Tim. hǝ̃ǝ̃lnãw 1

Timote sɛbɛba hǝ̃ǝ̃lnãw

Polẁ yállá gùú sɛbɛba hǝ̃ǝ̃lnãw ǹ-hã Timotew

Pol fyãnuugu

Mã́ã Pol, mã́ã̀ mãã Yesu Kɩrsa tĩɛ̃tiiw, ǹ-vaa nǝ̃ Dũnnũ kusuugu, mã́ã yállà sɛbɛ wáà.

Dũnnũẁ plã wù nũɔ̃gu wà wu ji hã-yáà nǝ̃ gùú nũmǝ̃nãsǝri mãã Yesu Kɩrsa cɔ̃mmã nã, Dũnnũẁ wáalá nǝ̃ mǝ̃n-lǝ mã́ã-i wà mǝ̃́ tu-dǝ nǝ̃ cwaaba.

2 Timote, yíǹ-lǝ yíi-i mǝ̃̀ bíɛ́ cituublɩw.

Mǝ̃̀ yal sɛbɛ wáà mǝ̃̀ hã yíi-i.

Tiiyǝ Dũnnũw, nǝ̃ Yesu Kɩrsaw mãã Yitiiw, bá ne ɲì yiɛgu, ǹ-sɔ̃ ɲì hujãndi nã̀ã hã-ɲã́ã̀ nǝ̃ hyasɩrãgǝgu.

Polẁ waa nǝ̃ Timotew wà wú ba yalntiiw

3 Mǝ̃̀ dũũ kwayaw mǝ̃̀ hã Dũnnũw, nã̀ã ba mǝ̃̀ bũũ-yǝ nã́ã́ yì tǝvũnvãnããbà cíé-dǝ nĩĩgu mãã, mǝ̃̀ hiɛgà sǝ̃n car-m nǝ̃ cɔ̃m.

Yisuɔ nǝ̃ bǝ̃ǝ̃nã mǝ̃̀ be ǹ yiiri, mǝ̃̀ mãã mǝ̃-ń ba mǝ̃̀ cirǝ̃ǝ̃ Dũnnũw nã mǝ̃̀ hã-n.

4 Mǝ̃́ nìɛ mǝ̃̀ kãnãã ǹ ɲiɲirãmmã nã, gùú cíé mǝ̃́ ba mǝ̃̀ caa mǝ̃́ da-n, ǹ-da ǹ-ba dudwalɩmmã nã dugɔ.

5 Ǹ sáa ce ǹ hũɔ̃mã nǝ̃ kusunɲã hǝ̃ǝ̃lɲã, mǝ̃̀ kãnãã dɩ̀-lǝ dìí nã-i.

Ǹ ɲũvũnvũɔ̃ Loyisɩw, bá nǝ̃ ǹ ɲũ Enisɩ yo, bà yáá nǝ̃ gɩ̀-lǝ gùú hũɔ̃m'n plǝrɩ dɩndɩ-i.

Mǝ̃̀ hṹɔ̃lã́ dɩ́ kaalaa wà gùú hũɔ̃mã dɩnmã-i yíi yo ǹ saa.

6 Gùú cíé mǝ̃́ ba mǝ̃̀ ji ce ń kãnãã díɛ́dɩ nã: Ǹ díɛ́ gùú fãngããguu mãã gùú nã mãã mǝ̃̀ píɛlá mǝ̃̀ nãkrɔnɲã ǹ nã, ver ń mǝ̃gaa ń ce mããcemmã nǝ̃-gǝ.

7 Sulammã nã, Dũnnũẁ mãã wù hã-yáà nǝ̃ gùú yuflǝw mãã, wù sǝ̃n dii gbǝrsǝ sǝ yì nã, nǝ̃ wù hã-yáà nǝ̃ fãngãã-i, nã̀ã ba wù ce yí ba yì ya cwaa'n cɔ̃mmã́ ba mã̀ dwal yì nã, nǝ̃ yí ba yì fǝ̃ǝ̃ yì hla'n blǝmmã.

8 Gɩ̀ sùɔ́gɩ nã, ǹ sǝ̃n saa ń ya ciirɩ́ blǝ-n nǝ̃ Yitii'n cɔ̃m'n waamã.

Báa ya ciirɩ́ blǝ-n mã́ã yo mǝ̃̀ cɔ̃mmã nã wà mǝ̃́ mãã kasoduugɩ nã wù cɔ̃mmã nã.

Nǝ̃ hũɔ̃ yí ywar yì min nǝ̃-m Yesu cɔ̃ndudwalɩm'n cɔ̃mmã nã nǝ̃ fãngããgu mãã Dũnnũ hlã-n nǝ̃-gǝ.

