Tes. hǝ̃ǝ̃lnãw 3

Bláà ɲì cirǝ̃ǝ̃ Dũnnũw nã ɲì hã-yáà

Dìí nǝ̃n yánã́ã hãmĩĩ cwanãã, dɩ̀-i, ɲí ba ɲì cirǝ̃ǝ̃ Dũnnũw nã ɲì hã-yáà, wù cãwandɩ́ da ǹ-pisɩrĩɛ̃ yanɲã min nã, nǝ̃ bá ba bà bũũ-dǝ nã́ã́ dɩ̀ mãã dɩ̀ ce nĩĩguu mãã ɲì nãã.

2 Bláà ɲì cirǝ̃ǝ̃ Dũnnũ hlo wà wú hiil-yáà gaacĩɛ̃yantaaba nǝ̃ cobaliɛ'n nãkruɔgɩ nã, nã̀ã wa cwaaba min sǝ bàa hũɔ̃ Yesu cɔ̃mmã.

3 Nǝ̃ Yitiiw, yalntii-i nǝ̃-yǝ, wù ji dii kɩkǝmmã ɲì nã, nã̀ã cii ɲì nã nǝ̃ Diibɩblarǝntiiw.

4 Yitii'n cɔ̃mmã nã, yí nǝ̃ yìi piɛ yì nãkruɔgu ɲì drɔ, wà ɲí nìɛ ɲì ce, nã̀ã ba ɲì ji ba ɲì ce, yi kárrá dìí nã mãã, ǹ-hã-ɲã́ã̀.

5 Yitiiẃ pya ɲì nã, ɲí fǝ̃ǝ̃, ɲì cɔ̃mmã̀ mãã mã̀ dwal Dũnnũw nã nĩĩgu mãã, nã̀ã pya ɲì nã, ɲí fǝ̃ǝ̃ Kɩrsaẁ hyárá dɩ̀ dɩndɩ nã nĩĩgu mãã, ɲimãã yo, ɲí da ǹ-ba ɲì ce nĩĩgu.

Polẁ wa yí ba yì ce mããcemmã wùú tammã

6 Hãmĩĩ cwanãã, Yitii Yesu Kɩrsa yiirɩ nã, yi hã-ɲã́ã̀ nǝ̃-dǝ wà ɲí hal cwanããba nã mãã lonããba, nã̀ã ba bà sǝ̃n wáà hlũũguu mãã yi kárrá-gǝ ǹ-hã-ɲã́ã̀.

7 Ɲimãã nǝ̃ ɲì hla, ɲi fǝ̃́ǝ̃lã́ ɲi mãã ɲì saa ɲí ce nĩĩgu mãã nã̀ã tuu yì nǝ̃ǝ̃li.

Nã̀ã wa yi yáá ɲì sǝ̃ǝ̃nã, lonãã sáá nǝ̃-yáà.

8 Sulammã nã, yi sáa wuu curo'n wuur nǝ̃ǝ̃nĩĩ, nǝ̃ yi hṹɔ̃lã́ mããcegbǝ̃ǝ̃mã nǝ̃ ywaruugu, ǹ-ba mããcemmã nã yisuɔ nǝ̃ bǝ̃ǝ̃nã, yi báa da ǹ-piɛ yì yuunã tuuli ǹ-hã curo ɲì sǝ̃ǝ̃nã.

9 Gɩ̀ sǝ̃n ce nã́ã́ yi sáá yì saa nǝ̃ dɩ̀-lǝ-i do, nǝ̃ yi yáá yì caa yí pɩgaa-ɲã́ã̀, ɲí tuu yì nǝ̃ǝ̃l-i, ǹ-ba ɲì ce hãmĩĩ tammã.

10 Yi yáá yì min nǝ̃-ɲã́ã̀ gùú nã mãã, yi yáá yìi kra dìí nã mãã ǹ-hã-ɲã́ã̀ dɩ̀-i nnĩĩ: «Gùú tii nǝ̃n ba wù sǝ̃n caa wú ce mããcemmã, wu báa wuu wuur yo.»

11 Yi nìɛ yì nɔ̃ wà ɲì sǝ̃ǝ̃nã badaabá nìɛ lonsǝrɩ nã, bà sǝ̃n ce mããcem, nã̀ã ba bà dii bà nɔ̃nɲã cwaa'n cɔ̃mmã nã.

12 Yi cirǝ̃ǝ̃ gɩ̀ tuutaaba nã, nã̀ã kra dɩ̀ nã ǹ-hã-ba Yitii Yesu Kɩrsa yiirɩ nã, wà bá suu bà nɔ̃nɲã nã nã̀ã dii bà hla mããcemmã nã, ǹ-ba bà da bà nũɔ̃nã wuuri nǝ̃ bà hla.

13 Nǝ̃ ɲimãã-lǝ, hãmĩĩ cwanãã, bláá ywar nǝ̃ diifɩnfar'n celli.

14 Yi wáalá dìí sɛbɛ wáà kusunã, wudiɛ wu-ń ba yà nɔ̃-dǝ, nã̀ã ba wù sǝ̃n ce-dǝ, wáalà nǝ̃ bà dɩgaliɛw nǝ̃ ɲí da-yǝ nǝ̃ wú ba, gɩ́ da dii ciiri wù nã.

15 Nǝ̃ bláá blǝ wú ba ɲì ɲããtii.

Bláà ɲì gbǝ wù nã nã́ã́ ɲì cwanĩĩ-i.

Polẁ cirǝ̃ǝ̃ Dũnnũw nã, wù hã Tesalonikɩ lǝntaaba, nã̀ã ba wù hã-ba nǝ̃ fyãnuugu

16 Bǝ̃ǝ̃ wo bǝ̃ǝ̃, Yitiiw mãã sɩsɩrãmntiiw, wú hã-ɲã́ã̀ nǝ̃ sɩsɩrãmmã nǝ̃ wù hla, tammã min nã.

Yitiiẃ ba nǝ̃ ɲì min!

17 Mã́ã Pol, mã́ã hla'n nãkruɔguu yállá fyãnuu gúɔ̀.

Sɛbɛba min mãã mǝ̃̀ hiil-ba, mǝ̃̀ nɩsɩ bà nã nnĩĩ-i.

Mǝ̃̀ ce nnĩĩ-i.

18 Yitii Yesu Kɩrsaẃ ne ɲì yiɛgu!