Filip. 2

Gɩ-ń ba wà ɲi da hyagbǝ̃ngbãndi Kɩrsaw nã, nã̀ã ba wà ɲi da hyasɩrãgǝgu dwalɩmmã nã, nã̀ã ba wà ɲí nǝ̃ gbǝllɩ nã nǝ̃ Dũnnũ Yuflǝw, nã̀ã ba wà blarɛmmã nǝ̃ hujãn'n sɔ̃llɩ́ nǝ̃ ɲì nã,

2 gbǝ́wà dɩ̀ dɩndɩ nã, mǝ̃̀ dudwalɩmmã́ da ǹ-jalliɛ.

Bláà nǝ̃ dwalɩmmã dɩnmã, nǝ̃ hiɛga dɩnga, nǝ̃ kãnɩmmã dɩnmã.

3 Bláá ba ɲì ce cɔ̃m nǝ̃ yandi, yindagǝ nã nǝ̃ huɔrɔmmã, nǝ̃ hɩ́rrǝ̀ ɲì hla nã, ɲí ba ɲì ne badaabá buɔ ɲì nã.

4 Curo wo curo ɲì sǝ̃ǝ̃nã, wu-ń wa wu ji ba wù kaal wù hla'n cɔ̃m dɩn nã, wú ba wù kaal wù nãbɩgaa yo, bà mǝ̃gãm'n cɔ̃mmã.

5 Yáalà ɲì kãnɩmmã́ ba sùɔ́gɩ dɩngu nǝ̃ Yesu Kɩrsa mǝ̃gãmmã:

6 wùú mãã bà vanãã nǝ̃ Dũnnũw, wù sáa ne bà vanãmmã, ǹ-kra mã̀ nã mã́ ba yigagɩ nã,

7 nǝ̃ wù híilá wù tammã wù hla nã, ǹ-tuu mããcier'n tammã, ǹ-juo ba cwaanbii'n tammã.

Wùú mãã bà yáá bà fǝ̃ǝ̃-yǝ curo'n blɩw,

8 wù hɩ́rrǝ́ wù hla ǹ-ba wù nɔ̃ wù hã Dũnnũw, fuwɔ ǹ-ga hi kuugu, halle kúúgu gbǝl'n daagɩ drɔ.

9 Gùú cíé Dũnnũẃ haar-yǝ, ǹ-kra wù nã wanjirammã mãã wanjirammã min yuugɩ nã, nã̀ã hã-yǝ nǝ̃ yiirii mãã yiriɛga min yuugɩ nã,

10 ǹ-da ǹ-ce Yesu yiirɩ nã, curo wo curo, wú kuulǝǝ drɔkuɔlɩ nã, nǝ̃ ɲũũrũũgɩ nã, nǝ̃ ɲũũrũũ taaragu,

11 nǝ̃ nãmbenĩɛ̃ga min, gá hũɔ̃ ǹ-hiraa dɩ̀ nã wà Yesu Kɩrsaw-i Yitiiw, ǹ-ba gà piɛ bũũmã Tiiyǝ Dũnnũw drɔ.

12 Gɩ̀ sùɔ́gɩ nã, mã́ã cituubii ɲimãã, gùú nã mãã mǝ̃̀ yáá dàa nǝ̃-ɲã́ã̀, ɲi yáá ɲì nɔ̃ ɲì hã-m pyandiɛ; nǝ̃ kuɔkuɔ yo, ǹ-da wà mǝ̃ sɩraa nǝ̃-ɲã́ã̀, cíyà mããcemmã nǝ̃ yigasɔ̃lli nǝ̃ bũũmã, ɲì korɩmmã́ da ǹ-curuɔ.

13 Sulammã nã, Dũnnũw díilà gɩ̀ cel'n kwãmmã nǝ̃ gɩ̀ celli ɲì nã, ǹ-vaa nǝ̃ wù kárrá dìí nã wù kusufɩnfaagɩ nã.

14 Bláà ɲì ce cɔ̃mmã min, hugɔ̃nãmmã nǝ̃ cincaruugɩ báa da mã̀ nã,

15 ǹ-da ǹ-ba ɲi sǝ nǝ̃ wanyuɔrɔm, nã̀ã ba yiyalɩmmã nã, ǹ-ba Dũnnũ tãnkuuraabaa mãã bà sǝ nǝ̃ dor bà bǝ̃ǝ̃ntaaba sǝ̃ǝ̃nã, bàá mãã bàa cĩɛ̃, nã̀ã ba cobaliɛba.

Ɲí nǝ̃ nã́ã́ lampanãã-i cuuw nã, ɲi caalaa bà sǝ̃ǝ̃nã

16 ǹ-ba ɲì hã-ba nǝ̃ nũmǝ̃nãsǝ'n cãwandi.

Gɩ̀ sùɔ́gɩ nã, Kɩrsa jol'n yuugu, mǝ̃̀ ga ba mǝ̃̀ pĩĩ mǝ̃̀ hla nã, ǹ-da wà mǝ̃ sáa sɔ̃ mǝ̃ǝ̃lǝ̃ǝ̃, yindagǝ nã ǹ-ce mããcemmã mǝ̃ǝ̃lǝ̃ǝ̃.

