Tim. dĩɛ̃l 6

Lwɛbà saa bá ba bà bũũ bà yuntaaba

Bà min mãã lwɛba, bà saa bá fǝ̃ǝ̃ díɛ̀: bà yuntaaba saa nǝ̃ nũɔ̃sǝn bũũm-i.

Dɩ-ń ba gɩ̀-lǝ gɩ̀ tammã, curo'n síì tuuraa Dũnnũ yiir nã, yindagǝ nã yi mãã yì kal-ɲã́ã̀ nǝ̃ dìí mãã.

2 Ba-ń ba nǝ̃ yuntaabaa mãã bàa hũɔ̃ Dũnnũ cɔ̃mmã, bà sǝ̃n saa bá hiil kuu bà bũũmã nã, nã̀ã wa bà mãã cwansǝrɩ nã Dũnnũ hlũũgɩ nã, nǝ̃ bà saa bá ba bà mǝ̃gaa bà ce mããcemmã huhorɩmmã nã bà hã-ba, ǹ-maa gɩ̀ sùɔ́gu.

Nã̀ã wa bà yuntaabaa mãã bà ji da mããcem mã́ã̀mã tɔ̃nɩw, bàá yo, bà wáà Dũnnũ hlũũgu, nã̀ã ba wù cituubiiba.

Ǹ mãã ǹ saa ń kal cwaaba nǝ̃ dìi, nã̀ã kra dìí nã mãã ǹ-hã-ba, dɩ̀-lǝ dɩ̀-i nĩĩgu.

Curow-ń ɲǝ̃gãr jin'n cɔ̃mmã nã, blasǝrɩ̀ hi-yǝ-i

3 Badaabà ji ba bà kal cwaaba nǝ̃ gɩ̀ dǝ'n kalɩm.

Bà kalɩmmã̀ sǝ̃n wáà nǝ̃ Yitii Yesu Kɩrsa cãwanĩɛ̃huhoriɛ'n hlũũgu, nã̀ã ba mã̀ sǝ̃n pya yì nã yí ɲǝ̃gãr Dũnnũ cɔ̃mmã nã.

4 Buɔnhlanẃ nǝ̃ yà car gɩ̀ tuutaaba nã nǝ̃ bà sǝ̃n fǝ̃ǝ̃ kuu.

Cincaruugu, nǝ̃ ǹ-gãnãã cãwandi drɔ, ɲã̀-lǝ ɲã̀ hlɔmmã́ nǝ̃ bà nã.

Gɩ̀-lǝ gùú jówà nǝ̃ yandi, byariɛga, yirbǝ̃ǝ̃lǝ̃gǝgu, ǹ-ka ǹ-ne curow nǝ̃ yikaarw,

5 nǝ̃ cincarunɲãã mãã ɲã̀ sǝ̃n tã ǹ-da, bà ce-ɲã nǝ̃ cwaabaa mãã bà yunɲã̀ sǝ̃n fa, sulammã̀ ɲǝ̃́ǝ̃lã́ ǹ-ɲũɔ̃ mã̀ hla nǝ̃ bà saa.

Bà ne wà ǹ-ɲǝ̃gãr Dũnnũ cɔ̃mmã nã, gùú ji ce bá da jinɲã.

6 Sulammã nã, ǹ-ɲǝ̃gãr Dũnnũ cɔ̃mmã nã, nũɔ̃sǝn gbaasǝ-i curow saa, gɩ̀ tiiw-ń ba wù sǝ̃n ne wù dalaagɩ́ kol.

7 Gɩ̀-i nnĩĩ, yi sáa jo nǝ̃ kuu cuu wáá nã, yi síì ver nǝ̃ kuu.

8 Gɩ̀ sùɔ́gɩ nã, yi-ń da yì nũɔ̃nã wuuri nǝ̃ kuulanãmba yì ji suu yì cãndɩ nã, yáalà ɲã̀-lǝ ɲã́ yu yì yinɲã.

9 Nǝ̃ bàá mãã bà caa bá ba gbaalaaba, Sɩtãnw-ń ce wú vuu ǹ-blǝ-ba wù jarnjĩɛ̃w nã.

Bà hla'n yisɩnã cɔ̃mmãã mãã mã̀ sǝ nǝ̃ yuu nã̀ã ba mã̀ã bla, mã̀-lǝ mã̀ã́ díilá-ba jarnjĩɛ̃ wáá nã.

Gɩ̀-lǝ gùú kã́ã̀ nǝ̃ cwaaba bǝ̃ǝ̃lǝ̃mmã nã nǝ̃ vaalam'n hlũũgɩ nã.

10 Sulammã nã, curow mãã wù jin'n kuugɩ-ń gbǝ̃ǝ̃ ǹ-car, gùú díilà gaabɩbliɛ'n plaaga min wù kusuugɩ nã.

Badaba'n jin'n kuugɩ́ nǝ̃ gùu gbǝ̃ǝ̃ ǹ-car fuwɔ, ǹ-ce bá nǝ̃nǝ̃ǝ̃ Yesu cɔ̃m'n hũɔ̃m'n hlũũgɩ nã, ǹ-dii bà hla mããjaamcin nã.

