Tim. dĩɛ̃l 2

Dũnnũ cirǝ̃m'n tammã

Dìí mãã mǝ̃̀ ji hã-n nǝ̃-dǝ cɔ̃mmã min yigagɩ nã, dɩ̀-i cwaabá da hyagbǝ̃ngbãndi, ǹ-ba bà cirǝ̃ǝ̃ Dũnnũw nã, nǝ̃ bá ba bà bũũ-yǝ bà cirǝ̃mmã nã, nã̀ã ba bà dũũ kwayaw bà hã-yǝ bà hã cwaaba min.

2 Bà saa bá ba bà ce cirǝ̃mmã bà hã yuntaaba nǝ̃ fãngãtaaba yi da ǹ-ba sɩsɩrãmmã nã byar, nã̀ã mǝ̃gaa ǹ-ɲǝ̃gãr Dũnnũ cɔ̃mmã nã, nã̀ã ba bà saa nǝ̃ bũũmã.

3 Dɩ̀-lǝ dìí fla, nã̀ã ba dɩ̀ dwal Dũnnũw nã mãã wù kor-yáà.

4 Wù-lǝ wùú cáalà cwaaba min ba ga juo fǝ̃ǝ̃ sulammã, nã̀ã da korɩmmã.

5 Sulammã nã, Dũnnũw dɩndɩn-i dìɛ, nǝ̃ yɔtii dɩnw cwaanbiiba nǝ̃ Dũnnũ sǝ̃ǝ̃gɩ nã, wɩ̀-i Yesu Kɩrsaw, wùú mãã wù jáa ba curo'n blɩw.

6 Wùú hlã-ba nǝ̃ wù yuugu ǹ-da ǹ-sǝ̃ǝ̃ ǹ-hiil cwaanbiiba ǹ-nǝ̃nǝ̃ǝ̃.

Dũnnũẁ yáá wùu kra gùú bǝ̃ǝ̃gɩ nã, gùú jáa hi, Yesuẃ ce-dǝ ǹ-da ǹ-pɩgaa cɔ̃m mã́ã̀ ǹ-ja cwaanbiiba min.

7 Gùú cíé Dũnnũẃ tĩɛ̃-m wà mǝ̃ júó waa wù cãwandi ǹ-ja cwaaba, nã̀ã ce mǝ̃́ ba Yesu tĩɛ̃tiiw, ǹ-ba mǝ̃̀ kãl bàá mãã bà sǝ Yahudyaba nǝ̃ sulammã nǝ̃ Yesu cɔ̃m'n hũɔ̃m'n cɔ̃mmã.

Mǝ̃̀ sǝ̃n bǝr kwasǝ sǝ, mǝ̃̀ waa sulam-i.

8 Gɩ̀ sùɔ́gɩ nã, mǝ̃ caa bibyanããbá haar bà nãkrɔnɲã, sɔnɲã min nã, ǹ-ba bà cirǝ̃ǝ̃ Dũnnũw nã yiyalɩmmã nã, nǝ̃ bá nǝ̃nǝ̃ǝ̃ hyadũũgɩ nã nǝ̃ byariɛga nã.

9 Gùú tammã dɩnmã nã-i, mǝ̃̀ caa canãã yo, bá ba bà mǝ̃gaa bà dii bà kuulanãmba huhorɩmmã nã, ǹ-da ǹ-saa bà kusunã, ba báa ba bà ce ciiri.

Bà parɩmmã̀ sǝ̃n saa mã́ vaa nǝ̃ bà yupyãlplaaga, nǝ̃ sãnã pariɛga, nǝ̃ kɩɲǝ̃mbiigaa mãã gà kuusǝ, nǝ̃ kuulanãmbaa mãã bà kuusǝ.

10 Nǝ̃ bà gaaciefɩnfiɛgaa sáalà gá ba bà parɩmmã.

Gɩ̀-lǝ gùú sáalà nǝ̃ canããbaa mãã bà wa bá nǝ̃ bàa ɲǝ̃gãr Dũnnũ nã-i.

11 Yáalà canããbá ba ciyɛ̃ ciyɛ̃ kalɩm'n bǝ̃ǝ̃gu.

Gɩ̀-lǝ gɩ̀ pɩgaa wà ba hɩ́rrǝ́ bà hla ǹ-hã kaltaaba.

12 Mǝ̃̀ sǝ̃n caa cijalẃ kal cwaaba yindagǝ nã ǹ-da yuugu bibiɛ drɔ.

Wù saa wú ba ciyɛ̃.

13 Nã̀ã wa Dũnnũẁ nǝ̃́ǝ̃lã́ Adɩmãw-i dĩɛ̃lãmmã, gɩ̀ furũũgɩ nã, wú fǝ̃ǝ̃ ǹ-nǝ̃ǝ̃ Hawaw.

14 Gɩ̀ sǝ nã́ã́ Adɩmã hṹɔ̃lã́ Sɩtãn vuumã, cijal hṹɔ̃lã́-mã, wù-lǝ wùú hlárá Dũnnũ yalli.

15 Dũnnũẁ ga ta wù honããgɩ nã-i ǹ-kor-yǝ, wu-ń hũɔ̃ ǹ-ba Dũnnũ cɔ̃m'n hũɔ̃mã nã, ǹ-ya cwaa'n cɔ̃mmã́ dwal wù nã nã̀ã ba yiyalɩmmã nã, nã̀ã ba wù ce wù cɔ̃mmã min saamã nã.