Tim. dĩɛ̃l 5

Blakuucanããba, byanvãnããba, nǝ̃ lwɛba, Kɩrsa bɩgaaba sǝ̃ǝ̃nã

Báa ba nǝ̃-n ce ń wanãã vũnvãtii nã nǝ̃ cãwaagbǝ̃ǝ̃yaga, nǝ̃ ba nǝ̃-n ce ń ba ǹ jiɛriɛ nǝ̃-yǝ nã́ã́ ń jiɛriɛ nǝ̃ ǹ tǝ-i, nǝ̃ ń ba ǹ jiɛriɛ nǝ̃ plaaba nã́ã́ ǹ ɲũũnãtaa-i,

2 nǝ̃ canvãnããba nã́ã́ ǹ ɲũba-i, nǝ̃ caplaaba nã́ã́ ǹ cwanãã-i.

Ce-dǝ yiyalɩmmã nã nǝ̃ kusuugɩ dɩngu.

3 Nǝ̃ blakuucanããbaa mãã nǝ̃ bà dɩndɩn sulammã nã, fǝ̃ǝ̃ ń mǝ̃gaa ń blǝ bà nã nǝ̃ ń ba ǹ bũũ-ba.

4 Nǝ̃ blakuuciɛdiɛw-ń ba nǝ̃ tãnkuuraaba, yindagǝ nã huɔnbiiba, bà mãã bà saa bá fǝ̃ǝ̃ dìí mãã dĩɛ̃lãmmã nã, dɩ̀-i bá ba bà ǝ̃ǝ̃lã Dũnnũ hlũũ'n wáàmã nã nǝ̃ bà hla'n suɔntaa'n blǝmmã.

Gɩ̀-lǝ gɩ̀ nã, bà huutaabà cíé ywaruu wo ywaruu ba yuunã, bá pã-gǝ ǹ-hã-ba.

Gɩ̀-lǝ gùú dwállà Dũnnũw nã.

5 Nǝ̃ blakuuciɛw mãã nǝ̃ wù dɩn sulammã nã, wù sǝ nǝ̃ curo wù blǝ wù nã, wú nǝ̃ wùu piɛ wù nãkruɔgu Dũnnũw nã.

Wù cirǝ̃ǝ̃ wù nã, nã̀ã ba wù jiɛriɛ nǝ̃-yǝ yisuɔ nǝ̃ bǝ̃ǝ̃nã.

6 Nǝ̃ blakuuciɛw mãã wù sǝ̃n ne mãdamã nã́ã́ wù hla'n yisɩnã cɔ̃m sǝ, wù-lǝ halle wu-ń ba dìɛ nũmǝ̃nã-i yo, wú nǝ̃ nã́ã́ wu kúú-i.

7 Ne, ǹ mãã ǹ saa ń kal-ba nǝ̃ dìi bá ba bà ce-dǝ, dɩ̀-i bá ba cwaabaa mãã wanyuɔrɔmmã sǝ bà nã.

8 Nǝ̃ gùú tii nǝ̃n ba wù sǝ̃n blǝ wù suɔntaaba nã nǝ̃ wù cokuganãmba nã, gɩ̀-lǝ gɩ̀ tiiẃ nǝ̃ wùu hla Dũnnũ cɔ̃m'n hũɔ̃m'n cɔ̃m-i.

Wù-lǝ wù cɔ̃mmã̀ ɲírǝ̃́ǝ̃ ǹ-bla ǹ-ɲǝ̃ǝ̃ wùú mãã wù sǝ wùu hũɔ̃ Yesu cɔ̃mmã.

9 Bàá dɩndɩn mãã bà yiriɛgà ji gbǝ̃ǝ̃ ǹ-dii blakuucanãã'n yiriɛga sǝ̃ǝ̃nã, bà-lǝ bà-i blakuucanããbaa mãã bà biigaa maa bii gwasiɛlw, nã̀ã ba canããbaa mãã bà vĩ́ĩlã́ blasǝrɩ nã.

10 Bà yirfɩnfaarɩ̀ saa dɩ́ hlǝ bà gaafɩnfiɛ'n cɔ̃mmã nã.

Bà saa bá ba bàa mǝ̃gaa ǹ-kor bà tãnkuuraaba, ǹ-ba bà yáá bà mǝ̃gaa bà hyar noraaba, ǹ-ba bà yáá bà saar^a Kɩrsa bluu'n vyanɲã, ǹ-ba bà yáá bà pɛ hujãncɔ̃mntaaba nã, nã̀ã ba bà yáá bà ce gaafɩnfiɛ'n plaaga min.

11 Nǝ̃ blakuucaplǝbii-lǝ, báa dii bà-lǝ bà yiriɛga blakuucanãã'n yiriɛga sǝ̃ǝ̃nã.

Nã̀ã wa bà cãnkũɔ̃m'n yisɩnã cɔ̃mmã̀ mãã mã-ń suro bà nã, bà ver bà furũũgu ǹ-hã Kɩrsaw-i, ba-ń ce bá ba bà caa bá ver ǹ-taa ǹ-tu.

12 Ǹ-ya bá ba dɩ̀-lǝ dɩ̀ cellɩ nã, wanyuɔrɔmmã̀ díɛ́ bà nã, nã̀ã wa bà dĩ́ɛ̃lã́ ǹ-pã bà nũɔ̃gu dìí nã mãã ǹ-hã Kɩrsaw, bà vérrá ǹ-hla-dǝ.

13 Ǹ-pya nã, bà mãã bà sǝ mããcem nã, blakuucaplǝbii báà, bà juo ba ba-ń ce bá ba bà waaraa cwaa'n swammã nã.

Nǝ̃ dìí dɩn sǝ, dìí mãã dìi ɲirǝ̃ǝ̃ cɔ̃mmã nã, bà ce cãwaacindi.

