Hebruba 9

Twanɲũɔ̃cũncuruɔgu nǝ̃ twanɲũɔ̃flĩɛ̃'n cɔ̃mmã

Twanɲũɔ̃cũncuruɔ'n bǝ̃ǝ̃gɩ̀ yáá nǝ̃ gɩ̀ hlũsǝri, dìí mãã dɩ̀ yáá dɩ̀ pɩgaa cwaaba nǝ̃ Dũnnũ bũũm'n tammã.

Nǝ̃ Dũnnũ sùɔ́ yo gɩ̀ yáá dàa bàa ce-gǝ, gɩ́ ba gɩ̀ dǝ, ǹ-ba bà bũũ Dũnnũw.

2 Sulammã nã, bà yáá bàa nǝ̃ǝ̃ Dũnnũ bũũkuɔli, ǹ-buruɔ dɩ̀ nã ǹ-ce-dǝ nǝ̃ kusunɲã hǝ̃ǝ̃lɲã.

Bà yáá bà be guudĩɛ̃lããgu wà Dũnnũ sùɔ́.

Burw mãã bàa kra wù nã wù dǝ ǹ-hã Dũnnũw, bà mãã bà kra wù nã gùú tabalw drɔ, nǝ̃ fitɩnɩba kwalli, bà yáá bà kra ɲã̀ nã gùú sùɔ́gɩ-i.

3 Kuulanãmba hǝ̃ǝ̃lnãẁ yáá dàa wùu buruɔ Dũnnũ bũũkuɔl'n kusuugɩ nã tiɛmã hǝ̃ǝ̃lmã.

Dũnnũ nũɔ̃sǝn sùɔ́gɩ̀ yáá dàa gɩ̀-lǝ gɩ̀ kuulaa furũnyiɛgu.

4 Kuuguu mãã bà tii wusunããw gɩ̀ drɔ, gɩ̀ yáá dàa, bàa ce-gǝ nǝ̃ sãnãw.

Twanɲũɔ̃kuruu yo, gɩ̀ yáá dàa bàa ce sãnãw ǹ-suu gɩ̀ sɔsǝri min nã.

Gɩ̀-lǝ gɩ̀ kuruugu kusunã, sãnã gaagɩ̀ yáá dàa mãnw gɩ̀ kusunã, nǝ̃ Arɩnã valblɩri, dìi pa gbarnããba nǝ̃ tɩntãnyanɲãã mãã Dũnnũ hlũũ'n nǝ̃ǝ̃yaga ɲã̀ drɔ.

5 Bà yáá bàa ce ɲindan nã́ã́ mɛlɛgɛbaa mãã bà be-ba wà serɩbɛ̃ba, kuruu gúɔ́ drɔ, bà pɩgaa Dũnnũ yuuntasǝ'n gbɩgbaamã, nã̀ã ba bà pɩgaa wà Dũnnũẃ nàa.

Bà tãmpɩrãnɲã̀ yáá ɲã̀ã curuɔ ǹ-suu, kuuguu mãã bà tũn twammã gɩ̀ nã ǹ-da ǹ-pyar cwaa'n gaacĩɛ̃yaga.

Nǝ̃ yi síì gbǝ̃ǝ̃ ǹ-waa ǹ-follaa gɩ̀-lǝ gɩ̀ ɲinɲã min cɔ̃mmã nã kuɔkuɔgu.

6 Dũnnũ bũũkuɔl díɛ̀ nǝ̃ dɩ̀ kusunãɲinɲã min ɲã̀ yáá krammã nã nnĩĩ-i.

Bǝ̃ǝ̃ wo bǝ̃ǝ̃ Yahudyaba puruɔntaabà yáá bà jãn dɩ̀ kusudĩɛ̃lããgɩ nã bà ce bà mããcemmã.

7 Nǝ̃ gɩ̀ kusunɲã hǝ̃ǝ̃lnã-lǝ, Yahudyaba puruɔntaa'n yuuntigǝ̃ngãw dɩn yáá wù da wù jãn gɩ̀ nã, yindiin blɩ'n kusuugɩ nã.

Nǝ̃ wùú yo wù sáá wù ji gbǝ̃ǝ̃ ǹ-jãn nã́ã̀ wu sáa tuu kwasǝnkuudagǝ twammã wù nãkruɔgɩ nã.

Wù yáá wù kã nǝ̃ gùú twammã-i ǹ-ga ce wù gaacĩɛ̃ya'n dũndɔw nǝ̃ gùú gaacĩɛ̃yagaa mãã cwaabà sáa fǝ̃ǝ̃ nã̀ã ce-ga.

8 Gɩ̀ sùɔ́gɩ nã, Dũnnũ Yuflǝẁ pɩgaa wù ja-yáà wà Dũnnũ bũũkuɔldĩɛ̃lããdɩ-ń ba dìɛ yugo yugo, hlũũgɩ̀ síì ciɛl curo'n saa kuɔkuɔ wú ba wù ji jãn Dũnnũ nũɔ̃sǝn sùɔ́gɩ nã.

