Hebruba 13

Dìí mãã dɩ̀ dwal Dũnnũw nã

Mã́ã cwanãã, gbǝ̃́ǝ̃lã̀ ɲí ya ɲì ɲĩɛ̃ cɔ̃mmã́ gbǝ̃ǝ̃ ɲì ɲĩɛ̃ nã nã́ã́ ɲũũnãtaa-i nǝ̃-ɲã́ã̀.

2 Bláá sĩĩnǝ̃ǝ̃ díɛ́ nã: bláà ɲì fǝ̃ǝ̃ ɲí mǝ̃gaa ɲì hyar noraaba ɲì swammã nã.

Sulammã nã, badaabà bla dìí nã-i ǹ-ji hyar Dũnnũ mɛlɛgɛba nǝ̃ bà sáa fǝ̃ǝ̃ dɩ̀ nã.

3 Bláà ɲì kãnãã kasoduuntaa'n cɔ̃mmã nã, bláà ɲì ce nã́ã́ ɲí nǝ̃ ɲì min-i nǝ̃-ba kasoduugɩ nã.

Bà mãã bà kãnnã bàá mãã, bláà ɲì kãnãã bàá yo bà cɔ̃mmã nã, ɲí ba ɲì ce nã́ã́ bá kãnnã ɲimãã-i nǝ̃ ɲì hla.

4 Cwaabà min bà saa bá ba bà bũũ cataagǝgu.

Blanĩĩw yindagǝ nã ciɛnĩĩẁ sǝ̃n saa wú kãã mǝ̃rǝ̃ǝ̃ nǝ̃ nǝ̃ǝ̃nĩĩtiiw ǹ-jo nǝ̃ dɩgaagu ǹ-ji piɛ-gǝ suɔ'n cĩĩnũũgu drɔ.

Bàá mãã durkũmnããba, capuɔraaba nǝ̃ blapuɔraaba, Dũnnũẁ ga hã-ba nǝ̃ yuɔrɔmmã.

5 Bláá ya jin'n cɔ̃mmã́ blǝ ɲì yunɲã ǹ-maa cɔ̃mmã min.

Gùú mãã ɲì saa, yáalà gɩ̀-lǝ gɩ̀-i gɩ́ yu ɲì yinɲã, nã̀ã wa Dũnnũw nǝ̃ wù hla wù wáalá wà: «Mǝ̃̀ ji ba mǝ̃̀ ne ǹ nã bǝ̃ǝ̃ wo bǝ̃ǝ̃, mǝ̃̀ síì ya ń ba nǝ̃ ǹ dɩn ǹ-da.»

6 Gùú cíé yì sǝ̃ǝ̃nã, curo wo curo, wú ba wù ji da hyagbǝ̃ngbãndi ǹ-waa wà: «Cuutiiw-i mǝ̃n pyannãtiiw, mǝ̃n síì sɔ̃ cɔ̃m nã.

Curo'n blɩẁ síì gbǝ̃ǝ̃ ǹ-ce-m nǝ̃ kuu.»

7 Ɲì yigantaabaa mãã bà kállá-ɲã́ã̀ nǝ̃ Dũnnũ cãwandi, bláá sĩĩnǝ̃ǝ̃ bà-lǝ bà cɔ̃mmã nã.

Bláà ɲì kãnãã bà cíé gàá mãã cuuw nã fuwɔ ǹ-ga hi bà kuugu.

Túulà bàá nǝ̃ǝ̃l-i Dũnnũ cɔ̃m'n hũɔ̃m'n hlũũgɩ nã.

8 Yesu Kɩrsaẁ sǝ̃n veraa ǹ-da, wù yáá gùú tammã daabǝ̃ǝ̃gu, wú nǝ̃ gùú tammã dɩnmã-i jimãã yo, nǝ̃ wú nǝ̃ nĩĩgɩ-i fɩraa.

9 Blǝ́rà ɲì hla nã, cwaadaabá nìɛ bà kal-ɲã́ã̀ nǝ̃ cɔ̃nplacin gàá mãã gà sǝ sùɔ́gɩ dɩn nǝ̃ Yesu cɔ̃ndudwalɩmmã.

Bláá ya curoẃ vuuraa ǹ-hiil-ɲã́ã̀ Dũnnũ hlũhuhorǝgɩ nã nǝ̃-ga.

Dũnnũw-ń ne ɲì yiɛgu, nã̀ã dii kɩkǝmmã ɲì hiɛga nã, gùú sáalá.

Nã̀ã wa bà mãã bàa kra gùú hlũsǝrɩ nã mãã ǹ-kã ɲããwuun'n yiɛgu, ɲã̀-lǝ ɲã̀ã́ sǝ̃n dii kɩkǝmmã curo'n hiɛga nã.

Bàá mãã bà wáà gɩ̀-lǝ gɩ̀ hlũsǝri, bà wáà-dǝ mǝ̃ǝ̃lǝ̃ǝ̃-i.

10 Yahudyaba puruɔntaa'n yuutiigǝ̃ngãw mãã bà ce mããcemmã Dũnnũ bũũkuɔlɩ nã, bà nũɔ̃gɩ̀ sɩraa hãmĩĩ siimã nã, mã̀-lǝ mã̀-i yì Dũnnũ bũũmã.

11 Yahudyaba Puruɔntaa'n yuuntigǝ̃ngãẁ kã nǝ̃ kwasǝnɲin'n twam-i Dũnnũ nũɔ̃sǝn sùɔ́gɩ nã, ǹ-kãã tũnũũ mã̀ nã ǹ-da ǹ-ce gaacĩɛ̃ya'n dũndɔw, nǝ̃ bà yáá ba-ń ce bá hlǝ nǝ̃ gɩ̀ kwasǝnɲin'n kũɔ̃mã ǹ-kãã tii mã́ hal nǝ̃ cwaa'n kuɔyaga.

