Hebruba 11

Dũnnũ cɔ̃m'n hũɔ̃mã

Curow mãã yà hũɔ̃ wà wu mãã wùu piɛ wù nãkruɔgu gùú ɲin'n cɔ̃mmã nã mãã, wà wu ji da-ɲã, nã̀ã ba yà hũɔ̃ ǹ-hiraa dɩ̀ nã wà gùú ɲinɲãã mãã wù sǝ̃n da-ɲã nǝ̃ wù yisɩri, wà ɲã nìɛ sulammã nã, bà ja wù-lǝ wɩ̀-i wà wu hṹɔ̃lã́ Dũnnũ cɔ̃mmã.

2 Dũnnũẁ bíé yì tǝvũnvãnãã'n yirfɩnfaari bà hũɔ̃m'n cɔ̃m nã-i.

3 Yi mãã yì hṹɔ̃lã́ Dũnnũ cɔ̃mmã, gùú cíé yí fǝ̃ǝ̃ wà Dũnnũw nǝ̃́ǝ̃lã́ cuuw nǝ̃ wù cãwan-i.

Gɩ̀-lǝ gɩ̀ pɩgaa wà kuu wo kuu mãã yì da-gǝ cuuw nã nnĩĩ, gɩ hlǝ́rá gùú kuugɩ nã mãã curo'n sǝ̃n da-gǝ nǝ̃ wù yisɩri.

4 Abɛlẁ hṹɔ̃lã́ Dũnnũ cɔ̃mmã, gùú cíé wù wù jã́nnã́ Dũnnũw nǝ̃ gùú nũɔ̃sǝn siimãã mãã, mã́ dwal wù nã ǹ-ɲǝ̃ǝ̃ Kayɛ̃ mǝ̃gãmmã.

Dũnnũw nã̀ã fǝ̃ǝ̃ ǹ-waa wà wu ne Abɛlẃ ba cosũɔ̃lyǝ-i wù hũɔ̃m'n cɔ̃mmã nã, nã̀ã blǝ wù siim yo.

Abɛlẁ yáá wùu hũɔ̃ Dũnnũw cɔ̃mmã, gùú cíé wù jáa ku, wù cãwandɩ́ ba dìɛ.

5 Enɔkɩẁ hṹɔ̃lã́ Dũnnũw cɔ̃mmã, gùú cíé wú juo tuu ǹ-ta nǝ̃-yǝ wù suɔgu, wù sáa fǝ̃ǝ̃ kúúgu.

Curo'n sáa ji ver ǹ-da-yǝ hlo, nã̀ã wa Dũnnũẁ yáá wùu tuu ǹ-ta nǝ̃-yǝ wù suɔgu.

Bà yállá Dũnnũ sɛbɛba nã wà Dũnnũw wáalá wu ji tuu ǹ-ta nǝ̃ Enɔkɩw, wu wáalá wà Enɔkɩ cɔ̃mmã dwállá wù nã-i haasǝ nã̀ã da ǹ-ce-dǝ.

6 Nǝ̃ curo'n síì gbǝ̃ǝ̃ ǹ-dwal Dũnnũw nã, nã́ã́ n sáa hũɔ̃ wù cɔ̃mmã.

Sulammã nã, gùú tiiw mãã wu-ń wa wú kuganãã Dũnnũw nã, wù saa wú hũɔ̃ wà Dũnnũw nìɛ, nǝ̃ wù pã bàá mãã bà caa-yǝ.

7 Níyà Nũhũ hũɔ̃m'n cɔ̃mmã ɲí ne: Dũnnũẁ gbǝ́ǝ́ wù nã nǝ̃ cɔ̃m wo cɔ̃mw mãã mã̀ yáá mã̀ ji ce nã̀ã ba mã̀ sǝ mã̀ã hi ǹ-ce ǹ-da.

Nũhũẁ mãã wù yáá wùu hũɔ̃ Dũnnũ cɔ̃mmã, gùú cíé wú blǝ cɔ̃m mã́ã̀mã́ ba nũɔ̃sǝn cɔ̃m; wú nɔ̃ ǹ-hã Dũnnũw nã̀ã ce batow.

Wùú nǝ̃ wù suɔntaabà kórrá gùú batow nã-i.

