Kol. 1

Kolɔsɩ taa'n sɛbɛw

Polẁ yállá gùú sɛbɛw ǹ-hã Kolɔsɩ lǝ'n Igɩlisɩ taaba

Fyãnuugu nǝ̃ bɩnǝ̃mmã

Mã́ã Pol, mã́ã̀ mãã Yesu Kɩrsa tĩɛ̃tiiw ǹ-vaa nǝ̃ Dũnnũ kusuugu, nǝ̃ mǝ̃̀ cwanĩĩ Timotew,

2 hãmĩĩ yállà sɛbɛ wáà yi hã Kɩrsa bluubaa mãã Kolɔsɩ lǝri, yì cwanããbaa mãã yalntaaba Kɩrsaw nã: Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu!

3 Yi dũũ kwayaw yi hã Dũnnũw pyandiɛ, wùú mãã Yitii Yesu Kɩrsa Tǝw, gùú nã mãã yi cirǝ̃ǝ̃ wù nã yi hã-ɲã́ã̀.

4 Sulammã nã, yi nṹɔ̃́ ɲì hũɔ̃m'n cɔ̃mmã Yesu Kɩrsa cɔ̃mmã nã, nã̀ã ya Kɩrsa bluuba min, bà cɔ̃mmã́ dwal ɲì nã

5 nãkrɔpiɛsuɔ'n cɔ̃mmã nã, gùú mãã gɩ̀ fennãã ɲì nã drɔkuɔlɩ nã.

Nãkrɔpiɛsuɔ gúɔ̀, ɲi nṹɔ̃́ gɩ̀ cɔ̃mmã ǹ-tã, ǹ-ta sulam'n cãwandɩ nã, dìí mãã Yesu cɔ̃ndudwalɩmmã.

6 Yesu cɔ̃ndudwalɩm mã́ã̀ híí-ɲã́ã̀ nã́ã́ mã̀ mãã cuu yanɲã min nĩĩguu mãã, nã̀ã ba mã̀ ŋmǝ̃ǝ̃ biiga mã̀ pya nã.

Dɩ́ nǝ̃ nĩĩgɩ-i ɲimãã yo ɲì saa, ǹ-tuu gùú yuuguu mãã ɲi nṹɔ̃́, nã̀ã fǝ̃ǝ̃ Dũnnũẁ níé yì yiɛgu nǝ̃ gùú nelli sulammã nã,

7 ǹ-ba ɲi duu yì cituublɩ Epafrasɩẁ kállá-ɲã́ã̀ nǝ̃ dìi, wùú mãã yì nãmããcierw.

Wù cíé Kɩrsa mããcierw mãã yalntiiw ɲì saa,

8 nǝ̃ Dũnnũ Yuflǝẁ díilá gùú dwalɩmmã ɲì nã, wù cíé yí fǝ̃ǝ̃ mã̀ cɔ̃mmã.

9 Gùú cíé hãmĩĩ yo, ǹ-tuu gùú yuuguu mãã yi nṹɔ̃́-mã, yi sǝ̃n hiraa Dũnnũ cirǝ̃mmã nã ɲì cɔ̃mmã nã.

Yi cirǝ̃ǝ̃ wù nã wú ce ɲí fǝ̃ǝ̃ wù kusunã cɔ̃mmã min, nǝ̃ yigakaalagǝgɩ min nǝ̃ cɔ̃nfǝ̃ǝ̃gǝgɩ minw mãã gɩ̀ hlǝ Dũnnũ Yuflǝw nã,

10 ǹ-ba ɲi wáà ǹ-vaa nǝ̃ Yitiiw mãã wù caa-dǝ nĩĩguu mãã, nǝ̃ ɲì cɔ̃mmã́ dwal wù nã gbɩla gbɩla.

Ɲì gaaciefɩnfiɛgà ji ba ɲì biiga, nǝ̃ ɲí ba ɲì vǝ̃ǝ̃ Dũnnũ fǝ̃ǝ̃mã nã,

11 nǝ̃ wù fãngããguu mãã gɩ̀ pɩgaa wù yuuntasǝ'n gbɩgbaamã, gɩ́ hã-ɲã́ã̀ nǝ̃ fãngããgu cɔ̃mmã min nã, ɲí da ǹ-ba pyandiɛ vaanhlanãw nã, nǝ̃ hyafɛ̃gǝgɩ nã.

Nǝ̃ dudwalɩmmã nã,

12 ɲi ji ba ɲì dũũ kwayaw ɲi hã Tiiyǝw, wùú mãã wù cíé yí ba yì ji gbǝ̃ǝ̃ ǹ-tuu yuɔr sùɔ́gɩ nã nǝ̃ Kɩrsa bluuba wù gbɩgbaamã nã.

13 Wù híilá-yáà dudũũm'n fãngããgɩ nã, nã̀ã tuu ǹ-kã nǝ̃-yáà wù Bíɛ́ cituublɩ'n yuuntasǝrɩ nã,

14 wùú mãã wù híilá-yáà diicĩɛ̃rǝ'n nãkruɔgɩ nã, nã̀ã ce yì gaacĩɛ̃ya'n dũndɔw.

Kɩrsa cosǝri nǝ̃ wù mããcemmã

15 Dũnnũw mãã wù sǝ̃n da yinɲã nã, Biɛnĩĩw-i wù hla'n tammã, nã̀ã ba ɲããnǝ̃ǝ̃ɲã min blɩdĩɛ̃lw.

16 Sulammã nã, wùú nã-i ɲinɲã min, ɲã nǝ̃́ǝ̃lã́ drɔkuɔli nǝ̃ ɲũũrũũgɩ nã, ɲã̀ã́ mãã ɲã̀ da yinɲã nã nǝ̃ ɲã̀ã́ mãã ɲã̀ sǝ̃n da yinɲã nã, fãngãtaa'n wanjirammã, yuntaaba, yuuntasǝri, fãngããsǝri.