9 Gɩ̀ cɔ̃mmã̀ pɩgaa kuɔkuɔ cɔ̃m-i.

Mã̀ pɩgaa wà yi mãã yì bũũ Dũnnũw nǝ̃ gùú ɲinɲã, nã̀ã ba yì jãn-yǝ gùú siimãã mãã, curo wo curo mãã wù wáà gɩ̀ hlũũgu, ɲã̀ síì gbǝ̃ǝ̃ ǹ-ce wù hiɛga pesǝ.

10 Gɩ̀ hlũũ'n ɲinɲã̀ yáá ɲããwuun-i, ɲãdaɲã́ ba ɲããɲũɔ̃nɲã nǝ̃ cwaabà yáá bà ca hũmmã gùú tammã, bà per bà hla nã.

Bà yáá bà wáà gɩ̀ hlũũgu guurɩmmã-i fuwɔ ǹ-juo hi gùú bǝ̃ǝ̃guu mãã Dũnnũ yáá ji veraa cɔ̃mmã min nã.

11 Nǝ̃ yindiɛ, Kɩrsaẁ júó ǹ-ji ba Dũnnũ puruɔntaa'n yuuntigǝ̃ngãw ǹ-tã, ǹ-da ǹ-hã-yáà nǝ̃ ɲinhuhoranɲãã mãã yì ji da-ɲã.

Wù mãã wù jã́nnã́ ǹ-hlǝ gùú Dũnnũ bũũkuɔli kusunã, dɩ́ nǝ̃ dìi bũũ nã̀ã ba dìi jalliɛ, cwaa'n nãkrɔn sáa sa-dǝ, dɩ̀ yuugɩ-i wà cuu wáà dǝl sǝ.

12 Nǝ̃ Kɩrsa jãnɩmmã nã Dũnnũ nũɔ̃sǝn sùɔ́gɩ nã, wù sáa jãn nǝ̃ siibu twam, yindagǝ nã nǝ̃ǝ̃bii'n twam, nǝ̃ wù jã́nnã́ nǝ̃ wù hla'n twammã-i yindiingu dɩn, ǹ-sǝ̃ǝ̃ ǹ-hiil-yáà yì gaabɩbliɛga nã fɩraa.

13 Haasǝgu, bàá nǝ̃n yáá ba-ń blǝ nã Dũnnũ hlũũgɩ nã, ba-ń ce bá ce siibu twammã, niibliɛ'n twammã nã̀ã hyã nǝ̃ǝ̃ nǝ̃nũɔ̃nw ǹ-ce wù cuugɩ ǹ-mɛ̃sã ǹ-tũn bà nã, ǹ-da ǹ-per bà nã.

14 Nǝ̃ dɩ-ń ba gɩ̀-lǝ gɩ̀ tammã, gɩ́ ba nã́ã́ Kɩrsa twam'n fãngããgɩ sáa maa gɩ̀-lǝ gɩ̀ ɲinɲã-i?

Dũnnũ Yuflǝw fãngããguu mãã fɩraa gùú cíé Kɩrsaw mãã wù sǝ nǝ̃ yuɔrɔmmã, wú ce wù hla siimãã ǹ-hã Dũnnũw nǝ̃ wù twammã, ǹ-da ǹ-per ǹ-hiil dɩgaa'n gaaciega yì yunɲã nã.

Gɩ̀-lǝ gùú ji ce yí da ǹ-ba yì ce mããcemmã yì hã Dũnnũw mãã nũmǝ̃nãw.

15 Gùú cíé, Dũnnũẁ cíé yí ɲũɔ̃ gùú twanflãmmãã mãã nǝ̃-yǝ, Kɩrsaẃ ba yɔtiiw hãmĩĩ nǝ̃ Dũnnũ sǝ̃ǝ̃gɩ nã.

Cwaabà cíé gùú gaacĩɛ̃yagaa mãã twanɲũɔ̃dĩɛ̃lãã'n bǝ̃ǝ̃gu, wù kúú ǹ-da ǹ-sǝ̃ǝ̃ ǹ-hiil-ba bà gaacĩɛ̃yaga nã.

Gɩ̀-lǝ gɩ̀ nã, Dũnnũẁ bíé bàá mãã ǹ-pã wù nũɔ̃gu wà ba ga tuu sùɔ́gu mãã fɩraa kuugu, bá da ǹ-da yuɔr gɩ̀ nã.

16 Curow-ń wa wú ji ku, wù mãã wù haa wù nũɔ̃gu ǹ-waa cɔ̃m wo cɔ̃m, wu-ń ba wù sáa ji ku sǝ, gɩ̀ cãwanĩɛ̃gà sǝ̃n ba guɔ nã.

