Hebruba 3

Yesuẃ nǝ̃ Dũnnũ tanhiil Musa yigagɩ nã

Mã́ã cwanãã, ɲimãã Kɩrsa bluuba mãã Dũnnũẁ bíé-ba, yáalà ɲì yinɲã́ ba Yesuw nã, wùú mãã Dũnnũ Tĩɛ̃tiiw, nǝ̃ yi mãã yì waa gùú hũɔ̃m'n cɔ̃mmã mãã, wù-lǝ wɩ̀-i mã̀ Yahudyaba puruɔntaa'n yuuntigǝ̃ngãw.

2 Sulammã nã, Dũnnũẁ yáá wùu ne ǹ-hiil-yǝ mããcem mã́ã̀ cɔ̃mmã nã-i, nǝ̃ wù cíé yalntii-i mã̀ min nã nã́ã́ Musaẁ cíé yalntii Dũnnũ bluuba sǝ̃ǝ̃nã nĩĩguu mãã.

3 Gùú tiiw mãã wù mã duugu, bà bũũ wù-lǝ ǹ-ɲǝ̃ǝ̃ duugu nǝ̃ gɩ̀ hla.

Gùú tammã dɩnmã nã-i, Yesuẃ ba wù saa wú da bũũmã ǹ-ɲǝ̃ǝ̃ Musaw.

4 Suɔ wo suɔ, gɩ́ nǝ̃ gɩ̀ mãtii-i, nǝ̃ wùú mãã wù mlã ɲinɲã min, wɩ̀-i Dũnnũw.

5 Dũnnũ bluuba sǝ̃ǝ̃nã, Musaẁ yáá nã́ã́ mããcierw mãã yalntiiw.

Dũnnũẁ yáá wù ji waa gùú cɔ̃mmã, wùú yáá wù saa wú taa-mã ǹ-ja cwaaba.

6 Nǝ̃ Kɩrsa-lǝ, yalntii-i, wɩ̀-i biɛnĩĩw mãã Dũnnũ suɔ'n yuugɩ nã.

Hãmĩĩ-lǝ, hãmĩĩ-i wù suɔgu, yi-ń gbǝ̃ǝ̃ ǹ-hũɔ̃ ǹ-hiraa dɩ̀ dɩndɩ nã yì hũɔ̃m'n cɔ̃mmã nã ǹ-ga hi gɩ̀ kǝǝri nã̀ã piɛ yì nãkruɔgu dìí nã mãã dɩ̀ hã-yáà nǝ̃ dudwalɩmmã.

Dũnnũ bluubà mãã bà ga ba gùú fiisaagɩ nã

7 Gɩ̀-i, Dũnnũ Yuflǝẃ waa Dũnnũ cãwan'n sɛbɛw nã wà: «Ɲi-ń nɔ̃ Dũnnũ yallɩ nã jimããgu,

8 bláá ce ɲí gbǝ̃ǝ̃ ɲì hiɛga, nã́ã́ ɲì tǝvũnvãnããbà yáá bàa suro wù yuunã jerkwaarɩ nã ǹ-dǝ̃ǝ̃-yǝ ǹ-ne gùú tammã.»

9 Dũnnũw nã̀ã fǝ̃ǝ̃ ǹ-waa hlo wà: «Gùú sùɔ́gɩ-i, bà sórrá mǝ̃̀ yuunã ǹ-dǝ̃ǝ̃-m ǹ-ne, nǝ̃ bà díɛ́ mǝ̃̀ gaaciega bii gwaahǝ̃ǝ̃l kusuugɩ nã.

10 Gùú cíé mǝ̃̀ hiɛgá dũ nǝ̃ gɩ̀ bǝ̃ǝ̃ntaaba, mǝ̃́ waa wà bà hla'n kãnɩmmãã díilà-ba vaalam'n hlũũgɩ nã bǝ̃ǝ̃ wo bǝ̃ǝ̃; nǝ̃ ba sǝ̃n caa bá fǝ̃ǝ̃ mǝ̃̀ mãã mǝ̃̀ caa bá tuu gùú hlũũguu mãã.

