Tes. dĩɛ̃l 4

Curo'n cɔ̃mmã̀ mãã mã̀ dwal Dũnnũw nã nĩĩguu mãã

Hãmĩĩ cwanãã, dìí nǝ̃n yánã́ã dɩ̀-i nnĩĩ: ɲi mãã ɲì saa ɲí ba nĩĩgu mãã nǝ̃ ɲì cɔ̃mmã́ dwal Dũnnũw nã, yi cíé ɲí kal-gǝ.

Sulammã nã, ɲí nǝ̃ dɩ̀-lǝ dìí nã-i.

Nǝ̃ yi cirǝ̃ǝ̃ ɲì nã, nã̀ã ba yì hã-ɲã́ã̀ hyagbǝ̃ngbãndi Yitii Yesu Kɩrsa yiir nã, wà ɲí ba ɲì piɛ kuu dɩ̀-lǝ dɩ̀ nã ɲì pya nã.

2 Sulammã nã, ɲi fǝ̃́ǝ̃lã́ Yitii Yesuẁ cíé yí kra dìí nã mãã ǹ-hã-ɲã́ã̀.

3 Dìí mãã Dũnnũ kusunã cɔ̃mmã dɩ̀-lǝ dɩ̀-i ɲí ba ɲì dǝ ǹ-ba wùú bɩgaaba: bláá ba durkũmsǝrɩ nã;

4 curo wo curo wú fǝ̃ǝ̃ ǹ-blǝ wù cãndɩ nã nã́ã́ dɩ̀ mãã dɩ̀ sáalá dɩ́ ba nĩĩgu mãã: yiyalɩmmã nã ǹ-ba dɩ̀ saa nǝ̃ bũũmã.

5 Bláá ɲǝ̃gãr cãnkũɔ̃m'n nũũgɩ nã, nã́ã́ cwaa'n dɩgaliɛw mãã bà sǝ̃n fǝ̃ǝ̃ Dũnnũw, bà mãã bà ce nĩĩgu mãã;

6 cɔ̃m mã́ã́ nã, curo'n báa ce ǹ-jãn yindagǝ nã ǹ-yuɔruɔ nǝ̃ wù mãã nǝ̃ gùú tii mãã cwansǝrɩ nã Kɩrsa cɔ̃m'n hũɔ̃mã nã.

Bà min mãã bà ce gà-lǝ, yi wáalá-dǝ ǹ-ta ǹ-tã nã̀ã ver ǹ-tu dɩ̀ nã, Yitiiẁ ji piir gɩ̀ taaba.

7 Sulammã, Dũnnũw sáa be-yáà wà yí juo ba dɩgaa'n ya nã sǝ, nǝ̃ wù bíé-yáà wà yí juo ba yì dǝ ǹ-ba wùú bɩgaaba.

8 Gɩ̀ sùɔ́gɩ nã, gùú tii nǝ̃n hla cɔ̃nfǝ̃ǝ̃gǝ gúɔ̀, wù sáa hla curo'n nũɔ̃nã cãwan sǝ, nǝ̃ Dũnnũw mãã wù hã-ɲã́ã̀ nǝ̃ wù Yuflǝw, wù hlárá wɩ̀-i.

9 Dũnnũw nǝ̃ wù hla, wù-lǝ wùú kállá-ɲã́ã̀, ɲí ba ɲì ɲĩɛ̃ cɔ̃mmã̀ dwal ɲì nã nã́ã́ ɲũũnãtaa-i nǝ̃-ɲã́ã̀.

Gɩ̀ sùɔ́gɩ nã, gɩ̀ sáa hi wà yí yal gɩ̀-lǝ gɩ̀ cɔ̃mmã ǹ-hã-ɲã́ã̀.