17 Nǝ̃ gɩ̀ tiiw-ń ba nũmǝ̃nã-lǝ, wù cãwandɩ̀ sǝ̃n ba cɔ̃m nã, nǝ̃ wu-ń ji ku, bà wáà gùú cãwandi drɔ-i.

18 Gùú cíé Dũnnũ wáalá wú ce bá dĩɛ̃l ǹ-ɲũɔ̃ twammã nǝ̃ cwaaba gùú nã mãã, gɩ̀-lǝ gɩ̀ sáa ce nã́ã́ kwasǝnkuu'n twammã sáa tũnũũ.

19 Fufodii Dũnnũ yáá wùu pɩgaa wù hlũũgɩ minw mãã ǹ-ja Musaw, wù túú-gǝ ǹ-ja cwaaba haasǝ, nã̀ã ga fǝ̃ǝ̃ ǹ-tuu nǝ̃ǝ̃bii'n twammã nǝ̃ siibonãã'n twammã ǹ-gaala mã̀ nã nǝ̃ hũmmã, nã̀ã tuu isope tuugu ǹ-finǝ̃ǝ̃ kuulaabumbɛ̃mw gɩ̀ mlãrɩ nã ǹ-ɲĩɛ̃-gǝ mã̀ nã nã̀ã ba wù mɛ̃sã wù tũn hlũũ'n sɛbɛw nã, nǝ̃ cwaaba min nã,

20 wù waa wà: «Twam mã́ã̀ pɩ́garà wà Dũnnũ cíé ɲí ɲũɔ̃ twammã nǝ̃-yǝ.

Wù wáalá wà ɲí ba ɲì wáà gɩ̀ hlũũgu.»

21 Nã̀ã fǝ̃ǝ̃ mɛ̃sã twammã gùú tammã dɩnmã-i ǹ-tũn Dũnnũ bũũkuɔlɩ nã, nǝ̃ Dũnnũ bũũwariɛga min nã.

22 Sulammã nã, Musa hlũũgɩ nã, twammãã yáá mã̀ per ɲincindɩ min nã.

Dũnnũẁ sáá wù ce cwaa'n gaacĩɛ̃ya'n dũndɔ yo, nã́ã́ twammã̀ sáa tũnũũ.

23 Drɔɲinhuhorɩn'n yuriɛga-i nǝ̃ Dũnnũ bũũkuɔli nǝ̃ dɩ̀ kusunã ɲinɲã min.

Ba-ń ba bà per ɲã-lǝ ɲã̀ nã nnĩĩ tammã, drɔkuɔl'n ɲinɲãã nǝ̃ ɲã̀ hla, ɲã-lǝ ɲã̀ yáá ɲã̀ saa ɲã́ per nǝ̃ siimãã mãã mã̀ã maa kwasǝnɲin'n siimã.

24 Dũnnũ sùɔ́guu mãã cwaanbiibàa ce-gǝ ɲũũrũũgu níɛ́ nã, gɩ̀-lǝ Dũnnũ sɔhuhorgǝ'n yuur-i.

Gɩ̀ sáa ce nã́ã́ Kɩrsaẃ jã́nnã́ ɲũũrũũ kuu nã-i dɛ.

Nǝ̃ wù jã́nnã́ drɔkuɔl nã-i nǝ̃ dɩ̀ hla ǹ-kãã hiraa Dũnnũ yigagɩ nã yì suɔnãw.

25 Yahudyaba puruɔntaa'n yuuntigǝ̃ngãẁ yáá wu-ń ce wú ba wù jãn Dũnnũ nũɔ̃sǝn sùɔ́gɩ nã blɩ wo blɩ nǝ̃ kwasǝnkuu'n twammã.

Nǝ̃ Kɩrsa-lǝ, wù sáá ce bá jãn-yǝ nǝ̃ siimãã ǹ-gbãlãã sǝ.

26 Dɩ nã́ã̀ ba gɩ̀-lǝ gɩ̀ tammã, wu nã́ã̀ wùu da ywaruugu, ǹ-gbãlãã cuuw nǝ̃ǝ̃m'n bǝ̃ǝ̃gu dìi.

Nǝ̃ wù júó yindiingu gbɩla cuu tãl'n bǝ̃ǝ̃ gúɔ́ nã, ǹ-juo ce bá jãn-yǝ nǝ̃ siimã ǹ-hã Dũnnũw, ǹ-da pyar cwaa'n gaacĩɛ̃yaga bà yuunã fɩraa.

27 Curo wo curo, wù ji ku yin dɩndɩnw ǹ-kãã hiraa Dũnnũ yigagɩ nã, wú jar wù sugolli.

28 Kɩrsa yo wù cíé bá jãn-yǝ nǝ̃ siimã yindiingu nnĩĩ-i ǹ-hã Dũnnũẁ, ǹ-da ǹ-pyar cocin'n gaacĩɛ̃yaga bà yuunã.

Wù ga ver ǹ-jo yinhǝ̃ǝ̃lnã jolli, nǝ̃ gɩ̀-lǝ gɩ̀ nã, wù sɩga jo gaacĩɛ̃ya'n cɔ̃m nã sǝ, wù ga juo kor bàá mãã dìɛ bà fennãã wù nã-i.