Tim. hǝ̃ǝ̃lnãw 2

Timoteẁ saa wú hũɔ̃ ywaruugu Yesu cɔ̃mmã nã

Gɩ̀ sùɔ́gɩ nã, mã́ã bíɛ́ yíì, yaala ń ba ǹ-da fãngããgu ǹ-pya nã ǹ kusufɩnfaagɩ nã mãã gɩ̀ hlǝ Yesu Kɩrsaw nã.

2 Mǝ̃̀ kállá-n nǝ̃ gùú kalɩmmãã mãã nǝ̃ cocindɩ́ da-mã nã̀ã nɔ̃-mã, dii-mã yalntii'n nãkruɔ nã, bàá mãã bà bǝ̃ǝ̃gɩ-ń ji hi, bàá yo, bá ba bà ji gbǝ̃ǝ̃ ǹ-kal badaba nǝ̃-mã.

3 Yíi yo ǹ saa ń da ǹ ywaruu'n guɔgu nã́ã́ Yesu Kɩrsa sɩrǝǝsɩhuhoryǝ-i.

4 Sɩrǝǝsɩw mãã mããcemmã nã, nã̀ã ba wù caa wù cɔ̃mmã́ dwal wù yuuntiiw nã, wù sǝ̃n ya cuu ɲin'n cɔ̃mmã́ blǝ wù yuugu.

5 Bàá mãã bà ɲǝ̃ǝ̃ susɔ̃llɩ nã, bà síì gbǝ̃ǝ̃ ǹ-hã curow nǝ̃ drapow wà wùú ɲǝ̃́ǝ̃lã́ bà min, nã́ã̀ gɩ̀ tiiw sáa sɔ̃ ǹ-vaa nǝ̃ bà kárrá gùú hlũsǝrɩ nã mãã, ǹ-hã-ba ɲǝ̃ǝ̃m mã́ã̀ nã.

6 Sɩkũɔ̃rw mãã wù ce mããcegbǝ̃ǝ̃mã, wù-lǝ wùú sáalà wú tɩgii dũdĩɛ̃lãmmã.

7 Mǝ̃̀ mãã mǝ̃̀ waa kuu wo kuu mãã nǝ̃-n, mǝ̃gaa ń blǝ-gǝ ń ne, nã̀ã wa Yitiiw ji ce ń gbǝ̃ǝ̃ ǹ-fǝ̃ǝ̃ gà min.

8 Kãnãã Dawuda furũntii Yesu Kɩrsa cɔ̃mmã nã ń ne, wùú mãã Dũnnũẁ pĩ́ĩlã́ ǹ-hiil-yǝ kúúgɩ nã.

Mǝ̃̀ kal cwaaba nǝ̃ gɩ̀-lǝ gùú cɔ̃ndudwalɩmmã-i.

9 Gɩ̀-lǝ gùú cɔ̃ndudwalɩm'n cɔ̃mmã nã-i mǝ̃́ ba ywaruugɩ nã, ǹ-ba jɔrgɔba nã, nã́ã́ cobal-i nǝ̃-m.

Nǝ̃ Dũnnũ cãwan-lǝ, dɩ̀ sǝ kasow nã.

10 Gùú cíé mǝ̃́ hũɔ̃ cɔ̃mmã min mǝ̃̀ hla nã, ǹ-da ǹ-pya gùú cwaaba nã mãã Dũnnũẁ níé ǹ-hiil-ba, bàá yo, bá da ǹ-da korɩmmã Yesu Kɩrsaw nã, nǝ̃ bũũmãã mãã mã̀ síì tã ǹ-da.

11 Mǝ̃̀ wáalá dìí nǝ̃-n, dɩ̀ káaláa wà cãwaahuhordǝ-i: Yi-ń ba yìi ku nǝ̃ Yesuw, yi ga ba nũmǝ̃nãw nǝ̃-yǝ.

12 Yi-ń hiraa dɩ̀ dɩndɩ nã, yi ga jiraa yì min nǝ̃-yǝ wù yuuntasǝrɩ nã, nǝ̃ yi-ń hla-yǝ, wùú yo wù ga hla-yáà.

13 Hãmĩĩ, yi-ń ba yì sǝ yalntaaba-i yo, wù-lǝ wú nìɛ wùu ba yalntasǝrɩ nã.

Nã̀ã wa wù-lǝ wù sǝ̃n gbǝ̃ǝ̃ wù car wù hla.

Timoteẁ saa wú ba mããcierw mãã wù dwal Dũnnũw nã

14 Ǹ saa ń ce cwaabá ba bà kãnãã gà-lǝ gà min nã.

Cirǝ̃ǝ̃ bà nã dɩ́ gbǝ̃ǝ̃ wà ba báa ba bà gãnãã cãwandi drɔ.

Gɩ̀-lǝ gɩ̀ byaarɩ̀ sǝ̃n pyar dugɔ gɩ-ń ba gɩ̀ sǝ̃n wa dɩ́ bǝ̃ǝ̃lǝ̃ǝ̃ bàá mãã bà nɔ̃-dǝ bà nã sǝ.

15 Gbǝ̃ǝ̃ ń pɩgaa ǹ hla ń ja Dũnnũw, wà mããcier-i nǝ̃-n, wùú mãã yà saa nǝ̃-yǝ.

Nã̀ã ba wù sǝ̃n sɔ̃ ciir wù mããcemmã nã, nã̀ã ba wù waa sulam'n cãwandi sũɔ̃lɩmmã nã.