Nũhũw mãã wù yáá wùu hũɔ̃ Dũnnũ cɔ̃mmã, wù pɩ́gará ǹ-ja cuu cwaaba nnĩĩ-i nǝ̃ bà yuɔrɔmmã, nǝ̃ Dũnnũẃ fǝ̃ǝ̃ ǹ-ne wú ba cosũɔ̃lyǝw wù yinɲã nã.

8 Ibramãẁ mãã wù yáá wùu hũɔ̃ Dũnnũ cɔ̃mmã, gùú cíé Dũnnũẁ bíé-yǝ gùú nã mãã, wú nɔ̃ ǹ-hã-yǝ nã̀ã suro ǹ-ta gùú yiɛgɩ nã mãã Dũnnũẁ yáá wù ji hã-yǝ nǝ̃-gǝ wú tuu-gǝ nǝ̃ sùɔ́gu.

Wù sáá wù fǝ̃ǝ̃ gɩ̀ sùɔ́gu, nã̀ã suro ǹ-ba wù maar.

9 Dũnnũ cɔ̃m'n hũɔ̃m'n cɔ̃mmã nã-i, Ibramãẃ ba wù jiraa wù waaraa nã́ã́ nǝ̃ǝ̃nĩĩtii-i nǝ̃-yǝ gùú yiɛgɩ nã mãã Dũnnũẁ yáá wùu pã wù nũɔ̃gu nǝ̃-yǝ wà wu ji hã-yǝ nǝ̃-gǝ.

Wù yáá wùu nǝ̃ǝ̃ kuɔli ǹ-jiraa dàa.

Isiyagaba nǝ̃ Yakubaw, bàá yo, bà cíé-dǝ nĩĩgɩ-i.

Bàá yo, Dũnnũẁ yáá wùu pã wù nũɔ̃gu nǝ̃-ba gùú cɔ̃mmã dɩnmã nã-i.

10 Nã̀ã wa Ibramãẁ yáá wù caa wú da lǝri mãã dìi mǝ̃gaa ǹ-fũũ ǹ-fa, dìí mãã Dũnnũw nǝ̃ wù hla wù ji vã dɩ̀ mãl'n tammã nã̀ã mã-dǝ.

11 Dũnnũ cɔ̃m'n hũɔ̃m'n cɔ̃mmã nã-i, Ibramãba nǝ̃ Sɩraw, halle ǹ-da wà ba yáá bàa vãnãã ǹ-tã, nǝ̃ Sɩraẃ ba wùu ĩɛ̃, bá da tãnkuur.

Wù yáá wùu hũɔ̃ dɩ́ kaalaa wù nã wà Dũnnũw plã wù nũɔ̃gu dìí nã mãã, wà wu ji ce-dǝ.

12 Nĩĩgɩ-i furũntaacin, bàá mãã curo'n síì gbǝ̃ǝ̃ ǹ-ja-ba, bà hlǝ́rá bibiɛ dɩnw nã, wùú mãã wù yáá wùu ku ǹ-tã.

Bá nǝ̃ bàa ɲũrũɔ̃ drɔŋmĩɛ̃'n tammã, nã̀ã ba nã́ã́ lwaakɩnkan'n nũɔ̃'n hlɔ̃mpier-i.

13 Cwaa báàbà min bà hṹɔ̃lã́ Dũnnũ cɔ̃mmã fuwɔ ǹ-ga hi bà kúúgu.

Dũnnũẁ yáá wùu pã wù nũɔ̃gu nǝ̃-ba gùú ɲin'n cɔ̃mmã nã mãã wà wu ji hã-ba nǝ̃-ɲã, bàá nǝ̃ bà hla, bà sáa da-ɲã.

Nǝ̃ bà bla dudwalɩmmã nã nã̀ã wa bà yáá bàa fǝ̃ǝ̃ wà gɩ̀ ɲinɲã ga jo furũũgɩ nã.

Bà wáalá-dǝ gbaa wà bà-lǝ noraa-i waal'n hlũũgɩ nã cuuw nã.