12 Gùú tammã dɩnmã nã-i, Yesu yo, wú kãã ku lǝ'n taasǝ̃ǝ̃nǝ̃ǝ̃gɩ nã, wù hla'n twammã, ǹ-da ǹ-per cwaaba nã.

13 Gɩ̀ sùɔ́gɩ nã, yáalà yí hlǝ lǝ'n kusuugɩ nã, yí kã wù nãã taasǝ̃ǝ̃nǝ̃ǝ̃gu, ba ga ba bà tuuraa yì nã yì min nǝ̃-yǝ.

14 Nã̀ã wa cuuw nã nhlíɛ̀, yi sǝ nǝ̃ lǝ dìí mãã dɩ̀ ji ba fɩraa, gùú cíé yí ba yì caa gùú lǝri mãã dɩ̀ ji ba fɩraa, dɩ̀-i Dũnnũ dǝlli.

15 Gɩ̀ sùɔ́gɩ nã, ǹ-ya yi ba Yesuw nã, yáalà yì Dũnnũbũũgǝgɩ́ ba yì siijãnũũgu bǝ̃ǝ̃ wo bǝ̃ǝ̃.

Dɩ̀ yuugɩ-i wà yi saa yí ba yì hiil yì yalli yì bũũ Dũnnũw nǝ̃ yì nɔ̃nɲã.

16 Bláá sĩĩnǝ̃ǝ̃ diifɩnfar'n cellɩ nã, nǝ̃ ɲí ba ɲì pɛ ɲi ɲĩɛ̃ nã.

Gɩ̀-lǝ gùú gaaciega-i siimãã mãã mã̀ dwal Dũnnũw nã.

17 Bláà ɲì nɔ̃ ɲì hã ɲì yigantaaba, nǝ̃ ɲí hɩr ɲì hla nã ɲí hã-ba.

Sulammã nã, bà-lǝ bàá cíilà ɲì yuflaaba nã, Dũnnũẁ ga yugu bà-lǝ bà-i cicuɔgu.

Bláà ɲì ce dɩ̀-lǝ bá da ǹ-ba bà ce bà mããcemmã dudwalɩmmã nã, gɩ̀ báa ba nǝ̃ yigaɲǝ̃ǝ̃gǝgu bà nã.

Nã̀ã wa dɩ-ń ba dɩ̀ sáa ba gɩ̀-lǝ tammã, ɲimãã yo ɲì hlǝmmã sɩraa dɩ̀ kusuugɩ̀ nã.

18 Bláà ɲì cirǝ̃ǝ̃ Dũnnũw nã ɲì hã-yáà.

Yí nǝ̃ yìi piɛ yì nãkruɔgu dɩ̀ nã wà yì hiɛga sǝ̃n car-yáà nǝ̃ cɔ̃m yì gaacie'n kusuugɩ nã.

Yi caa yí ba yì ce diifɩnfaar-i bǝ̃ǝ̃ wo bǝ̃ǝ̃.

19 Dìí mãã mǝ̃̀ ji waa dɩ́ gbǝ̃ǝ̃ nǝ̃-ɲã́ã̀, dɩ̀-i ɲí ba ɲì cirǝ̃ǝ̃ Dũnnũw nã ɲì hã-m, mǝ̃́ da ǹ-ver ǹ-kã ɲì nãã kaliɛ kaliɛ.

Fyãnuufaalaagu

20 Sɩsɩrãmntii Dũnnũẁ pĩ́ĩlã́ Yitii Yesu Kɩrsaw mãã yì wanciigǝ̃ngãw ǹ-hiil-yǝ cugutaaba sǝ̃ǝ̃nã nã̀ã tuu wù twammã ǹ-ce yí ɲũɔ̃ twanflãmmã nǝ̃-yǝ.

Gɩ̀-lǝ gɩ̀ twanɲũɔ̃flĩɛ̃gɩ nǝ̃ fɩraa-i.

21 Dũnnũẃ pya ɲì nã, ɲí ba ɲì gbǝ̃ǝ̃ ɲì ce gaafɩnfiɛga, ǹ-da ǹ-ba ɲì ce wù kusunã cɔ̃mmã.

Wú ta Yesu Kɩrsa nã-i wù ce yí ba yì gbǝ̃ǝ̃ yì ce dìí mãã dɩ̀ dwal wù nã.

Wù yiirɩ́ bũũ fɩraa!

Kwaya.

22 Mã́ã cwanãã, mǝ̃n gbǝ́ǝ́ ɲì nã nǝ̃ gùú cãwanĩɛ̃ga mãã nnĩĩ, mǝ̃̀ cirǝ̃ǝ̃ ɲì nã wà gà nɔ̃llɩ nã, ɲí fɛ̃ ɲì hiɛga.

Nã̀ã wa mǝ̃̀ sáa yal gá ɲũrũɔ̃ ǹ-car.

23 Mǝ̃̀ caa ɲí fǝ̃ǝ̃ wà ba gáa hiil yì cwanĩĩ Timotew kasoduugɩ nã ǹ-nǝ̃nǝ̃ǝ̃ wù nã.

Wu-ń gǝǝ ǹ-hi mǝ̃̀ nãã fufa, yi ji kã yì min nǝ̃-yǝ ǹ-ga hlǝ ɲì nãã.

24 Fyã́nnã̀ ɲì yigantaaba min nǝ̃ Kɩrsa bluuba min ɲí hã-m.

Yì cwanããbaa mãã Italiigu, bàá yo bà hlã-ɲã́ã̀ nǝ̃ fyãnuugu.

25 Dũnnũẃ ne ɲì min yiɛgu.