Kol. 2

Sulammã nã, mǝ̃̀ caa ɲí fǝ̃ǝ̃ narɩm mã́ã̀ mãã mã̀ã gbǝ̃ǝ̃ nĩĩguu mãã, mã̀ã́ mãã mǝ̃̀ ce-mã ɲì cɔ̃mmã nã, nǝ̃ bàá mãã Lawɔdise lǝri bà cɔ̃mmã nã, nǝ̃ bà minw mãã bà sáa da mǝ̃̀ yigagu ǹ-da.

2 Mǝ̃́ nǝ̃ narɩm mã́ã́ nã nnĩĩ nã, ǹ-da ǹ-ce bàá mãã bàa mǝ̃gaa ǹ-blǝ bà ɲĩɛ̃ dwalɩmmã nã, bá da hyagbǝ̃ngbãndi bà hiɛga nã, nã̀ã da cɔ̃nfǝ̃ǝ̃gǝgu dugɔ ǹ-da ǹ-fǝ̃ǝ̃ Dũnnũ cɔ̃nŋmǝ̃ǝ̃rǝ̃mmã, mã̀ã́ mãã Tiiyǝ'n mǝ̃gammã nǝ̃ Kɩrsa yo wù mǝ̃gãmmã.

3 Wùú nã-i, gbaasǝri minw mãã yigakaalagǝgu nǝ̃ cɔ̃nfǝ̃ǝ̃gǝgɩ nã, dɩ́ nǝ̃ dìi ŋmǝ̃ǝ̃rǝ̃ǝ̃.

4 Mǝ̃̀ waa dɩ̀-lǝ, curo'n báa ji vuuraa ɲì nã nǝ̃ nũɔ̃dwaluu'n cãwanĩɛ̃ga.

5 Sulammã nã, halle mǝ̃-ń ba mǝ̃̀ sɩraa nǝ̃-ɲã́ã̀ mǝ̃̀ cãndɩ nã, mǝ̃̀ hiɛgá nàa nǝ̃-ɲã́ã̀, nǝ̃ mǝ̃́ ba dudwalɩmmã nã ǹ-da wà gaalammã̀ sɩraa ɲì sǝ̃ǝ̃gɩ nã, nǝ̃ ɲí ba ɲĩ̀ĩ hiraa kwelle ɲì hũɔ̃mã nã Kɩrsaw nã.

Nũmǝ̃nãsǝrɩ̀ da Kɩrsa nã-i

6 Gɩ̀ sùɔ́gɩ nã, ɲi mãã ɲi hṹɔ̃lã́ Yitii Yesu Kɩrsa cɔ̃mmã, bláà ɲì wáà ǹ-vaa nǝ̃-yǝ;

7 nǝ̃́ǝ̃lã̀ ɲũmǝ̃nǝ̃ǝ̃ba ɲí vãnãã wù nã, ǹ-ba nǝ̃ kɩkǝmmã ɲì hũɔ̃mã nã, nã́ã́ bà kállá-ɲã́ã̀ nǝ̃-mã nĩĩguu mãã, nǝ̃ ɲí ba ɲì dũũ kwayaw Dũnnũw nã piyɛ̃.

8 Blǝ́rà ɲì hla nã, curo'n báa nɩsɩ ǹ-blǝ-ɲã́ã̀ nǝ̃ cwaa'n cɔ̃nfǝ̃ǝ̃gǝguu mãã nǝ̃ vuurammã mǝ̃ǝ̃lǝ̃ǝ̃, nã̀ã ba mã̀ã jiraa cwaa'n hlũsǝrɩ drɔ, nǝ̃ cuu ɲin'n kãnɩmmã, nǝ̃ mã̀ sǝ Kɩrsaw drɔ.

9 Sulammã nã, Dũnnũ dũnnũsǝrɩ min, dɩ́ nǝ̃ wùú cãndɩ nã-i.

10 Ɲi díɛ́ ɲinɲã min ɲã́ suu wù nã, wùú mãã yuuntasǝrɩ min yuugɩ nã, nǝ̃ fãngãnɲã min yuugɩ nã.

11 Wùú nã-i hlo, bà síilǝ́-ɲã́ã̀ nǝ̃ síìmãã mãã mã̀ sáa ce nǝ̃ curo'n blɩ'n nãkruɔgu, nǝ̃ Kɩrsa siim-i, mã̀ã́ mãã mã̀ hiil diicĩɛ̃rǝ'n cosǝri ɲì nã.

12 Sulammã nã, ǹ-ta ɲĩɛ̃mã nã, bà díilá ɲì pĩɛ̃ndi ɲì min nǝ̃ Kɩrsaw, nǝ̃ ɲí nĩĩ ǹ-hlǝ kuugɩ nã ɲì min nǝ̃-yǝ, ǹ-ta ɲì hũɔ̃mã nã Dũnnũ fãngããgɩ drɔ, gùú mãã gɩ̀ pĩ́ĩlã́ ǹ-hiil-yǝ kúúgɩ nã.