Mã̀ã́ mãã mã̀ sǝ bà cɔ̃mmã, bà dii bà nɔ̃nɲã mã̀ min nã.

Dìí mãã dɩ̀ sǝ diiwaarǝdi, bà nɔ̃nɲã̀ hi dɩ̀ min.

14 Gùú cíé mǝ̃́ ba mǝ̃̀ caa blakuucaplǝbiibá ver ǹ-tuu blanããba ǹ-tu, ǹ-huu tãnkuuraaba, ǹ-mǝ̃gaa ǹ-blǝ bà swammã nã, yì ɲããtaaba báa ji da wanyuɔrɔm'n sùɔ́ yi nã, ǹ-ba bà tuuraa yì nã.

15 Nã̀ã wa blakuucanããdaabà nǝ̃́nǝ̃́ǝ̃ hlũsũɔ̃lgǝgɩ nã, ǹ-ba bà duu Sɩtãnw nã.

16 Nǝ̃ blakuuciɛw-ń ba dàa Kɩrsa bɩgaa'n cijaldiɛ suɔ, Kɩrsa bɩgaa'n cijal wáà sáalà wú ba wù pɛ wù nã, wù yuunã tuul báa da ǹ-ba Igɩlisɩ taabaa yuunã.

Gɩ̀-lǝ gɩ̀ tammã, blakuucanããbaa mãã nǝ̃ bà denden sulammã nã, Igɩlisɩ taabá da ǹ-gbǝ̃ǝ̃ ǹ-ba bà pɛ bà nã.

17 Igɩlisɩ taa'n vũnvãnããbaa mãã yigantaaba, nã̀ã ba bà ce bà mããcemmã torrɩ Igɩlisɩ taaba sǝ̃ǝ̃nã, gɩ̀ saa Igɩlisɩ taabá ba bà pã-ba nã̀ã ba bà bũũ-ba.

Nǝ̃ bàá mãã bà ce mããcegbǝ̃ǝ̃mãã mãã Yesu cɔ̃ndudwalɩm'n waamã, nǝ̃ cwaa'n kalɩmmã, bà-lǝ bà dǝllɩ̀ sǝ̃n waa.

18 Sulammã nã, dɩ́ nàa dìi yal Dũnnũ cãwan'n sɛbɛw nã wà: «Nǝ̃ǝ̃w mãã wu-ń ba wù ce mããcemmã dũtɩgibǝ̃ǝ̃gu, ǹ sǝ̃n saa ń vaa wù nũɔ̃gu wà wu báa wuu dũmmã.»

Nã̀ã ver ǹ-waa hlo wà: «Mããcierẁ saa nǝ̃ wù pãl-i.»

19 Báa hũɔ̃ curoẃ juo waa nǝ̃-n wà Igɩlisɩ taa'n vũnvãtiidiɛ wú yuɔruɔ nǝ̃ nnĩĩ nǝ̃ nnĩĩ.

Gɩ-ń ba gɩ̀ sǝ cwaaba hǝ̃ǝ̃l, yindagǝ nã cwaaba siɛlba díɛ́-dǝ nǝ̃ bà yinɲã wà sulam-i, báa hũɔ̃-dǝ.

20 Igɩlisɩ taa'n vũnvãnããba sǝ̃ǝ̃nã, bàá mãã bà ce gaacĩɛ̃yaga, ba ǹ wanãã bà nã cwaaba min yinɲã nã, gɩ́ da ǹ-dii gbǝrsǝri bà dɩgaliɛw nã ba báa ce dɩ̀ tuugu.

21 Mǝ̃̀ cirǝ̃ǝ̃ ǹ nã dɩ́ gbǝ̃ǝ̃ Dũnnũw yinɲã nã nǝ̃ Yesu Kɩrsaw nǝ̃ Dũnnũẁ níé ǹ-hiil gùú mɛlɛgɛbaa mãã bà yinɲã nã, wà ń ba ǹ wáà hlũsǝ díɛ̀.

Báa ce-dǝ nǝ̃ tũɔ̃lɩm yindagǝ nã ǹ-ne wudiɛẃ buɔ wudiɛ nã.

22 Báa ba nǝ̃-n ce ń huulaa ǹ hiɛga nã, ǹ-piɛ nãkrɔnɲã curow nã, ǹ-hã-yǝ nǝ̃ mããcemmã Igɩlisɩ taaba sǝ̃ǝ̃nã.

Báa dii ǹ nũɔ̃gu cwaa'n dɩgaliɛ gaacĩɛ̃yaga nã, nǝ̃ yíì, ba yiyalɩmmã nã.

23 Ǹ mãã hlɔnɲiɲũgɔ̃mmã̀ sǝ̃n da ǹ nã, nǝ̃ ǹ kusuu yo gɩ́ ba gɩ̀ ywar-n, báa ba ǹ ɲũɔ̃ hũnkɩka dɩn, ba ǹ ɲũɔ̃ ɛrsɛ̃ kwãmmã fiyãã fiyãã.

24 Badaba'n gaacĩɛ̃yagá nǝ̃ coriyaa cwaaba min yinɲã nã, halle bà sugollɩ-ń ba dɩ̀ sáa hi ǹ-jar-i yo.

Nǝ̃ dɩ̀ sǝ nnĩĩ badaabaa saa, furũũ nã-i bà da bà yuɔrɔmmã.

25 Gaafɩnfiɛ yo, gá nǝ̃ coriyaa cwaa'n yinɲã nã gùú tammã dɩnmã nã-i.

Halle gàá mãã gà sǝ coriyaa cwaa'n yinɲã nã, gà síì gbǝ̃ǝ̃ ǹ-ŋmǝ̃ǝ̃rǝ̃ǝ̃.