Hebruba 6

Dɩ̀ mãã gɩ̀-lǝ gɩ̀ tammã, yáalà yí ta yí maa bà dĩ́ɛ̃lã́ ǹ-kal-yáà nǝ̃ ɲã̀ã́ mãã Kɩrsa cãwandɩ nã, nǝ̃ yí kã nǝ̃ yiga kalɩmmã nã, mã̀ã́ mã̀ saa nǝ̃ vũnvãnããba.

Bláá ya yí ver yí ba Yesu cɔ̃nhũɔ̃m'n ɲããdĩɛ̃lãnɲã nã, ɲã̀ã́ mãã ɲã̀ wa yí nǝ̃nǝ̃ǝ̃ mǝ̃ǝ̃lǝ̃ǝ̃ gaaciega nã, nǝ̃ yí hũɔ̃ Dũnnũ cɔ̃mmã,

2 ɲĩɛ̃m'n cɔ̃mmã, nãkrɔn'n piɛmã, cugutaa'n pĩĩmã, nǝ̃ Dũnnũ sugojarcɔ̃mmã.

3 Yáalà yí kã nǝ̃ yiga gba!

Yi ji ce dɩ̀-lǝ dɩ̀-i, gɩ-ń dwal Dũnnũw nã.

4 Bàá mãã ba-ń ce bá nǝ̃nǝ̃ǝ̃ Dũnnũ cɔ̃mmã nã, bǝ̃ǝ̃dagǝ nã, bà fǝ̃́ǝ̃lã́ sulammã mã̀ nã, nǝ̃ Dũnnũẁ mãã wù hã-yáà nǝ̃ gùú ɲããfɩnfanɲãã mãã, bà díɛ́ bà yuɔri ɲã̀ nã, nã̀ã da bà yuɔri Dũnnũ Yuflǝ yo wù nã.

5 Bà fǝ̃́ǝ̃lã́ wà cɔ̃ndudwalɩmmãã mãã mã̀ waa Dũnnũ cɔ̃mmã, wà mã́ fla, nã̀ã ba bàa fǝ̃ǝ̃ gùú fãngããguu mãã gɩ̀ ga jo cuuw nã.

6 Bà-lǝ ba-ń nǝ̃nǝ̃ǝ̃ hlũhuhorǝgɩ nã, bà síì gbǝ̃ǝ̃ ǹ-ver ǹ-nǝ̃nǝ̃ǝ̃ bà gaabɩbliɛga nã, nã̀ã tuu ǹ-tu.

Nã̀ã wa gɩ́ nǝ̃ nã́ã́ bá ver bà gbǝ Dũnnũ Bíɛ́w-i daagɩ nã, nã̀ã ba bà diɛ-yǝ cwaaba min yinɲã nã.

Gɩ̀-lǝ gɩ̀ tammã, bà ce gɩ̀ diibɩblaari bà hla nã-i.

7 Sulammã nã, duɔgɩ-ń mǝ̃gaa ǹ-nɔ̃ hi gùú hlɔ̃mmã nã mãã ǹ-hã secieraaba, ba-ń kɔ̃-mã nǝ̃ mã́ fa dũmmã dugɔ, gɩ̀-lǝ gɩ̀ pɩgaa wà Dũnnũ píɛlá wù nãkrɔfɩnfaagu mã̀ drɔ.

8 Nǝ̃ gùú hlɔ̃mmãã mãã mã̀ sǝ̃n fa gɩdagǝ nã́ã́ huɔnɲã nǝ̃ hĩɛ̃bɩblaa sǝ, mã̀ sǝ̃n pyar dugɔ, Dũnnũẁ síì hǝ̃ǝ̃sǝ nã̀ã piɛ wù nãkrɔbɩblaagu mã̀ drɔ, nǝ̃ furũũgɩ nã dǝ̃ǝ̃mã́ juo caa-gǝ.

9 Hãmĩĩ cituubii ɲimãã, halle yi-ń ba yìi waa-dǝ gɩ̀-lǝ gɩ̀ tammã-i yo, yi fǝ̃́ǝ̃lã́ dɩ́ kaalaa wà ɲimãã-lǝ ɲi nǝ̃ ɲinhuhorɩn'n hlũũgɩ nã-i, gɩ̀-i korɩm'n hlũũgu.

10 Ɲi cíé dìí mãã ǹ-hã Kɩrsa bluuba, nǝ̃ ɲi mãã dìɛ ɲì ce dìi ɲì hã-ba, gɩ̀-lǝ gùú pɩ́garà wà Dũnnũ cɔ̃mmã dwal ɲì nã.

Dũnnũẃ nǝ̃ wùu sũɔ̃l, wù síì sĩĩnǝ̃ǝ̃ ɲì gaaciega nã.

