Hebruba 10

Gùú ɲinhuhoranɲãã mãã drɔgu, Musa hlũũgɩ sǝ̃n pɩgaa ɲã̀ã́ sǝ dugudugu.

Nǝ̃ gùú ɲinfɩnfanɲãã mãã ɲã̀ ga jo, gɩ̀ cíé ɲã̀ã́ yuur-i.

Gùú siim'n plaaga nǝ̃n yáá gà jãn pyandiɛ blɩ wo blɩ, Musa hlũũgùu kra gà nã, gà sáa gbǝ̃ǝ̃ ǹ-ce bà min mãã bà kuganãã Dũnnũ nã bà bũũ-yǝ, bà cɔ̃mmã́ jalliɛ ǹ-da.

2 Siim mã́ã̀, mã nã́ã̀ ba mã̀ ji gbǝ̃ǝ̃ ǹ-per curow nã, yin dɩnw, wù sáá wù ji da wù hla diicĩɛ̃rǝntii hlo, wu nã́ã̀ yaala siim'n jãnɩmmã́ ba.

3 Nǝ̃ gɩ̀-i nnĩĩ, mã̀ ce cwaabá ba bà kãnãã bà gaacĩɛ̃ya'n cɔ̃mmã nã blɩ wo blɩ.

4 Sulammã nã, niibliɛ'n twammã nǝ̃ siibonãã'n twammã̀ síì gbǝ̃ǝ̃ ǹ-pyar cwaa'n gaacĩɛ̃yaga ǹ-da.

5 Gùú cɔ̃mmã-i Kɩrsaẁ gáa ba wù jo cuuw nã gùú nã, wú waa nǝ̃ Dũnnũw wà: «Ǹ wáalà ǹ sǝ̃n caa kwasǝnkuu'n siim, ǹ sáa hũɔ̃ cwaaba bũũ-n nǝ̃ kuudagǝ.

Nǝ̃ ǹ mlã mǝ̃n cãnkũɔ̃mã.

6 Siimãã mãã bà ye-mã nǝ̃ yellɩ nã, nǝ̃ mã̀ã́ mãã bà jãn-mã ǹ-ce gaacĩɛ̃ya'n dũndɔw, mã̀-lǝ mã̀ min nã, mã̀ dɩn yo mã̀ sáa dwal ǹ nã.

7 Gùú sùɔ́gɩ-i, Yesuẃ fǝ̃ǝ̃ ǹ-waa wà: “Dũnnũ!

Mã́ã-i nnĩĩ, mǝ̃̀ jo mǝ̃̀ ji ce ǹ kusunã cɔ̃mmã, nã́ã́ dɩ̀ yállá mǝ̃̀ cɔ̃mmã nã nĩĩguu mãã sɛbɛw nã.”»

8 Wú dĩɛ̃l ǹ waa wà: «Ǹ sǝ̃n caa bá jãn-n nǝ̃ siim, yindagǝ nã ǹ-bũũ-n nǝ̃ kuu, yindagǝ nã ǹ-jãn-n nǝ̃ siimãã mãã bà ye-mã nǝ̃ yellɩ nã, yindagǝ nã mã̀ã́ mãã mã̀ ce gaacĩɛ̃ya'n dũndɔw, wà mã̀-lǝ mã̀ min mã́ sǝ̃n dwal ǹ nã.»

Nǝ̃ gɩ̀ siimã̀ jã́nnã́ ǹ-vaa nǝ̃ Musa hlũũguu mãã gɩ̀ waa dìi!

9 Nã̀ã ga fǝ̃ǝ̃ ǹ-waa dɩ̀-lǝ dɩ̀ furũũgɩ nã wà: «Mã́ã-i nnĩĩ, mǝ̃̀ jo mǝ̃̀ ji ce ǹ kusunã cɔ̃mmã.»

Kɩrsaẁ hyárrá haasǝ siimã nnĩĩ-i, ǹ-da ǹ-kra mã̀ hǝ̃ǝ̃lnãw nã mãã wù jã́nnã́-mã nǝ̃ wù hla'n cãnkũɔ̃mã.

