Kol. 3

Nũmǝ̃nãsǝflããri Kɩrsaw nã

Gɩ-ń ba wà Dũnnũw pĩ́ĩlã́ ǹ-hiil-ɲã́ã̀ kúúgɩ nã nǝ̃ Kɩrsaw, bláà ɲì caa drɔɲinɲã, Kɩrsaw mãã wùu jiraa Dũnnũ nãdĩĩyiɛgu gùú sùɔ́gu.

2 Bláà ɲì huu ɲì yigasǝri drɔɲin'n cɔ̃mmã nã, nǝ̃ bláá ba ɲì huu ɲì yigasǝri ɲũũrũũ ɲin'n cɔ̃mmã nã.

3 Nã̀ã wa ɲi kúú, nǝ̃ ɲì nũmǝ̃nãsǝrɩ́ ba dìi ŋmǝ̃ǝ̃rǝ̃ǝ̃ nǝ̃ Kɩrsaw Dũnnũw nã.

4 Kɩrsaw mãã yì nũmǝ̃nãsǝri, wu-ń ji hillaa, gɩ̀-lǝ gɩ̀ nã, ɲi ji hillaa ɲì min nǝ̃-yǝ wù faa'n gbɩgbaamã nã.

5 Yáalà kuu wo kuuw mãã ɲũũrũũ kuugu, gɩ́ ku ɲì nã: durkũmsǝri, dɩgaagu, cãnkũɔ̃m'n nũũgu, yisɩnã cɔ̃mbɩblammã, nǝ̃ sǝ̃nyuyisɩri, dìí mãã nã́ã́ siijãnũũ-i.

6 Gùú cɔ̃mmã nã-i, Dũnnũ hyadũũgɩ́ ba gɩ̀ jo [cwaaba nã mãã cɔ̃nhlataaba].

7 Haasǝgu, ɲì yáá ɲì wáà nnĩĩ-i, gùú nã mãã diicĩɛ̃rǝdɩ̀ yáá dìi jiraa ɲì sǝ̃ǝ̃nã.

8 Nǝ̃ yindiɛ, nǝ̃nǝ̃ǝ̃ ɲã̀-lǝ ɲã̀ min nã, ɲã̀ã́ mãã hyadũũgu, hyadũpiirǝgu, blasǝri, yirbǝ̃ǝ̃lǝ̃gǝgu, cãwaahãrĩɛ̃gaa mãã gà ji gbǝ̃ǝ̃ ǹ-hlǝ ɲì nũɔ̃gɩ nã.

Kɩrsa bɩgaaba nǝ̃ bà ɲĩɛ̃

9 Bláá ba ɲí bǝr kwasǝri nǝ̃ ɲì ɲĩɛ̃, nã̀ã wa ɲi nǝ̃́nǝ̃́ǝ̃ ɲì cosǝcũncuruɔdɩ nã nǝ̃ dɩ̀ gaacie'n tammã,

10 nã̀ã tuu cosǝflããrii mãã dɩ̀ ver, ǹ-da ǹ-da cɔ̃nfǝ̃ǝ̃gǝhuhorgǝgu, ǹ-vaa nǝ̃ wùú mãã wù nǝ̃́ǝ̃lã́-dǝ wù hla'n tammã.

11 Gɩ̀ sùɔ́gɩ nã, gɩ̀ sɩraa wà Yahudya-i nǝ̃-yǝ, yindagǝ nã Yahudya sǝ nǝ̃-yǝ, gɩ̀ sɩraa wà wu síilǝ́ yindagǝ nã wù sáa sii, gɩ̀ sɩraa wà norii-i, gɩ̀ sɩraa wà wù yinɲã sáa cugur, gɩ̀ sɩraa wà lɔ-i yindagǝ nã curow mãã wù hla nã, nǝ̃ Kɩrsaw-i ɲinɲã min, nã̀ã ba ɲã̀ min nã.

12 Gɩ̀ sùɔ́gɩ nã, ɲì mãã cwaabaa mãã Dũnnũẁ níé ǹ-hiil-ba, bá ba yiyalɩmmã nã, nã̀ã ba wù cituubiiba, bláà nǝ̃ blarɛmmã nǝ̃ hujãn'n sɔ̃lli, nǝ̃ kusufɩnfaagu, nǝ̃ hɩrnhlanãw, nǝ̃ hyafɛ̃gǝgu.

