Tes. dĩɛ̃l 2

Dũnnũ mããcemmãã mãã Polẁ ce-mã Tesalonikɩ lǝri

Hãmĩĩ cwanãã, sulammã nã, ɲimãã nǝ̃ ɲì hla ɲi fǝ̃́ǝ̃lã́ wà yì jollɩ sáa ce mǝ̃ǝ̃lǝ̃ǝ̃ ɲì nãã.

2 Ɲi fǝ̃́ǝ̃lã́ wà Filipɩ lǝri, yi díɛ́ ywaruugu nǝ̃ kãnnãmmã.

Nǝ̃ dɩ̀-lǝ dɩ̀ furũũgɩ nã, yi píɛlá yì nãkruɔgu yì Dũnnũw drɔ, ǹ-da ǹ-waa Dũnnũ cɔ̃ndudwalɩmmã nǝ̃-ɲã byariɛcindi sǝ̃ǝ̃nã.

3 Sulammã nã, yi mãã yì hã-ɲã́ã̀ nǝ̃ gùú hyagbǝ̃ngbãndii mãã, yi sǝ̃n pe yì ce sǝ, dɩgaa'n cɔ̃m sǝ, yindagǝ nã vuuram'n cɔ̃m sǝ.

4 Nǝ̃ gɩ̀ mãã Dũnnũẁ dǝ̃́ǝ̃lã́-yáà ǹ-ne nǝ̃ gɩ́ dwal wù nã wú dii cɔ̃ndudwalɩmmã yì nãkruɔgɩ nã, gɩ̀ sùɔ́gɩ nã, yi-ń ba yì waa cɔ̃mmã, yi sǝ̃n caa yì cɔ̃m sǝ mã́ dwal cwaaba nã, nǝ̃ yi caa mã́ dwal Dũnnũw nã mãã wù dǝ̃ǝ̃ yì hiɛga wù ne.

5 Ɲimãã nǝ̃ ɲì hla, ɲi fǝ̃́ǝ̃lã́ wà yi sǝ̃n vuuraa curo nã ǹ-da.

Nǝ̃ gɩ̀ sáa ce nã́ã́ yi sórrá ǹ-ba yì caa jin-i, Dũnnũw-i mǝ̃̀ siɛrnãw.

6 Yi sǝ̃n caa cwaa sǝ bá ba bà bɩnǝ̃ǝ̃ yì nã ɲì nãã yindagǝ nã cwaa'n dɩgaliɛw saa.

Kɩrsa tĩɛ̃taa-i nǝ̃-yáà, gùú cíé yí ba yì yáá yì ji gbǝ̃ǝ̃ ǹ-guur ǹ-kra dɩ̀ nã ǹ-hã-ɲã́ã̀.

7 Nǝ̃ yi cíé yì hla baasaalaaba ɲì sǝ̃ǝ̃nã nã́ã́ ɲũũyǝw mãã blǝ wù tãnkuuraaba nã mãã wù val-ba nĩĩgu.

8 Ɲì cɔ̃mmã̀ yáá mã̀ dwal yì nã ǹ-car, gɩ̀-i, yi sǝ̃n caa yí waa Dũnnũ cɔ̃ndudwalɩm dɩndɩn sǝ nǝ̃-ɲã́ã̀, nǝ̃ ɲi mãã ɲì jáa ba yi cituubiiba, gɩ̀-i, halle yì hla'n yun yo, yí ba yì caa yí hã-ɲã́ã̀ nǝ̃-ɲã.

9 Hãmĩĩ cwanãã, ɲí nìɛ ɲì kãnãã yì mããcegbǝ̃ǝ̃mã nǝ̃ yì ywaruugɩ nã: yi yáá yì waa Dũnnũ cɔ̃ndudwalɩmmã yì ja-ɲã́ã̀ gùú nã mãã, yi cíé mããcemmã yisuɔ nǝ̃ bǝ̃ǝ̃nã.

Nã̀ã wa ɲì sǝ̃ǝ̃nã, yi sáá yì caa yí piɛ yì yuunã tuuli ǹ-hã curo.

10 Yi yáá nĩĩguu mãã nǝ̃-ɲã́ã̀, ɲimãã nǝ̃ ɲì hla, ɲi cíé gɩ̀ siɛrnããba, nǝ̃ Dũnnũ yo, wù cíé gɩ̀ siɛrnãw.

Ɲi hṹɔ̃lã́ Yesu cɔ̃mmã ǹ-ba yiyalɩmmã nã, sũɔ̃lɩmmã nã, wanyuɔrɔm'n sùɔ́ sáa da ɲì nã.