10 Yi mãã cwansǝrɩ nã nǝ̃ bàá mãã Mãsedwan yanɲã minw nã, ɲi pɩ́gará-ba nǝ̃ gùú dɩ dɩndɩ-i wà bà cɔ̃mmã́ dwal ɲì nã.

Nǝ̃ hãmĩĩ cwanãã, yi hã-ɲã́ã̀ nǝ̃ hyagbǝ̃ngbãndi wà ɲí ba ɲì piɛ kuu dɩ̀ nã ɲì maar.

11 Bláà ɲì ce nã́ã́ yi kárrá-dǝ ǹ-hã-ɲã́ã̀ nĩĩgu mãã: bláà ɲì caa sɩsɩrãmmã́ ba ɲì sǝ̃ǝ̃nã nǝ̃ ɲì jirataaba, bláá ba ɲì dii ɲì nɔ̃nɲã cwaa'n cɔ̃mmã nã, nǝ̃ bláá hũɔ̃ londi.

12 Ɲi-ń ba ɲì ce gɩ̀-lǝ gɩ̀ tammã, ɲì gaaciegà ji saa nǝ̃ǝ̃nĩĩtaa'n yinɲã nã, ɲì dugɔẁ síì ba curo nã mãdamã nã.

Yitii'n jol'n yuugu, wù ji pĩĩ cugutaaba

13 Hãmĩĩ cwanãã, yi sǝ̃n caa ɲí ba dudũũmã nã ǹ-ba ɲì sǝ̃n fǝ̃ǝ̃ cugutaa'n cɔ̃mmã, ɲì yigasǝrɩ báa ji ba ɲǝ̃ǝ̃mã nã nã́ã́ bàá mãã bà sáa piɛ nãkruɔgu Dũnnũw nã bà yigasǝrɩ mãã ɲǝ̃ǝ̃mã nã nĩĩgu mãã.

14 Sulammã nã, yi-ń ba yìi hũɔ̃ wà Yesuw kúú nã̀ã nĩĩ, gɩ̀ sùɔ́gɩ nã, yi hṹɔ̃lã́ wà Dũnnũw ga ta Yesuw nã-i ǹ-tɩgii bàá mãã bà hṹɔ̃lã́ wù cɔ̃mmã nã̀ã ku.

15 Sulammã nã, yi mãã yì ji waa dìi nǝ̃-ɲã́ã̀ ǹ-vaa nǝ̃ Yitii'n cãwandi, dɩ̀-i nnĩĩ nã: hãmĩĩ mãã yì ji ba nũmǝ̃nãw fuwɔ Yitii'n jollɩ nã dìi, dɩ̀ káaláa wà yi síì ta bà yiganã wù jǝ̃ǝ̃lǝ̃mmã.

16 Yi ji nɔ̃ kuudaagɩ̀ du: mɛlɛgɛba yuuntii'n yalli, nǝ̃ Dũnnũ yen'n bulli.

Gɩ̀-lǝ gɩ̀ nã, Yitiiw nǝ̃ wù hla, wù ga hlǝ drɔkuɔlɩ nã ǹ-hɩr ǹ-jo.

Bàá nǝ̃n hṹɔ̃lã́ Kɩrsa cɔ̃mmã nã̀ã ku, Dũnnũẁ ji pĩĩ bà-lǝ bà-i dĩɛ̃lãmmã nã.

17 Gɩ̀ furũũgɩ nã, hãmĩĩ nǝ̃n yánã́ã nũmǝ̃nãw, Dũnnũẁ ji hiil-yáà yi yuguraa yì min nǝ̃-ba yiiluugɩ nã ǹ-ga jǝ̃ǝ̃lǝ̃ǝ̃ yì Yitii nã.

Yi ga ba dàa nǝ̃-yǝ nnĩĩ-i fɩraa.

18 Gɩ̀ sùɔ́gɩ nã, bláà ɲì hã ɲì ɲĩɛ̃ nǝ̃ hyagbǝ̃ngbãndi nǝ̃ cãwanĩɛ̃ gáà.