11 Nǝ̃ ǹ-ya mǝ̃́ ba mǝ̃̀ hyadũũgɩ nã, mǝ̃̀ yáá mã̀ã waasǝ mǝ̃̀ hla'n nũɔ̃'n drɔ, mǝ̃́ wa mǝ̃̀ mãã mǝ̃̀ ji dii-ba gùú fiisaagɩ nã mãã, bá sɩga jãn gɩ̀ nã.»

12 Mã́ã cwanãã, blǝ́rà ɲì hla nã, ɲì sǝ̃ǝ̃nã curo'n báa ba nǝ̃ hiɛbɩbliɛga, curo'n báa ba wù sǝ̃n hũɔ̃ Dũnnũ cɔ̃mmã fuwɔ ǹ-ji ce wú ver wù furũũgu ǹ-hã Dũnnũw mãã nũmǝ̃nãw.

13 Nǝ̃ gùú yuuguu mãã bà be-gǝ wà «jimããgu» Dũnnũ cãwan'n sɛbɛw nã, gɩ̀-lǝ gɩ-ń ba dìɛ-lǝ, bláà ɲì hã ɲì ɲĩɛ̃ nǝ̃ hyagbǝ̃ngbãndi yuu wo yuu, kuu'n báa ji vuu ǹ-dii-ɲã́ã̀ diicĩɛ̃rǝdɩ nã ɲí hla Dũnnũ cɔ̃mmã.

14 Yi hṹɔ̃lã́ ǹ-cu Kɩrsa furũũgɩ nã gùú tammã, yi-ń ba yi sáa ver nǝ̃ furũũgu nã̀ã kã nǝ̃ yigagu fuwɔ ǹ-ga hi gɩ̀ kǝǝri, yì cíé wù nãmããcieraa-i.

15 Gùú cíé bá yal Dũnnũ sɛbɛw nã wà: «Ɲi-ń nɔ̃ Dũnnũ yalli jimããgu, bláá gbǝ̃ǝ̃ ɲì hiɛga nã́ã́ ɲì tǝvũnvãnããba sórrá Dũnnũw yuunã jerkwaarɩ nã nĩĩguu mãã.»

16 Nǝ̃ haba nṹɔ̃́ Dũnnũ yalli nã̀ã hla nã̀ã suro wù yuunã?

Musaẁ tíɛ́ yigagɩ nã ǹ-hiil bàá bà minw mãã Misɩra yiɛgu, bà-lǝ bà-i.

17 Dũnnũ hiɛgà yáá gàa dũ nǝ̃ haba-i ǹ-ji da bii gwaahǝ̃ǝ̃lw?

Bàá nǝ̃n yáá bàa ce gaacĩɛ̃yaga nã̀ã ga kurǝǝ jerkwaarɩ nã, wù hiɛgà yáá gàa dũ nǝ̃ bà-i.

18 Dũnnũẁ yáá wùu waasǝ wù nũɔ̃gu nǝ̃ haba-i wà wu mǝ̃́gará gùú yiɛguu mãã wù ga dii-ba fiisaagɩ nã gɩ̀ nã, ba síì jãn gɩ̀ nã?

Dɩ̀ káaláa wà bàá mãã bà sáá bà nɔ̃ bà hã-yǝ, wu yáá wù ja bà-i.

19 Mã́ã cwanãã, gɩ̀ sùɔ́gɩ nã yi díɛ́ wà ba mãã ba sáa hũɔ̃ ǹ-cu Dũnnũ furũũgɩ nã, gɩ̀-i, bá ba bà sáa gbǝ̃ǝ̃ ǹ-jãn fiisaa'n yiɛ gúɔ́ nã.