Tim. hǝ̃ǝ̃lnãw 3

Dìí mãã dɩ̀ ji ce cuu tãl'n bǝ̃ǝ̃gu

Ǹ mãã ǹ saa ń fǝ̃ǝ̃ dìí mãã dɩ́ kaalaa ǹ yuugɩ nã, dɩ̀-i nnĩĩ: cuu tãl'n bǝ̃ǝ̃gu, yunɲãã mãã ɲã̀ã gbǝ̃ǝ̃, ɲã̀ ji ba dìɛ.

2 Sulammã nã, cwaabà ji blǝ bà hla'n cɔ̃mmã́ dwal bà nã ǹ-maa bà nã cwaa'n cɔ̃mmã, jin'n cɔ̃mmã̀ ji gbǝ̃ǝ̃ bà nã, bà ji ba mǝ̃ǝ̃lǝ̃ǝ̃yircaagǝgɩ nã bà hla nã, nã̀ã ba bà buɔ bà hla nã nǝ̃ cwaa'n dɩgaliɛw, bà ji suro ǹ-ba bà waa bà jãn Dũnnũw nã, bà síì ba bà nɔ̃ bà hã bà huutaaba, bà ji ba sɩfǝ̃ǝ̃dwaarnãba, nã̀ã ba bà sǝ̃n bũũ Dũnnũw.

3 Bà hiɛgà ji ba gà gbǝ̃ǝ̃, bà síì ba bà sɔ̃ hujãn, bà ji ba bà hiil cãwanĩɛ̃bɩbliɛga bà nɔ̃nɲã nã, bà síì ba bà fǝ̃ǝ̃ bà blǝ bà hla nã, bà ji bla nã́ã́ jerbɩganãã-i, diifɩnfaarɩ̀ síì ba dɩ̀ dwal bà nã.

4 Gɩ̀-lǝ gɩ̀ bǝ̃ǝ̃gu, cwaadaabà ji ba bà hlǝ badaba'n furũũgɩ nã, bà ji ba tɔ̃njãnsǝrɩ nã, bà ji ba bà huɔruɔ bà hla nã, bà yisɩnã cɔ̃mmã̀ ji ba mã̀ dwal bà nã ǹ-ɲǝ̃ǝ̃ Dũnnũ cɔ̃mmã.

5 Bà ji ce bà hla nã́ã́ cwaabaa mãã bàa ɲǝ̃gãr Dũnnũ cɔ̃mmã nã, nǝ̃ yàá bà kusunɲã nã bà sǝ bàa hũɔ̃ wù fãngããgu.

Ver ǹ furũũgu ń hã gɩ̀ cwaa'n tuugu.

6 Nã̀ã wa gɩ̀ cwaaba sǝ̃ǝ̃nã, badaabà ji jãn swammã nã, ǹ-vuuraa ǹ-blǝ canããbaa mãã mǝ̃nkurnǝ̃ǝ̃ba, gaacĩɛ̃yagàa car bà nã, nã̀ã ba bà duu bà yisɩnã cɔ̃ncindɩ nã.

7 Gɩ̀ canãã'n tuu-lǝ, bá nǝ̃ ǝ̃ǝ̃lãmmã nã-i bǝ̃ǝ̃ wo bǝ̃ǝ̃, nǝ̃ bà sǝ̃n gbǝ̃ǝ̃ ǹ-fǝ̃ǝ̃ sulammã ǹ-da.

8 Fufodii, Janɛsiba nǝ̃ Jãmbrɛsɩw^a, bà sórrá Musaw yuunã nĩĩguu mãã, cwaa báàba tuugɩ́ suro sulammã yuunã nnĩĩ-i.

Cwaadaba-i, bà kãnɩmmã̀ sǝ̃n fa, nǝ̃ bà hũɔ̃m yo, mã́ ba mã̀ sǝ̃n pyar dugɔ.