11 Tiiyǝẁ mãã wù ba nĩĩguu mãã nǝ̃ wù tãnkuuraaba, ɲi fǝ̃́ǝ̃lã́ dɩ́ kaalaa wà yi yáá nĩĩgɩ-i nǝ̃ curo wo curo ɲì sǝ̃ǝ̃nã.

12 Yi hlã-ɲã́ã̀ nǝ̃ hyagbǝ̃ngbãndi, ǹ-sɩrĩɛ̃ ɲì hiɛga nã, nã̀ã jiɛriɛ nǝ̃-ɲã́ã̀ wà ɲì waal'n tammã́ vaa nǝ̃ Dũnnũw.

Wù-lǝ wùú bíé-ɲã́ã̀ ǹ-ji dii-ɲã́ã̀ wù yuuntasǝrɩ nã nã̀ã dii-ɲã́ã̀ wù yuuntasǝ'n gbɩgbaamã nã.

13 Gùú cíé bǝ̃ǝ̃ wo bǝ̃ǝ̃ yí dũũ kwayaw pyandiɛ yì hã Dũnnũw ɲì cɔ̃mmã nã.

Dũnnũ cãwandii mãã ɲi nṹɔ̃́-dǝ yì saa, ɲi sáa blǝ dɩ́ ba cwaanbii'n cãwan, nǝ̃ ɲi blǝ́rá dɩ́ ba Dũnnũ cãwan-i.

Sulammã nã dɩ́ nǝ̃ nnĩĩ-i.

Dɩ́ nìɛ mããcemmã nã ɲimãã mãã ɲì hṹɔ̃lã́ Yesu cɔ̃mmã ɲì sǝ̃ǝ̃nã.

14 Sulammã nã, mã́ã cwanãã, ɲi túulá Suude yiɛ'n Igɩlisɩ taa'n nǝ̃ǝ̃li, bàá mãã Yesu Kɩrsaw nã.

Ɲì hla'n yiɛntaabà píɛlá ywaruugu ɲì drɔ, nã́ã́ Yahudyabà píɛlá-gǝ ǹ-hã bàá yo nĩĩgu mãã.

15 Yahudyaba, bà-lǝ bàá kúó Yitii Yesuw, nǝ̃ Dũnnũ tanhiilaa yo.

Bà cúɔlá-yáà.

Bà ce cwaaba min bá ba bà kuurǝǝ-i.

Bà cɔ̃mmã̀ sǝ̃n dwal Dũnnũw nã.

16 Bà cii-yáà wà yi báa waa Dũnnũ cɔ̃mmã nǝ̃ bàá mãã bà sǝ Yahudyaba ǹ-da kor-ba.

Gɩ̀-lǝ gɩ̀ tammã, bà yírìi bà faal bà gaacĩɛ̃yaga nã-i.

Nǝ̃ Dũnnũ hyadũũgɩ̀ gáa juo du nã, ǹ-ba gɩ̀ hi-ba.

Polẁ caa wú da Tesalonikɩ lǝntaaba

17 Nǝ̃ hãmĩĩ-lǝ, hãmĩĩ cwanãã, yi yáá yìi buruɔ nǝ̃-ɲã́ã̀ bǝ̃ǝ̃biidagǝ fiyãã.

Yi yáá yìi haliɛ yì ɲĩɛ̃ nã, nǝ̃ ɲì cɔ̃mmã̀ yáá dìɛ yì hiɛga nã pyandiɛ.

Gùú cíé yi yáá wa yí gbǝ̃ǝ̃ ǹ-jo ɲì nãã ǹ-ji naa, nã̀ã wa yi yáá yì caa dìí yáá nǝ̃ yì hiɛga min.

18 Gùú yáá gùu ce yí ba yì caa yí ver ǹ-jo ɲì nãã.

Mã́ã Pol, mǝ̃n dǝllɩ̀ káaláa wà mǝ̃ yáá mǝ̃̀ caa mǝ̃́ jo ǹ-gbãlãã, nǝ̃ Sɩtãnẃ hla nã̀ã paa ǹ-cii-m.

19 Haba ji ba hãmĩĩ nãkrɔpiɛsuɔgu, yì dudwalɩmmã, nã̀ã ba bà pɩgaa yì buusam'n kuugu Yitii Yesu yinɲã nã wù jollɩ nã nã́ã́ ɲimãã sǝ?

20 Sulammã nã, Dũnnũẁ bɩnǝ̃ǝ̃ yì nã ɲimãã cɔ̃mmã nã-i.

Ɲimãã cɔ̃mmã nã-i yí ba yì ce kweyi-kweyiw.