Hebruba 12

Yi duu Yesu nǝ̃ǝ̃l nã-i

Hãmĩĩ-lǝ, cocin díɛ̀dɩ minw mãã dìi piɛ bà nãkruɔgu Dũnnũw nã, bá nìɛ bàa caliɛ yì nã ǹ-ba bà dii-yǝ hlũũgɩ nã.

Gɩ̀ sùɔ́gɩ nã, cɔ̃m wo cɔ̃mmã mã̀ cii-yáà yi ba yì síì kã nǝ̃ yigagu, yáalà yí nǝ̃nǝ̃ǝ̃ mã̀ nã pew, nǝ̃ diicĩɛ̃rǝdii mãã dɩ̀ gǝǝ dɩ̀ nũũ yì nã.

Yáalà yí gbǝ̃ǝ̃ yí ba yì kã nǝ̃ yiga nǝ̃ susɔ̃llii mãã Dũnnũẁ hlã-yáà nǝ̃-dǝ.

2 Yáalà yí ba yì ne Yesuw-i, wùú mãã wù tíɛ́ yi yiga nã Dũnnũ cɔ̃m'n hũɔ̃mã nã.

Nã̀ã wa wù-lǝ wɩ̀-i yì Dũnnũ cɔ̃m'n hũɔ̃m'n dulli nǝ̃ mã̀ faalɩmmã.

Wù hṹɔ̃lã́ ywaruugu ǹ-ku gbǝl'n daagɩ nã, wù sáa ne gɩ̀-lǝ gɩ̀ kuugɩ́ ba circɔ̃m wù saa.

Dũnnũ yáá wù ga hã-yǝ nǝ̃ gùú dudwalɩmmãã mãã, wù yinɲã̀ yáá mã̀ã́ nã-i.

Yindiɛ, wú nàa wùu jiraa Dũnnũ yuuntasǝ'n guujirakuu'n nãdĩĩyiɛgu.

3 Blǝ́rà Yesu cɔ̃mmã ɲí ne, diicĩɛ̃rǝntaabà sórrá wù yuunã nĩĩgu mãã nǝ̃ wú gbǝ̃ǝ̃ ǹ-hũɔ̃-dǝ, ɲimãã yo bláá ya ɲì cãnĩɛ̃gá suruɔ, bláá ya ɲi cãnĩɛ̃gá karaa.

4 Ɲí nìɛ byaarɩ nã gaacĩɛ̃yaga, nǝ̃ ǹ-ji vaa nǝ̃ kuɔkuɔgu, curo'n sǝ yà hi ǹ-guu wù yuugɩ nã dɩ̀ kusunã.

5 Dũnnũẁ gbǝ́ǝ́ ɲì nã nǝ̃ gùú cɔ̃nfǝ̃ǝ̃gǝguu mãã, ɲi sĩĩnǝ̃ǝ̃ gɩ̀ nã-ì?

Wù wanãã nǝ̃-ɲã́ã̀ nã́ã́ tiiyǝw mãã wù wanãã nǝ̃ wù byanããbaa nĩĩguu mãã.

Wù wáalá nǝ̃-ɲã́ã̀ wà: «Mã́ã bíɛ́, Cuutii Dũnnũ wu-ń ba wù piir-n, báa ya gɩ́ ba nǝ̃ cɔ̃m ǹ saa, wu-ń ba wù wanãã ǹ nã, báa ya gɩ́ karaa ǹ cãndɩ nã.

6 Nã̀ã wa gùú tiiw mãã wù cɔ̃mmã̀ dwal Cuutiiw nã, wù piir wɩ̀-i, nã̀ã ba wù mũũ wùú mãã wù ne wú ba wù tãnkuurw.»

7 Gùú ywaruuguu mãã ɲì drɔ, gbǝ̃́ǝ̃lã̀ ɲí hũɔ̃-gǝ ɲì hla nã.

Dũnnũ-lǝ, wùú píɛlà-gǝ wù hã-ɲã́ã̀ ǹ-da ǹ-dii-ɲã́ã̀ hlũũgɩ nã.