13 Bláà ɲì hũɔ̃ ɲì ɲĩɛ̃ cɔ̃mmã ɲì ɲĩɛ̃ nã, nǝ̃ wudiɛw-ń ba nǝ̃ dɩdarǝ wudiɛ'n yuunã, cíyà ɲì ɲĩɛ̃ dũndɔw.

Kɩrsaẁ cíé ɲì dũndɔw gùú tammã, ɲimãã yo, cíyà ɲì ɲĩɛ̃ dũndɔw.

14 Nǝ̃ dìí mãã cɔ̃mmã min yuugɩ nã, díilà dwalɩmmã ɲì hla nã, mã̀ã́ mãã mã̀ dii-ɲã́ã̀ ɲì ɲĩɛ̃ nã ǹ-jalliɛ.

15 Kɩrsaẃ hã-ɲã́ã̀ nǝ̃ hyasɩrãgǝgu, gùú mãã Dũnnũẁ bíé-ɲã́ã̀ gɩ̀ nã, ɲí juo ba cãndi dɩndi, gɩ́ jiraa ɲì hiɛga nã.

Nǝ̃ bláà ɲì fǝ̃ǝ̃ dwaari.

16 Kɩrsa cãwandi nǝ̃ dɩ̀ gbaasǝrɩ min, dɩ́ ba ɲì nã!

Bláà ɲì kal ɲì ɲĩɛ̃, nǝ̃ ɲí ba ɲì gbǝ ɲì ɲĩɛ̃ nã nǝ̃ cɔ̃nfǝ̃ǝ̃gǝgu ǹ-ta saburba nã, nǝ̃ Dũnnũ bũũm'n hlãnɲã, nǝ̃ hlãnɲãã mãã Dũnnũ Yuflǝẁ ce ɲí ba ɲì hyar-ɲã, nǝ̃ ɲí ba ɲì hyar hlãnɲã mãã ɲã̀ dũũ kwayaw ɲã̀ hã Dũnnũw nǝ̃ ɲì hiɛga min.

17 Nǝ̃ cɔ̃m wo cɔ̃mw mãã ɲi ce-mã, gùú ba cãwan nã-i wo, gaacie nã-i wo, bláà ɲì ce cɔ̃mmã min Yitii Yesu yiirɩ nã, ǹ-ta wù nã ǹ-ba ɲì dũũ kwayaw ɲì hã Tiiyǝ Dũnnũw.

Blǝbaɲĩɛ̃w suɔgɩ nã

18 Canãã ɲimãã, díilà ɲì hla ɲí hã ɲì blaba nã́ã́ Yitiiw mãã wù caa-dǝ nĩĩguu mãã.

19 Blanãã ɲimãã, yáalà ɲì canãã'n cɔ̃mmã́ dwal ɲì nã, nǝ̃ ɲi báa ba ɲì ca nǝ̃-ba.

20 Tãnkuuraa ɲimãã, bláà ɲì nɔ̃ ɲì hã ɲì huutaaba cɔ̃mmã min nã, nã̀ã wa gùú dwállà Yitiiw nã.

21 Tiiba ɲimãã yo, bláá ce ɲì tãnkuuraa'n hiɛgá dũ, bà cãnĩɛ̃ga báa ji da ǹ-karaa.

22 Lwɛ ɲimãã, bláà ɲì nɔ̃ ɲì hã ɲì taaba mãã dìɛ cuuw nã cɔ̃mmã min nã, nǝ̃ gɩ báa ba bà yin dɩndɩn nã, nã́ã́ yircaaraabaa mãã bà ce-dǝ nĩĩgu ǹ-da ǹ-dwal cwaaba nã, nǝ̃ bláà ɲì ce-dǝ nǝ̃ hyakaalagǝgu, ɲí ba ɲì sɔ̃ Yitiiw nã.

23 Cɔ̃m wo cɔ̃mw mãã ɲi ce-mã, bláá ba ɲì ce gɩ̀ mããcemmã nã́ã́ ɲi ce ɲi hã cwaa-i, nǝ̃ cíyà-mã nǝ̃ ɲì hiɛga min nã́ã́ ɲi ce ɲi hã Yitii-i,

24 nã̀ã ba ɲĩ̀ĩ fǝ̃ǝ̃ wà ɲi ga tuu sùɔ́gu Yitiiw saa gɩ́ ba ɲì pãlli.

[Sulammã nã,] ɲi mãã ɲi ce mããcemmã ɲi hã Yitiiw mãã, wɩ̀-i Kɩrsaw.

25 Nǝ̃ wùú mãã wù ce diibɩblaari, wù ga da diibɩblar'n pãlli, nã̀ã wa Dũnnũw sǝ̃n pyariɛ curo nã.