17 Halle mǝ̃-ń ba mǝ̃̀ ji ba nã́ã́ siijãnkwãmmãã mãã bàa ba bà tũnũũ mã̀ nã, nã̀ã ba mããcemmã nã ɲì hũɔ̃m'n cɔ̃mmã, mǝ̃́ nǝ̃ dudwalɩmmã nã gɩ̀ cɔ̃mmã nã, nã̀ã ba mǝ̃̀ ce kweyi-kweyiw nǝ̃ ɲì min.

18 Ɲimãã yo, bláà dudwalɩmmã nã, nǝ̃ ɲí ba ɲì ce kweyi-kweyiw nǝ̃-m.

Polẁ tĩɛ̃ Timotew nǝ̃ Epafroditɩw Filipɩ lǝri

19 Yitii Yesuw-ń hũɔ̃, gɩ-ń ce fiyãã, mǝ̃̀ ne mǝ̃ ji tĩɛ̃ Timoteẃ kã ɲì nãã, ǹ-da ǹ-ce mã́ã̀ nǝ̃ mǝ̃̀ hla, mǝ̃̀ mãã mǝ̃̀ ji nɔ̃ dìi ǹ-kã ɲì yiɛgu, mǝ̃́ da hyagbǝ̃ngbãndi dɩ̀ nã,

20 nã̀ã wa mǝ̃̀ sǝ nǝ̃ curo, wùú mãã nǝ̃ hiɛga dɩnga nǝ̃-m, ǹ-ba wù blǝ ɲì cɔ̃mmã wù hiɛga nã.

21 Nã̀ã wa, bà min, bà kaal bà hla'n cɔ̃m nã-i, bà sǝ̃n kaal Yesu Kɩrsa cɔ̃mmã yuunã.

22 Ɲi fǝ̃́ǝ̃lã́ wà Timotew pɩ́gará wù vĩĩmã Yitii'n hlũũgɩ nã, ǹ-kã yí ba mããcemmã nã yì min Yesu cɔ̃ndudwalɩmmã nã, nã́ã́ tãnkuur-i nǝ̃ wù tǝw.

23 Mǝ̃̀ ne mǝ̃́ tĩɛ̃-yǝ ɲì nãã, gùú nã mãã mǝ̃̀ cɔ̃mmã̀ ji kaalaa mǝ̃̀ nã.

24 Mǝ̃́ nǝ̃ mã̀ã piɛ mǝ̃̀ nãkruɔgu Yitiiw drɔ, wà mã́ã yo, mǝ̃̀ síì hǝ̃ǝ̃sǝ nã̀ã kã ɲì nãã.

25 Nǝ̃ mǝ̃̀ ne wà gɩ sáalá mǝ̃́ tĩɛ̃ mǝ̃̀ cwanĩĩ Epafroditɩw ɲì nãã, wùú mãã mǝ̃̀ nãmããcierw nǝ̃ mǝ̃̀ nãsɩrǝǝsɩw mãã ɲi tĩ́ɛ̃lã́-yǝ, wú da ǹ-juo pɛ mǝ̃̀ nã mǝ̃̀ dugɔnããba nã.

26 Wù caa wú ver ǹ-da ɲì min hlo, nǝ̃ wù hiɛgà dṹṹ nã ǹ-ba gà suɔ, nã̀ã wa ɲi nṹɔ̃́ wù hlɔm'n cɔ̃mmã.

27 Sulammã nã, wù yáá hlɔmmã nã nã́ã́ wù ji ku-i, nǝ̃ Dũnnũẁ sṹɔ̃́ wù hujãndi, nǝ̃ wù sáa sɔ̃ wùú dɩn dǝl nã sǝ, wù sṹɔ̃́ mã́ã yo mǝ̃̀ dǝllɩ nã, mǝ̃ báa ji ba yigaɲǝ̃ǝ̃gǝgu nǝ̃ yigaɲǝ̃ǝ̃gǝgɩ nã.

28 Mǝ̃̀ gǝǝraa mǝ̃̀ tĩɛ̃-yǝ ɲì nãã, ɲí da ǹ-ba dudwalɩmmã nã, ǹ-ver ǹ-da-yǝ, nǝ̃ kuugɩ́ da ǹ-hlǝ mã́ã yo, mǝ̃̀ yigaɲǝ̃ǝ̃gǝgɩ nã.

29 Mǝ̃́garà ɲí hyar-yǝ Yitiiw nã, nǝ̃ dudwalɩmmã mãã mã̀ã jalliɛ, nǝ̃ ɲi ya gɩ̀ cwaa'n tuugɩ́ ba nũɔ̃sǝn cwaaba ɲì saa.

30 Sulammã nã, Kɩrsa mããcem'n cɔ̃m nã-i wù yáá kúú'n nũɔ̃gɩ nã; wù hṹɔ̃lã́ ǹ-dii wù yuugu, ǹ-da ǹ-tuu ɲì sùɔ́gu pyallɩ nã mãã ɲi sáá ɲì ji gbǝ̃ǝ̃ ǹ-ce-dǝ ǹ-hã-m.