Tes. hǝ̃ǝ̃lnãw 1

Tesalonikɩ lǝntaa'n sɛbɛba hǝ̃ǝ̃lnãw

Polẁ yállá gùú sɛbɛba hǝ̃ǝ̃lnãw mãã ǹ-hã Tesalonikɩ lǝ'n Igɩlisɩ taaba

Pol Fyãnuugu

Mã́ã Pol mã́ã̀, nǝ̃ Silvɛ̃w, nǝ̃ Timotew, hãmĩĩ-lǝ hãmĩĩ yállà sɛbɛ wáà yì tĩɛ̃ yì hã Tesalonikɩ lǝ'n Igɩlisɩ taabaa mãã yì Tǝ Dũnnũ bɩgaaba nã̀ã ba Yitii Yesu Kɩrsa bɩgaaba.

2 Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu nã̀ã mǝ̃gaa ǹ-hã-ɲã́ã̀ nǝ̃ hyasɩrãgǝgu.

Polẁ dũũ kwayaw wù hã Dũnnũw, nã̀ã ba wù cirǝ̃ǝ̃ wù nã wù hã Tesalonikɩ lǝntaaba

3 Hãmĩĩ cwanãã, ɲì hũɔ̃mã̀ mãã dìɛ mã̀ kã nǝ̃ yigagu dugɔ, nǝ̃ ɲì min, ɲi mãã dìɛ ɲì pɩgaa wà kuugɩ́ nìɛ gɩ̀ piɛ ɲì dwalbaɲĩɛ̃nãw nã gɩ̀ pya nã, gɩ̀ sáalá yí ba yì dũũ kwayaw yì hã Dũnnũw pyandiɛ ɲì cɔ̃mmã nã.

4 Ɲi mãã ɲĩ̀ĩ vaa ɲì hla, nã̀ã ba ɲĩ̀ĩ hũɔ̃ Yesu cɔ̃mmã, gɩ̀-i, yí ba yì huɔruɔ yì hla nã ɲì cɔ̃mmã nã.

Gùú cíé Dũnnũ Igɩlisɩ taaba sǝ̃ǝ̃nã yi waa ɲimãã cɔ̃mmã-i.

Nã̀ã wa, halle ǹ-da wà ba cuɔl-ɲã́ã̀ nǝ̃ ɲí da ywaruu yo, gɩ̀ cɔ̃mmã nã, ɲí nǝ̃ ɲĩ̀ĩ gbǝ̃ǝ̃ ǹ-hũɔ̃-mã ɲì hla nã.

5 Ɲi mãã ɲì ce gàa, gà-lǝ gàá pɩ́garà wà Dũnnũ sugojaruugɩ sṹɔ̃lã́, nã̀ã ba gà pɩgaa wà ɲi saa nǝ̃ Dũnnũ Yuuntasǝri, ɲi mãã ɲì ywar dìí cɔ̃mmã nã mãã.

6 Sulammã nã, Dũnnũẁ sṹɔ̃lã́, wù ga piɛ ywaruugu ǹ-hã bàá mãã bà ce ɲí ba ɲì ywar.

7 Ɲimãã mãã ywaruugɩ nã, Dũnnũẁ ga hã-ɲã́ã̀ fiisaagu hãmĩĩ tammã gùú nã mãã Yitii Yesuẁ ji hillaa drɔkuɔlɩ nã nǝ̃ wù mɛlɛgɛbaa mãã nǝ̃ fãngããgu.

8 Gɩ̀-lǝ gɩ̀ yuugu, bàá mãã bà sǝ̃n fǝ̃ǝ̃ Dũnnũw nã̀ã ba bà sǝ̃n nɔ̃ bà hã Yitii Yesu cɔ̃ndudwalɩmmãã mãã mã̀ waa dìi, wù ga jo dãncaalamdamã nã ǹ-ji piir-ba.

9 Gɩ̀ cɔ̃nhlataabà mãã bà ga da gùú piirɩmmãã mãã, mã̀ ga saa nǝ̃-ba, mã̀-i, Dũnnũẃ guu bà nã pyandiɛ, bà ga hal Yitii'n yigagɩ nã nã̀ã hal wù fãngããgɩ nã mãã gɩ̀ pɩgaa wù yuuntasǝ'n gbɩgbaamã.

10 Wù mãã wù ga jo gùú yuugu mãã, wà wù bluuba min, ba ji bũũ wù yiiri, nǝ̃ dɩ́ tugulǝǝ cwaaba min mãã bà hṹɔ̃lã́ wù cɔ̃mmã, ɲimãã yo ɲì nũɔ̃gɩ̀ ga ba dàa nǝ̃-ba.

Nã̀ã wa, yi díɛ́ dìí, nã̀ã nɔ̃ dìí mãã, ǹ-waa-dǝ nǝ̃-ɲã́ã̀, ɲi hṹɔ̃lã́-dǝ.

11 Gɩ̀-i, yí ba yì ce cirǝ̃mmã pyandiɛ yì hã-ɲã́ã̀, gɩ̀-lǝ gɩ́ da ǹ-ce ɲí saa nǝ̃ Dũnnũ belli.

Diifɩnfar wo diifɩnfar mãã ɲì caa ɲí ce-dǝ, wù fãngããgɩ́ ce ɲí ba ɲì ce dɩ́ suu, nã̀ã ce ɲì hũɔ̃mã́ ce ɲí ba mããcemmã nã.

12 Gɩ̀-lǝ gɩ̀ tammã, Yitii Yesu yiirɩ̀ ji bũũ ɲimãã cɔ̃mmã nã-i, nǝ̃ wùú yo, wú hã-ɲã́ã̀ nǝ̃ wù yuuntasǝ'n gbɩgbaamã.

Dũnnũw bá nǝ̃ Yitii Yesu Kɩrsa, bà-lǝ bàá níé yì yiɛgu díɛ̀dɩ min dɩ́ ce.