Hebruba 1

Hebruba sɛbɛw

Dũnnũẁ ta wù bíɛ́w nã wù waa cɔ̃mmã

Fufodii, Dũnnũẁ wáalá cɔ̃mmã nǝ̃ yì tǝvũnvãnããba ǹ-gbãlãã tamcin nã.

Wù tíɛ́ tanhiilaaba nã-i bá waa-ga ǹ-ja-ba.

2 Nǝ̃ cuu tãl'n bǝ̃ǝ̃ gúɔ́ nã, Dũnnũẁ tíɛ́ wù bíɛ́ nã-i, wú juo waa wù nũɔ̃nãcãwandi ǹ-ja-yáà.

Wù túulá wɩ̀-i ǹ-nǝ̃ǝ̃ cuuw, nã̀ã dii ɲinɲã min wù nãkruɔgɩ nã.

3 Biɛnĩĩw pɩ́garà Dũnnũ yuuntasǝ'n gbɩgbaamã.

Dũnnũw mãã gùú tammã, wùú yo wú nǝ̃ nĩĩgɩ-i.

Wù-lǝ wùú cãwan'n fãngããgɩ-i gùu blǝ cuuẃ hiraa.

Wù jáa per cwaaba nã, ǹ-pyar bà gaacĩɛ̃yaga bà yuunã ǹ-tã, wú ta ǹ-kãã jiraa Fãngããgɩmintii Dũnnũ nãdĩĩyiɛgu drɔkuɔlɩ nã.

Yesu Kɩrsaẁ maa mɛlɛgɛba

4 Biɛnĩĩẁ díɛ́ yuugu ǹ-ɲǝ̃ǝ̃ mɛlɛgɛba nĩĩgu mãã, Dũnnũ yo wù hlã-yǝ nǝ̃ yirgǝ̃ngãr, dìí mãã dìi maa mɛlɛgɛba dǝlli nĩĩgɩ-i.

5 Dũnnũẁ sáa hi ǹ-waa nǝ̃ mɛlɛgɛw dɩn yo ǹ-da wà: «Yíi-i mǝ̃̀ Bíɛ́w^a, ǹ-tuu jimããgu, mã́ã-i ǹ tǝw.»

Wù sáa hi ǹ-waa nǝ̃ wù dɩn yo wà: «Mǝ̃̀ ji ba ǹ Tǝw, nǝ̃ yíǹ ba mǝ̃̀ Bíɛ́w.»

6 Nǝ̃ gùú nã mãã wù jáa ba wù ji tĩɛ̃ wù bíɛ́ kadiinw, wù sɔtuurẃ jo cuuw nã, wú waa wà: «Mɛlɛgɛ ɲimãã, ɲì min ɲi saa ɲí kuulǝǝ wù yigagɩ nã ǹ-bũũ-yǝ.»

7 Dũnnũẁ wáalá dìí mãã ǹ-kã mɛlɛgɛba yiɛgu, dɩ̀-i nnĩĩ: «Tĩɛ̃taa-i nǝ̃-ba, bá nǝ̃ nã́ã́ saluu-i.

Mããcieraa-i, bá nǝ̃ nã́ã́ dãncaalam-i.»

8 Nǝ̃ wù bíɛ́-lǝ, wú waa nǝ̃-yǝ wà: «Yíi-i Dũnnũw, ǹ yuuntasǝ'n fãngããgɩ́ nǝ̃ fɩraa-i.

Yigantisũɔ̃lyǝ-i nǝ̃-n ǹ bluu'n yuugɩ nã.

9 Cɔ̃nsũɔ̃lɩmmãã dwállà ǹ nã, ǹ sǝ̃n hũɔ̃ diibɩblaari few.

Gɩ̀-i Dũnnũ, ǹ Dũnnũẃ ne ǹ-hiil-n ǹ-kra ǹ nã ǹ dǝ dudwalɩmmã nã, ń ba wùú yow.

Wù níé yín buɔ ǹ nãbɩgaaba nã.»

10 Dũnnũw nã̀ã ver ǹ-waa hlo wà: «Yitii, yíi-i fṹũlã́ ɲũũrũũgu cuu nǝ̃ǝ̃m'n bǝ̃ǝ̃gu, nã̀ã nǝ̃ǝ̃ drɔkuɔli nǝ̃ ǹ nãkrɔnɲã.

11 Ɲã-lǝ ɲã̀ min, ɲã̀ ji guu nã, nǝ̃ yíǹ-lǝ, ǹ ji ba fɩraa-i.

Ɲũũrũũgu nǝ̃ drɔkuɔlɩ̀ ji bǝ̃ǝ̃lǝ̃ǝ̃ nã́ã́ kuulaaw mãã wù bǝ̃ǝ̃lǝ̃ǝ̃ nĩĩguu mãã.

12 Ǹ ji pigɩ-ɲã nã́ã́ bà mãã bà pigɩ kuulaacũncurɔw nĩĩguu mãã, bà ji hwar-ɲã nã́ã́ bà mãã bà hwar kuulaacũncurɔw nã nĩĩguu mãã.

Nǝ̃ yíǹ-lǝ, ǹ ji ba ǹ tantammã nã, ǹ bìigà síì ba nǝ̃ kǝr.»

13 Dũnnũẁ sáa hi ǹ-waa nǝ̃ mɛlɛgɛw dɩn yo wà: «Jo ń jiraa mǝ̃̀ nãdĩĩyiɛgu, fuwɔ mǝ̃ ji dii ǹ ɲããtaaba ǹ vyan'n taaragu.»

14 Nǝ̃ mɛlɛgɛba-lǝ, bà min yuflaa-i nǝ̃-ba, bá nǝ̃ Dũnnũ mããcem nã-i bà ce wù tĩɛ̃yaga.

Dũnnũẁ tĩɛ̃ bá ba bà kã bà pɛ cwaaba nã mãã bà saa nǝ̃ korɩmmã.