14 Bàá mãã bà wanãã nnĩĩ tammã, gɩ̀ pɩgaa gbaa wà ba caa bà yiɛ-i.

15 Ba nã́ã̀ ba dìɛ bà kãnãã bà wanhlǝm'n sùɔ́'n cɔ̃mmã nã, ba nã́ã̀ bàa ver ǹ-kã gɩ̀ sùɔ́gɩ nã.

16 Sulammã nã, bà yáá dàa bà caa gùú yiɛgu mãã gùu buɔ nã.

Gɩ̀-lǝ gɩ̀-i Dũnnũ suɔgu drɔkuɔlɩ nã.

Nã̀ã wa wú nàa wùu mǝ̃gaa lǝdarǝ ǹ-cii-ba.

Sulammã nã, gɩ̀ sǝ̃n ce Dũnnũw nǝ̃ cir, ba-ń ba bà be-yǝ wà bà Dũnnũ.

17 Gùú nã mãã Dũnnũẁ dǝ̃́ǝ̃lã́ Ibramãw ǹ-ne wà wú jãn wù bíɛ́w nǝ̃ siimã ǹ-hã-yǝ, Ibramãẃ hũɔ̃ Dũnnũ cɔ̃mmã, nã̀ã pɩgaa wà wu hyárá dɩ̀ nã wà wu ji hã Dũnnũw nǝ̃ wù kadiinw.

Nã̀ã wa Dũnnũẁ yáá wùu pã wù nũɔ̃gu nǝ̃-yǝ dìí nã mãã, wù yáá wùu hũɔ̃ ǹ-cu dɩ̀ nã.

18 Sulammã nã, Dũnnũẁ yáá wùu waa nǝ̃-yǝ wà: «Ǹ furũntaabaa mãã mǝ̃̀ plã mǝ̃̀ nũɔ̃gu nǝ̃-n bà cɔ̃mmã nã, bà ji hlǝ Isiyagaw nã-i.»

19 Ibramãẁ yáá wùu cu dɩ̀ nã wà Dũnnũẃ nǝ̃ fãngããgu ǹ-ba wù ji pĩĩ cugutiiw.

Sulammã nã, gɩ̀ cíé nã́ã́ Isiyagaw kúú nǝ̃ Dũnnũẃ pĩĩ ǹ-hiil-yǝ kúúgɩ nã ǹ-hã Ibramãw nǝ̃-yǝ.

20 Isiyaga yo, wù Dũnnũ cɔ̃m'n hũɔ̃m'n cɔ̃mmã nã-i, wú cirǝ̃ǝ̃ Dũnnũw nã wà wú piɛ wù nãkrɔfɩnfaagu wù byanããba nã mãã Yakubaba nǝ̃ Esow.

Wù cíé dɩ̀-lǝ ǹ-pɩgaa-ba nǝ̃ bà cicuɔ'n cɔ̃m nã-i.

21 Yakuba Dũnnũ cɔ̃m'n hũɔ̃m'n cɔ̃mmã nã-i, wù yáá wù caa wú ku gùú nã mãã, wú cirǝ̃ǝ̃ Dũnnũw nã ǹ-hã Yisefu bíɛ́ wo bíɛ́, wà wú piɛ wù nãkrɔfɩnfaagu bà drɔ, nã̀ã nɩsɩ wù guruugu drɔ ǹ-kuulǝǝ ǹ-bũũ Dũnnũw.

22 Yisefu yo, wù Dũnnũ cɔ̃m'n hũɔ̃m'n cɔ̃mmã nã-i, wù gáa ba wù jo wù ji naa gùú nã mãã, wú waa Isɩrayɛl bluu'n hlǝm'n cɔ̃mmã Misɩra yiɛgu, nã̀ã pɩgaa-ba nǝ̃ bà mãã bà ji ce wù kukuunɲã nĩĩgu mãã.

23 Musa tǝba yo, bà Dũnnũ cɔ̃m'n hũɔ̃m'n cɔ̃mmã nã-i bà sáa sɔ̃ Misɩra yuuntigǝ̃ngãw nã, nǝ̃ wù yáá wùu kra gùú hlũũgɩ nã mãã ǹ-hã-ba, nã̀ã ŋmǝ̃ǝ̃rǝ̃ǝ̃ Musaw nã ǹ-ji da hyarsǝrɩ siɛldi.

Nã̀ã wa bà yáá bàa da wà Musaw fa ǹ-car.