16 Hla mǝ̃ǝ̃lǝ̃ǝ̃cãwanĩɛ̃gaa mãã gà sǝ̃n kã yiɛgɩ dɩn nǝ̃ Dũnnũ hlũũgu.

Bàá mãã bà waa gɩ̀ cãwanĩɛ̃'n tuugu, bà-lǝ bà nǝ̃nǝ̃ǝ̃ Dũnnũ hlũũ nã-i bà maar.

17 Gɩ̀ tuutaa'n cãwanĩɛ̃gà ce bǝ̃ǝ̃lǝ̃mmã, nã́ã́ tapǝ̃ǝ̃gɩ̀ mãã gɩ-ń ce gɩ́ hwar ǹ-bǝ̃ǝ̃lǝ̃ǝ̃ cãnkũɔ̃mã nã nĩĩguu mãã.

Gùú cwaa'n tuugɩ-i Imeneba nǝ̃ Filɛtɩw.

18 Bá nǝ̃ bàa ver bà furũũgu ǹ-hã sulammã, ǹ-ba bà waa wà cugutaa'n pĩĩmã cíé ǹ-tã, nã̀ã ba bà bǝ̃ǝ̃lǝ̃ǝ̃ badaba'n hũɔ̃mã nã.

19 Nǝ̃ dɩ̀-lǝ dɩ̀ min drɔ, Dũnnũ bluu-lǝ bá nìɛ bàa sa ǹ-cii kwelle.

Cãwanĩɛ̃ gáá-i gàa yal bà nã wà: «Yitiiẁ fǝ̃ǝ̃ bàá mãã wù bɩgaaba.»

Nã̀ã yal hlo wà: «Curo wo curo, wu-ń wa wù-lǝ Yitii'n yo-i, wù saa wú hal gaabɩbliɛga nã.»

20 Dogǝ̃ngããgu kusunã, nũɔ̃sǝn wariɛga-ń ce gá ba dàa, sãnã wariɛga nǝ̃ kwaplar'n yaga.

Nǝ̃ gàá mãã gà sǝ̃n kuusǝ, gàá yo, ga-ń ce gá ba dàa; dawariɛga nǝ̃ mǝ̃raa'n yaga.

Gaadĩɛ̃lããgà hlǝ nũɔ̃sǝn yun'n cɔ̃m nã-i, nǝ̃ gadaa gáàgá ba nǝ̃ǝ̃nĩĩyun'n cɔ̃mmã nã.

21 Dɩ́ nǝ̃ nnĩĩ-i Kɩrsa bɩgaaba yo bà saa.

Gùú tii mãã wu-ń per wù hla nã nǝ̃ gɩ̀ gaabɩbliɛga, wù ji ba nã́ã́ nũɔ̃sǝn wariɛgaa mãã bàa kra gà nã gà dǝ ǹ-hã Dũnnũw, nã̀ã ba gà pyar gà tii'n dugɔw.

Gɩ̀ tuutiiẃ nǝ̃ wùu tɩgɩnǝ̃ǝ̃ ǹ-ba wù ji ce gaafɩnfiɛ'n plaaga min.

22 Gɩ̀ sùɔ́gɩ nã, Timote, gùú yisɩnã cɔ̃mbɩblammãã mãã pũmpǝraaba nã, da-mã nǝ̃ mã́ ba.

Ba ǹ caa sũɔ̃lɩmmã, nǝ̃ ń vĩĩ ǹ hũɔ̃mã nã.

Ya cwaa'n cɔ̃mmã́ dwal ǹ nã, nǝ̃ ń kã ɲi ba ɲì min sɩsɩrãmmã nã nǝ̃ bàá mãã bà be Yitii'n yiiri nǝ̃ hyapesǝyaga.

23 Hiil ǹ nũɔ̃gu baahãrsǝ'n cãwanĩɛ̃ga nã nǝ̃ mǝ̃ǝ̃lǝ̃ǝ̃cincaruugɩ nã, ǹ fǝ̃́ǝ̃lã́ wà ɲã̀ã́ jówà nǝ̃ byaari.

24 Nǝ̃ Yitii'n mããcier-lǝ, wù sǝ̃n saa wú ba wù ce byaari.

Wù saa wú blariɛ nǝ̃ cwaaba min, nã̀ã ba wù gbǝ̃ǝ̃ wù kal-ba, nã̀ã ba wù fɛ̃ wù hiɛga nǝ̃ diibɩblaari.

25 Bàá mãã bà car-yǝ, wù saa wú blariɛ wù hla nã nã̀ã dii-ba hlũũgɩ nã.

Dɩ̀ ji gbǝ̃ǝ̃ ǹ-ce wà Dũnnũw ji ya bá nǝ̃nǝ̃ǝ̃ nã̀ã tuu ǹ-tu, ǹ-da fǝ̃ǝ̃ sulammã dugudugu,

26 bá da ǹ-ɲǝ̃ǝ̃ kãnãã nã̀ã kor bà hla nã nǝ̃ tiilǝtii'n jarnjĩɛ̃w mãã yà blǝ-ba wù nã, bá ba bà ce wù kusuugu.