Tes. dĩɛ̃l 5

Hãmĩĩ cwanãã, dìí mãã ǹ-kã Yitii'n jol'n bǝ̃ǝ̃guu nǝ̃ wù jol'n yuu'n cɔ̃mmã nã, gɩ̀ sáa hi yí ba yì ji yal ǹ-waa ɲã̀ cɔ̃mmã ǹ-ja-ɲã́ã̀.

2 Sulammã nã, ɲimãã yo, ɲi fǝ̃́ǝ̃lã́ dɩ́ kaalaa ɲì nã dugudugu wà Yitii'n jol'n yuugɩ ji hi nã́ã́ ŋmãllĩĩ mãã wù ŋmã wù jo gùú tammã mãã yisuɔgu.

3 Cwaaba-ń ji ba bà waa gùú nã mãã wà sɩsɩrãmmã nìɛ, wà kuɔkuɔ-lǝ yì hiɛga járrá, gùú bǝ̃ǝ̃gɩ-i narẁ ga juo tugulǝǝ ǹ-suu bà nã nã́ã́ cahuunciɛ'n kúsúuguu mãã gɩ-ń ce gɩ́ du wù nã gùú tammã, curo'n sɩga hlǝ dɩ̀ nã.

4 Nǝ̃ mã́ã cwanãã ɲimãã-lǝ, ɲi sǝ dudũũmã nã, yuu gúɔ̀gɩ̀ síì tugulǝǝ ɲì nã ŋmãllĩĩ'n tammã.

5 Sulammã nã, ɲì min gbɩgbaam'n cwaa-i nǝ̃-ɲã́ã̀, bǝ̃ǝ̃nãcwaa-i nǝ̃-ɲã́ã̀.

Yi sǝ yisɔtaa sǝ nǝ̃-yáà, yindagǝ nã dudũũmntaa sǝ nǝ̃-yáà.

6 Bláá ya yí ba duɔsǝmmã nã cwaa'n dɩgaliɛ tammã, yáà yí ba nũmǝ̃nãw, nǝ̃ yí mǝ̃gaa yí blǝ yì hla nã.

7 Nã̀ã wa duɔsǝtaaba duɔsǝ yisuɔ-i, nǝ̃ kwãnɲũɔ̃rãã yo bà ɲũɔ̃ mã́ blǝ-ba yisuɔ-i.

8 Nǝ̃ hãmĩĩ mãã bǝ̃ǝ̃nãtaa-lǝ, yi saa yí mǝ̃gaa ǹ-blǝ yì hla nã: yì hũɔ̃mã, nǝ̃ yì ɲĩɛ̃ cɔ̃m'n dwalɩmmã́ ba yì dǝ̃ngũũcĩĩbyarceɲinɲã yì cãndɩ nã, korɩmmãã mãã yì nãkrɔpiɛsuɔgu, mã̀-lǝ mã́ ba kwal'n hucuugu yì yuugɩ nã.

9 Nã̀ã wa Dũnnũẁ sáa ne ǹ-hiil-yáà, ǹ-kra yì nã yì dǝ piirɩm'n cɔ̃m nã sǝ, nǝ̃ wù cíé-dǝ yi da ǹ-da korɩmmã Yitii Yesu Kɩrsaw nã.

10 Yesuẁ kúú yì cɔ̃mmã nã, ǹ-da ǹ-ce halle yi-ń ba nũmǝ̃nã-i wo, yi-ń ba kúú nã-i wo, yí ba nũmǝ̃nãw yì min nǝ̃-yǝ.

11 Gùú cíé bláà ɲì hã ɲì ɲĩɛ̃ nǝ̃ hyagbǝ̃ngbãndi nǝ̃ ɲí ba ɲì pɛ ɲì ɲĩɛ̃ nã ǹ-da ǹ-kã nǝ̃ yiga Dũnnũ hlũũgɩ nã, nã́ã́ ɲi mãã dìɛ ɲì ce-dǝ nĩĩgu mãã ǹ-tã.

