, wù vyanɲã taara wà mǝ̃ bũũ-yǝ.

9 Wú fǝ̃ǝ̃ ǹ-waa nǝ̃-m wà: «Blǝ ǹ hla nã nǝ̃ dɩ̀ celli!

Mǝ̃́ nǝ̃ mã̀ã ba ǹ nãmããcier-i, nǝ̃ ǹ cwanããbaa mãã Dũnnũ tanhiilaaba, nǝ̃ bà minw mãã bà blǝ sɛbɛ wáà cãwanĩɛ̃ga, bà nãmããcierw.

Bũũ Dũnnũw.»

10 Nã̀ã fǝ̃ǝ̃ ǹ-pya nã wà: «Báa ɲãl Dũnnũ tanhiil'n cãwanĩɛ̃gaa mãã sɛbɛ wáá nã, ǹ kusuugɩ nã, nã̀ã wa gà bǝ̃ǝ̃gɩ̀ píɛlá nã.

11 Wùú nǝ̃n ba wù sáa sũɔ̃l, wú kã nǝ̃ yiga ǹ-ba wù ce dìí mãã dɩ̀ sáa sũɔ̃l hlo, wùú mãã wùu bla, wú kã nǝ̃ yiga ǹ-bla wù hla hlo, nǝ̃ wùú mãã wùu sũɔ̃l, wú kã nǝ̃ yiga sũɔ̃lɩmmã nã hlo, wùú mãã wùu per wù hla nã, wú kã nǝ̃ yiga ǹ-ba wù per wù hla nã hlo.»

12 Yesuẃ fǝ̃ǝ̃ ǹ-waa wà: «Ne, gɩ-ń ce fiyãã, mǝ̃̀ ga jo, nã̀ã ba mǝ̃̀ jo nǝ̃ pãlli mǝ̃̀ ji pã curo wo curo ǹ-vaa nǝ̃ wù diicerǝdi.

13 Mã́ã-i Alfaw nǝ̃ Omegaw, wuudĩɛ̃lw nǝ̃ wuufaalyǝw, dulli nǝ̃ faalɩmmã.

14 Bàá mãã bà saar bà kuulanãmba, bà yunɲã̀ dwállá: bà ji da hlũũgu, ǹ-wuu nũmǝ̃nãsǝ'n tubikuu'n blɩri, nã̀ã ba bà ji gbǝ̃ǝ̃ ǹ-jãn nǝ̃ dũndɔ̃lĩɛ̃ga lǝ'n kusuugɩ nã!

15 Nǝ̃ bàá mãã vamba, nǝ̃ kaaraaba, nǝ̃ durkũmnããba, nǝ̃ cokuoraaba, nǝ̃ siijãnããba, nǝ̃ bà minw mãã kwasǝrɩ̀ dwal bà nã, nã̀ã ba bà bǝr-dǝ, bá hlǝ lǝ'n taasǝ̃ǝ̃nǝ̃ǝ̃gu!

16 Mã́ã Yesu mã́ã̀, mǝ̃̀ tĩ́ɛ̃lã́ mǝ̃̀ mɛlɛgɛẃ juo pɩgaa ǹ-ja-ɲã́ã̀ nǝ̃ cɔ̃m mã́ã̀ min, Igɩlisɩ taa'n kurɔnɲã nã.

Mã́ã-i Dawuda huɔnblɩw nǝ̃ wù furũntiiw, nã̀ã ba taakaalaaŋmããri mãã dɩ̀ caalaa.»

17 Dũnnũ Yuflǝw nǝ̃ ciɛnĩĩẁ waa wà: «Jo!»

Wùú mãã wù nɔ̃, wú waa wà: «Jo!»

Hũnɲũɔ̃sǝrɩ-ń ba wùú nã, wú jo!

Wùú nǝ̃n ba wù caa nũmǝ̃nãsǝ'n hũmmã, wú hũɔ̃-mã mǝ̃ǝ̃lǝ̃ǝ̃!

18 Mǝ̃̀ waa-dǝ gbaa nǝ̃ curo wo curow mãã wù nɔ̃ Dũnnũ tanhiil'n cãwanĩɛ̃gaa mãã sɛbɛ wáá nã wà: gùú tii nǝ̃n piɛ kuu gà nã, naraabaa nǝ̃n yállá sɛbɛ wáá nã, Dũnnũẁ ji piɛ-ba ǹ-hã-yǝ;

19 nǝ̃ gùú tii nǝ̃n hiil kuu Dũnnũ tanhiil'n sɛbɛ wáà cãwanĩɛ̃ga nã, Dũnnũẁ ji hiil wù yuɔri nũmǝ̃nãsǝ'n tubikuugɩ nã, nǝ̃ lǝrii mãã dìi kra dɩ̀ dǝ ǹ-hã-yǝ, nǝ̃ dɩ̀ cɔ̃mmã́ yal sɛbɛ wáá nã.

20 Wùú mãã wù pɩgaa wù ja-ɲã́ã̀ wà cɔ̃m mã́ã̀ sulam-i, wù waa wà: «Ũwũũ, gɩ-ń ce fiyãã, mǝ̃̀ ga jo.»

Kwaya!

Jo, Yitii Yesu!

21 Yitii Yesu [Kɩrsaẃ] ne ɲì min yiɛgu!