Hebruba 2

Dũnnũẁ hã-yáà nǝ̃ korɩmgǝ̃ngãmmã

Gɩ̀ sùɔ́gɩ nã, yi-ń ba yì sǝ̃n caa yi ji nǝ̃nǝ̃ǝ̃ hlũũgɩ nã, yi nṹɔ̃́ gùú cãwanĩɛ̃gaa mãã, yi saa yí mǝ̃gaa ǹ-ɲǝ̃gãr gà nã huhorɩmmã nã, ǹ-maa haasǝgu.

2 Fufodii, mɛlɛgɛbà yáá bàa waa gùú cãwandi, dɩ̀ jáa ba sulam-i.

Bàá nǝ̃n yáá bà ne dɩ́ ba mǝ̃ǝ̃lǝ̃ǝ̃cãwandi, nǝ̃ bàá mãã bà sáa hũɔ̃-dǝ, curo wo curo, wù yáá wù saa nǝ̃ gùú piirɩmmã, wù díɛ́-mã.

3 Gɩ̀ sùɔ́gɩ nã, Dũnnũẁ hlã-yáà nǝ̃ gùú korɩmmã, yi-ń ba yì ce cǝ̃̀ǝ̃́mã nǝ̃-mã, yi ga hlǝ dɩ̀ nã tam hamã-i?

Yitiiw nǝ̃ wù hla, wùú dúú nã ǹ-ba wù waa korɩm mã́ã̀mã̀ cɔ̃mmã, nǝ̃ bàá nǝ̃n nṹɔ̃́-mã nǝ̃ bà tɔ̃nɲã, bá juo taa dɩ́ kaalaa ǹ-ja hãmĩĩ.

4 Dũnnũẁ nǝ̃ wù hla, wù pɩ́gará-dǝ wà bà cãwandi sulam-i.

Wù hlã wù tĩɛ̃taaba nǝ̃ fãngããgu, bá ba bà ce cɔ̃ngǝ̃ngãmmã, mã̀ã́ mãã mã̀ pɩgaa wù fãngããgu nǝ̃ cɔ̃nnurom'n placin.

Nã̀ã ver ǹ-hã-ba nǝ̃ wù Yuflǝ fãngããgu ǹ-vaa nǝ̃ wù kusuugu.

Wùú mãã wù pɩgaa-yáà nǝ̃ korɩm'n hlũũgu

5 Sulammã nã, yi mãã yi waa gùú cuuw mãã wù cɔ̃mmã wà wu nàa wù jo, Dũnnũẁ sáa dii wù yuuntasǝri mɛlɛgɛba nãkruɔ nã sǝ.

6 Bà yállá Dũnnũ cãwan'n sɛbɛ sùɔ́dagǝ nã wà: «Dũnnũ, curow mãã nnĩĩ, binkuu-i nǝ̃ ń ba ǹ kãnãã wù cɔ̃mmã nã?

Curo'n blɩw, binkuu-i nǝ̃-yǝ nǝ̃ ń ba ǹ jã wù cɔ̃mmã?

7 Ǹ cíé-yǝ wú ba mɛlɛgɛba taaragu bǝ̃ǝ̃biidagǝ nã fiyãã.

Ǹ kárrá wù nã yuuntasǝrɩ nã nã̀ã hã hã-yǝ nǝ̃ bũũmã,

8 nã̀ã piɛ-yǝ ɲinɲã min yuugɩ nã ɲã́ ba wù vyan'n taaragu.»

Ba-ń waa wà Dũnnũẁ píɛlá curow ɲinɲã min yuugɩ nã, gɩ̀ yuugɩ-i wà ɲinɲã min ɲã nɔ̃ ɲã̀ hã-yǝ.

Nǝ̃ gɩ̀-i nnĩĩ, ǹ-ji hi jimããnããw, yi da wà wù yuuntasǝrɩ sǝ dìi hi ǹ-hi ɲinɲã min yugo.

9 Nǝ̃ yi fǝ̃́ǝ̃lã́ wà fufodii, Dũnnũẁ yáá wùu hɩr Yesuw bǝ̃ǝ̃biidagǝ nã fiyãã, wú ba mɛlɛgɛba taaragu.

Wù hṹɔ̃lã́ ywaruugu ǹ-ku, Dũnnũẃ da ǹ-ne cwaanbii hãmĩĩ yiɛgu.

