Filip. 3

Ǹ-tuu Pol nǝ̃ǝ̃li

Yindiɛ, mã́ã cwanãã, bláà dudwalɩmmã nã Yitiiw nã!

Gɩ̀ sǝ̃n ca mǝ̃̀ nã, mǝ̃́ ver ǹ-yal gɩ̀ cɔ̃mmã dɩnmã ǹ-hã-ɲã́ã̀, nǝ̃ gɩ̀-lǝ gùú ji pɛ ɲì nã ɲí hiraa dɩ̀ dɩndɩ nã kwelle.

2 Blǝ́rà ɲì hla nã nǝ̃ mããcierabɩbliɛbaa mãã vamba, nã̀ã ba bà ne bá sii.

3 Nã̀ã wa hãmĩĩ-i yìi síì huhorɩmmã nã, hãmĩĩ mãã Dũnnũ Yuflǝẁ cíé yí ba yì ce mããcemmã yì hã Dũnnũw, nã̀ã ba yì pĩĩ yì hla nã Yesu Kɩrsaw nã, nã̀ã ba yì sǝ̃n piɛ yì nãkruɔgu yì hla'n cosǝrɩ drɔ.

4 Nã̀ã da mã́ã yo, mǝ̃̀ yáá mǝ̃̀ ji gbǝ̃ǝ̃ ǹ-piɛ mǝ̃̀ nãkruɔgu mǝ̃̀ hla'n cosǝrɩ drɔ.

Curow-ń ba wù ne wà wu ji gbǝ̃ǝ̃ ǹ-piɛ wù nãkruɔgu wù hla'n cosǝrɩ drɔ, mǝ̃n ji gbǝ̃ǝ̃ ǹ-ce-mã ǹ-maa:

5 bà síilǝ́-m mǝ̃̀ huum'n yuu bãn nɩrsiɛlnã yuugu, nǝ̃ mǝ̃́ huu ǹ-hlǝ Isɩrayɛl bluuba nã, Bɛ̃nsamɛ̃ nũɔ̃ntaaba nã, ǹ-ba Hebru biɛpiirw; ǹ-vaa nǝ̃ Musa hlũũgu, Farisĩɛ̃biɛ yáá nǝ̃-m;

6 mǝ̃̀ yáá mã̀ã dii dɔ̃mmã mǝ̃̀ hla nã, ǹ-ba mǝ̃̀ cuɔl Igɩlisɩ taaba; ǹ-vaa nǝ̃ Musa hlũũgɩ̀ yáá gùu kra gùú sũɔ̃lɩmmã nã, mǝ̃̀ sáá nǝ̃ wanyuɔrɔm.

7 Nǝ̃ gùú mãã mǝ̃̀ yáá mǝ̃̀ ne mǝ̃̀ hlǝmmã́ ba gɩ̀ nã, mǝ̃̀ jáa ba mǝ̃̀ ne gɩ́ ba durum-i Kɩrsa cɔ̃mmã nã.

8 Yitii Yesu Kɩrsa fǝ̃ǝ̃mãã mãã ɲinɲã min yuugɩ nã, mã̀ ce mǝ̃́ ba mǝ̃̀ ne ɲinɲã min ɲã́ ba durum-i.

Wù-lǝ wù cɔ̃mmã nã, mǝ̃̀ hṹɔ̃lã́ durummã cɔ̃mmã min nã, nã̀ã ba mǝ̃̀ ne mã̀ min, mã́ ba nã́ã́ hiɛn-i mǝ̃̀ yinɲã nã, ǹ-da ǹ-da Kɩrsaw,

9 nǝ̃ mǝ̃ báa ba wù nã mǝ̃̀ hla'n sũɔ̃lɩm'n cɔ̃mmã nã, mã̀ã́ mãã mã̀ hlǝ Musa hlũũgɩ nã, nǝ̃ gɩ́ ba sũɔ̃lɩmmã mãã mã̀ da Kɩrsa hũɔ̃mã nã, mã̀ã́ mãã mã̀ hlǝ Dũnnũw nã, nã̀ã ba mã̀ã jiraa hũɔ̃mã drɔ.

