Tes. dĩɛ̃l 1

Tesalonikɩ taa'n sɛbɛdĩɛ̃lw

Polẁ yállá gùú sɛbɛdĩɛ̃lw mãã ǹ-hã Tesalonikɩ lǝ'n Igɩlisɩ taaba

Pol Fyãnuugu

Mã́ã Pol mã́ã̀ nǝ̃ Silvɛ̃w nǝ̃ Timotew, hãmĩĩ-lǝ hãmĩĩ yállà sɛbɛ wáà yì tĩɛ̃ yì hã Tesalonikɩ lǝ'n Igɩlisɩ taabaa mãã Tiiyǝ Dũnnũw bá nǝ̃ Yitii Yesu Kɩrsa bɩgaaba.

Dũnnũẃ ne ɲì yiɛgu nã̀ã hã-ɲã́ã̀ nǝ̃ hyasɩrãgǝgu.

Polẁ dũũ kwayaw wù hã Dũnnũw Tesalonikɩ lǝntaa'n hũɔ̃m'n cɔ̃mmã nã

2 Yi dũũ kwayaw pyandiɛ yì hã Dũnnũw ɲì min cɔ̃mmã nã, nã̀ã ba yì kãnãã ɲì cɔ̃mmã nã yì Dũnnũ cirǝ̃mmã nã pyandiɛ.

3 Bǝ̃ǝ̃ wo bǝ̃ǝ̃, yì Tǝ Dũnnũ yinɲã nã, yí nìɛ yì kãnãã ɲì hũɔ̃m'n cɔ̃mmã nã, mã̀ã́ mãã mã̀ã ce ɲí ba mããcemmã nã, nã̀ã ba yì kãnãã wà cwaa'n cɔ̃mmã dwállá ɲì nã, nã̀ã ba yì kãnãã hlo wà ɲí nìɛ ɲì gbǝ̃ǝ̃ ɲì kã nǝ̃ yiga ɲì nãkruɔ'n piɛmã nã Yitii Yesu Kɩrsaw nã.

4 Hãmĩĩ cwanãã ɲimãã mãã ɲì cɔ̃mmã̀ã dwal Dũnnũw nã, yi fǝ̃́ǝ̃lã́ wà wu níé ǹ-hiil-ɲã́ã̀ ɲí ba wù bɩgaaba.

5 Nã̀ã wa hãmĩĩ Yesu cɔ̃ndudwalɩmmã, yi sáa waa-mã nǝ̃-ɲã́ã̀ cãwanĩɛ̃ nã dɩndɩn nã sǝ, nǝ̃ yi wáalá-mã nǝ̃ Dũnnũ Yuflǝ fãngããgu, nã̀ã ba yìi ǹ-piɛ yì nãkruɔgu mã̀ nã kwelle.

Ɲi fǝ̃́ǝ̃lã́ yi yáá nĩĩgu mãã ɲì sǝ̃ǝ̃nã.

Yi yáá gɩ̀-lǝ gɩ̀ tammã ǹ-da ǹ-pɛ ɲimãã nã-i.

6 Nǝ̃ ɲimãã yo nǝ̃ ɲì hla, ɲi túulá hãmĩĩ nǝ̃ǝ̃l-i, nã̀ã tuu Yitii'n dǝlli, ǹ-hũɔ̃ ǹ-hyar Dũnnũ cãwandi ywargǝ̃ngããgu kusunã nǝ̃ Dũnnũ Yuflǝ dudwalɩmmã.

7 Gɩ̀-lǝ gɩ̀ tammã, bàá mãã bàa hũɔ̃ Yesu cɔ̃mmã Mãsedwan yiɛgu nǝ̃ Akayi yiɛgu, bà ji ba bà ne ɲimãã nã-i.

8 Nã̀ã wa Yitii'n cãwandɩ̀ pisɩrĩɛ̃ ɲimãã yiɛgɩ-i.

Dɩ̀ sáa hlǝ Mãsedwan yiɛgu nǝ̃ Akayi yiɛ dɩn sǝ.

Sùɔ́ wo sùɔ́, bà fǝ̃́ǝ̃lã́ ɲì Dũnnũ cɔ̃m'n hũɔ̃mã nã fuwɔ ǹ-ce gɩ́ ba gɩ̀ sáa hi bá ba bà ji waa-dǝ ǹ-ja curo.

9 Ɲi hyárrá-yáà ɲì kuugɩ nã gùú tammã, nã̀ã hũɔ̃ Dũnnũw cɔ̃mmã, cwaaba-ń ce bá ba bà waa-mã.

Ɲi nǝ̃́nǝ̃́ǝ̃ kiiba nã, nã̀ã hũɔ̃ Dũnnũhuhoryǝ'n cɔ̃mmã ǹ-ba ɲì ce mããcemmã ɲì hã-yǝ, wù-lǝ wɩ̀-i nũmǝ̃nãw,

10 nã̀ã ba ɲì fennãã wù bíɛ́ Yesuw nã mãã wù pĩ́ĩlã́ ǹ-hiil-yǝ cugutaaba sǝ̃ǝ̃nã, wú hlǝ drɔkuɔlɩ nã ǹ-juo kor-yáà nǝ̃ Dũnnũ hyadũũguu mãã gɩ̀ ga jo.