Polẁ hã Timotew nǝ̃ cɔ̃nfǝ̃ǝ̃gǝgu

11 Nǝ̃ yíi mãã Dũnnũ curow, ba nǝ̃ kwar nǝ̃ gɩ̀ ɲinɲã; nǝ̃ ń ba ǹ ɲǝ̃ǝ̃ ǹ duu sũɔ̃lɩmmã nã, Dũnnũ cɔ̃m'n ɲǝ̃gãrɩmmã nã, Yesu cɔ̃m'n hũɔ̃mã nã, ba ǹ pɩgaa wà cwaa'n dɩgaliɛ cɔ̃mmã dwal ǹ nã, ń hiraa dɩ̀ dɩndɩ nã, nǝ̃ ń blariɛ nǝ̃ cwaaba.

12 Ba narɩmmã nã, Yesu cɔ̃nhũɔ̃m'n narɩmhuhorɩmmã nã, ǹ-da ǹ-da fɩraa nũmǝ̃nãsǝri.

Sulammã nã, Dũnnũ bíé-n ń juo fǝ̃ǝ̃-dǝ gùú nã mãã ǹ hṹɔ̃lã́ ǹ-wa ń duu Yesuw gbaa cocin'n yinɲã nã, bà-lǝ bàa nṹɔ̃́-dǝ nã̀ã da-dǝ.

13 Mǝ̃̀ mãã mǝ̃̀ kra dìí nã mãã mǝ̃̀ hã-n Dũnnũw mãã wù díilá nũmǝ̃nãsǝri ɲinɲã min nã wù yinɲã nã, nǝ̃ Yesu Kɩrsaw mãã wù wáalá wù hla'n cɔ̃mmã gbaa sugojarsuɔgɩ nã Pɔ̃sɩ Pilatɩ yigagɩ nã wù-lǝ wù yinɲã nã wà:

14 bà kárrá gùú hlũũ'n nǝ̃ǝ̃lɩ nã ǹ-hã-n, ba ǹ nɔ̃ ǹ hã-dǝ torrɩ, báa ya wanyuɔrɔm'n sùɔ́gɩ́ da ǹ nã dɩ̀-lǝ dɩ̀ kusunã, fuwɔ gùú yuuguu mãã Yitii Yesu Kɩrsaẁ ga jo, yí da-yǝ.

15 Dũnnũẁ kárrá gùú bǝ̃ǝ̃gɩ nã mãã, gɩ-ń ji hi, wùú ji ce wú hillaa.

Wù-lǝ wɩ̀-i Hyasɩrãgǝntiiw, wɩ̀-i Cɔ̃mmãmintiiw, wú nǝ̃ wù dǝ-i, wɩ̀-i yuntaa'n Yuuntiiw, nã̀ã ba yiɛntaa'n Yuuntiiw.

16 Wùú dɩndɩn-i wù sǝ̃n ku.

Wú nǝ̃ gbɩgbaamdamã kusunã-i, curo'n síì hi-yǝ, curo'n sáa da-yǝ ǹ-da, curo'n síì gbǝ̃ǝ̃ ǹ-da-yǝ.

Cwaaba min bà saa bá ba bà bũũ wɩ̀-i, fãngããgɩ min gɩ́ ba wùú kuugu fɩraa.

Kwaya!

17 Bàá mãã bàa gbaalaa nǝ̃ cuu ɲinɲã, waa nǝ̃-ba wà ba báa ba bà huɔruɔ bà hla nã nǝ̃-ɲã, nǝ̃ ba báa piɛ nãkruɔgu gɩ̀-lǝ gɩ̀ ɲinɲã nã mãã ɲã̀ sǝ̃n hǝ̃ǝ̃sǝ.

Nǝ̃ bà saa bá piɛ bà nãkruɔgu Dũnnũ nã-i, wùú mãã wu-ń ce wú fɩr wù kusuugu nã̀ã hã-yáà yí da ǹ-ba dudwalɩmmã nã gɩ̀ ɲin'n cɔ̃mmã nã.

18 Waa nǝ̃-ba wà bá ba bà ce diifɩnfaari, wà diifɩnfaarɩ́ ba bà gbaasǝri, bà nãkrɔnɲã́ ba ɲã̀ fɩraa, nǝ̃ bá ba bà pã.

19 Nĩĩgɩ-i, bà ji kaala gbaasǝri mãã dɩ̀ fa, nã̀ã ba dɩ̀ ji hǝ̃ǝ̃sǝ cicuɔgu, ǹ-da ǹ-da nũmǝ̃nãsǝhuhordǝdi.

20 Timote, yíi mãã ǹ cɔ̃mmã̀ã gbǝ̃ǝ̃ mǝ̃̀ nã, cɔ̃m wo cɔ̃mmã Dũnnũẁ díilá-mã ǹ nãkruɔgɩ nã, wà ń ba ǹ ne mã̀ nã, fǝ̃ǝ̃ ń blǝ mã̀ nã.

Hla mǝ̃ǝ̃lǝ̃ǝ̃cãwanĩɛ̃gaa mãã gà sǝ̃n kã yiɛgɩ dɩn nǝ̃ Dũnnũ hlũũgu, nǝ̃ cincarunɲãã mãã bà ce-ɲã cɔ̃mmã nã mãã bà ne wà ba fǝ̃́ǝ̃lã́-mã, nǝ̃ yàá, ba sǝ̃n fǝ̃ǝ̃-mã.

21 Sulammã nã, cwaadaabá nìɛ bà waa wà bà-lǝ bá nǝ̃ cɔ̃nfǝ̃ǝ̃gǝ gúɔ̀, nã̀ã fǝ̃ǝ̃ ǹ-ver bà furũũgu Dũnnũ cɔ̃m'n hũɔ̃m'n hlũũgu.

Dũnnũẃ ne ǹ yiɛgu.