11 Nǝ̃ hãmĩĩ mãã yì caa dìí, dɩ̀-i ɲì sǝ̃ǝ̃nã, curo wo curo, wú ɲǝ̃gãr cɔ̃m mã́ã̀ nã, ǹ-da piɛ wù nãkruɔgu gùú diifɩnfaarɩ nã mãã Dũnnũẁ ji ce-ɲã́ã̀ nǝ̃-dǝ gɩ̀ faalɩmmã nã.

12 Gɩ̀ sùɔ́gɩ nã yi sǝ̃n caa ɲí ba lonããba.

Nǝ̃ bàá mãã bà hṹɔ̃lã́ Dũnnũ cɔ̃mmã, ǹ-hiraa dɩ̀ dɩndɩ nã, ǹ-ba bà kã nǝ̃ yigagu fuwɔ ǹ-da gùú ɲinɲãã mãã Dũnnũ plã wù nũɔ̃gu nǝ̃-ba ɲã̀ cɔ̃mmã nã, yi caa ɲí tuu bàá nǝ̃ǝ̃l-i.

Dũnnũ nũɔ̃'n pãlli

13 Gùú nã mãã Dũnnũẁ yáá wù pã wù nũɔ̃gu nǝ̃ Ibramãw, wù sáá wù ji gbǝ̃ǝ̃ ǹ-waasǝ yirdarǝ nã dìí mãã dìi maa wù-lǝ wù dǝlli, gùú cíé wú waasǝ wù hla'n yiirɩ nã.

14 Dũnnũẃ waa nǝ̃ Ibramãw wà: «Cincaruugɩ̀ sǝ dɩ̀ nã, mǝ̃̀ ji mǝ̃gaa ǹ-piɛ mǝ̃̀ nãkrɔfɩnfaagu ǹ nã dugɔ, nã̀ã ce ǹ furũntaabá ɲũrũɔ̃ piyɛ̃.»

15 Ibramã yo, wù fĩ́ɛ̃́ wù hiɛga nĩĩgɩ-i ǹ-fennãã Dũnnũw nã, gùú cíé Dũnnũw yáá wùu pã wù nũɔ̃gu nǝ̃-yǝ gùú ɲin'n cɔ̃mmã nã, wú da-ɲã.

16 Curoẁ mãã wu-ń ba wù caa cwaabá hiraa wù cãwandɩ nã, cincaruugɩ báa ba dɩ̀ nã, wù waasǝ kuudagǝ yiirɩ nã-i gùú mãã gùu maa wù-lǝ nǝ̃ wù hla.

Dɩ̀ mãã dɩ-ń ce gɩ̀-lǝ gɩ̀ tammã, cincaruugɩ̀ tã-i.

17 Gùú tammã dɩnmã-i bàá mãã Dũnnũẁ plã wù nũɔ̃guu nǝ̃-ba ɲinhuhorɩn ɲã́ã̀ ɲã̀ cɔ̃mmã nã, Dũnnũẁ yáá wù caa wú pɩgaa dɩ́ kaalaa nǝ̃-ba wà wù nũɔ̃'n pãllɩ̀ síì suro.

Gùú cíé halle ǹ-da wà wu plã wù nũɔ̃gu, wú ver ǹ-waasǝ ǹ-pya nã.

18 Gɩ̀-lǝ gɩ̀ ɲinɲã hǝ̃ǝ̃lɲã̀ síì gbǝ̃ǝ̃ suro few.

Dũnnũẁ síì gbǝ̃ǝ̃ ǹ-bǝr kwasǝri.

Gɩ̀-lǝ gɩ̀ tammã, hãmĩĩ mãã yì sṹɔ̃́ ǹ-ji cĩĩ Dũnnũ taaragu, wù mǝ̃gaa wù hã-yáà nǝ̃ hyagbǝ̃ngbãndi, wà yí mǝ̃gaa yí hiraa dɩ̀ dɩndɩ nã, yí piɛ yì nãkruɔgu gùú ɲinɲã nã mãã wù wáalá ɲã̀ cɔ̃mmã nǝ̃-yáà.

19 Dũnnũẁ plã wù nũɔ̃gu dìí nã mãã, yí nǝ̃ yìi piɛ yì nãkruɔgu dìí nã-i, gùú cíé Dũnnũẃ ce yí hiraa dɩ̀ dɩndɩ nã kwelle nã́ã́ bato hirakwagǝ̃ngããr-i dìi ce yí hiraa wù cɔ̃mmã nã.

Gùú cíé yí ba nã́ã́ yi tíɛ́ ǹ-maa kuulaaw mãã wù cĩĩ Dũnnũ nũɔ̃sǝn sùɔ́gɩ nã, ǹ-kãã hiraa wù yigagɩ nã.

20 Yesuẁ túɔ́ ǹ-jãn gɩ̀ sùɔ́gɩ nã yì yiganã hãmĩĩ cɔ̃mmã nã-i.

Wù cíé Dũnnũ puruɔntaa'n yuuntigǝ̃ngã-i Mɛlkisɩdɛkɩ tammã.

Wù ji ba gɩ̀-lǝ gɩ̀ yuuntasǝrɩ nã fɩraa-i.