Filip. 4

Gùú cíé, mã́ã cwanãã cituubii ɲimãã, ɲì nũũgɩ́ nǝ̃ mǝ̃̀ nã ǹ-car, ɲimãã mãã mǝ̃̀ dudwalɩmmã, nã̀ã ba ɲì pɩgaa mǝ̃̀ buusam'n kuugu, hyárrà dɩ̀ dɩndɩ nã gùú tammã-i Yitiiw nã, mã́ã cituubii!

Polẁ gbǝ Filipɩ lǝntaaba nã

2 Mǝ̃̀ jiɛriɛ nǝ̃ Evodɩw, nã̀ã jiɛriɛ nǝ̃ Sɛ̃tisɩw, wà bá ba bà wáà gbǝllɩ nã Yitiiw nã.

3 Mǝ̃̀ nãmããcierhuhor yíí yo, mǝ̃̀ cirǝ̃ǝ̃ ǹ nã wà ń pɛ canãã báá nã, bàá mãã bà kã́ã́ yí ce Yesu cɔ̃ndudwalɩm'n byaari nǝ̃ hiɛga dɩnga nǝ̃ mã́ã̀, nǝ̃ Kɩlemãw, nǝ̃ mǝ̃̀ nãmããcieraa'n dɩgaliɛw mãã bà yiriɛgá nǝ̃ nũmǝ̃nãsǝ'n sɛbɛw nã.

4 Bláà dudwalɩmmã nã bǝ̃ǝ̃ wo bǝ̃ǝ̃ Yitiiw nã!

Mǝ̃̀ ver mǝ̃̀ waa-dǝ: bláà dudwalɩmmã nã!

5 Cwaaba min, bá fǝ̃ǝ̃ wà cofɩnfaa-i nǝ̃-ɲã́ã̀.

Yitiiẁ kúganã́ã.

6 Bláá jã cɔ̃m, nǝ̃ cɔ̃mmã min nã, pɩ́garà ɲì dugɔnããba ɲí ja Dũnnũw jiɛrɛmmã nã, nǝ̃ cirǝ̃mmã nã, nǝ̃ ɲí ba ɲì dũũ kwayaw ɲi hã-yǝ.

7 Nǝ̃ Dũnnũ sɩsɩrãmmãã mãã mã̀ ta curo'n guufǝ̃ǝ̃gǝgɩ min nã, mã̀ ji ba mã̀ cii ɲì hiɛga nã nǝ̃ ɲì kãnɩmmã, Yesu Kɩrsaw nã.

8 Ǹ-faal mã́ã cwanãã, yáalà ɲì kãnɩmmã́ vaa nǝ̃ cɔ̃m wo cɔ̃mw mãã sulammã, nǝ̃ cɔ̃m wo cɔ̃mw mãã mã̀ saa nǝ̃ bũũmã, nǝ̃ cɔ̃m wo cɔ̃mw mãã mã̀ã sũɔ̃l, nǝ̃ cɔ̃m wo cɔ̃mw mãã yalla, nǝ̃ cɔ̃m wo mãã mã̀ saa nǝ̃ dwalɩmmã, nǝ̃ cɔ̃m wo cɔ̃mw mãã mã̀ã saa, nǝ̃ cɔ̃m wo cɔ̃mw mãã mã̀ fa, nǝ̃ cɔ̃m wo cɔ̃mw mãã mã̀ saa nǝ̃ bɩnǝ̃mmã.

9 Ɲi kállá dìi, nã̀ã hũɔ̃-dǝ, nã̀ã nɔ̃-dǝ mǝ̃n nã, nǝ̃ dìí mãã ɲi díɛ́-dǝ mǝ̃̀ nã, kárrà dɩ̀ nã mããcemmã nã.

Gɩ̀-lǝ gɩ̀ nã, hyasɩrãgǝntii Dũnnũẁ ji ba nǝ̃-ɲã́ã̀.

Fyãnuugu

10 Mǝ̃̀ cɔ̃mmã̀ mãã mã̀ jáa ver ǹ-ba ɲì nã, mǝ̃̀ díɛ́ dudwalɩmmã dugɔ Yitiiw nã.

Mǝ̃̀ cɔ̃mmã̀ yáá ɲì nã dugɔ, nǝ̃ ɲi sáá ɲĩ̀ĩ da huɔ-i.