Wú nǝ̃ wùu ne ɲí ce wù tãnkuuraa-i, gɩ̀-lǝ gùú cíé wú ba wù ce dɩ̀-lǝ.

Nã̀ã wa tãnkuur hawɩ-i wù tǝw sǝ̃n piir-yǝ?

8 Dũnnũw-ń ba wù sǝ̃n piir-ɲã́ã̀ wù tãnkuuraaba min tammã, gɩ̀-lǝ ɲã cíé gǝ̃ǝ̃ tãnkuuraa-i, tãnkuuraahuhoraa sǝ nǝ̃-ɲã́ã̀.

9 Yi tǝhuubabà yáá bà piir-yáà nǝ̃ hãmĩĩ ba yì bũũ-ba, nã̀ã ji wa yi síì nɔ̃ ǹ-hã yì Tǝ Drɔ-Dũnnũw ǹ-da ǹ-ba nũmǝ̃nãw.

10 Yì tǝbà yáá bà piir-yáà bǝ̃ǝ̃dagǝ nã fiyãã, ǹ-vaa nǝ̃ bà-lǝ bà mãã bà caa-dǝ nĩĩguu mãã.

Nǝ̃ Dũnnũ-lǝ wù piir-yáà yì faa'n cɔ̃m nã-i, yí da ǹ-ba yì dǝ yiyalɩmmã nã wùú tammã.

11 Gùú nã mãã yì tǝbà yáá bà piir-yáà, gɩ̀ yáá gɩ-ń ce gɩ́ bla yi nã, gɩ̀ sáá gɩ̀ ba nǝ̃ dudwalɩmmã yi nã.

Nǝ̃ bǝ̃ǝ̃dagǝ gɩ̀ furũũgɩ nã, hãmĩĩ mãã yì díɛ́ gɩ̀ piirɩmmã, yi díɛ́ gɩ̀ fuugu.

Gɩ̀ hlã-yáà nǝ̃ hyasɩrãgǝgu, nã̀ã ce yí ba cosũɔ̃lbaba.

Bláá ya yí hla Dũnnũ cɔ̃mmã

12 Gɩ̀ sùɔ́gɩ nã, bláá duɔ ɲì nãkrɔnɲã, díilá hyagbǝ̃ngbãndi ɲì hla nã ɲí gbǝ̃ǝ̃ ɲí ba ɲì kã nǝ̃ yiga.

13 Ɲì Dũnnũ hlũũ'n waalɩ nã, túulà hlũsũɔ̃lgǝgɩ-i, gɩ̀-lǝ gɩ̀ nã, bàá mãã bà wáà bà diisǝ Dũnnũ hlũũgɩ nã, ba báa ji nǝ̃nǝ̃ǝ̃ gɩ̀ nã, nǝ̃ bá da ǹ-da kɩkǝmmã ǹ-kã nǝ̃ yiga.

14 Yáalà hyasɩrãgǝgɩ́ ba ɲì sǝ̃ǝ̃nã nǝ̃ cwaaba min, nǝ̃ ɲí dii ɲì hla ɲí hã Dũnnũw, nã̀ã wa gɩ-ń ba sǝ dìí sǝ, curo'n yinɲã sǝ̃n ga taa Cuutiiw nã.

15 Dũnnũẁ mãã wù ne yì yiɛgu nǝ̃ dìí mãã, blǝ́rà ɲì hla nã curo'n báa ji ver wù furũũgu ǹ-hã-dǝ.

Gɩ̀ sùɔ́gɩ nã, blǝ́rà ɲì hla nã curo'n báa ga juo ba hyacoruugɩ nã ǹ-ba nã́ã́ tubikuubɩblaa-i, gùú mãã nǝ̃ tãmmã gùu pa ǹ-ba gɩ̀ vǝ̃ǝ̃ nǝ̃ gɩ̀ tãmmã́ ba mã̀ hũn mã̀ jãn cocindɩ nã, mã̀ bǝ̃ǝ̃lǝ̃ǝ̃ bà nã.

