Hebruba 7

Dũnnũ puruɔntii Mɛlkisɩdɛkɩ cɔ̃mmã

Mɛlkisɩdɛkɩ wáà yáá Salɛm lǝ'n mũɔ̃ri-i, nã̀ã ver ǹ-ba Drɔ-Dũnnũ puruɔntiiw.

Gùú nã mãã Ibramãẁ yáá wùu kãã ce byaari nǝ̃ mũɔ̃rããdaba ǹ-gbǝ̃ǝ̃ bà nã, wù verɩmmã nã, Mɛlkisɩdɛkɩẃ kãã jǝ̃ǝ̃lǝ̃ǝ̃ wù nã, nã̀ã cirǝ̃ǝ̃ Dũnnũw nã wà wú piɛ wù nãkrɔfɩnfaagu wù drɔ.

2 Ibramãẁ yáá nǝ̃ kuu wo kuu mãã, wù híilá gɩ̀ jagaw ǹ-hã Mɛlkisɩdɛkɩw-i.

Mɛlkisɩdɛkɩ yuugɩ-i wà «Sũɔ̃lɩm'n mũɔ̃riw».

Ǹ-pya dɩ̀-lǝ dɩ̀ nã, wù-lǝ wɩ̀-i Salɛm lǝ'n mũɔ̃riw, dɩ̀ yuugɩ-i wà «Sɩsɩrãm'n yuuntii».

3 Dũnnũ cãwan'n sɛbɛw nã, wù tǝ cɔ̃mmã̀ sáa waa sùɔ́ nã, wù ɲũ cɔ̃mmã̀ sáa waa sùɔ́ nã, wù nũɔ̃ntaa'n cɔ̃m yo mã̀ sáa waa sùɔ́ nã.

Wù huum'n cɔ̃mmã nǝ̃ wù kúúcɔ̃mmã̀ sáa waa sùɔ́ nã.

Wù mãã puruɔntasǝrɩ nã fɩraa, wù hieliw-i nǝ̃ Dũnnũ Bíɛ́w.

4 Ɲi sáa da?

Sulammã nã, Mɛlkisɩdɛkɩẁ yáá nũɔ̃sǝn curo-i.

Ibramãw nǝ̃ wù hla, wùú mãã hãmĩĩ tǝvũnvũɔ̃w, ɲinɲã minw mãã wù díɛ́-ɲã byarcesuɔgɩ nã, wù híilá ɲã̀ jagaw ǹ-hã Mɛlkisɩdɛkɩw-i.

5 Nǝ̃ Dũnnũ puruɔntasǝrɩ̀ mãã dɩ̀ yáá dìi vĩĩ Levi nũɔ̃ntaaba, gùú yáá gùu ce Musa hlũũgɩ nã, bá da hlũũgu ǹ-ba bà hũɔ̃ jagaw bà bluuba min saa.

Bà-lǝ bà-i Isɩrayɛl bluuba.

Nã̀ã da bàá yo Ibramã furũntaa yáá.

6 Levi nũɔ̃ntii sǝ nǝ̃ Mɛlkisɩdɛkɩw.

Nǝ̃ Ibramã híilá wù ɲin'n jagaw ǹ-hã wɩ̀-i.

Ǹ-pya dɩ̀-lǝ dɩ̀ nã, Ibramãw mãã Dũnnũẁ plã wù nũɔ̃gu nǝ̃-yǝ, Mɛlkisɩdɛkɩẃ cirǝ̃ǝ̃ Dũnnũw nã wa wú piɛ wù nãkrɔfɩnfaagu wù drɔ.

7 Nǝ̃ dìí mãã cincaruugɩ sǝ dɩ̀ nã, dɩ̀-i nnĩĩ: wùú mãã wù ta nã, wù-lǝ wùú círǝ̃̀ǝ̃ Dũnnũw nã wa wú piɛ wù nãkrɔfɩnfaagu wuusaalaaw nã.

8 Levi nũɔ̃ntaabaa mãã bà hũɔ̃ jagaw, bà kurǝǝ kurǝǝ.

Nǝ̃ nhlíɛ̀ba, wùú nǝ̃n hṹɔ̃lã́ jagaw Ibramãw saa, Dũnnũ cãwandɩ̀ wáalá-dǝ gbaa wà wu nǝ̃ nũmǝ̃nã.