11 Gɩ̀ sáa ce nã́ã́ mǝ̃̀ dugɔẃ nǝ̃ kuu nã-i mǝ̃́ ba mǝ̃̀ waa dɩ̀-lǝ, nã̀ã wa mǝ̃̀ kállá-dǝ ǹ-ba mǝ̃̀ ya gùú mãã mǝ̃̀ nãkruɔgɩ nã, gɩ́ yu mǝ̃̀ yisɩri.

12 Mǝ̃̀ fǝ̃ǝ̃ mǝ̃̀ hũɔ̃ kuokuosǝri, nã̀ã ba mǝ̃̀ fǝ̃ǝ̃ mǝ̃̀ hũɔ̃ dalaagu.

Sùɔ́ wo sùɔ́, cɔ̃mmã min nã, mǝ̃̀ mĩ́ɛ̃lã́ nǝ̃ yelaagu nǝ̃ nũmmã; nã̀ã mĩɛ̃ nǝ̃ dalaagu nǝ̃ nãkwasǝri.

13 Wùú mãã wù hã-m nǝ̃ fãngããgu, mǝ̃̀ gbǝ̃ǝ̃ mǝ̃̀ ce cɔ̃mmã min wù nã, [Kɩrsaw].

14 Nǝ̃ ɲi fǝ̃́ǝ̃lã́ ǹ-ce-i, ǹ-tuu guɔ mǝ̃̀ ywaruugɩ nã.

15 Filipɩ lǝntaa ɲimãã nǝ̃ ɲì hla, ɲi fǝ̃́ǝ̃lã́-dǝ; mǝ̃̀ dúú nã mǝ̃̀ waa Yesu cɔ̃ndudwalɩmmã gùú bǝ̃ǝ̃gu, gùú nã mãã mǝ̃̀ hlǝ́rá Mãsedwan yiɛgu, Igɩlisɩ taa'n kurɔnɲã sǝ̃ǝ̃nã, gɩ̀ dɩn yo gɩ̀ sáa tuu guɔ nǝ̃-m mǝ̃̀ dalaagu nǝ̃ mǝ̃̀ naalaagɩ nã.

Ɲimãã dɩndɩn cíé-dǝ:

16 ǹ-tuu gùú nã mãã mǝ̃̀ yáá dàa Tesalonikɩ lǝri, ɲi tĩ́ɛ̃lã́ mǝ̃̀ dugɔ ɲinɲã ǹ-hã-m ǹ-gbãlãã.

17 Gɩ̀ sáa ce nã́ã́ mǝ̃̀ caa ɲããhãn-i, nǝ̃ mǝ̃̀ caa ɲí da ɲì hlǝmmã dugɔ mã̀ nã.

18 Mǝ̃̀ díɛ́ mǝ̃̀ dugɔ ɲinɲã min, nã̀ã da-ɲã ǹ-maa.

Ɲi tĩ́ɛ̃lã́ Epafroditɩẃ juo hã-m nǝ̃ gùú ɲinɲã, ɲã híilá-m; ɲã̀ã́ mãã nã́ã́ ɲããhãnɲãã mãã nǝ̃ hũũdwaluugu bà hã Dũnnũ nǝ̃-ɲã, nã̀ã ba siimãã mãã Dũnnũẁ hũɔ̃-mã, nǝ̃ mã́ ba mã̀ dwal wù nã.

19 Ɲì dugɔw mãã kuu wo kuu nã, mǝ̃̀ Dũnnũẁ ji hã-ɲã́ã̀ nǝ̃-gǝ gɩ́ hiil-ɲã́ã̀ ǹ-vaa nǝ̃ wù gbaasǝri, nǝ̃ wù faa'n gbɩgbaamã Yesu Kɩrsaw nã.

20 Wùú mãã yì Dũnnũw nǝ̃ yì Tǝw, bũũmã́ ba wù drɔ fuwɔ fɩraa!

Kwaya!

21 Fyã́nnã̀ Kɩrsa bluuba min Yesu Kɩrsa nã.

Cwanããbaa mãã nǝ̃-m, bà fyãn-ɲã́ã̀.

22 Kɩrsa bluuba min, bà hã-ɲã́ã̀ nǝ̃ fyãnuugu, nã́ã́ bàá mãã bà ce mããcemmã yuuntigǝ̃ngã Sesaar kuugɩ nã nnĩĩ.

23 Yitii Yesu Kɩrsaẃ ne ɲì min yiɛgu!