Tim. hǝ̃ǝ̃lnãw 4

Mǝ̃̀ cirǝ̃ǝ̃ ǹ nã dɩ́ gbǝ̃ǝ̃ Dũnnũ yinɲã nã, nǝ̃ Yesu Kɩrsa yinɲã, wùú mãã wù ji jar nũmǝ̃nãtaaba nǝ̃ cugutaa'n sugolli, mǝ̃̀ cirǝ̃ǝ̃ ǹ nã Yesu Kɩrsa jol'n cɔ̃mmã nã nǝ̃ wù yuuntasǝ yo dɩ̀ cɔ̃mmã nã wà:

2 gùú bǝ̃ǝ̃guu mãã cwaabà caa bá nɔ̃ Dũnnũ cãwandi, yindagǝ nã bà sǝ̃n caa bá nɔ̃-dǝ, tu bà nã, pɩgaa-ba nǝ̃ bà yuɔrɔmmã, hã-ba nǝ̃ hyagbǝ̃ngbãndi, bǝ̃ǝ̃ wo bǝ̃ǝ̃, ba ǹ pɩgaa-ba nǝ̃ hyafɛ̃gǝgu bà kalɩmmã nã.

3 Sulammã nã, bǝ̃ǝ̃daagɩ̀ ji hi, cwaabà síì ba bà hũɔ̃ kalɩmhuhorɩmmã.

Bà ji ba bà caa bá ba bà duu bà hla'n yisɩnã cɔ̃mmã nã.

Bà ji be cokalliɛcindɩ́ juo caliɛ bà nã, ǹ-ba bà waa bà dìí mãã dɩ̀ dwal bà nã.

4 Bà ji hla sulam'n nɔ̃lli nã̀ã ba haasǝ gaataaya'n waamã nã.

5 Nǝ̃ yíǹ-lǝ, mǝ̃gaa ń blǝ ǹ hla nã cɔ̃mmã min nã, gbǝ̃ǝ̃ ń hũɔ̃ ywaruugu ǹ hla nã, gbǝ̃ǝ̃ ń pisɩrĩɛ̃ Yesu cɔ̃ndudwalɩmmã nã, nǝ̃ ǹ mãã ǹ saa ń ce gùú mããcemmãã mãã Dũnnũ mããcemmã nã gbǝ̃ǝ̃ ń dii ǹ yuugu mã nã.

6 Nǝ̃ mǝ̃n-lǝ, mǝ̃̀ tal'n bǝ̃ǝ̃gɩ̀ híí cuu wáá nã.

Mǝ̃́ nǝ̃ nã́ã́ siijãnkwãmmãã mãã bàa ba bà tũnũũ mã̀ nã.

7 Mǝ̃̀ nárrá narɩmhuhorɩmmã, ǹ-sɔ̃ susɔ̃lhuhordǝdi fuwɔ ǹ-ga hi gɩ̀ kǝǝri, nã̀ã ba yalntiiw Yesu cɔ̃m'n kalɩmmã nã fuwɔ gɩ̀ kǝǝrɩ nã.

8 Nǝ̃ yindiɛ-lǝ, mǝ̃̀ mãã mǝ̃̀ jáa gbǝ̃ǝ̃ ǹ-hi, gɩ̀-lǝ gɩ̀ bɩnǝ̃m'n hucuugɩ́ nàa gɩ̀ fennãã mǝ̃̀ nã.

Curo nǝ̃-ń sũɔ̃l, ǹ mãã ǹ da gùú pãlli mãã dɩ̀-i nĩĩgu, Yitiiw, wùú mãã sugojarrasũɔ̃lyǝw wù ga pã-m nǝ̃ dɩ̀-i yufaalgǝ'n yuugu.

Wù sɩga pã mã́ã dɩn sǝ nǝ̃-dǝ, nǝ̃ bàá bà minw mãã bà fennãã wù jollɩ nã nǝ̃ dwalɩmmã, yí da ǹ-da-yǝ, wù ga pã bàá yo nǝ̃-dǝ.