9 Wù-lǝ wùú kórrá-yáà, nã̀ã be-yáà yí ba wùú bɩgaaba.

Gɩ̀ sáa ce nã́ã́ yì gaafɩnfiɛ'n cɔ̃m nã-i dɩ̀-lǝ dɩ́ ce, nǝ̃ wù mãã wù yáá wùu blǝ-dǝ wù kusuugɩ nã wà wu ji ne yì yiɛgu, gùú cíé.

Wù tíɛ́ Yesu Kɩrsaw nã-i ǹ-ce dɩ̀-lǝ, nǝ̃ cuuw ji da wú nǝ̃ǝ̃.

10 Nǝ̃ yindiɛ, wù pɩ́gará-dǝ gbaa ǹ-ja-yáà wà wu níé yì yiɛgu, gùú nã mãã yì Kortii Yesu Kɩrsaẁ júó yí da-yǝ.

Wù-lǝ wùú bǝ̃́ǝ̃lǝ̃́ǝ̃ kúú'n fãngããgɩ nã nǝ̃ wù cɔ̃ndudwalɩmmã, nã̀ã dii nũmǝ̃nãsǝri nǝ̃ fɩraa nũmǝ̃nãsǝri, gbɩgbaamã nã.

11 Dũnnũẁ tĩ́ɛ̃lã́-m wà mǝ̃́ juo waa gɩ̀-lǝ gùú cɔ̃ndudwalɩm'n cɔ̃mmã-i ǹ-ja cwaaba, nã̀ã ba wù tĩɛ̃tiiw, nã̀ã kal-ba nǝ̃ cɔ̃ndudwalɩm mã́ã̀.

12 Gùú cɔ̃mmã nã-i, mǝ̃́ ba ywaruu gúɔ̀ nã.

Nǝ̃ gɩ̀-lǝ gɩ̀ sǝ̃n ce cir mǝ̃̀ nã, nã̀ã wa mǝ̃̀ mãã mã̀ã hũɔ̃ gùú tii'n cɔ̃mmãã mãã mǝ̃̀ fǝ̃́ǝ̃lã́-yǝ dugudugu.

Wù díilá gùú ɲinɲãã mãã mǝ̃̀ nãkruɔgɩ nã wà mǝ̃́ ba mǝ̃̀ ne ɲã̀ nã, fãngããgɩ́ nǝ̃ wù saa wú ba wù ji cii ɲã̀ nã fuwɔ ǹ-ji hi Dũnnũ sugojaryuugu, mǝ̃́ nǝ̃ mã̀ã piɛ mǝ̃̀ nãkruɔgu dìí nã-i.

13 Mǝ̃̀ kállá-n nǝ̃ gùú kalɩmhuhorɩmmãã mãã, ba nĩĩgɩ-i, ǹ hũɔ̃mã, nǝ̃ yi mãã nǝ̃ gùú kusufɩnfaaguu mãã Yesu Kɩrsaw nã, ɲã̀ã́ ji ce ń gbǝ̃ǝ̃ ǹ-ce-dǝ.

14 Gùú ɲinhuhoranɲãã mãã bà díilá-ɲã ǹ nãkruɔgɩ nã, Dũnnũ Yuflǝw mãã yì nã, wú pɛ ǹ nã ń fǝ̃ǝ̃ ǹ-ɲãl ɲã̀ nã.

15 Ǹ fǝ̃́ǝ̃lã́ wà Asii yiɛntaaba min bá nǝ̃nǝ̃ǝ̃ mǝ̃̀ nã.

Figɛlw, bá nǝ̃ Ɛrmogɛnɩw, bàá yo bá nàa gɩ̀ cwaaba sǝ̃ǝ̃nã.

16 Yitii Dũnnũẃ fɩraa wù hujãndɩ nã ǹ-suu Onesifɔr suɔntaaba nã, nã̀ã wa bǝ̃ǝ̃cin nã, wù sɩrĩɛ̃ mǝ̃̀ hiɛga nã.

Nǝ̃ halle ǹ-da wà mǝ̃́ nǝ̃ kasoduugɩ nã, wù sáa ne mã̀-lǝ mã́ ba circɔ̃m wù saa,

17 wù hillɩ nã Wurɔmgu, wú caaraa mǝ̃̀ nã fuwɔ ǹ-ga da-m.

18 Sugojaryuugu, Yitiiẃ ce Dũnnũw ga ne wù hujãndi.

Wù cíé cɔ̃m wo cɔ̃mw mãã ǹ-hã-m Efɛsɩ lǝri, ǹ fǝ̃́ǝ̃lã́-mã ǹ-ɲǝ̃ǝ̃ cwaaba min.