Hebruba 5

Sulammã nã, puruɔntaa'n yuuntigǝ̃ngã wo puruɔntaa'n yuuntigǝ̃ngã, Dũnnũẁ ne wù hiil-yǝ cwaa'n sǝ̃ǝ̃nã-i, wú ba wù ce wù mããcemmã wù hã cwaaba.

Wù hã Dũnnũw nǝ̃ cwaabà mãã bà jo nǝ̃ gùú ɲinɲã mãã bà ji bũũ-yǝ nǝ̃-ɲã, nã̀ã ba wù jãn siimã wù hã-yǝ cwaa'n gaacĩɛ̃ya'n cɔ̃mmã nã.

2 Wùú nǝ̃ wù hla, wù yúɔrúɔ cɔ̃ncin nã, gùú cíé bàá nǝ̃n mãã bà yúɔrúɔ Dũnnũ hlũũgɩ nã, nǝ̃ bàá mãã bà sǝ̃n fǝ̃ǝ̃ yiɛ Dũnnũ cɔ̃mmã nã, wú ba wù fɛ̃ wù hiɛga nǝ̃-ba.

3 Wùú yo wù mãã mǝ̃nkurnĩĩw, gɩ̀-i, wu-ń wa wù jãn siimã Dũnnũẃ da ǹ-ce cwaa'n gaacĩɛ̃ya'n dũndɔw, wu-ń ce wú jãn-mã nǝ̃ wù hla'n mǝ̃gãm yo gbɩla, Dũnnũẃ da ǹ-pyar wùú yo wù yaga.

4 Curo'n síì gbǝ̃ǝ̃ ǹ-ka ǹ-suro nǝ̃ wù hla nnĩĩ ǹ-tuu yiiri wà wù-lǝ puruɔntaa'n yuuntii-i, fuwɔ Dũnnũẃ be-yǝ ǹ-dii-yǝ gɩ̀ mããcemmã nã nã́ã́ wù bíé Arɩnãw nĩĩguu mãã.

5 Kɩrsa cɔ̃m yo, mã́ nǝ̃ nnĩĩ-i: wù sáa ka ǹ-suro nǝ̃ wù hla sǝ, ǹ-tuu gɩ̀ yiiri wà wù-lǝ wɩ̀-i puruɔntaa'n yuuntigǝ̃ngãw.

Nǝ̃ Dũnnũw mãã wù bíé-yǝ, wùú díilá-yǝ mã̀ nã nã̀ã waa wà: «Yíi-i mǝ̃̀ Bíɛ́w, ǹ-tuu jimããgu, mã́ã-i ǹ tǝw.»

6 Nã̀ã ver ǹ-waa yiɛdagǝ hlo wà: «Ǹ ji ba puruɔntiiw fɩraa Mɛlkisɩdɛkɩ tammã.»

7 Ǹ-ya Kɩrsaẃ ba nũmǝ̃nãw cuuw nã, wù yáá wùu fǝ̃ǝ̃ wà fãngããgɩ́ nǝ̃ Dũnnũw saa wú ba wù ji kor ǹ-hiil-yǝ kúúgɩ nã.

Wú cirǝ̃ǝ̃ Dũnnũw nã kaaluugɩ nã nǝ̃ ɲiɲirãmmã nã.

Wù mãã wù yáá wùu mǝ̃gaa ǹ-ɲǝ̃gãr Dũnnũw nã dugɔ, gùú cíé Dũnnũ yo wú hũɔ̃ wù cirǝ̃mmã.

8 Halle ǹ-da wa wɩ̀-i Dũnnũ Bíɛ́w, wù ywaruugu kállá-yǝ nǝ̃ wù mãã wù saa wú nɔ̃ ǹ-hã Dũnnũw nĩĩgu mãã.

9 Dũnnũẁ cíé wù cɔ̃mmã min mã́ jalliɛ.

Yindiɛ, bà min mãã bà nɔ̃ bà hã-yǝ, bà mãã bà ga da gùú korɩmmãã mãã fɩraa, mã̀ ga hlǝ wùú nã-i.

10 Sulammã nã, Dũnnũẁ cíé wú ba puruɔntaa'n yuuntigǝ̃ngã-i Mɛlkisɩdɛkɩ tammã.

Blǝ́rà ɲì hla nã, ɲi báa ji nǝ̃nǝ̃ǝ̃ Dũnnũ hlũũgɩ nã

11 Cɔ̃m mã́ã̀ nã cɔ̃ncindɩ́ nìɛ, mã̀ã́ mãã yì saa yí waa-mã ǹ-ja-ɲã́ã̀.

Nǝ̃ yi-ń wa yí fɩr-mã ǹ-ja-ɲã́ã̀, mã̀ fɩrɩmmã̀ ji ca, nã̀ã wa ɲi sǝ̃n gǝǝ ɲì fǝ̃ǝ̃ cɔ̃mmã.

12 Ɲi híí gùú sùɔ́guu nnĩĩ, ɲi yáá ɲì saa ɲí ba cokalliɛ-i.

Nǝ̃ gɩ̀-i nnĩĩ, ɲì dugɔẃ nǝ̃ bá ver ǹ-kal-ɲã́ã̀ nǝ̃ mã̀ã́ mãã cɔ̃ndĩɛ̃lãmmã Dũnnũ cɔ̃mmã nã.

Ɲí nǝ̃ nã́ã́ caaliinãã-i, ɲi síì gbǝ̃ǝ̃ ǹ-wuu wuurii mãã kugɔtaa, ɲi saa nǝ̃ ŋmǝ̃nhũm-i.

13 Nǝ̃ curo wo curo mãã wù sǝ̃n wuu gɩdagǝ nã́ã́ ŋmǝ̃nhũm sǝ, wù-lǝ caalii-i nǝ̃-yǝ, wù sǝ̃n fǝ̃ǝ̃ kuu ǹ-kã cɔ̃nsũɔ̃lɩm'n yiɛgu.

14 Nǝ̃ bàá mãã covũnvãtaa-lǝ, bà-lǝ bà wuu wuurii mãã kugɔtaa dǝlli.

Bà kállá cɔ̃nfǝ̃ǝ̃gǝgu, ǹ-ga juo ba bà fǝ̃ǝ̃ bà pyariɛ diibɩblaari diifɩnfaarɩ nã.

Bà mãã bà bla bà ce mããcemmã nǝ̃ cɔ̃nfǝ̃ǝ̃gǝ gúɔ̀, gùú cíé bá da-gǝ.