24 Musaẁ yáá wùu hũɔ̃ Dũnnũ cɔ̃mmã, gùú cíé wù jáa vǝ̃ǝ̃ gùú nã, wù sáa hũɔ̃ bá wa Misɩra yuuntigǝ̃ngã'n bisĩɛ̃'n bíɛ́-i nǝ̃-yǝ.

25 Wú hla wù yisɩnã cɔ̃ndudwalɩmmãã mãã wù yáá wù ji gbǝ̃ǝ̃ ǹ-da-mã bǝ̃ǝ̃dagǝ fiyãã diicĩɛ̃rǝdɩ nã, nã̀ã kã bá ba ywaruugɩ nã nǝ̃ Dũnnũ bluuba.

26 Musaẁ yáá wùu da wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wù yáá wù saa wú ywar nĩĩguu mãã, wù-lǝ wu-ń ywar gɩ̀-lǝ gɩ̀ tammã, gùú búɔlá nã ǹ-ɲǝ̃ǝ̃ wú da Misɩra yiɛ'n gbaasǝri.

Wù-lǝ wù saa, Dũnnũẁ mãã wù yáá wù ga pã-yǝ nǝ̃ gùú pãlli cicuɔgu, wù yáá wù ne dɩ̀-i.

27 Musaẁ hṹɔ̃lã́ Dũnnũ cɔ̃mmã, gùú cíé wù sáa sɔ̃ Misɩra yuuntigǝ̃ngã'n hyadũũgɩ nã nã̀ã hlǝ Misɩra yiɛgu.

Dũnnũw mãã curo'n sǝ̃n da-yǝ nǝ̃ wù yinɲã, wù-lǝ wù yáá wùu hiraa dɩ̀ dɩndɩ nã nã́ã́ wu yáá dàa wù da Dũnnũw nǝ̃ wù yinɲã-i.

28 Musa Dũnnũ cɔ̃m'n hũɔ̃m yo mã̀ã́ cɔ̃mmã nã-i wú ce Isɩrayɛl bluubá ce Ta-n-maa paaruugu nã̀ã ce bá mɛ̃sã twammã ǹ-tũn bà don'n bɩmbãnĩɛ̃ga nã.

Nĩĩgɩ-i kúú'n mɛlɛgɛẁ sáa jĩɛ̃ Isɩrayɛl bluu'n byanãdĩɛ̃lããba nã.

29 Isɩrayɛl bluubà hṹɔ̃lã́ Dũnnũ cɔ̃mmã, gùú cíé bá huɔl Baabũmbɛ̃m'n hũmmã nã́ã́ bá ta hlɔ̃nkuulam'n drɔ-i, nǝ̃ Misɩra yiɛntaabà gáa wa bá huɔl-yǝ, hũmmã́ wuu-ba.

30 Isɩrayɛl bluubà mãã bà yáá bàa hũɔ̃ Dũnnũ cɔ̃mmã, gùú cíé bà gáa wáà ǹ-cinĩĩ Seriko lǝri bãn nɩrhǝ̃ǝ̃l kusuugɩ nã, dɩ̀ dofũũlɩ́ duruu,

31 Arhabɩẁ yáá cijaldiɛ-i wùú mãã wù suur wù hla wù hã bibyanããba.

Wù jáa hũɔ̃ Dũnnũ cɔ̃mmã gùú nã mãã, wú hũɔ̃ ǹ-mǝ̃gaa ǹ-hyar Isɩrayɛl bluubà yáá bàa tĩɛ̃ gùú cwaabaa mãã wà bá kãã ŋmã ǹ-dǝ̃́ǝ̃̀ bà lǝri.

Gùú cíé wù-lǝ sáa ku nǝ̃ wù yiɛntaabaa mãã bà sáá bàa hũɔ̃ Dũnnũ cɔ̃mmã.

32 Mǝ̃n ji waa hadi ǹ-pya nã hlo?

Mǝ̃̀ síì da gbaagu ǹ-ba mǝ̃̀ ji waa Gedeyonba nǝ̃ Barakɩw nǝ̃ Samsɔ̃w nǝ̃ Sɛfɩtew nǝ̃ Dawudaw nǝ̃ Samiyɛlba nǝ̃ Dũnnũ tanhiilaa'n cɔ̃mmã.

