Tes. dĩɛ̃l 3

Gùú cíé yi gáa ba yì síì gbǝ̃ǝ̃ ǹ-fennãã ǹ-hǝ̃ǝ̃sǝ, yi ne wà gɩ sáalá yi juo ba nǝ̃ yì dɩn Atɛn lǝri,

2 nã̀ã tĩɛ̃ Timotew ǹ-hã-ɲã́ã̀.

Wù-lǝ wɩ̀-i yì cwanĩĩw, nǝ̃ Dũnnũ mããcierw mãã yì waa Kɩrsa cɔ̃ndudwalɩmmã yì min nǝ̃-yǝ.

Wù yáá wù saa wú dii kɩkǝmmã ɲì nã, nã̀ã hã-ɲã́ã̀ nǝ̃ hyagbǝ̃ngbãndi, ɲì hũɔ̃m'n cɔ̃mmã kusunã.

3 Gɩ̀-lǝ gɩ̀ nã, curo'n sáá wù ji ya kuɔkuɔ ywaruugɩ́ gaala wù nã.

Nã̀ã wa, ɲimãã nǝ̃ ɲì hla ɲi fǝ̃́ǝ̃lã́ wà gɩ̀-lǝ gɩ̀ min Dũnnũ kusuu-i.

4 Yi yáá ɲì nãã gùú nã mãã, yi yáá yi-ń ce yí ba yì gbǝ ɲì nã wà cwaaba ji cuɔl-yáà.

Sulammã nã, dɩ̀-lǝ dɩ̀-i dìɛ.

Ɲi fǝ̃́ǝ̃lã́ dɩ́ kaalaa.

5 Gùú cíé mǝ̃̀ jáa ba mǝ̃̀ síì gbǝ̃ǝ̃ ǹ-fennãã, mǝ̃́ tĩɛ̃ Timotew wà wú kãã caa ǹ fǝ̃ǝ̃ dìí mãã dàa ɲì hũɔ̃m'n cɔ̃mmã nã.

Mǝ̃̀ yáá mǝ̃̀ sɔ̃ cɔ̃mmã dɩn nã-i mǝ̃́ wa Sɩtãn Dǝ̃ǝ̃tiiw báa ga juo dǝ̃ǝ̃-ɲã́ã̀.

Dɩ nã́ã̀ ba gɩ̀-lǝ gɩ̀ tammã, yì mããcemmã̀ yáá mã̀ cíé mǝ̃ǝ̃lǝ̃ǝ̃-i.

6 Nǝ̃ yindiɛ, Timoteẁ hlǝ́rá ɲì nãã ǹ-jo nǝ̃ cɔ̃ndudwalɩmmã ɲì hũɔ̃m'n cɔ̃mmã nã, nǝ̃ ɲì kusufɩnfaa'n cɔ̃mmã.

Wù wáalá nǝ̃-yáà wà ɲi nǝ̃ kãnɩmhuhorɩmmã yì cɔ̃mmã nã pyandiɛ, nã̀ã waa wà ɲi caa ɲí ver ǹ-da-yáà nã́ã́ hãmĩĩ mãã yì caa yí ver ǹ-da-ɲã́ã̀ nĩĩguu mãã.

7 Hãmĩĩ cwanãã, ɲì hũɔ̃m'n cɔ̃mmã nã, halle ǹ-ya yí ba yigaɲǝ̃ǝ̃gǝgu nǝ̃ ywaruugɩ nã mãã gùu caliɛ yì nã, yí da hyagbǝ̃ngbãndɩ-i.

8 Yindiɛ, ɲi mãã ɲì sórrá ǹ-hiraa dɩ̀ dɩndɩ nã Yitii'n cɔ̃mmã nã, gɩ̀-lǝ gùú vérrà gɩ̀ hã-yáà nǝ̃ nũmǝ̃nãsǝri hlo.

9 Yi da gùú dudwalɩmmã mãã ɲì cɔ̃mmã nã, nã̀ã ba yì ce kweyi-kweyi yì Dũnnũ yinɲã nã, yi sǝ nǝ̃ nũɔ̃ yì ji dũũ kwayaw ǹ-hã-yǝ ɲì cɔ̃mmã nã.

10 Yisuɔ nǝ̃ bǝ̃ǝ̃nã, yí nìɛ yì mũũ sukwaga nǝ̃ Dũnnũw, wú gbǝ̃ǝ̃ ǹ-ya yí ver ǹ-da-ɲã́ã̀.

Gɩ̀-lǝ gɩ̀ nã, gùú mãã gùu yon ɲì hũɔ̃mã nã, yí piɛ-gǝ ǹ-pya nã ǹ-hã-ɲã́ã̀.

11 Dũnnũw nǝ̃ wù hla, wùú mãã yì Tǝw, bá nǝ̃ Yitii Yesuw, bá ciɛl hlũũgu yí da ǹ-kã ɲì nãã.

12 Dũnnũẃ ce ɲì cɔ̃mmã̀ mãã mã̀ dwal ɲì ɲĩɛ̃ nã nĩĩguu mãã, nǝ̃ cwaa'n dɩgaliɛ cɔ̃mmã̀ dwállá ɲì nã nĩĩguu mãã, ɲã̀-lǝ ɲã́ ba ɲã̀ piɛ kuu ɲã̀ pya nã, nã́ã́ yi yáá nǝ̃-ɲã́ã̀ nĩĩgu mãã.

13 Wú hã-ɲã́ã̀ nǝ̃ hyagbǝ̃ngbãndi wanyuɔrɔm'n sùɔ́'n báa da ɲì nã, nǝ̃ ɲí ba yiyalɩmmã nã yì Tǝ Dũnnũ yinɲã nã, Yitii Yesu jol'n bǝ̃ǝ̃gu, wùú mãã wù ga jo nǝ̃ wù bluuba min!

Kwaya!