Hebruba 4

Gɩ̀ sùɔ́gɩ nã, Dũnnũẁ plã wù nũɔ̃gu nǝ̃-yáà wà wu ga dii-yáà gùú fiisaagɩ nã mãã, yáalà yí fǝ̃ǝ̃ yí blǝ yì hla nã, yì sǝ̃ǝ̃nã curo'n báa ji yanãã ǹ-ba wù sɩga jãn gɩ̀ nã.

2 Nã̀ã wa bà túú Yesu cɔ̃ndudwalɩmmã nã nǝ̃-yáà nã́ã́ bà yáá bàa tu Dũnnũ cãwandi nǝ̃ yì tǝvũnvãnããba nĩĩguu mãã.

Nǝ̃ dɩ̀ sáa pyar dugɔ ǹ-hã-ba, nã̀ã wa bà nṹɔ̃́-dǝ gùú nã mãã bà sáa hũɔ̃ ǹ-cu dɩ̀ nã.

3 Nǝ̃ hãmĩĩ mãã yì hṹɔ̃lã́ Yesu cɔ̃mmã, hãmĩĩ ga jãn fiisaa gúɔ́ nã.

Dũnnũẁ wáalá gùú fiisaa'n cɔ̃mmã-i wà: «Mǝ̃̀ hyadũũgɩ nã, mǝ̃̀ yáá mã̀ã waasǝ mǝ̃̀ hla'n nũɔ̃'n drɔ, mǝ̃́ wa mǝ̃̀ mãã mǝ̃̀ ji dii-ba gùú fiisaagɩ nã mãã, bá sɩga jãn gɩ̀ nã.»

Nǝ̃ Dũnnũẁ wáalá dɩ̀-lǝ gùú nã mãã, wù mããcemmã min mã̀ yáá mã̀ã tã cuu nǝ̃ǝ̃m'n bǝ̃ǝ̃gu dìi.

4 Sulammã nã, bãn nɩrhǝ̃ǝ̃lnã yuu gúɔ̀gɩ cɔ̃mmã́ nàa mã̀ã waa yiɛdagǝ Dũnnũ cãwan'n sɛbɛw nã wà: «Dũnnũẁ cíé wù mããcemmã min mã́ tã bãn nɩrhǝ̃ǝ̃lnã yuugu, wú fiisa gɩ̀-lǝ gɩ̀ yuugu.»

5 Nã̀ã ver ǹ-waa sùɔ́gɩ dɩn gúɔ́ nã hlo wà: «Mǝ̃̀ yáá mǝ̃̀ ji dii-ba gùú fiisaagɩ nã mãã bà sɩga jãn gɩ nã.»

6 Bàá mãã bà yáá bàa dĩɛ̃l ǹ-nɔ̃ Dũnnũ cãwandi, bà mãã bà sáa hũɔ̃ ǹ-nɔ̃ ǹ-hã-yǝ, gùú cíé bà sáa jãn fiisaa'n yiɛ gúɔ́ nã.

Nǝ̃ dɩ̀ wáalá ǹ-kra wà badaaba ga da ǹ-gbǝ̃ǝ̃ ǹ-jãn gɩ̀ nã.

7 Gùú cíé Dũnnũẃ ne ǹ-hiil yuudagǝ hlo, ǹ-be-gǝ «jimããgu».

Fufodii, Dũnnũẁ yáá wùu dii cãwan díɛ̀ Yahudyaba yuuntii Dawuda nũɔ̃gɩ nã-i wà: «Ɲi-ń nɔ̃ Dũnnũ yallɩ nã jimããgu, bláá ce ɲí gbǝ̃ǝ̃ ɲì hiɛga.»

