Tim. dĩɛ̃l 1

Timote sɛbɛdĩɛ̃lw

Polẁ yállá gùú sɛbɛdĩɛ̃lw ǹ-hã Timotew

Pol Fyãnuugu

Mã́ã Pol, mǝ̃n-lǝ mã́ã yállà sɛbɛ wáà.

Dũnnũw mãã yì Kortiiw, bá nǝ̃ Yesu Kɩrsaw mãã yìi piɛ yì nãkruɔgu wù drɔ, bà-lǝ bàá kárrá dɩ̀ nã ǹ-hã-m, wà mǝ̃́ ba Yesu Kɩrsa tĩɛ̃tiiw.

2 Mǝ̃̀ yal-yǝ mǝ̃̀ hã Timote yíi-i, yíi mãã mǝ̃̀ byahuhorw Dũnnũ cɔ̃m'n hũɔ̃m'n kusuugɩ nã.

Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, ǹ-sɔ̃ ɲì hujãndi nã̀ã hã-ɲã́ã̀ nǝ̃ hyasɩrãgǝgu.

Blǝ́rà ɲì hla nã nǝ̃ cokallɛkwasǝnããba

3 Mǝ̃̀ yáá mǝ̃̀ maar Mãsedwan yiɛgu gùú nã, nã̀ã kra dɩ̀ nã nĩĩguu mãã ǹ-hã-n wà ń ba dàa Efɛsɩ lǝri, ba dàa gɩ̀ sùɔ́gɩ nã.

Nã̀ã wa gɩ̀ sùɔ́gɩ nã, cwaadaabá nàa bà kal cwaaba nǝ̃ gɩ̀ dǝ'n kalɩm.

Ǹ saa ń waa nǝ̃-ba wà bá suu bà nɔ̃nɲã nã.

4 Nǝ̃ ba báa ɲǝ̃gãr haasǝ cɔ̃ntaamãã mãã cwaabà káá ǹ-hiil-mã ǹ-ba bà taa-mã, nǝ̃ ba báa ɲǝ̃gãr bà tǝvũnvãnãã'n honãã'n nũɔ̃ntaa'n cɔ̃m yo mã̀ nã.

Gɩ̀-lǝ gùú ɲinɲãã jówà nǝ̃ mǝ̃ǝ̃lǝ̃ǝ̃cincaruugu, nã̀ã ba ɲã̀ sǝ̃n ce dìí mãã Dũnnũẁ díilá-dǝ bà nãkruɔgɩ nã bá ce-mã wù cɔ̃m'n hũɔ̃m'n cɔ̃mmã nã.

5 Mǝ̃̀ kra gɩ̀-lǝ gɩ̀ cɔ̃mmã nã mǝ̃̀ hã-n, yì cwanããbá da ǹ-ba nǝ̃ hiɛgaa mãã gàa pesǝ, nǝ̃ bà hiɛga báa car-ba nǝ̃ cɔ̃m bà gaaciega nã, nǝ̃ bà Dũnnũ cɔ̃m'n hũɔ̃m yo, mã́ ba mããhuhorɩmmã.

Ɲã̀-lǝ ɲã̀ min ɲã̀ã́ ji ce cwaa'n dɩgaliɛ cɔ̃mmã́ ba mã̀ dwal bà nã mã̀ maar.

6 Cwaadaabà vérrá bà furũũgu ǹ-hã gɩ̀-lǝ gɩ̀ hlũũgu, gùú cíé bá vaalaa baahãrsǝ'n cincaruugɩ nã.

7 Bà caa bá ba Musa hlũũ'n yuntaaba, nǝ̃ bàá nǝ̃ bà hla bà sǝ̃n fǝ̃ǝ̃ bà mãã bà waa dìi, nǝ̃ bà mãã bà hiraa dìí nã mãã bà dĩĩ dɩ̀ nã wà sulam'n cɔ̃m-i, bà sǝ̃n fǝ̃ǝ̃ dìí yo.

8 Nǝ̃ yi fǝ̃́ǝ̃lã́ wà Musa hlũũgɩ fla, yi-ń ba yì fǝ̃ǝ̃ yì ce mããcemmã nǝ̃-gǝ nã́ã́ gɩ̀ mãã gɩ̀ saa gɩ́ ce nĩĩguu mãã.

9 Yi fǝ̃́ǝ̃lã́ hlo wà Musa hlũũgɩ sáa jo cosũɔ̃lba'n cɔ̃m nã sǝ, nǝ̃ bàá mãã bà sǝ̃n nɔ̃ bà hã Dũnnũw, bàá mãã bà sǝ̃n hũɔ̃ cɔ̃m, bàá mãã bàa hla Dũnnũw, diicĩɛ̃rǝntaaba, bàá mãã bà sǝ̃n bũũ Dũnnũw, nã̀ã ba bà sǝ̃n bũũ Dũnnũ ɲinɲã, nǝ̃ bàá mãã bà ko bà tǝba, yindagǝ nã bà ɲũba, nǝ̃ cokuoraaba, hlũũ gúɔ̀gɩ̀ júó bàá cɔ̃m nã-i.

10 Musa hlũũgɩ̀ kárrá ǹ-hã durkũmnããba, nǝ̃ bibyanããbaa mãã bà puɔr bà nãbibyanããba, yindagǝ nã canããbaa mãã bà puɔr bà nãcanããba, nǝ̃ bàá mãã bà suur cwaaba bà hã badaaba wasǝrɩ nã, nǝ̃ kwasǝnããba nǝ̃ bàá mãã bà vuu bà pã bà nɔ̃nɲã, yindagǝ nã bàá mãã bà ce gaabɩbliɛ'n pladaga tùú, gàá mãã gà car kalɩmhuhorɩmmã.