10 Gùú nã-i, mǝ̃̀ ji fǝ̃ǝ̃ Kɩrsaw, nã̀ã fǝ̃ǝ̃ wù nĩĩm'n fãngããgu, nã̀ã fǝ̃ǝ̃ gùú yuɔrii mãã mǝ̃̀ tuu-dǝ wù ywaruugɩ nã, ǹ-ba wù tammã wù kúúgɩ nã

11 ǹ-da ǹ-ce, dɩ-ń ba dɩ̀ ji gbǝ̃ǝ̃ ǹ-ce, mǝ̃́ ba mǝ̃̀ ga nĩĩ ǹ-hlǝ kuugɩ nã.

12 Gɩ̀ sáa ce nã́ã́ mǝ̃̀ díɛ́ dɩ̀-lǝ dɩ̀ min-i, yindagǝ nã mǝ̃̀ jáa jalliɛ ǹ-tã-i, nǝ̃ mǝ̃́ nǝ̃ susɔ̃llɩ nã mǝ̃̀ caa mǝ̃́ gbǝ̃ǝ̃ ǹ-blǝ-dǝ, nã̀ã wa mã́ã́ yo, Yesu Kɩrsaẁ blǝ́rá-m.

13 Mã́ã cwanãã, mǝ̃̀ sǝ̃n kãn wà mã́ã̀ nǝ̃ mǝ̃̀ hla, mǝ̃̀ ɲǝ̃́ǝ̃lã́ ǹ-blǝ-dǝ ǹ-tã, nǝ̃ mǝ̃́ nìɛ mǝ̃̀ ce cɔ̃mmã dɩn: mǝ̃̀ sĩĩnǝ̃ǝ̃ dìí mãã mǝ̃̀ furũũgɩ nã, nã̀ã ba mǝ̃̀ wa mǝ̃́ gbǝ̃ǝ̃ ǹ-hi dìí mãã mǝ̃̀ yigagɩ nã,

14 mǝ̃̀ sɔ̃ mǝ̃̀ ɲǝ̃ǝ̃ kaari, Dũnnũẁ bíé-m nǝ̃ gùú belli Yesu Kɩrsaw nã drɔgu, mǝ̃́ da gɩ̀ pãlli.

15 Yì minw mãã yì yigasǝrɩ́ kaalaa, yáalà yí huu yì yigasǝri cɔ̃m mã́ã́ nã, nǝ̃ gɩ-ń ba wà ɲì kãnɩmmã́ nǝ̃ mã̀ dǝ-i cɔ̃mdamã nã, Dũnnũẁ ji cugur ɲì yinɲã ɲí fǝ̃ǝ̃-mã.

16 Dɩ̀-lǝ dɩ̀ min drɔ, yi híí gùú sùɔ́gu nnĩĩ, yáalà yí ba yì wáà nǝ̃ǝ̃li dɩndi, [nǝ̃ yí ba gbǝllɩ nã].

17 Mã́ã cwanãã, túulà mǝ̃̀ nǝ̃ǝ̃li, nǝ̃ bàá mãã bà wáà ǹ-vaa nǝ̃ gùú tammã mãã ɲi da-mã hãmĩĩ nã, nǝ̃́ǝ̃lã̀ ɲì yinɲã bà nã.

18 Nã̀ã wa, cindɩ̀ wáà ɲããsǝrɩ nã nǝ̃ Kɩrsa gbǝl'n daagu; mǝ̃̀ wáalá bà cɔ̃mmã nǝ̃-ɲã́ã̀ bǝ̃ǝ̃cin, nǝ̃ mǝ̃̀ ver mǝ̃̀ waa-mã nǝ̃ ɲiɲirãm-i yindiɛgu.

19 Bà faalɩmmã-i guumã; bà kusunɲã-i bà dũnnũw, bà buusa bà hla nã nǝ̃ gùú mãã gɩ̀ ce bà ciiri, cuu ɲin'n cɔ̃m dɩndɩn-i bà kãnɩmmã nã.

20 Nǝ̃ hãmĩĩ-lǝ, drɔkuɔl'n cwaa-i nǝ̃-yáà, gùú sùɔ́gu mãã yi fennãã Kortiiw nã, wùú mãã Yitii Yesu Kɩrsaw.

21 Wù ji cin yì hujãncɔ̃m'n cãndi, ǹ-ce-dǝ wù cãn'n tammã, dìí mãã nǝ̃ faa'n gbɩgbaamã, ǹ-ta wù fãngããgɩ nã mãã gùu ce wú ba ɲinɲã min yuugɩ nã.