33 Gɩ̀-lǝ gɩ̀ cwaaba, bà hũɔ̃m'n cɔ̃mmã nã, bá gbǝ̃ǝ̃ ǹ-ce byaari nǝ̃ yuntaagǝ̃ngĩɛ̃ba nǝ̃ bà yankɩnkaniɛga ǹ-gbǝ̃ǝ̃ bà nã, nã̀ã kra sũɔ̃lɩmmã nã.

Dũnnũẁ plã wù nũɔ̃gu dìí nã mãã, bà díɛ́-dǝ.

Bà súulǝ́ jaraba nɔ̃nɲã nã,

34 ǹ-hi dǝ̃ǝ̃mã nã ǹ-dĩĩ-mã, bàá mãã bà yáá bà caa bá ko-ba nǝ̃ dãngunãba, bá tar ǹ-hlǝ bà nãkrɔnɲã nã.

Bà dúrúu hlɔmmã nã, nã̀ã ji suro ǹ-ba nǝ̃ kɩkǝmmã.

Bà yáá byarcekũnkonbliɛ-i, byarcebǝ̃ǝ̃gu, bà cíé byaari nǝ̃ hyagbǝ̃ngbãndi ǹ-ɲǝ̃ǝ̃ ǹ-tĩɛ̃ niɛriɛ'n sɩrǝǝsɩba.

35 Canããdaabà hṹɔ̃lã́ Dũnnũ cɔ̃mmã, gùú cíé bá da bà cwaabaa nǝ̃n yáá bàa kurǝǝ, Dũnnũẁ ya pĩĩ ǹ-hiil-ba kuugɩ nã.

Bibyanããdaabà hṹɔ̃lã́ bá piɛ nũɔ̃sǝn ywaruugu bà drɔ.

Bà sáa ya bá hiil-ba bà nãkrɔnɲã nã.

Sulammã nã, bà-lǝ bà saa, ba nã́ã̀ bàa kurǝǝ nǝ̃ Dũnnũẃ pĩĩ ǹ-hiil-ba kuugɩ nã, ǹ-da ǹ-da nũmǝ̃nãsǝrii mãã fɩraa, gùú yáá gùu buɔ nã.

36 Badaabà hṹɔ̃lã́ bá hiil bà kwãmmã nã nã̀ã mũũ-ba nǝ̃ cãmblɩri, nǝ̃ badaa-lǝ, bá vaa-ba nǝ̃ jɔrgɔba ǹ-kãã nǝ̃ǝ̃ ǹ-dii-ba kasoduugɩ nã.

37 Bà nǝ̃́ǝ̃lã́ ǹ-ko badaaba nǝ̃ tɩntrãga yindagǝ nã bá sĩɛ̃gã ǹ-bǝr-ba blaga hǝ̃nhǝ̃lga, nã̀ã ko badaaba nǝ̃ dãngunãba.

Badaabà yáá ba-ń ce bá dii tũmãm'n cãlũnɲã-i yindagǝ nã wuram'n ɲinɲã ǹ-ba bà waaraa.

Bà sáá nǝ̃ kuu.

Cwaabà cúɔlá-ba, nã̀ã piɛ ywaruugu bà drɔ.

38 Cwaa báàbà yáá bàa fa ǹ-maa cuu wáàw, cuu wáà sáa wù saa wú da-ba!

Bà yáá bà waaraa jerkwiɛga nã nǝ̃ tãnsǝrɩ nã.

Bà yáá bà cɔ tãnfliɛga nã, nǝ̃ fosǝrɩ nã.

39 Cwaa báàbà min, Dũnnũẁ bíé bà yirfɩnfaari bà hũɔ̃m'n cɔ̃mmã nã, nǝ̃ Dũnnũẁ yáá wùu pã wù nũɔ̃gu nǝ̃-ba dìí nã mãã, dɩ̀ sáa ji ce bà yinɲã nã.

40 Sulammã nã, Dũnnũẁ yáá wùu blǝ cɔ̃mdamã ǹ-kra, mã̀ã́ mãã nũɔ̃sǝn cɔ̃mmã ǹ-ɲǝ̃ǝ̃ mã̀ min ǹ-kra ǹ-cii-yáà.

Gùú cíé bà cɔ̃mmã̀ sáa mã̀ ji gbǝ̃ǝ̃ ǹ-jalliɛ nã́ã́ yì nũɔ̃gɩ sáa ba mã̀ nã.