9 Nǝ̃ bà síì kã halɩm nã, nã̀ã wa nĩĩguu mãã cwaabà jáa fǝ̃ǝ̃ Janɛsiba nǝ̃ Jãmbrɛsɩ bà baahãrsǝrɩ nã, gùú tãmmã dɩnmã nã-i cwaaba min bà ji da bà baahãrsǝri gbaa.

Polẁ hã Timotew nǝ̃ cɔ̃nfǝ̃ǝ̃gǝgu

10 Nǝ̃ yíǹ-lǝ, ń nìɛ ǹ duu mǝ̃̀ nã cɔ̃mmã min nã: kalɩmmã nã, ǹ-waa sũɔ̃lɩmmã nã, mǝ̃̀ kusunã cɔ̃mmã nã, nǝ̃ mǝ̃̀ hũɔ̃m'n cɔ̃m yo Dũnnũw nã, mǝ̃̀ hyafɛ̃gǝgɩ nã, cwaa'n cɔ̃mmã̀ dwállá mǝ̃̀ nã nĩĩguu mãã, nǝ̃ mǝ̃̀ mãã mã̀ã hiraa dɩ̀ nã vyanɲã hǝ̃ǝ̃l nĩĩguu mãã.

11 Ǹ díɛ́ cwaabà cúɔlá-m nĩĩguu mãã, nǝ̃ mǝ̃̀ gbǝ̃́ǝ̃lã́ ǹ-hũɔ̃ gùú ywaruugu Ãtiyɔsɩ lǝri, Ikoniyɔm lǝri nǝ̃ Lisɩtɩr lǝri.

Cuɔlɩm hamã tuu-i mǝ̃̀ sáa da-mã, nǝ̃ Yitiiw híilá-m mã̀ min nã.

12 Sulammã nã, bàá mãã bà caa bá ɲǝ̃gãr Dũnnũ cɔ̃mmã nã Yesu Kɩrsaw nã, cwaabà ji cuɔl-ba.

13 Nǝ̃ cobɩbliɛbaa mãã bà vuu bà ce, bà-lǝ bà blasǝrɩ̀ kã nǝ̃ yiga dɩndɩn-i, bà vuu cwaaba, nǝ̃ bàá yo, badaabà ji vuu-ba.

14 Nǝ̃ yíǹ-lǝ, ǹ fǝ̃́ǝ̃lã́ ǹ kállá cɔ̃m mã́ã̀ gùú yuuntii saa.

Gɩ̀ sùɔ́gɩ nã, ǹ kállá dìí mãã, ɲǝ̃gãr dìí nã-i, dìí mãã nã̀ã hũɔ̃-dǝ kwelle.

15 Ǹ fǝ̃́ǝ̃lã́ Dũnnũ cãwan'n sɛbɛba ǹ baasaalsǝrɩ nã-i dìi.

Bà-lǝ bàá ji gbǝ̃ǝ̃ ǹ-hã-n nǝ̃ cɔ̃nfǝ̃ǝ̃gǝgu ń da korɩmmã Yesu Kɩrsaw nã, nǝ̃-ń hũɔ̃ wù cɔ̃mmã.

16 Dũnnũ cãwan'n sɛbɛbà wáalá kuu wo kuu, gɩ̀ hlǝ́rá Dũnnũ nũɔ̃ nã-i.

Gɩ̀ sɛbɛbà pyar yì dugɔw nã̀ã wa bà-lǝ bàá ji gbǝ̃ǝ̃ ǹ-kal-yáà, ǹ-dii-yáà hlũũgɩ nã, ǹ-ciir-yáà, nã̀ã ba bà pɩgaa-yáà, yi mãã yì ji fǝ̃ǝ̃ ǹ-blǝ yì hla nã sũɔ̃lɩmmã nã gùú tammã.

17 Dũnnũ cãwandɩ̀ cíé dɩ̀-lǝ ǹ-da ce Dũnnũ cwaabá mǝ̃gaa ǹ-tɩgɩnǝ̃ǝ̃, ǹ-saa cwaabaa mãã bà maar gaafɩnfiɛga min celli.