10 Yesu Kɩrsaẁ cíé Dũnnũ kusunã cɔ̃mmã.

Wù cíé bá jãn wùú nǝ̃ wù hla nǝ̃ siimã ǹ-hã Dũnnũw yindiingu gbɩla.

Wù pérrá yì nã nnĩĩ-i ǹ-hiil-yáà diicĩɛ̃rǝdɩ nã.

11 Yuu wo yuu Yahudyaba puruɔntii wo Yahudyaba puruɔntiiẁ yáá hirammã nã wù mããcemmã nã, ǹ-da ba wù jãn gùú siim'n plǝr dɩndɩndɩ-i wù hã Dũnnũw.

Nǝ̃ gɩ̀ siimã̀ síì gbǝ̃ǝ̃ ǹ-pyar diicĩɛ̃rǝdii curo'n yuunã ǹ-da.

12 Nǝ̃ Kɩrsa-lǝ, wù júó ǹ-ji jãn siimã dɩnmã-i ǹ-hã Dũnnũw, cwaa'n gaacĩɛ̃ya'n cɔ̃mmã nã.

Gùú siimã dɩnmã-i dìɛ pyandiɛ.

Dɩ̀-lǝ dɩ̀ furũũgɩ nã, wú ta ǹ-kãã jiraa Dũnnũ nãdĩĩyiɛgu.

13 Yindiɛ, wù fennãã Dũnnũw nã gùú sùɔ́gɩ-i, fuwɔ wú ji guur wù ɲããtaaba, ǹ-ce-ba vyapiɛkuugu ǹ-hã-yǝ.

14 Wù mãã wù per bàá nã mãã, wù cíé bà cɔ̃mmã́ jalliɛ nĩĩgɩ-i nǝ̃ siimã dɩndɩn mã́ã̀.

15 Dũnnũ Yuflǝw yo wù waa dɩ̀-i wà:

16 «Cuutiiẁ wáalá wà wu mãã wù ji ce gùú twanɲũɔ̃gǝguu mãã nǝ̃ wù bluuba gɩ̀-lǝ gɩ̀ furũũgɩ nã, wà wu ji dii wù hlũũ'n cɔ̃mmã bà hiɛga nã, nã̀ã yal ǹ-dii-mã bà yunɲã nã.»

17 Cuutiiẁ gáa wanãã nnĩĩ nã, wú ver ǹ-waa hlo wà: «Mǝ̃̀ síì dii bà gaacĩɛ̃ya'n cɔ̃mmã mǝ̃̀ hiɛga nã, yindagǝ nã bà cíé gùú gaabɩbliɛgaa mãã.»

18 Yindiɛ, Dũnnũw-ń ba wù cíé yì gaacĩɛ̃ya'n dũndɔw ǹ-tã, gɩ̀ sɩriɛ wà yi ga jo nǝ̃ kuudagǝ ǹ-ji bũũ-yǝ nǝ̃ wú da ǹ-ce yì gaacĩɛ̃ya'n dũndɔw.

Jówà yí hiraa Dũnnũ cãwandɩ nã

19 Gɩ̀ sùɔ́gɩ nã, mã́ã cwanãã, Yesuẁ kúú ǹ-tũnũũ wù twammã nã, ǹ-jãn gùú siimãã mãã, mã̀-lǝ mã̀ã́ hlã-yáà nǝ̃ hlũũgu, yi ba yi ji gbǝ̃ǝ̃ ǹ-jãn Dũnnũ nũɔ̃sǝn sùɔ́gɩ nã.

20 Wù cíɛlá hlũflĩɛ̃ ǹ-hã-yáà, gùú mãã nũmǝ̃nãsǝ'n kuugu, gùu ta ǹ-hlǝ kuulaa mãã bà yáá bàa nũũ-yǝ ǹ-buruɔ Dũnnũ bũũkuɔl'n kusuugɩ nã; gɩ̀-lǝ gùu kuulaaw-i wù hla'n cãndi.

