Tim. dĩɛ̃l 3

Igɩlisɩ taa'n yigantaa'n waali

Níyà, dɩ̀ káaláa wà cãwan díɛ̀di cãwaahuhordǝ-i: curodiɛw-ń ba wù caa wú ce Igɩlisɩ taa'n vũnvãtaa'n yigantasǝ'n mããcemmã, wù caa mããcehuhorɩm-i.

2 Igɩlisɩ taa'n vũnvãtii mãã yigantiiw, wù sǝ̃n saa wú ba nǝ̃ wanyuɔrɔm'n sùɔ́, wù saa wú ba ciɛdiintii-i, wù sǝ̃n saa wú ba wu-ń ce wú wuu wuuri, yindagǝ nã ǹ-ɲũɔ̃ kwãmmã ǹ-ji maa gɩ̀ sùɔ́gu, wù saa wú ba wù fǝ̃ǝ̃ wù blǝ wù hla nã, wù saa wú ba curow mãã wùu saa, wù fǝ̃ǝ̃ wù hyar cwaaba, ǹ-ba wù ji gbǝ̃ǝ̃ ǹ-kal cwaaba.

3 Wu báa ba wu-ń ce wú ɲũɔ̃ kwãmmã́ blǝ-yǝ, yindagǝ nã ǹ-ba wù gǝǝ wù mũũ nãkruɔgu, nǝ̃ wù saa wú ba cofɩnfayǝw, nã̀ã ba wù sǝ̃n jã byaari.

Wù sǝ̃n saa wú ba jin'n purnĩĩw.

4 Wù saa wú ba wù ji gbǝ̃ǝ̃ ǹ-blǝ wù hla'n suɔgɩ nã, fuwɔ wù tãnkuuraa yo, bá ba bà nɔ̃ bà hã-yǝ, nã̀ã ba bà bũũ-yǝ torrɩ.

5 Sulammã nã, curow-ń ba wù síì gbǝ̃ǝ̃ ǹ-blǝ wù hla'n suɔgɩ nã, wù ji ce danii nã̀ã gbǝ̃ǝ̃ ǹ-blǝ Dũnnũ Igɩlisɩ taaba nã?

6 Wù sǝ̃n saa wú ba curow mãã wù sáa hǝ̃ǝ̃sǝ Dũnnũ hlũũgɩ nã, wu báa ji da ǹ-ba wù huɔruɔ wù hla nã, nǝ̃ Dũnnũ sugollɩ ga duruu wù drɔ nã́ã́ dɩ̀ duruu tiilǝtiiẁ drɔ nĩĩguu mãã.

7 Bàá mãã bà sǝ Igɩlisɩ taaba, wù yirfɩnfaarɩ̀ saa dɩ́ ba dɩ̀ hlǝ bàá yo bà nɔ̃nɲã nã, gɩ̀-lǝ gùú ji ce cwaaba báa ji diɛ-yǝ, nǝ̃ wu báa ji duruu tiilǝtii'n jarnjĩɛ̃w nã.

Bàá mãã bà ce mããcemmã Igɩlisɩ taaba sǝ̃ǝ̃nã

8 Bàá mãã bà pɛ cwaaba nã Igɩlisɩ taaba sǝ̃ǝ̃nã, bà saa bá ba cwaabaa mãã bà saa nǝ̃ bũũmã, nã̀ã ba bà sǝ nɔ̃nɲãhǝ̃nhǝ̃ltaaba.

Bà sǝ̃n saa bá ya kwãnyelacɔ̃mmã́ blǝ bà yúǹɲã, yindagǝ nã ǹ-ba jin'n purnããba.

9 Bà saa bá ɲǝ̃gãr Yesu cɔ̃nhũɔ̃m'n sulammã nã mãã Dũnnũẁ fɩ́rrǝ́ mã nã, bà hiɛga báa ba gà car-ba.

10 Gɩ̀ saa bá caa ǹ-fǝ̃ǝ̃-ba, wanyuɔrɔmmã-ń ba mã̀ sáa da bà nã, gɩ̀ furũũgɩ nã, bà ji gbǝ̃ǝ̃ ǹ-ce bá ba cwaabaa mãã bà pɛ cwaaba nã Igɩlisɩ taaba sǝ̃ǝ̃nã.

11 Bà canãã yo, bà saa bá ba canããbaa mãã bà saa nǝ̃ bũũmã, cãwanĩɛ̃bɩbliɛga báa ba gà hlǝ bà nɔ̃nɲã nã.

Bà sǝ̃n saa bá ba ba-ń ce bá wuu wuuri yindagǝ nã ǹ-ɲũɔ̃ kwãmmã ǹ-ji maa gɩ̀ sùɔ́gu, bá ba yalntaaba bà cɔ̃mmã min nã.

12 Curow mãã wù pɛ cwaaba nã Igɩlisɩ taaba sǝ̃ǝ̃nã, wù saa wú ba ciɛdiintii-i, nã̀ã ba wù gbǝ̃ǝ̃ wù blǝ wù hla'n suɔgɩ nã, nǝ̃ wù tãnkuuraaba nã.

13 Nã̀ã wa bàá mãã bà fǝ̃ǝ̃ bà ce bà mããcemmã, bà yirfɩnfaarɩ̀ ji hlǝ Igɩlisɩ taaba min saa, nǝ̃ bá ba nǝ̃ hiɛgaa mãã gàa jiraa huhorɩmmã nã Yesu Kɩrsa cɔ̃mmã nã mãã bà hṹɔ̃lã́-mã.

Polẁ mãã wù hã Timotew nǝ̃ kalɩm mã́ã̀ dìí yuugɩ nã mãã

14 Mǝ̃̀ yal sɛbɛ wáà mǝ̃̀ hã-n nã̀ã ba mǝ̃̀ ne wà gɩ síì hǝ̃ǝ̃sǝ nǝ̃ mǝ̃́ da-n,

15 wà gɩ-ń ba nã́ã́ mǝ̃ sáa ga hi ǹ nãã fufa, ń da ǹ-fǝ̃ǝ̃ ǹ hla'n blǝm'n tammã Dũnnũ bluu'n suɔgɩ nã.

Nǝ̃-ń da mǝ̃̀ waa dɩ̀-lǝ, mǝ̃̀ caa mǝ̃́ wa Dũnnũw mãã nũmǝ̃nãw, wù Igɩlisɩ taabá nǝ̃ bàa blǝ ǹ-cii Dũnnũ sulammã nã nã̀ã ɲãl mã̀ nã nã́ã́ dofũũl-i.

16 Curo'n síì gbǝ̃ǝ̃ ǹ-car-mã.

Yi ɲǝ̃́gãrã́ Dũnnũ cɔ̃mmã nã nã̀ã fǝ̃ǝ̃ gùú cɔ̃nŋmǝ̃ǝ̃rǝ̃mmãã mãã, mã́ nǝ̃ dugɔ: Yesu Kɩrsaẁ túulá cãnkũɔ̃mã, ǹ-juo pɩgaa wù hla ǹ-ja cwaaba, Dũnnũ Yuflǝẁ waa wà wu sṹɔ̃lã́, nã̀ã pɩgaa wù hla ǹ-ja mɛlɛgɛba.

Wù bluubà wáalá wù cɔ̃mmã ǹ-ja coplaaga, cwaabá hũɔ̃-mã cuuw nã, nǝ̃ Dũnnũw ga juo tuu ǹ-kũũ nǝ̃-yǝ.