16 Mǝ̃́garà ɲí blǝ ɲì hla nã, ɲì sǝ̃ǝ̃nã, curo'n báa ba durkũmsǝrɩ nã, nǝ̃ curo'n báa ya gùú ɲinɲãã mãã ɲã̀ã kra ɲã̀ dǝ ǹ-hã Dũnnũw, ɲã̀ cɔ̃mmã́ bla wù nã nã́ã́ Esow cíé-dǝ nĩĩguu mãã.

Wù súurá wù vũnvãnsǝri ǹ-hã wù hǝ̃ǝ̃w, nǝ̃ wú hã-yǝ nǝ̃ wuur'n kuudagǝ wú wuu.

17 Gɩ̀ furũũgɩ nã, ɲi fǝ̃́ǝ̃lã́-dǝ wà wu yáá wù caa wù tǝw pã wù nɔ̃fɩnfaagu nǝ̃-yǝ, nǝ̃ tiiyǝẁ sáa gbǝ̃ǝ̃ ǹ-ce-dǝ.

Halle ǹ-da wà wu káalá cɔ̃m mã́ã̀ yuunã, kuu'n sáa gbǝ̃ǝ̃ ǹ-ver kuu mã̀ nã.

18 Ɲi mãã ɲĩ̀ĩ hiraa Dũnnũ yigagɩ nã gùú tãnũũgu taara, gùú sǝ Sɩnãyi tãnũũgu.

Sɩnãyi tãnũũgɩ̀ yáá nã́ã́ twanɲũɔ̃cũncuruɔguu mãã Dũnnũw kã́ã́ bá ce-gǝ nǝ̃ Isɩrayɛl bluuba.

Gɩ̀-lǝ gɩ̀ tãnũũgu, cwaabà yáá bà da-gǝ gbaa nǝ̃ bà yinɲã.

Dǝ̃nkɩnkandaarɩ̀ yáá gɩ̀ drɔ, nǝ̃ dudũũmã nǝ̃ yiilbɩblinɲã nǝ̃ saluugɩ̀ yáá dàa ɲã̀ã caliɛ gɩ̀ nã.

19 Ǹ-pya dɩ̀-lǝ dɩ̀ nã, bà nṹɔ̃́ yendarǝ bullɩ nã nǝ̃ fãngããgu, nã̀ã nɔ̃ yaldarǝ nã dɩ̀ nãlĩɛ̃.

Bàá nǝ̃n nṹɔ̃́ yal díɛ́ nã, bà yáá bà jiɛriɛ wà ba sǝ̃n caa bá nɔ̃ gɩ̀ yallɩ nã hlo.

20 Nã̀ã wa Dũnnũẁ kárrá dìí nã mãã, bà sáá bà ji gbǝ̃ǝ̃ ǹ-hũɔ̃-dǝ.

Wù wáalá wà: «Nũmǝ̃nãkuu wo nũmǝ̃nãkuu mãã gɩ̀ ji jĩɛ̃ tãnũũ gúɔ́ nã, halle gɩ-ń ba kwasǝnkuu nǝ̃n ba, gɩ̀ saa bá nǝ̃ǝ̃ ǹ-ko-gǝ nǝ̃ tɩntrã-i.»

21 Bà díɛ́ dìí mãã gɩ̀ sùɔ́gɩ nã, dɩ̀ cíé gbǝrsǝri bà nã fuwɔ Dũnnũ tanhiil Musaẃ waa wà: «Gbǝrsǝrɩ̀ blǝ́rá-m, mǝ̃́ ba mǝ̃̀ ɲãnãã.»

22 Nǝ̃ ɲimãã-lǝ, ɲi mãã ɲĩ̀ĩ hiraa Dũnnũ yigagɩ nã gùú tãnũũgu taara gɩ̀-i Siyɔ̃ tãnũũgu, nǝ̃ Dũnnũw mãã nũmǝ̃nãw, wù mãã gùú lǝri mãã: drɔ Serusalɛmgu, gùú sùɔ́gɩ nã mãã mɛlɛgɛcindɩ́ nàa dìi tɩgii ǹ-ba paaruugɩ nã.