11 Dũnnũw mãã hyasɩrãgǝntiiw, wù-lǝ wɩ̀-i yuuntasǝ'n gbɩgbaamãã mãã mã̀ díilá Yesu cɔ̃ndudwalɩmmã mǝ̃̀ nãkruɔgɩ nã.

Kalɩm mã́ã̀mã̀ sáalá ǹ-vaa nǝ̃ cɔ̃ndudwalɩm mã́ã̀-i.

Polẁ dũũ kwayaw wù hã Kɩrsaw

12 Mǝ̃̀ dũũ kwayaw mǝ̃̀ hã Yitii Yesu Kɩrsaw, wùú mãã wù níé mǝ̃́ ba yalntiiw nã̀ã dii-m wù mããcemmã nã.

Wù-lǝ wùú hlã́ã̀-m nǝ̃ fãngããgu mǝ̃́ ba mǝ̃̀ gbǝ̃ǝ̃ mǝ̃̀ ce-mã.

13 Wù cíé dɩ̀-lǝ, halle ǹ-da wà mǝ̃ wáalá ǹ-jãn wù nã haasǝgu, ǹ-cuɔl wù bluuba nã̀ã ba mǝ̃̀ cɔ̃mmã̀ yáá mã̀ ca.

Nǝ̃ mǝ̃n mãã mǝ̃̀ sáá mã̀ã hi ǹ-hũɔ̃ Yesu cɔ̃mmã, gùú yáá gùu ce mǝ̃̀ sáá mǝ̃̀ fǝ̃ǝ̃ mǝ̃̀ mãã mǝ̃̀ yáá mǝ̃̀ ce dìi, gùú cíé Dũnnũẃ sɔ̃ mǝ̃̀ hujãndi.

14 Yitiiẁ níé mǝ̃̀ yiɛgu huhorɩmmã nã ǹ-ce mǝ̃́ hũɔ̃ wù cɔ̃mmã nã̀ã ce mǝ̃́ gbǝ̃ǝ̃ ǹ-ya cwaa'n dɩgaliɛ cɔ̃mmã́ dwal mǝ̃̀ nã Yesu Kɩrsaw nã.

15 Níyà cãwan díɛ̀, dɩ̀ káaláa wà cãwaahuhordǝ-i nã̀ã ba dɩ̀ saa cwaaba min bá hũɔ̃-dǝ: Yesu Kɩrsaẁ júó cuuw nã ǹ-da ǹ-kor diicĩɛ̃rǝntaa-i.

Diicĩɛ̃rǝntaaba sǝ̃ǝ̃nã, mǝ̃n-lǝ mã́ã dǝllii yáá dìi ɲirǝ̃ǝ̃ nã ǹ-ɲǝ̃ǝ̃ bà min dǝlli.

16 Nǝ̃ mã́ã mãã diicĩɛ̃rǝntaaba min yigagɩ nã, Dũnnũẁ sṹɔ̃́ mǝ̃̀ hujãndi.

Wù cíé dɩ̀-lǝ, Yesu Kɩrsaẃ da ǹ-gbǝ̃ǝ̃ ǹ-pɩgaa wù hyafɛ̃gǝgu pyandiɛ nǝ̃ gùú cwaabaa mãã bà yáá bà ji hũɔ̃ wù cɔ̃mmã, ǹ-da fɩraa nũmǝ̃nãsǝri, bá da wù mãã wù ji fɛ̃ wù hiɛga nǝ̃ bàá yo nĩĩguu mãã.

17 Yuuntasǝ'n yuuntiiw mãã fɩraa, wùú mãã wù sǝ̃n ku ǹ-da, wùú mãã curo'n sǝ̃n da-yǝ nǝ̃ wù yisɩri, wùú dɩn mãã Dũnnũw, bũũmã nǝ̃ fãngããgɩ́ ba wù drɔ fuwɔ fɩraa.

Kwaya!

18 Mǝ̃̀ bíɛ́ Timote, dìí mãã dìi saa ǹ-vaa nǝ̃ Dũnnũ tanhiilaabà wáalá dìí ǹ cɔ̃mmã nã bǝ̃ǝ̃dagǝ nã, mǝ̃̀ kra dìí nã-i mǝ̃̀ hã-n ń ce-dǝ.

Cãwanĩɛ̃ gáàgà ji hã-n nǝ̃ hyagbǝ̃ngbãndi ń da ǹ-ce byarhuhoraadi.

19 Hiraa Yesu cɔ̃m'n hũɔ̃mã nã, nǝ̃ ǹ hiɛ yo ga báa car-n nǝ̃ cɔ̃m ǹ gaaciega nã.

Badaabà sáa hũɔ̃ dìí nǝ̃n yáá bà hiɛga nã, gùú cíé, bà hũɔ̃mã bǝ̃́ǝ̃lǝ̃́ǝ̃.

20 Imeneba nǝ̃ Alɛkɩsãdrɩw, bá nǝ̃ gùú taaba sǝ̃ǝ̃nã-i.

Bà-lǝ mǝ̃̀ díilá-ba Sɩtãn nãkruɔgɩ nã, piirɩmmã̀ ji hi-ba, ǹ-da ǹ-fǝ̃ǝ̃ wà ba sǝ̃n saa bá waa ǹ-jãn Dũnnũw nã.