9 Levi nũɔ̃ntaabaa hṹɔ̃lã̀ jagaw.

Nǝ̃ Ibramãw mãã bà-lǝ bà tǝvũnvũɔ̃, wù-lǝ wù híilá jagaẁ ǹ-hã Mɛlkisɩdɛkɩw.

Gɩ̀ sùɔ́gɩ nã, yi ji gbǝ̃ǝ̃ ǹ-waa wà bàá yo ba híilá jagaw.

10 Halle ǹ-da wà Leviw sáá wùu hi ǹ-huu, gùú nã mãã Mɛlkisɩdɛkɩw kã́ã́ Ibramãw jǝ̃ǝ̃lǝ̃mmã, Levi yáá dàa Ibramã twammã nã.

11 Dũnnũ hlũũguu mãã Isɩrayɛl bluubà yáá bà wáà-gǝ, gɩ̀ cɔ̃mmã min mã̀ yáá mã̀ hlǝ Levi nũɔ̃ntaa'n puruɔntasǝrɩ nã-i.

Nǝ̃ bà-lǝ bà mããcemmã nã́ã̀ ba mã̀ã jalliɛ, dɩ̀ sáá dɩ̀ ji ba nǝ̃ yuu puruɔntiidiɛẃ ver ǹ-jo hlo, wùú mãã Mɛlkisɩdɛkɩ tammã, wù sǝ Arɩnã tammã.

12 Nã̀ã wa puruɔntasǝrɩ-ń ba dɩ̀ jáa veraa, Dũnnũ hlũũ yo gɩ̀ saa gɩ́ veraa.

13 Nǝ̃ cãwan díɛ̀dɩ̀ vĩ́ĩlã́ gùú tiiw mãã wɩ̀-i Yitiiw.

Wù hlǝ́rá gùú nũɔ̃gɩ nã mãã, gɩ̀ nũɔ̃ntaaba sǝ̃ǝ̃nã, curo'n sáa ce puruɔntasǝri Dũnnũ siijãnsuɔgɩ nã.

14 Dɩ̀ káaláa wà Yitiiw hlǝ́rá Suuda nũɔ̃ntaa nã-i.

Nǝ̃ Musaẁ wáalá Yahudyaba puruɔntaa'n cɔ̃mmã wù sɛbɛba nã gùú sùɔ́guu mãã, wù sáa waa bà-lǝ bà nũɔ̃ntaa'n cɔ̃mmã.

Yesuw-i Dũnnũ puruɔntaa'n yuuntigǝ̃ngãw mãã Mɛlkisɩdɛkɩ tammã

15 Dũnnũ puruɔntiidiɛẁ mãã wù vérrá ǹ-jo hlo, wùú mãã Mɛlkisɩdɛkɩ tammã, gùú cíé cɔ̃m mã́ã̀mã́ kaalaa yì nã.

16 Gɩ̀ sáa ce nã́ã́ cwaabaa mãã bà kárrá gùú hlũsǝrɩ nã, dìí cíé wú ba Dũnnũ puruɔntiiw, nǝ̃ wù nũmǝ̃nãsǝrii mãã dɩ̀ sǝ̃n tã, dɩ̀-lǝ dìí fãngããguu cíé wú ba Dũnnũ puruɔntiiw.

17 Sulammã nã, Dũnnũ cãwandɩ̀ wáalá wà: «Ǹ ji ba Dũnnũ puruɔntiiw fɩraa-i, Mɛlkisɩdɛkɩ tammã.»

18 Hlũcũncuruɔ'n nǝ̃ǝ̃lɩ̀ sáá nǝ̃ fãngãã, dɩ̀ sáá dɩ̀ pyar dugɔ, gùú cíé dɩ̀-lǝ dɩ́ jii ǹ-kra yiɛgu.

19 Sulammã nã, Musa hlũũgɩ̀ sáá gɩ̀ ji gbǝ̃ǝ̃ ǹ-ce curo'n cɔ̃mmã́ jalliɛ.

Nǝ̃ hãmĩĩ píɛlá yì nãkrɔnɲã gùú kuugu drɔ, gɩ̀-lǝ gùú cíyà yí ba yì ji gbǝ̃ǝ̃ ǹ-kuganãã Dũnnũw nã.

Dũnnũẁ hlã-yáà nǝ̃ gùú mãã yí piɛ yì nãkrɔnɲã gɩ̀ drɔ, gɩ̀ búɔlá hlũcũncuruɔ'n kuugɩ nã.