23 Ɲi júó ǹ-ji jãn Dũnnũ yisɩnã cwaaba sǝ̃ǝ̃nã bàa tɩgii ǹ-ba bà ce kweyi-kweyiw.

Dũnnũ tãnkuuraadĩɛ̃lããba-i nĩĩgu, bà yiriɛgá nàa gàa yal ǹ-kra Dũnnũ suɔgu drɔkuɔlɩ nã.

Dũnnũw mãã cwaaba min sugojarraw, ɲi kúganã́ã wùú nã-i, nã̀ã kuganãã wù cosũɔ̃lbabaa mãã bà yáá dìɛ fufodii cuuw nã, nã̀ã ji kãã ba dàa wù nãã.

Bà cɔ̃mmã́ nǝ̃ mã̀ã jalliɛ gɩ̀ sùɔ́gɩ nã.

24 Ɲi kúganã́ã Yesuw nãã-i.

Dũnnũẁ cíé yí ɲũɔ̃ gùú twanflãmmãã mãã nǝ̃-yǝ, wù-lǝ wɩ̀-i yɔtiiw hãmĩĩ nǝ̃ Dũnnũ sǝ̃ǝ̃gɩ nã.

Wù twammãã mãã mã̀ tũnũũ, mã̀ pérrá yì nã, gɩ̀-lǝ gɩ̀ twammã búɔlá Abɛl mǝ̃gãmmã nã.

25 Gɩ̀ sùɔ́gɩ nã, blǝ́rá ɲì hla nã, gùú tii mãã wù wanãã nǝ̃-ɲã́ã̀, bláá hla wù nũɔ̃nãcãwandi.

Fufodii, wùú mãã wù yáá wù gbǝ cwaaba nã nǝ̃ Dũnnũ cɔ̃mmã ɲũũrũũgu níɛ́ nã, nǝ̃ bàá mãã bá hla-dǝ, bà sáa ji gbǝ̃ǝ̃ ǹ-tar ǹ-hlǝ ywaruugɩ nã, nã̀ã ji wa yi-ń hla wù mãã ya ba drɔkuɔlɩ nã dìi nã̀ã ba wù wù waa cɔ̃mmã nǝ̃-yáà, wù cãwandi.

26 Wùú mãã wù yallɩ̀ yáá dìi ce ɲũũrũũgɩ́ saaraa, wùú plã wù nũɔ̃gu nǝ̃-yáà wà: «Kuɔkuɔ-lǝ, mǝ̃̀ síì saaraa ɲũũrũũ dɩndɩn nã sǝ, mǝ̃̀ ji saaraa drɔkuɔl yo dɩ̀ nã.»

27 Nǝ̃-ń da wà: «Kuɔkuɔ-lǝ hlo», ɲi saa ɲí fǝ̃ǝ̃ wà Dũnnũẁ nǝ̃́ǝ̃lã́ kuu wo kuu mãã guusaaragǝgu, gɩ̀ ji guu nã, nǝ̃ ɲã̀ã́ mãã ɲã̀ sǝ ɲããsaaranɲã sǝ ɲã̀-lǝ ɲã́ da ǹ-ba.

28 Dũnnũẁ mãã wù ga dii yì nũɔ̃gu gùú yuuntasǝrɩ nã mãã, diisaaradǝ sǝ.

Gɩ̀ sùɔ́gɩ nã, yáalà yí ba yì dũũ kwayaw yì hã-yǝ, nã̀ã ba yì bũũ-yǝ.

Gɩ̀-lǝ gɩ̀ nã, yi-ń ba yi nɔ̃ yì hã-yǝ, nã̀ã ba yì sɔ̃ wù nã, gɩ̀ ji dwal wù nã.

29 Sulammã nã, hãmĩĩ Dũnnũẃ nǝ̃ nã́ã́ dǝ̃ǝ̃m-i, mã̀ã́ mãã mã̀ caa kuugu ǹ-guu gɩ̀ nã.