Gùú cíé, Dũnnũẃ kra wù nã yuuntasǝrɩ nã nã̀ã hã hã-yǝ nǝ̃ bũũmã.

10 Gɩ̀ yáá gɩ̀ saa Dũnnũẃ haar Yesuw, nã̀ã ce wú jalliɛ ywaruugɩ nã.

Dũnnũẃ nǝ̃́ǝ̃lã́ ɲinɲã min, ɲã́ nǝ̃ wùú saa-i.

Wù júó nǝ̃ cocin wù yuuntasǝ'n gbɩgbaamã nã.

Yesu Kɩrsa-lǝ wùú tíɛ́ nǝ̃-ba yigagɩ nã, Dũnnũẃ da ǹ-kor-ba.

11 Yesuw mãã wù pyar cwaa'n gaacĩɛ̃yaga bà yuunã, wù-lǝ nǝ̃ wù mãã wù pyar bàá mãã bà gaacĩɛ̃yaga bà yuunã, bá nǝ̃ Tiiyǝw dɩn-i.

Gɩ̀-i, Yesuẃ ba wù be-ba wà wù hãmba nǝ̃ gɩ́ ba gɩ̀ sǝ̃n ce-yǝ nǝ̃ ciir.

12 Gùú cíé wú waa wà: «Dũnnũ, mǝ̃̀ caa mǝ̃́ waa ǹ cɔ̃mmã ǹ-ja mǝ̃̀ hãmba, nã̀ã ba mǝ̃̀ caa mǝ̃́ bũũ-n ǹ cwaaba min yinɲã nã.»

13 Ǹ-pya nã, wú waa wà: «Mǝ̃̀ ji piɛ mǝ̃̀ nãkruɔgu Dũnnũw nã.»

Nã̀ã ver ǹ-waa hlo wà: «Mã́ã-i nnĩĩ nǝ̃ tãnkuuraabaa mãã Dũnnũẁ hlã-m nǝ̃-ba.»

14 Tãnkuuraa báàbà min bà mãã cwaanbiiba, gɩ̀-i, Yesuw nǝ̃ wù hla, wùú yo, wú juo ba curo'n blɩw bàá tammã.

Wùú yo, wù yáá curo'n blɩ'n tammã-i.

Gùú cíé wù jáa ku, wù kúúgɩ́ bǝ̃ǝ̃lǝ̃ǝ̃ tiilǝtiiw nã, wùú mãã wù yáá nǝ̃ kúú'n fãngããgu.

15 Nǝ̃ bàá mãã kúú'n gbǝrsǝrɩ̀ yáá dìi ce bá ba nã́ã́ lwɛ-i ǹ-tuu bà huumã nã ǹ-ga kra bà kúú, wú juo hiil bàá yo ǹ-nǝ̃nǝ̃ǝ̃ bà nã.

16 Sulammã nã, dɩ̀ kaalaa wà Yesuẁ sáa jo wù ji pya mɛlɛgɛba nã sǝ, nǝ̃ wù júó wù ji pya Ibramã huɔnbii nã-i.

17 Gùú cɔ̃mmã nã-i, wú ba wù yáá wù saa wú juo ba wù cwanãã'n tammã cɔ̃mmã min nã, ǹ-ba bà Yahudyaba puruɔntaa'n yuuntigǝ̃ngãw mãã nǝ̃ kusuufɩnfaagu nã̀ã ba yalntiiw Dũnnũ puruɔntasǝ'n mããcemmã nã ǹ-da ǹ-pyar wù bluu'n gaacĩɛ̃yaga bà yuunã.

18 Yindiɛ, wù ji gbǝ̃ǝ̃ ǹ-ba wù pya bàá mãã Sɩtãnẁ dǝ̃ǝ̃-ba wù ne, nã̀ã wa wùú yo, Sɩtãnẁ dǝ̃́ǝ̃lã́-yǝ ǹ-ne nǝ̃ wú da ywaruugu.