Polẁ mãã wù waa dìi nǝ̃ Tesalonikɩ lǝntaaba wù faal

12 Yi mãã yì cirǝ̃ǝ̃ dìí nã mãã ɲì saa hãmĩĩ cwanãã, dɩ̀-i ɲí ba ɲì bũũ bàá mãã bà ce mããcegbǝ̃ǝ̃mã ɲì sǝ̃ǝ̃nã, bàá mãã bà ta ɲì yigagɩ nã Yitii'n cɔ̃mmã nã, nǝ̃ bàá mãã bà gbǝ ɲì nã.

13 Bláà ɲì mǝ̃gaa ɲì bũũ-ba, nǝ̃ ɲí ba ɲì pɩgaa-ba, wà bà cɔ̃mmã dwal ɲì nã, bà mããcem'n cɔ̃mmã nã.

Bláà sɩsɩrãmmã nã nǝ̃ ɲì ɲĩɛ̃.

14 Hãmĩĩ cwanãã, yi cirǝ̃ǝ̃ ɲì nã wà ɲí ba ɲì gbǝ bàá nã mãã bà sǝ̃n wáà ǹ-vaa nǝ̃ bà mãã bà saa bá wáà nĩĩgu mãã.

Bàá mãã bà cãnĩɛ̃gàa karaa, hlã́ã̀-ba nǝ̃ hyagbǝ̃ngbãndi.

Píyà mǝ̃nkurnǝ̃ǝ̃ba nã, nǝ̃ ɲí ba ɲì fɛ̃ ɲì hiɛga nǝ̃ cwaaba min.

15 Blǝ́rà ɲì hla nã, curo'n báa ver diibɩblaari diibɩblaarɩ nã, nǝ̃ bláà ɲì caa diifɩnfar'n celli bǝ̃ǝ̃ wo bǝ̃ǝ̃ ɲì hã ɲì ɲĩɛ̃ nǝ̃ ɲí ba ɲì ce-dǝ ɲì hã cwaaba min.

16 Bláà dudwalɩmmã nã bǝ̃ǝ̃ wo bǝ̃ǝ̃.

17 Bláà cirǝ̃mmã nã pyandiɛ.

18 Bláà ɲì dũũ kwayaw ɲì hã Dũnnũw cɔ̃mmã min nã.

Dũnnũẁ kusuugɩ-i, wà ɲimãã mãã Yesu Kɩrsaw nã, ɲí ba ɲì ce nĩĩgu.

19 Bláá paa ɲí cii Dũnnũ Yuflǝw mãã gùú mããcemmã nã, ɲì nã.

20 Dũnnũ Yuflǝw mãã wù dii gùú cãwanĩɛ̃gaa mãã cwaa'n nɔ̃nɲã nã, bláá diɛ gɩ̀ cãwanĩɛ̃ga,

21 nǝ̃ mǝ̃́garà ɲí tiisǝ gà min ɲí ne.

Túulà nũɔ̃sǝn yaga.

22 Híilà ɲì hla gaabɩbliɛ'n plaaga min nã.

23 Sɩsɩrãmntii Dũnnũw nǝ̃ wù hla, wú kra ɲì nã ɲì dǝ, ɲì yurummã, ɲì yuflǝ, nǝ̃ ɲì cãndɩ́ mǝ̃gaa ǹ-ɲãl ǹ-kra wanyuɔrɔm'n sùɔ́ báa da ɲì nã gùú yuuguu mãã Yitii Yesu Kɩrsaẁ ga ver ǹ-jo hlo.

24 Wùú mãã wù bíé-ɲã́ã̀ yalntii nǝ̃-yǝ, wù-lǝ wùú ji ce-dǝ.

25 Hãmĩĩ cwanãã, bláà ɲì cirǝ̃ǝ̃ Dũnnũw nã ɲì hã-yáà.

26 Hlã́ã̀ ɲì ɲĩɛ̃ nǝ̃ cwansǝ'n fyãnuuguu mãã gɩ̀ pɩgaa wà ɲi dwal nǝ̃ ɲì ɲĩɛ̃.

27 Mǝ̃̀ waasǝ Yitii'n yiirɩ nã wà ɲí ya bá kal sɛbɛ wáà yì cwanããba min yinɲã nã.

28 Yitii Yesu Kɩrsaẃ ne ɲì yiɛgu.