Hebruba 8

Yesuw-i yì puruɔntaa'n yuuntigǝ̃ngãw

Yi mãã yì waa kuu wo kuu mãã nnĩĩ, dìí mãã nũɔ̃sǝn dǝlli, dɩ̀-i nnĩĩ: puruɔntaa'n yuuntigǝ̃ngã wáà tuugɩ-i hãmĩĩ saa.

Wù-lǝ wɩ̀-i Yesuw, wú nàa wùu jiraa Fãngããgɩmintii Dũnnũ yuuntasǝ'n guujirakuu'n nãdĩĩyiɛgu drɔkuɔlɩ nã.

2 Wù-lǝ wù ce wù mããcemmã Dũnnũ bũũkuɔlɩ nã-i Dũnnũ nũɔ̃sǝn sùɔ́gɩ nã.

Dɩ̀-lǝ dɩ̀-i diihuhordǝdi Dũnnũ suɔgu.

Gɩ̀ sǝ nã́ã́ cwaanbii cíé Dũnnũ bũũkuɔl díɛ̀, nǝ̃ Cuutiiw nǝ̃ wù hla, wù-lǝ wùú cíé-dǝ.

3 Bà kárrá Yahudyaba puruɔntaa'n yuntaagǝ̃ngĩɛ̃ba min nã, bá ba bà kã nǝ̃ ɲinɲãã bà bũũ Dũnnũw, nã̀ã ba jãn siimã bà hã-yǝ.

Gɩ̀ saa hãmĩĩ yo yì puruɔntaa'n yuuntigǝ̃ngã Yesu yo, wú da kuu, gùú mãã wù ji bũũ Dũnnũw nǝ̃-gǝ.

4 Wu nã́ã̀ ba dìɛ cuuw nã nhlíɛ̀, halle wù sáá wù ji ba Yahudyaba puruɔntii yo, nã̀ã wa Musa hlũũgɩ̀ kárrá Yahudyaba puruɔntaadaba nã ǹ-tã, bàá mãã bà bũũ Dũnnũw nǝ̃ ɲinɲã.

5 Bà mãã bà ce mããcem wo mããcem mãã Dũnnũ bũũkuɔlɩ nã, mã̀ pɩgaa dìí mãã dàa dɩ̀ ce Dũnnũ suɔgu drɔgu.

Dũnnũ suɔ'n yɩryɩrw nǝ̃ gɩ̀ yuuri-i nǝ̃ Dũnnũ kuɔli.

Gùú nã mãã Dũnnũ tanhiil Musaẁ yáá wù caa wú ce Dũnnũ kuɔli, Dũnnũẁ yáá wùu waa nǝ̃-yǝ wà: «Mǝ̃̀ wáalá-dǝ ǹ-ja-n gùú tuugu tãnũũgɩ nã, gbǝ̃ǝ̃ ń ce dɩ́ ba nĩĩgu».

6 Nǝ̃ yindiɛ, Kɩrsa mããcemmã̀ ta puruɔntaa'n mǝ̃gãmmã nã.

Nã̀ã wa Dũnnũẁ cíé wɩ̀-i yɔtiiw, cwaaba nǝ̃ wù-lǝ wù sǝ̃ǝ̃gɩ nã, ǹ-da ǹ-ce bá ɲũɔ̃ twanflãmmã, mã̀ã́ mãã mã̀ã maa haasǝ mǝ̃gãmmã.

Dũnnũẁ plã wù nũɔ̃gu dìí nã mãã, nǝ̃ twanflãm mã́ã̀mã́ ɲũɔ̃, dɩ̀ máalá haasǝ dǝlli.

7 Sulammã nã, gùú twanɲũɔ̃gǝguu nǝ̃n cíé dĩɛ̃lãmmã nã, gɩ nã́ã̀ ba gùu jalliɛ, yinhǝ̃ǝ̃lnã twanɲũɔ̃gǝgɩ̀ sáá gɩ̀ ji ba nǝ̃ yuu.

8 Nǝ̃ Dũnnũẁ díɛ́ wù bluu'n yuɔrɔmmã-i, wú nãlĩɛ̃ bà nã wà: «Mã́ã Fɩraa-Dũnnũ mǝ̃̀ wa yuugɩ́ nàa yuu nã, mǝ̃̀ ji ce yí ɲũɔ̃ twanflãmmã nǝ̃ Isɩrayɛl bluuba nǝ̃ Suuda bluuba.

9 Twanɲũɔ̃flĩɛ̃ gúɔ̀, gɩ̀ síì ba nã́ã̀ guucũncurɔguu mãã mǝ̃̀ cíé-gǝ nǝ̃ bà tǝvũnvãnããba gùú yuuguu mãã mǝ̃̀ blǝ́rá bà nãkruɔgu ǹ-hiil-ba Misɩra yiɛgu.

Bà mãã bà sáa ji hũɔ̃ blǝ gɩ̀ twanɲũɔ̃cɔ̃mmã, gùú cíé mã́ã yo mǝ̃́ ver mǝ̃̀ furũũgu ǹ-hã-ba.

Mã́ã Fɩraa-Dũnnũ mã́ã wáalá dɩ̀-lǝ.

10 Gɩ̀-lǝ gɩ̀ furũũgɩ nã, mǝ̃̀ ji ce yí ɲũɔ̃ twanflãmmã nǝ̃ Isɩrayɛl bluuba.

Mǝ̃̀ ji dii mǝ̃̀ hlũũ'n cɔ̃mmã bà yunɲã nã nǝ̃ bà hiɛga nã.

Mã́ã ji ba bà Dũnnũw nǝ̃ bà-lǝ bá ba mǝ̃̀ bluuba.

Fɩraa-Dũnnũ mã́ã wáalà dìí yo.

11 Gɩ̀-lǝ gɩ̀ nã, wudiɛ'n síì suro wà wu ji kal wù yiɛntii yindagǝ nã wù cwanĩĩ wà wu gbǝ̃ǝ̃ ǹ-fǝ̃ǝ̃ Cuutii.

Nã̀ã wa ǹ-tuu wuusaalw nã ǹ-ga kra wuugǝ̃ngãw nã, bà min bà ji fǝ̃ǝ̃-m.

12 Mǝ̃̀ ji ce bà gaabɩbliɛ'n dũndɔw, nã̀ã hiil bà gaacĩɛ̃ya'n cɔ̃mmã mǝ̃̀ yuugɩ nã.»

13 Ɲã-ń da Dũnnũẁ waa twanɲũɔ̃flĩɛ̃'n cɔ̃mmã nnĩĩw, gɩ̀ pɩgaa wà bá dĩ́ɛ̃lã́ ǹ-ce gùú twanɲũɔ̃gǝguu mãã, wà gɩ̀-lǝ guucũncurɔ-i.

Nǝ̃ gɩ̀-i nnĩĩ, kuugɩ̀ mãã gɩ-ń ji vǝ̃ǝ̃ ǹ-ba guucũncurɔgu, gɩ̀ maar vaalam-i.