Wùú nǝ̃́ǝ̃lã́ ɲinɲã min, nǝ̃ ɲã́ ba wù ɲinɲã.

17 Wɩ̀-i ɲinɲã min yigagɩ nã, nǝ̃ ɲã̀ min, ɲã́ nǝ̃ ɲã̀ã tɩgɩnǝ̃ǝ̃ ǹ-ba wù nã.

18 Wɩ̀-i cãn'n yuugu, dìí mãã Igɩlisɩ taaba; wɩ̀-i dulli, blɩdĩɛ̃lw ǹ-hlǝ cugutaaba sǝ̃ǝ̃nã, ǹ-da ǹ-ba wuudĩɛ̃lw cɔ̃mmã min nã.

19 Sulammã nã, gɩ̀ dwállá Dũnnũw nã wú ce wù dũnnũtasǝrɩ min, dɩ́ ba wù nã.

20 Gɩ̀ dwállá wù nã wú ta Kɩrsaw nã ǹ-dii gbǝlli ɲinɲã min sǝ̃ǝ̃gɩ nã nǝ̃ wùú nǝ̃ wù hla, ǹ-tuu ɲũũrũũ ɲinɲã nã, ǹ-ga hlǝ drɔkuɔl'n ɲinɲã nã, ǹ-ta wù nã ǹ-dii sɩsɩrãmmã, nǝ̃ wù twammã mãã mã̀ tũnũũ gbǝl'n daagɩ nã.

21 Nǝ̃ ɲimãã mãã ɲi yáá noraaba haasǝgu, nã̀ã ba Dũnnũ ɲããtaaba ǹ-vaa nǝ̃ ɲì kãnɩmmã nǝ̃ ɲì gaabɩbliɛga, wù vérrá ǹ-dii gbǝlli ɲì sǝ̃ǝ̃gɩ nã kuɔkuɔgu,

22 ǹ-ta [wù Bíɛ́'n] kúúgɩ nã, gùú mãã cãnkũɔ̃m'n kuugu, ǹ-ce ɲí hiraa yiyalɩmmã nã wù yigagɩ nã, ǹ-ba ɲi sǝ nǝ̃ dor, nǝ̃ wanyuɔrɔmmã.

23 Nǝ̃ ɲi saa ɲí suro ǹ-hiraa kwelle, nǝ̃ ɲì hiɛgá mǝ̃gaa ǹ-jiraa ɲì hũɔ̃mã nã, nǝ̃ ɲi báa pyar ɲì nãkruɔgu Yesu cɔ̃ndudwalɩmmã nã mãã ɲi nṹɔ̃́-mã, mã̀ã́ mãã mã̀ túú ǹ-ja ɲããnǝ̃ǝ̃ɲã min drɔkuɔl'n taaragu, nǝ̃ mã́ã Pol, mǝ̃n juo ba mã̀ mããcierw.

Pol byaari Igɩlisɩ taa'n cɔ̃mmã nã

24 Mǝ̃̀ mãã gùú ywaruugɩ nã ɲì yuunã kuɔkuɔgu, mǝ̃́ nǝ̃ dudwalɩmmã nã gɩ̀ cɔ̃mmã.

Nã̀ã wa Kɩrsaẁ yónnã́ gùú ywaruugɩ nã mãã wù cãndɩ nã, dìí mãã Igɩlisɩ taaba, mǝ̃n cãnkũɔ̃m'n ywaruugɩ̀ suu gɩ̀-i.

25 Mã̀ã́ cɔ̃mmã nã-i, mǝ̃́ juo ba wùú mãã wù pɛ cwaaba nã Igɩlisɩ taaba sǝ̃ǝ̃nã, ǹ-vaa nǝ̃ Dũnnũẁ díilá gùú mããcemmã mǝ̃̀ nãkruɔgɩ nã wà mǝ̃ ce-mã ɲì cɔ̃mmã nã: ǹ-ce Dũnnũ cãwandɩ́ suu,

26 dìí mãã bãnɲã min cɔ̃nŋmǝ̃ǝ̃rǝ̃mmã, brǝnnɔ̃nɲã min saa, nã̀ã ba mã̀ã́ fɩ́rrǝ́ Kɩrsa bluuba nã kuɔkuɔgu.

27 Sulammã nã, Dũnnũẁ yáá wù caa wú ce bá fǝ̃ǝ̃ cɔ̃nŋmǝ̃ǝ̃rǝ̃m mã́ã̀ faaguu mãã dugɔ, bàá mãã bà sǝ Yahudyaba bà sǝ̃ǝ̃nã.

Dɩ̀ yuugɩ-i wà Kɩrsaw-ń ba ɲì nã, ɲi píɛlá ɲì nãkruɔgu dɩ̀ nã wà ɲí nǝ̃ guɔ wù faa'n gbɩgbaamã nã.

28 Yi tu wùú cɔ̃m nã-i, ǹ-ba yi gbǝ cwaaba min nã, nã̀ã ba yi kal-ba cɔ̃nfǝ̃ǝ̃gǝgɩ min nã, bà da ǹ-ba yigakaalataaba Kɩrsaw nã.

Gɩ̀-lǝ gɩ̀ nã, yi ji pɩgaa-ba ǹ-ja Dũnnũw.

29 Mǝ̃̀ ce mããcegbǝ̃ǝ̃mã mã̀ã́ cɔ̃m nã-i, ǹ-ba narɩmhuhorɩmmã nã nǝ̃ wù pyãluuguu mãã gɩ̀ ce mããcemmã mǝ̃̀ nã nǝ̃ fãngããgu.