Tes. hǝ̃ǝ̃lnãw 2

Dìí mãã dɩ̀ ji ce Yitii'n jol'n bǝ̃ǝ̃gu

Hãmĩĩ cwanãã, yi cirǝ̃ǝ̃ cɔ̃mmã dɩn nã ɲì saa, ǹ-kã Yitii'n Yesu Kɩrsa jol'n cɔ̃mmã nã nǝ̃ yì tɩgimmã wù tuɔra.

2 Ɲi-ń da curoẁ waa cãwandarǝ nǝ̃-ɲã́ã̀ wà Dũnnũ Yuflǝ cãwan-i, yindagǝ nã wà hãmĩĩ nũɔ̃nãcãwan-i, yindagǝ nã sɛbɛdiɛ cwaaba kal-yǝ wà hãmĩĩ yállá-yǝ bà waa wà Yitii'n jol'n yuugɩ híí ǹ-tã, bláá ya dɩ́ gaala ɲì yuugɩ nã, yindagǝ nã ǹ-dii gbǝrsǝri ɲì nã.

3 Bláá ya curoẃ da tam ǹ-ba wù ji vuuraa ɲì nã.

Nã̀ã wa gɩ̀ yuugɩ̀ síì hi nã́ã́ cwaaba sáa suro Dũnnũw yuunã, nǝ̃ nã́ã́ bá sáa da byagǝ̃ngãw wùu suro ǹ-hiil wù hla bá fǝ̃ǝ̃-yǝ.

Biɛ wáà mãã wù suro Dũnnũ hlũũgu yuunã, wù-lǝ wú nǝ̃ wù hla'n bǝ̃ǝ̃lǝ̃m'n hlũũgɩ nã-i.

4 Ɲããtii-i nǝ̃-yǝ, nǝ̃ cwaabà mãã bà ne gùú ɲinɲãã mãã wà dũnnũba-i nǝ̃ kuu wo kuu mãã bà bũũ-gǝ, wù ji suro ɲã̀ min yuunã ǹ-ba wù piɛ wù hla nã drɔgu ǹ-maa gɩ̀-lǝ gɩ̀ ɲinɲã, nã̀ã ji fǝ̃ǝ̃ ǹ-suro ǹ-jãn Dũnnũ bũũduugu kusunã ǹ-kãã jiraa wà wù-lǝ wɩ̀-i Dũnnũw.

5 Yi yáá yì min nǝ̃-ɲã́ã̀ gùú nã mãã, mǝ̃̀ wáalá gɩ̀ cɔ̃mmã nǝ̃-ɲã́ã̀, ɲi sĩ́ĩnǝ̃́ǝ̃ mã̀ nã-i?

6 Yindiɛ, ɲi fǝ̃́ǝ̃lã́ wà kuu-i gùu cii gɩ̀ biɛw, fuwɔ ǹ-ce wú ba wù síì da ǹ-hlǝ ǹ-pɩgaa wù hla, nã́ã́ wù bǝ̃ǝ̃gɩ̀ sáa hi.

7 Gùú gaabɩbliɛgaa mãã gà ce dudũũmã nã Dũnnũw yuunã, gá nìɛ mããcemmã nã ǹ-tã.

Gɩ̀ yánã́ã Dũnnũẃ ce wùú mãã wù cii wù nã wú ta.

8 Gɩ̀-lǝ gùú nã-i, byagǝ̃ngãw mãã wù suro Dũnnũ hlũũgu yuunã, wù ji suro wù hla nã.

Yitii Yesuẁ ji ko-yǝ nǝ̃ wù nũɔ̃nã saluugu wù jollɩ nã, wù mãã wù ji hillaa gùú nã, wù ji guu wù nã.

9 Byagǝ̃ngãw mãã wù suro Dũnnũ hlũũgu yuunã wu-ń ga ba wù jo, wù ga jo nǝ̃ Sɩtãn fãngããgɩ-i, ǹ-ji ba wù ce cɔ̃nnurom'n placin, wù ce gaacepliɛcin wù pɩgaa, nǝ̃ cɔ̃ntugulǝmmãã mãã nǝ̃ kwasǝri.

10 Bàá mãã bà ga hyã cicuɔgu, wù ji vuuraa bà nã nǝ̃ vuuram'n plaaga min.

Bà sáa hũɔ̃ Dũnnũẃ ce sulam'n cɔ̃mmã́ dwal bà nã bá da ǹ-da korɩmmã.

11 Gùú cíé Dũnnũẃ tĩɛ̃ vuuram'n fãngããgu bà drɔ, ǹ-ce bá hũɔ̃ kwasǝ'n cɔ̃mmã,

12 ǹ-da ǹ-ce Dũnnũẃ jar bàá mãã bà sáa hũɔ̃ sulammã, nã̀ã ba cɔ̃mbɩblammã dwal bà nã, bà sugolli.

Tesalonikɩ lǝ'n Igɩlisɩ taabà saa bá hiraa dɩ̀ dɩndɩ nã

13 Hãmĩĩ cwanãã, ɲimãã mãã ɲì cɔ̃mmã̀ã dwal Yitiiw nã, gɩ̀ saa yi ba yì dũũ kwayaw yì hã Dũnnũw bǝ̃ǝ̃ wo bǝ̃ǝ̃ ɲi cɔ̃mmã nã.

Dũnnũẁ túɔ́ ǹ-ne ǹ-hiil ɲimãã-i dĩɛ̃lãmmã nã, ǹ-da ǹ-kor-ɲã́ã̀.

Dũnnũ Yuflǝw mãã wù ce ɲí ba ɲĩ̀ĩ kra ɲì dǝ ǹ-hã Dũnnũw, wù-lǝ, nǝ̃ ɲi hṹɔ̃lã́ gùú sulam'n cɔ̃mmã, ɲã̀-lǝ ɲã̀ã́ cíyà ɲí da korɩm mã́ã̀.

14 Dũnnũẁ tíɛ́ Yesu cɔ̃ndudwalɩmmã nã mãã yì tu-mã nǝ̃-ɲã́ã̀, ǹ-be-ɲã́ã̀ dɩ̀-lǝ dìí nã-i, ɲí da ǹ-da yuɔr Yitii Yesu Kɩrsa yuuntasǝ'n gbɩgbaamã nã.

15 Gɩ̀ sùɔ́gɩ nã, hãmĩĩ cwanãã, hyárà dɩ̀ dɩndɩ nã, nǝ̃ yi kárrá gàá nã mãã ǹ-hã-ɲã́ã̀ nũɔ̃nãcãwandɩ nã, yindagǝ nã sɛbɛba kusunã, ɲí blǝ-ga.

16 Yitii Yesu Kɩrsaw nǝ̃ wù hla, nǝ̃ yì Tǝ Dũnnũw mãã yì cɔ̃mmã̀ dwal wù nã, wú ne yì yiɛgu, nã̀ã hã-yáà nǝ̃ hyasɩrãgǝguu mãã fɩraa kuugu, nǝ̃ nãkrɔpiɛsɔhuhorgǝgu,

17 bá dii hyagbǝ̃ngbãndi ɲì hiɛga nã, nã̀ã dii kɩkǝmmã ɲì nã, ɲí da ǹ-ba ɲì waa gaafɩnfiɛga nã̀ã ba ɲì ce gaafɩnfiɛga.