13 Ɲimãã mãã ɲi yáá nã́ã́ ɲì kurǝǝ-i ɲì yuɔrɔm'n cɔ̃mmã nã, nǝ̃ ɲi mãã ɲi sáá ɲĩ̀ĩ síì ɲì cãndɩ nã, Dũnnũẁ cíé ɲí ba nũmǝ̃nãw nǝ̃-yǝ.

Wù cíé yì yuɔrɔmmã min dũndɔw;

14 gùú sɛbɛ nǝ̃n yáá wùu yal yì yuunã, ǹ-ba wù hã-yáà nǝ̃ yuɔrɔmmã ǹ-vaa nǝ̃ Musa hlũũgu, wù húú ǹ-hiil-yǝ, nã̀ã gbǝ-yǝ gbǝl'n daagɩ drɔ ǹ-pyar-yǝ.

15 Nĩĩgɩ-i, wù híilá byarcewariɛga yuntaaba nǝ̃ fãngãtaaba saa, nã̀ã hiil-ba nǝ̃ sɩgagu, nã̀ã ta gbǝl'n daagɩ nã ǹ-gbǝ̃ǝ̃ bà nã.

16 Gɩ̀ sùɔ́gɩ nã, bláá ya curoẃ jar ɲì sugolli wuur'n cɔ̃mmã nã, yindagǝ nã guuɲũɔ̃gǝdagǝ cɔ̃mmã nã, yindagǝ nã paaruudagǝ cɔ̃mmã nã, yindagǝ nã hyarflĩɛ̃'n paaruudagǝ cɔ̃mmã nã, yindagǝ nã fiisaa'n yuu'n cɔ̃mmã nã:

17 ɲã̀-lǝ ɲã̀ min, ɲã̀ yáá ɲã̀ pɩgaa ɲin'n yuriɛ-i, ɲã̀ã́ mãã ɲã̀ ga jo, nǝ̃ ɲã̀ ɲããhuhorɩnɲã́ ba Kɩrsa nã-i.

18 Bláá ya bàá mãã bà vuu bà ce wà ba hɩ́rrǝ́ bà hla, nã̀ã ba bà bũũ mɛlɛgɛba, bá ce ɲí naa ɲì pãlli.

Bà mãã bà da gàá mãã bà dãnsǝ̃lãga nã, bà blǝ gá ba nũɔ̃sǝn ɲinɲã.

Gɩ̀ tuutaabà bũũ bà hla mǝ̃ǝ̃lǝ̃ǝ̃, ǹ-ta cwaanbii'n kãnɩmmã nã,

19 nǝ̃ wùú mãã yuugu, bà sǝ̃n ɲǝ̃gãr wù cɔ̃mmã nã.

Nã̀ã da gùú nã-i cãndɩ min, dɩ́ val dɩ̀ fa, nã̀ã ba dìi mǝ̃gaa ǹ-blǝ dɩ̀ ɲĩɛ̃ kukuun'n jalɩm'n sɔsǝrɩ nã, nǝ̃ dɩ̀ blǝm'n sɔsǝrɩ nã, nǝ̃ Dũnnũẃ ce dɩ́ ba dɩ̀ vǝ̃ǝ̃ dɩ̀ maar.

20 Ɲi-ń ba ɲĩ̀ĩ ku nǝ̃ Kɩrsaw ǹ-vaa nǝ̃ cuu ɲin'n kãnɩmmã, bii cíé ɲí ver ǹ-ba ɲi wáà nã́ã́ ɲí nǝ̃ cuu nã-i, ǹ-dii ɲì hla wù hlũsǝrɩ nã:

21 «Báa tuu-gǝ!

Báa dǝ̃ǝ̃-gǝ!

Báa jĩɛ̃ gɩ̀ nã!»?

22 Gɩ̀-lǝ gɩ̀ ɲinɲã̀ ji guu nã ɲã̀ mããcem'n furũũgɩ nã.

Bà ja cwaabà kárrá gùú hlũũ'n nǝ̃ǝ̃yaga nã nǝ̃ gùú kalɩmmã nã!

23 Sulammã nã, ɲã̀ hlǝ cɔ̃nfǝ̃ǝ̃gǝ'n cɔ̃mmã, nã̀ã wa ɲã̀ waa cwaabà kárrá gùú hlũsǝrii mãã dìi gbǝ̃ǝ̃ dɩ̀ cɔ̃mmã, nǝ̃ vuu ǹ-ce wà ǹ hɩ́rrǝ́ ǹ hla, nǝ̃ cãn'n kãnnãmmã, nã̀ã da ɲã̀ sǝ̃n pyar dugɔ, gɩ-ń ba gɩ̀ sǝ wà ǹ-yu nǝ̃ ǹ hla yisɩnã cɔ̃m dɩndɩn sǝ.