Kol. 4

Lɛntaa ɲimãã, cíyà ɲì lwɛba nǝ̃ dìí mãã dìi sũɔ̃l nã̀ã vaa, nã̀ã ba ɲĩ̀ĩ fǝ̃ǝ̃ wà ɲimãã yo, ɲí nǝ̃ yuuntii Dũnnũ suɔgu.

Cãwaafaaldǝdi

2 Váalà ɲì hla cirǝ̃mmã nã, ɲí ba nũmǝ̃nãw mã̀ nã ǹ-ba ɲì dũũ kwayaw ɲì hã Dũnnũw.

3 Bláà ɲì ce cirǝ̃mmã ɲì hã hãmĩĩ yo gbɩla: Dũnnũẃ ciɛl wù cãwan'n waam'n hlũgǝ̃ngããgu ǹ-hã-yáà, ǹ-da ǹ-ce mǝ̃́ gbǝ̃ǝ̃ ǹ-tu Kɩrsa cɔ̃nŋmǝ̃ǝ̃rǝ̃mmã nã, mǝ̃̀ mãã kasoduugɩ nã mã̀ã́ mãã mã̀ cɔ̃mmã nã,

4 nǝ̃ mǝ̃́ waa-mã, nã̀ã ce mã́ fǝ̃ǝ̃ ǹ-kaalaa, nã́ã́ mǝ̃̀ mãã mǝ̃̀ saa mǝ̃́ waa-mã nĩĩguu mãã.

5 Bàá mãã taasǝ̃ǝ̃nǝ̃ǝ̃taaba, bláà ɲì wáà nǝ̃ cɔ̃nfǝ̃ǝ̃gǝgu bà sǝ̃ǝ̃nã.

Ɲǝ̃́ǝ̃lã̀ ɲí blǝ bǝ̃ǝ̃gu.

6 Yáalà ɲì cãwanĩɛ̃gá ba cãwaadudwaliɛga bǝ̃ǝ̃ wo bǝ̃ǝ̃, nã̀ã ba gà ce kwãmmã, ǹ-da ǹ-ce ɲí fǝ̃ǝ̃ ɲi mãã ɲi saa ɲí siɛ curo wo curo gùú tammã.

Fyãnuugu

7 Dìí mãã ǹ-kã mǝ̃̀ yiɛgu, yì cwanĩĩ cituublɩ Tisikɩw mãã mããcierw mãã yalntiiw, nã̀ã ba mǝ̃̀ nãmããcierw Yitiiw nã, wù ga pɩgaa-ɲã́ã̀ nǝ̃ mã̀ min.

8 Mǝ̃̀ blǝ́rá-dǝ mǝ̃̀ kusuugɩ nã, ǹ-tĩɛ̃-yǝ ɲì nãã, wú da ǹ-ce ɲí fǝ̃ǝ̃ dìí mãã yì nã, nã̀ã hã-ɲã́ã̀ nǝ̃ hyagbǝ̃ngbãndi.

9 Mǝ̃̀ tĩɛ̃-yǝ nǝ̃ yì cwanĩĩ cituublɩ Onesɩnw mãã yalntiiw, nã̀ã ba wù hlǝ ɲì nãã.

Bà ga pɩgaa cɔ̃m wo cɔ̃mw mãã mã̀ ce dìɛ nnĩĩ nǝ̃-ɲã́ã̀.

10 Arisɩtarkɩw mãã mǝ̃̀ nãkasoduuntiiw, wù hã-ɲã́ã̀ nǝ̃ fyãnuugu, nǝ̃ Barnãbasɩ cwanĩĩ Marka yo, wù fyãn-ɲã́ã̀, wùú mãã wù cɔ̃mmã̀ yáá mã̀ã waa nǝ̃-ɲã́ã̀ ǹ-kra: wu-ń kã ɲì nãã, fǝ̃́ǝ̃lã̀ ɲí hyar-yǝ.

11 Yesuw mãã bà be-yǝ wà Susɩtusɩw, wù hã-ɲã́ã̀ nǝ̃ fyãnuugu.

Bàá mãã bà síilǝ́ bà sǝ̃ǝ̃nã, bàá dɩndɩn cíyà mããcemmã nǝ̃-m Dũnnũ yuuntasǝ'n cɔ̃mmã nã, nã̀ã ba bàa hã-m nǝ̃ hyasɩrãgǝgu dugɔ.

12 Epafrasɩw mãã wù hlǝ ɲì nãã, wù hã-ɲã́ã̀ nǝ̃ fyãnuugu.

Yesu Kɩrsa mããcier wáà sǝ̃n hiraa narɩmmã nã wù cirǝ̃mmã nã ɲì cɔ̃mmã nã, ɲí da ǹ-hiraa kwelle, nã́ã́ cwaabaa mãã bà yigasǝrìi mǝ̃gaa ǹ-kaalaa, nǝ̃ bá dii-dǝ bà hiɛga nã ǹ-ba bà ce Dũnnũ kusuugɩ min.

13 Mǝ̃̀ waa díɛ̀ mǝ̃̀ ja-ɲã́ã̀ wù cɔ̃mmã nã: wú nǝ̃ wùu dii wù hla ǹ-ba mããcegbǝ̃ǝ̃mã nã ɲì cɔ̃mmã nã, nǝ̃ Lawɔdise lǝ'n taa'n cɔ̃mmã nã, nǝ̃ Iyerapolisɩ lǝ'n taa'n cɔ̃mmã nã.

14 Yì cituublɩ Lukaw mãã dugɔtɔrbiɛw, bá nǝ̃ Demasɩw, bà fyãn-ɲã́ã̀.

15 Fyã́nnã̀ yì cwanããbaa mãã Lawɔdise lǝri, nǝ̃ ɲi fyãn Nɛ̃fasɩw nǝ̃ Igɩlisɩ taaba mãã bà tɩgii wù suɔgu.

16 Gùú bǝ̃ǝ̃guu mãã bà ga kal sɛbɛ wáà ɲì nãã, cíyà cɔ̃mmã min, bá kal-yǝ Lawɔdise lǝ'n Igɩlisɩ taa yo bà nãã.

Nǝ̃ ɲimãã yo, kállà wùú mãã wù ga hlǝ Lawɔdise lǝri.

17 Wáalà nǝ̃ Arsipɩw wà: «Fǝ̃ǝ̃ ń blǝ gùú mããcemmãã mãã ǹ díɛ́-mã Yitiiw nã, ǹ-da ǹ-mǝ̃gaa ǹ-ce mã́ suu.»

18 Mã́ã Pol mã́ã yállà sɛbɛ wáà nǝ̃ mǝ̃̀ nãkruɔgu, mǝ̃̀ hã-ɲã́ã̀ nǝ̃ fyãnuugu.

Bláà ɲì kãnãã mǝ̃̀ jɔrgɔba cɔ̃mmã nã.

Dũnnũẃ ne ɲì yiɛgu!