20 Ǹ-pya nã, Dũnnũw wáasǝ́ wù hla'n nũɔ̃'n drɔ-i nǝ̃ dɩ̀-lǝ dɩ́ ce.

Nǝ̃ bà dɩgaliɛ-lǝ, wù sáa waasǝ nǝ̃ bá da ǹ-ba wù puruɔntaaba.

21 Nǝ̃ Yesu-lǝ, Dũnnũẁ wáasǝ́ nǝ̃-yǝ-i ǹ-ce-yǝ puruɔntiiw.

Wù wáalá wà: «Mã́ã Cuutii, gɩ̀ síì ca mǝ̃̀ nã, mǝ̃́ ver dìí mãã mǝ̃̀ yuugɩ nã, mǝ̃̀ wáasǝ́ mǝ̃́ wa ǹ ji ba fɩraa puruɔntasǝrɩ nã.»

22 Nĩĩgɩ-i Yesuẁ cíé twanɲũɔ̃cɔ̃mmã́ ba mã̀ ji gbǝ̃ǝ̃ ǹ-ce, mã̀ã́ mãã mã̀ã maa mããdĩɛ̃lãmmã.

23 Ǹ-pya nã hlo, dɩdaarɩ́ nìɛ dìi ce cɔ̃m mã́ã̀, mã́ ba mã̀ sǝ sùɔ́gɩ dɩn.

Kúúgɩ̀ cíé Yahudyaba puruɔntaa'n dɩgaliɛẁ sáa gbǝ̃ǝ̃ ǹ-kã nǝ̃ yiga bà mããcemmã nã.

24 Nǝ̃ Yesu-lǝ, wú nǝ̃ fɩraa-i, gùú cíé wù puruɔntasǝ yo, curo'n síì tuu-dǝ nǝ̃ sùɔ́, wù ji ba dɩ̀ nã fɩraa-i.

25 Gɩ̀-lǝ gùú cíé wú ba nǝ̃ fãngããgu wù ji kor curo wo curo mãã wù ji duu wù nã ǹ-kã Dũnnũw nãã pepew.

Nã̀ã wa wù-lǝ wù mãã dàa nũmǝ̃nãw fɩraa, gɩ̀-i, wú gbǝ̃ǝ̃ ǹ-ba dàa, ǹ-ba wù cirǝ̃ǝ̃ Dũnnũw nã wù hã-ba.

26 Gɩ̀ sùɔ́gɩ nã, puruɔntaa'n yuuntigǝ̃ngã wáà tuuguu yáá gɩ̀ saa nǝ̃-yáà.

Dũnnũẁ kárrá wù nã wù dǝ, wú ba wùú yow.

Wù sáa yuɔruɔ nǝ̃ cɔ̃m, wù sáa ce diibɩblar ǹ-da.

Dũnnũẁ búrúɔ wù nã nǝ̃ diicĩɛ̃rǝntaaba, nã̀ã ce wú yuguraa ǹ-kãã ba wù nãã drɔkuɔl'n yuugɩ nã.

27 Wù sǝ Yahudyaba puruɔntaa'n yuntaagǝ̃ngĩɛ̃'n dɩgaliɛ tammã.

Bà-lǝ bà yáá bà jãn siimã yuu wo yuu ǹ-da pyar bà hla'n gaacĩɛ̃yaga, nǝ̃ cwaa'n dɩgaliɛ yaga bà yuunã.

Nǝ̃ Yesu-lǝ, wù cíé wù hla siijãnkwasǝnkuugu, bá blǝ-yǝ ǹ-jãn siimã dɩndɩnmã yindiingu gbɩla.

28 Sulammã nã, Musa hlũũgɩ̀ yáá gùu kra gùú Yahudyaba puruɔntaa'n yuntaagǝ̃ngĩɛ̃ba nã, mǝ̃nkursǝrɩ nǝ̃ bà nã.

Nǝ̃ Dũnnũẁ wáasǝ́ wù hla'n yiirɩ nã, Musa hlũũ'n furũũgɩ nã, ǹ-kra wùú nã mãã, wù-lǝ wɩ̀-i Dũnnũ Bíɛ́w.

Dũnnũẁ cíé wù cɔ̃mmã́ jalliɛ ǹ-ba fɩraa.