21 Wù-lǝ wɩ̀-i ya jiraa Dũnnũ suɔ'n yuugɩ nã, ǹ-ba Dũnnũ puruɔntaa'n yuuntigǝ̃ngãw.

22 Dɩ̀ mãã gɩ̀-lǝ gɩ̀ tammã, yáà yí mǝ̃gaa yí piɛ yì nãkruɔgu Yesu Kɩrsaw drɔ.

Yáà yí kuganãã Dũnnũw nã nǝ̃ kusuugɩ dɩngu.

Nã̀ã wa Yesuẁ sáará ǹ-hiil cɔ̃mbɩblammã min yì kusunɲã nã, nã̀ã ca yì nã nǝ̃ hũmmãã mãã lɩgǝlɩgǝ, mã̀ sǝ mã̀ã gaala nã nǝ̃ kuu.

23 Yi mãã yìi piɛ yì nãkruɔgu dìí nã mãã, nã̀ã ba yì haa yì nɔ̃nɲã yì waa-dǝ, yáà yí hiraa dìí nã-i kwelle.

Nã̀ã wa wùú mãã wù plã wù nũɔ̃gu nǝ̃-yáà yalntii-i nǝ̃-yǝ.

24 Yáà yí fǝ̃ǝ̃ yí blǝ yì ɲĩɛ̃, yí ba yì dii dɔ̃mmã yì ɲĩɛ̃ nã wà yì nãcuro'n cɔ̃mmã̀ saa mã́ dwal yì nã, nǝ̃ yí vaa yì hla nã diifɩnfar'n cellɩ nã.

25 Bláá ya yí ba yì ver yì tɩgim'n sɔsiɛga nã, nã́ã́ badaabà mĩ́ɛ̃lã́ nǝ̃-dǝ nĩĩguu mãã.

Ɲi mãã dìɛ ɲì da wà Yitii'n jol'n yuugɩ píɛlá nã, mǝ̃́garà ɲí kã nǝ̃ yiga ɲì ba ɲì dii dɔ̃mmã ɲì ɲĩɛ̃ nã.

26 Yi mãã yi jáa fǝ̃ǝ̃ sulammã, yi-ń fǝ̃ǝ̃ nã̀ã hla, nã̀ã gbǝ̃ǝ̃ nǝ̃ gaacĩɛ̃ya'n celli, siim'n sɩriɛ mã̀ã́ mãã mã̀ ji pyar yì gaacĩɛ̃yaga.

27 Gɩ̀ yanãã yí ba yì ɲãnãã yì fennãã Dũnnũ sugollɩ nã-i nǝ̃ dǝ̃ǝ̃mãã mãã mã̀ ji hyã Dũnnũ ɲããtaaba.

28 Fufodii, curo wo curo mãã wù yáá wu-ń nǝ̃nǝ̃ǝ̃ Musa hlũũgɩ nã, nǝ̃ cwaaba hǝ̃ǝ̃l yindagǝ nã cwaaba siɛl bá da-yǝ nã̀ã waa dɩ̀ sulammã, gɩ̀-lǝ gɩ̀ nã, gɩ̀ sɩraa nǝ̃ hujãn'n cɔ̃m, bà yáá ba-ń ce bá ko gɩ̀ tiiw.

29 Musa hlũũ'n dǝllɩ-ń ba gɩ̀-lǝ gɩ̀ tammã, gùú tii nǝ̃n ba wù diɛ Dũnnũ Bíɛ́w, yindagǝ nã gùú tii nǝ̃n ba wù ne wù twammãã mãã mã̀ yúɔ́-yáà nǝ̃ Dũnnũw nã̀ã per yì nã, mã́ ce mǝ̃ǝ̃lǝ̃ǝ̃kuu, yindagǝ nã ǹ-ba wù diɛ Dũnnũ Yuflǝw, wù-lǝ wù mãã wù ga da gùú ywaruuguu mãã, ɲã̀ sɩga fi ɲã̀ ɲĩɛ̃ nǝ̃ wùú mãã wù nǝ̃́nǝ̃́ǝ̃ Musa hlũũgɩ nã wù kuugu.