8 Sulammã nã, gɩ nã́ã̀ ba wà Sosuwew díilá Isɩrayɛl bluuba fiisaa'n yiɛ gúɔ́ nã, Dũnnũẁ sáá wù ji waa yuudagǝ cɔ̃m hlo.

9 Dũnnũẁ fíisá bãn nɩrhǝ̃ǝ̃lnã yuugu gùú tammã, wù hlã wù bluu yo nǝ̃ fiisaagu nnĩĩ-i.

10 Gùú cíé wùú nǝ̃n jãn Dũnnũ fiisaagɩ nã, Dũnnũẁ cíé mããcemmã nã̀ã fiisa gùú tammã, gùú yo gɩ̀ tiiw fiisa wù mããcemmã nã nĩĩgɩ-i.

11 Gɩ̀ sùɔ́gɩ nã, yáalà yí gbǝ̃ǝ̃ yi jãn fiisaa gúɔ́ nã.

Gɩ̀-lǝ gɩ̀ tammã, yì sǝ̃ǝ̃nã, curo'n sɩga tuu yì tǝvũnvãnãã'n nǝ̃ǝ̃li ǹ-duruu.

Bà sáa nɔ̃ ǹ-hã Dũnnũ.

12 Sulammã nã, Dũnnũ cãwandɩ-i nũmǝ̃nãsǝri.

Dɩ́ nǝ̃ fãngããgu.

Dɩ̀ jã ǹ-ɲǝ̃ǝ̃ dãngunãw mãã nǝ̃ nɔ̃nɲã hǝ̃ǝ̃lɲã.

Dɩ-ń ce dɩ́ jãn ǹ-buruɔ curo'n yuflǝw nǝ̃ wù yurummã nã, ǹ-buruɔ kukuun'n wanjalɩmmã nã nǝ̃ kukuun'n nɔ̃mmã nã.

Dɩ̀ fǝ̃ǝ̃ dɩ̀ pyariɛ curo'n dugorblɩ'n kusunã cɔ̃mmã nã nǝ̃ wù mãã wù kãn dìí mãã wù kusuugɩ nã.

13 Kuu'n sɩriɛ Dũnnũ ɲããnǝ̃ǝ̃nɲã sǝ̃ǝ̃nã, gùú mãã gùu ŋmǝ̃ǝ̃rǝ̃ǝ̃ wù nã.

Ɲinɲã min ɲã́ nǝ̃ coriyaa hlaan wù yinɲã nã.

Yi ga taa yì gaacie'n yuugu ǹ-ja gùú Dũnnũw-i.

Yesuw-i Dũnnũ puruɔntaa'n yuuntigǝ̃ngãw

14 Sulammã nã, yí nǝ̃ puruɔntaa'n yuuntigǝ̃ngã, wùú mãã wù yúguráa ǹ-kã Dũnnũw nãã.

Wɩ̀-i Dũnnũ Bíɛ́ Yesuw.

Gɩ̀ sùɔ́gɩ nã, Dũnnũ cɔ̃mmãã mãã yìi cu mã̀ nã, nã̀ã ba yì waa-mã, yáalà yí hiraa dɩ̀ dɩndɩ nã mã̀ cɔ̃mmã nã.

15 Puruɔntaa'n yuuntigǝ̃ngãw mãã wù síì gbǝ̃ǝ̃ ǹ-sɔ̃ yì hujãndɩ nã ǹ-pya yì nã yì mǝ̃nkursǝrɩ nã, wùú sǝ hãmĩĩ yow.

Nã̀ã wa hãmĩĩ yo-lǝ, Sɩtãnẁ wáalá wú dǝ̃ǝ̃-yǝ nã́ã́ wù cíé hãmĩĩ nĩĩguu mãã, nǝ̃ wù sáa ce diicĩɛ̃rǝ ǹ-da.

16 Gɩ̀ sùɔ́gɩ nã, bláá yaala yí sɔ̃ cɔ̃m nã, yáalà yí kuganãã Dũnnũw nã.

Wù-lǝ wù ce cwaaba nǝ̃ kusufɩnfaagu.

Gɩ̀-lǝ gɩ̀ nã, wù ga sɔ̃ yì hujãndi nã̀ã ne yì yiɛgu ǹ-pya yì nã gùú bǝ̃ǝ̃guu mãã gùu saa.