Tim. dĩɛ̃l 4

Cokallɛkwasǝnãã'n cɔ̃mmã

Nǝ̃ Dũnnũ Yuflǝ waa-dǝ gbaa wà cuu tãl'n bǝ̃ǝ̃ gúɔ̀ nã, cwaadaaba ji nǝ̃nǝ̃ǝ̃ bà hũɔ̃mã nã.

Bà ji ce dɩ̀-lǝ ǹ-da ɲǝ̃gãr gùú yuflaaba nã mãã bà vuuraa cwaaba nã, nã̀ã ba bà duu gùú kalɩmmã nã mãã mã̀ hlǝ tãntɔ̃nããba nã.

2 Cwaabaa mãã kusunɲãhǝ̃nhãltaaba nǝ̃ kwasǝnããba, bà ji ba bà vuuraa bà nã.

Gɩ̀-lǝ gɩ̀ cwaa'n hiɛgà sǝ̃n car-ba nǝ̃ cɔ̃m, nã̀ã wa gɩ́ nǝ̃ nã́ã́ ba hĩ́ɛ̃́-ga nǝ̃ kwahuuladǝ-i.

3 Bà kal cwaaba wà ba sǝ̃n saa bá taa bà ɲĩɛ̃, yindagǝ nã ǹ-wuu ɲããwuundaaɲã.

Nǝ̃ gɩ̀-lǝ gɩ̀ ɲããwuunɲã, Dũnnũ nǝ̃́ǝ̃lã́-ɲã ǹ-da ǹ-ce bàá mãã bà hṹɔ̃lã́ Dũnnũ cɔ̃mmã, nã̀ã ba bà fǝ̃ǝ̃ sulammã, bá ba bà wuu-ɲã, bà dũũ kwayaw bà hã-yǝ.

4 Sulammã nã, Dũnnũẁ nǝ̃́ǝ̃lã́ kuu wo kuu mãã, gɩ́ nǝ̃ gùu saa, kuu'n sǝ guuhlagǝgu, dìí nǝ̃n gbǝ̃́ǝ̃lã́ yi-ń wa yi wuu-ɲã, yí ba yì dũũ kwayaw yì hã-yǝ ɲã wuumã nã.

5 Nã̀ã wa Dũnnũ cãwandi nǝ̃ Dũnnũcirǝ̃ǝ̃gǝguu kárrà ɲinɲã min nã ɲã̀ dǝ ǹ-hã-yǝ.

Kɩrsa mããcierhuhoryǝw

6 Kal yì cwanããba nǝ̃ cɔ̃m mã́ã̀.

Gɩ̀-lǝ gɩ̀ ji pɩgaa wà Dũnnũ val-n nǝ̃ Yesu cɔ̃nhũɔ̃m'n cãwanĩɛ̃-i, nǝ̃ ǹ mãã ǹ duu gùú kalɩmhuhorɩmmã nã.

Nǝ̃-ń ba ǹ-ce dɩ̀-lǝ, ǹ ji ba Yesu Kɩrsa mããcierhuhoryǝw.

7 Nǝ̃ cwaaba-ń jiraa ǹ-taa gùú haasǝ cɔ̃mmãã mãã mã̀ sǝ mã̀ã vĩĩ nǝ̃ Dũnnũ hlũũgu, hla gɩ̀ cɔ̃mmã, pelaa'n cãwanĩɛ̃ dɩndɩn-i, bà waa-ga.

Fɩr ǹ cãndi ń ɲǝ̃gãr Dũnnũ cɔ̃mmã nã.

8 Ǹ-fɩr ǹ cãndi fãngãã'n mããcemmã nã gɩ̀ pyar dugɔ, nǝ̃ ǹ-ɲǝ̃gãr Dũnnũ cɔ̃mmã nã, gɩ̀ pya curow nã cɔ̃mmã min nã.

Nã̀ã wa Dũnnũẁ plã wù nũɔ̃gu nǝ̃-yáà wà wu ji hã-yáà nǝ̃ gùú nũmǝ̃nãsǝrii mãã, yi ji da-dǝ kuɔkuɔ cuuw nã, nã̀ã ba yi ga da-dǝ cicuɔ'n yo wù nã.

9 Níyà cãwan díɛ̀, dɩ̀ káaláa wà cãwaahuhordǝ-i, nã̀ã ba dɩ̀ saa nǝ̃ cwaaba min bá hũɔ̃-dǝ.

10 Sulammã nã, yi-ń gbǝ̃ǝ̃ ǹ-ba mããcegbǝ̃ǝ̃mã nã nã̀ã ba narɩmmã nã, yi piɛ yì nãkruɔ-i Dũnnũw nã mãã nũmǝ̃nãw wù drɔ.

Wù-lǝ wùú kórrà cwaanbiiba min, nǝ̃ bàá mãã bà hṹɔ̃lã́ wù cɔ̃m-lǝ, bà-lǝ bà dǝllɩ̀ sǝ̃n waa.

11 Ǹ saa ń kal cwaaba nǝ̃ ɲã-lǝ ɲã̀-i nã̀ã kra ɲã̀ nã ǹ-hã bá ba bà wáà-ɲã.

12 Báa ya curoẃ diɛ-n nã̀ã wa ń mãã plǝw, ya bàá mãã bà hũɔ̃ Yesu cɔ̃mmã bá tuu ǹ nǝ̃ǝ̃li ǹ cãwandɩ nã, ǹ waal'n tammã nã, cwaa'n dɩgaliɛ cɔ̃mmã mãã mã̀ dwal ǹ nã nĩĩguu mãã, ǹ hũɔ̃m'n cɔ̃mmã, nǝ̃ ǹ yiyalɩmmã nã.

13 Vaa ǹ hla ń ba ǹ kal Dũnnũ cãwandi cwaa'n yigagɩ nã, ǹ-hã-ba nǝ̃ hyagbǝ̃ngbãndi nǝ̃ ń ba ǹ kal-ba ǹ-fennãã mǝ̃̀ jollɩ nã.

14 Dũnnũ Yuflǝẁ hlã-n nǝ̃ gùú fãngããgu, mǝ̃gaa ń blǝ-gǝ.

Ǹ díɛ́ gɩ̀ fãngããgu gùú nã mãã Igɩlisɩ taa'n vũnvãnãã'n kuruugɩ̀ yáá gùu piɛ gɩ̀ nãkruɔgu ǹ drɔ, nǝ̃ curodiɛẃ hiil Dũnnũ cãwandarǝ ǹ cɔ̃mmã nã.

15 Gbǝ̃ǝ̃ gɩ̀ cɔ̃m'n cellɩ nã, dii ǹ hla gbɩla mã̀ nã, gɩ̀-lǝ gɩ̀ nã, cwaaba min bà ji da ǹ mãã ǹ kã nǝ̃ yigagu nĩĩguu mãã.

16 Fǝ̃ǝ̃ ǹ hla'n blǝmmã, nǝ̃ ń fǝ̃ǝ̃ ǹ mãã ǹ kal cwaaba nǝ̃ dìi.

Suro ń hiraa gɩ̀ mããcemmã yuunã, nã̀ã wa nǝ̃-n ba ǹ ce-dǝ gɩ̀ tammã, Dũnnũẁ ji ce ń da korɩmmã, nǝ̃ bàá mãã bà nɔ̃ bà hã-n, bàá yo bá da-mã.