30 Sulammã nã, yi fǝ̃ǝ̃ wùú mãã wù wáalá wà: «Mǝ̃n-lǝ mã́ã ji pã cobaliɛ'n gaabɩbliɛga ǹ-hã-ba, nã̀ã pã curo wo curo ǹ-vaa nǝ̃ wù diicerǝdi».

Nã̀ã waa hlo wà: «Mǝ̃̀ ji jar mǝ̃̀ bluu'n sugolli.»

31 Dũnnũw mãã nũmǝ̃nãw, wù sugollɩ-ń duruu yíi mãã ǹ drɔ, ǹ ywaruugɩ̀ síì jãn duu.

32 Kã́nã̀ã ɲí ne gùú yunɲã nã mãã ɲi jã́nnã́ Dũnnũ gbɩgbaamã nã, nã̀ã du narɩmmã nã ywaruugǝ̃ngããgu kusunã, ɲi gbǝ̃́ǝ̃lã́ ǹ-hũɔ̃ gɩ̀-lǝ gɩ̀ min.

33 Ɲì sǝ̃ǝ̃nã, bà túuráa badaaba nã, nã̀ã blǝ ǹ-ga ce-ba nǝ̃ guraagu cwaa'n yinɲã nã.

Nǝ̃ gɩ̀ ywaruugɩ̀ yáá gɩ-ń hi bàá mãã, ɲí hla nã̀ã ɲǝ̃gãr bà nã.

34 Sulammã nã, bà díilá bàá mãã kasoduugɩ nã, ɲi kã́ã́ ɲí hũɔ̃ ywaruugu ɲì min nǝ̃-ba.

Bà gáa hũɔ̃ ɲì nãkruɔɲinɲã gùú nã mãã, ɲi sáa ya gɩ́ ba nǝ̃ cɔ̃m ɲì saa, nǝ̃ dudwalɩmmãã yáá ɲì nã wà ɲi mãã ɲì fǝ̃́ǝ̃lã́ wà ɲi ji da gbaasǝrii mãã fɩraa dǝlli.

35 Ɲi mãã ɲĩ̀ĩ piɛ ɲì nãkruɔgu dìí nã mãã, bláá pyar-gǝ dɩ̀ nã, ɲi ji da nũɔ̃sǝn pãl dɩ̀ kusuugɩ nã.

36 Ɲi saa ɲí suro ǹ-hiraa vyanɲã hǝ̃ǝ̃l ǹ-vaa ɲì hla ǹ-da ǹ-ce Dũnnũ kusunã cɔ̃mmã.

Nĩĩgɩ-i, Dũnnũẁ plã wù nũɔ̃gu nǝ̃-ɲã́ã̀ dìí nã mãã, ɲi ji da-dǝ.

37 Nã̀ã wa: «Wùú mãã dàa wù jo, gɩ̀ síì hǝ̃ǝ̃sǝ nǝ̃ wú hi wù gbɩraanã.

38 Mǝ̃n ne gùú tii mãã wú ba cosũɔ̃lyǝw wù ji ba nũmǝ̃nãw wù hũɔ̃m'n cɔ̃m nã-i, nǝ̃ wu-ń ver nǝ̃ furũũgu, wù cɔ̃mmã̀ síì dwal mǝ̃̀ nã».

39 Nǝ̃ hãmĩĩ-lǝ, yi sǝ nã́ã́ bàá mãã bà hla nã̀ã ver nǝ̃ furũũgu ǹ-ba bà maar dǝ̃ǝ̃mã nã bà ga hyã cicuɔgu.

Nǝ̃ yi nǝ̃ nã́ã́ bàá mãã bàa hũɔ̃ Dũnnũ cɔ̃mmã ǹ-da ǹ-da korɩmmã.