Polẁ cirǝ̃ǝ̃ Timotew nã wà wú juo hlǝ wù nãã

9 Gbǝ̃ǝ̃ ń duu mǝ̃̀ nã ń jo ǹ gbɩraanã.

10 Sulammã nã, kuɔkuɔ cuu wáà cɔ̃mmã̀ dwal Demasɩw nã, gùú cíé wú nǝ̃nǝ̃ǝ̃ mǝ̃̀ nã nǝ̃ mǝ̃̀ dɩn nã̀ã ta Tesalonikɩ lǝri.

Kresãsɩẁ tíɛ́ Galasii yiɛgu, nǝ̃ Titɩẃ ta Dalmati yiɛgu.

11 Lukaw dɩndɩn-i dìɛ nǝ̃-m.

Tuu Markaw ɲí jo ɲì min nǝ̃-yǝ mǝ̃̀ nãã, nã̀ã wa wú nǝ̃ wùu saa, ǹ-ba wù ji pya mǝ̃̀ nã Dũnnũ mããcemmã nã.

12 Mǝ̃̀ tĩ́ɛ̃lã́ Tisikɩẃ ta Efɛsɩ lǝri.

13 Nǝ̃-ń ga ba ǹ jo, jo nǝ̃ mǝ̃̀ yɔ'n kuulaaw mãã mǝ̃̀ tíɛ́ nǝ̃ wú ba Trowasɩ lǝri, Karpisɩ kuugɩ nã, nǝ̃ ń jo nǝ̃ mǝ̃̀ sɛbɛba yo, nǝ̃ nǝ̃-ń ce n báa ga sĩĩnǝ̃ǝ̃ mǝ̃̀ cãlũn'n sɛbɛba nã, nũɔ̃sǝn bɩgaa-i.

14 Flãbiɛ Alɛkɩsãdrɩẁ cíé-m nǝ̃ gaabɩbliɛcin, Yitiiẁ ji pã-yǝ ǹ-vaa nǝ̃ wù gaaciega.

15 Yíi yo, blǝ ǹ hla nã nǝ̃-yǝ, nã̀ã wa yi yáá yì kal cwaaba nǝ̃ dìi, wù sórrá dɩ̀ yuunã ǹ-ciɛ ǹ-cii nǝ̃ fãngããgu.

16 Gùú nã mãã mǝ̃̀ dĩ́ɛ̃lã́ ǹ-hillaa sugojarriɛ'n yigagɩ nã, ǹ-ba mǝ̃̀ ga waa ǹ-hũɔ̃ mǝ̃̀ hla, curo'n sáa juo pya mǝ̃̀ nã.

Cwaaba min bá nǝ̃nǝ̃ǝ̃ mǝ̃̀ nã nǝ̃ mǝ̃̀ dɩn, nǝ̃ Dũnnũw báa piɛ dɩ̀-lǝ bà yuunã tuuli drɔ.

17 Yitii-lǝ, wùú júó ǹ-ji pya mǝ̃̀ nã, nã̀ã ce mǝ̃́ da fãngããgu.

Gùú cíé mǝ̃́ gbǝ̃ǝ̃ ǹ-waa Yesu cɔ̃ndudwalɩmmã́ suu, nǝ̃ bà min mãã bà sǝ Yahudyaba.

Wù híilá-m jara ɲirãnɲã sǝ̃ǝ̃nã.

18 Yitiiw ji hiil-m gaabɩbliɛga min nã, ǹ-kor-m, ǹ-dii-m wù yuuntasǝrɩ nã, Dũnnũ suɔgu.

Cwaaba min bà saa bá ba bà bũũ wɩ̀-i fɩraa!

Kwaya!

Fyãnuugu

19 Fyãn Prisilba nǝ̃ Akilasɩw nǝ̃ Onesifɔr suɔntaaba ń hã-m.

20 Erasitɩẃ nàa dàa Korɛ̃tɩ lǝri.

Nǝ̃ Trofim-lǝ, wù mãã wù yáá hlɔmmã nã, gùú cíé mǝ̃n ta nã̀ã ya wú ba dàa Mile lǝri.

21 Gbǝ̃ǝ̃ ń jo nǝ̃ yɔ'n bǝ̃ǝ̃gɩ ji da gɩ́ hi.

Ebulusɩw, Pudãsɩw, Linusɩw, Kulodiyaw nǝ̃ yì cwanãã'n dɩgaliɛw min bà fyã́nnã́-n.

22 Yitiiẃ ba ǹ saa.

Wú ne ɲì yiɛgu.