Filip. 1

Filipɩ taa'n sɛbɛw

Polẁ yállá gùú sɛbɛw mãã ǹ-hã Filipɩ lǝ'n Igɩlisɩ taaba

Fyãnuugu

Mã́ã Pol mã́ã̀, nǝ̃ Timotew, hãmĩĩ mãã Yesu Kɩrsa mããcieraaba, hãmĩĩ yállà sɛbɛ wáà yi hã ɲì minw mãã yiyalɩmmã nã Yesu Kɩrsaw nã Filipɩ lǝri, nǝ̃ Igɩlisɩ taa'n yigantaaba nǝ̃ Igɩlisɩ taa'n vũnvãnããba:

2 Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu!

3 Mǝ̃̀ dũũ kwayaw mǝ̃̀ hã mǝ̃̀ Dũnnũw, bǝ̃ǝ̃ wo bǝ̃ǝ̃ mãã mǝ̃̀ kãnãã ɲì cɔ̃mmã nã.

4 Mǝ̃̀ cirǝ̃mmã min nã ɲì min cɔ̃mmã nã, mǝ̃̀ cirǝ̃ǝ̃ wù nã pyandiɛ nǝ̃ dudwalɩmmã,

5 ǹ-da wà ǹ-tuu yudĩɛ̃lããgu ǹ-ji vaa nǝ̃ kuɔkuɔgu, ɲi tuu guɔ Yesu cɔ̃ndudwalɩmmã nã.

6 Mǝ̃́ nǝ̃ mã̀ã piɛ mǝ̃̀ nãkruɔgu dɩ̀ nã, wà gùú tii mãã wù dúú mããcehuhorɩm mã́ã̀ ɲì nã, wù ji faal-mã, fuwɔ ǹ-ji hi Yesu Kɩrsa jol'n yuugu.

7 Gɩ̀ sáalá mǝ̃́ ba mǝ̃̀ kãn dɩ̀-lǝ ɲì min cɔ̃mmã nã, nã̀ã wa ɲì cɔ̃mmã́ nǝ̃ mǝ̃̀ hiɛga nã, ɲimãã mãã Dũnnũẁ níé mǝ̃̀ yiɛgu nǝ̃ gùú nelli, gùu ba wà mǝ̃ nǝ̃ jɔrgɔba nã-i wo, yindagǝ nã wà mǝ̃ waa mǝ̃̀ hũɔ̃ Yesu cɔ̃ndudwalɩm-i, nã̀ã ba mǝ̃̀ pɩgaa-mã kwelle, ɲi tuu guɔ dɩ̀ nã.

8 Nã̀ã wa, Dũnnũw-i mǝ̃̀ sulamntiiw, wà ɲì cɔ̃mmã dwal mǝ̃̀ nã dugɔ nǝ̃ hiɛgaa mãã Yesu Kɩrsa hiɛga.

9 Nǝ̃ mǝ̃̀ mãã mǝ̃̀ cirǝ̃ǝ̃ dìí nã mǝ̃̀ cirǝ̃mmã nã, dɩ̀-i nnĩĩ: kuugɩ́ ba gɩ̀ piɛ ɲì dwalɩmmã nã gɩ̀ maar nǝ̃ cɔ̃nfǝ̃ǝ̃gǝgu, nǝ̃ mã́ ba mã̀ fǝ̃ǝ̃ cɔ̃mmã́ jalliɛ,

10 ǹ-ba ɲì fǝ̃ǝ̃ ɲì pyariɛ dìí mãã nũɔ̃sǝn dǝlli.

Gɩ̀-lǝ gɩ̀ nã, Kɩrsa jol'n yuugu, ɲi ji ba yalla, nã̀ã ba ɲi sǝ nǝ̃ wanyuɔrɔm,

11 ǹ-ba ɲì ce sũɔ̃lɩm'n yagaa mãã gà hlǝ Yesu Kɩrsaw nã dugɔ, gà piɛ bũũmã nǝ̃ bɩnǝ̃mmã Dũnnũw drɔ.

Pol cɔ̃mmã

12 Mã́ã cwanãã, mǝ̃̀ caa ɲí fǝ̃ǝ̃ wà dìí mãã dɩ̀ híí-m, dɩ̀ vérrá ǹ-pɛ Yesu cɔ̃ndudwalɩm nã-i, mã́ kã nǝ̃ yiga.

13 Sulammã nã, gùú ba wà kumãndã dogǝ̃ngãã nã-i wo, yindagǝ nã sùɔ́ wo sùɔ́, curo'n sɩriɛ wù sáa fǝ̃ǝ̃ wà Kɩrsa cɔ̃m nã-i bà díilá-m jɔrgɔba nã.

14 Nǝ̃ mǝ̃̀ cwanããba nã, cindɩ̀ píɛlá dɩ̀ nãkruɔgu Yitiiw drɔ mǝ̃̀ jɔrgɔba cɔ̃mmã nã, nã̀ã ba bà siɛ bà waa Dũnnũ cãwandi ǹ-maa dĩɛ̃lãmmã nã hlo, bà sǝ̃n sɔ̃ cɔ̃m nã.

15 Sulam-i, kusuguugu nǝ̃ yan cíé badaabá ba bà waa Kɩrsa cɔ̃mmã, nǝ̃ badaa-lǝ, bà waa-mã nǝ̃ kusufɩnfaagu.

16 Bà-lǝ bà ce-mã nǝ̃ dwalɩmmã, nã̀ã wa bà fǝ̃́ǝ̃lã́ wà mǝ̃́ nìɛ mǝ̃̀ waa mǝ̃̀ hũɔ̃ Yesu cɔ̃ndudwalɩm-i.

17 Nǝ̃ badaa-lǝ, bà mãã yandɩ nã, bà waa Kɩrsa cɔ̃mmã nǝ̃ hiɛgaa mãã gà sáa kaalaa, nã̀ã ba bà ne wà fíí ba ji piɛ kuu mǝ̃̀ ywaruugɩ nã mǝ̃̀ jɔrgɔba nã.

18 Mǝ̃̀ nũɔ̃ nǝ̃ bii?

Tammã min nã, gùú ba wà ba ce-mã nǝ̃ bà hiɛga min-i wo, yindagǝ nã bà sǝ̃n ce-mã nǝ̃ bà hiɛga min-i wo, Kɩrsa cɔ̃mmã́ nìɛ mã̀ waa: mǝ̃́ nǝ̃ dudwalɩmmã nã gɩ̀ cɔ̃mmã nã, nã̀ã ba mǝ̃̀ ji ba dudwalɩmmã nã gɩ̀ cɔ̃mmã nã hlo,

19 nã̀ã wa mǝ̃̀ fǝ̃́ǝ̃lã́ wà gɩ̀-lǝ gɩ̀ ji ce mǝ̃́ da korɩmmã ɲì cirǝ̃m'n cɔ̃mmã nã, nǝ̃ Yesu Kɩrsa Yuflǝ pyal'n cɔ̃mmã nã.

20 Ǹ-vaa nǝ̃ mǝ̃̀ mãã mǝ̃̀ fennãã dìí nã kwelle, nǝ̃ mǝ̃̀ mãã mã̀ã piɛ mǝ̃̀ nãkruɔgu dìí nã, kuu'n síì ce ciiri mǝ̃̀ nã.

Nǝ̃ ǹ-tuu kuɔkuɔgu nǝ̃ fuwɔ pyandiɛ, mǝ̃̀ ji da hyagbǝ̃ngbãndi ǹ-ba mǝ̃̀ pɩgaa Kɩrsa bũũmã nǝ̃ mǝ̃̀ cãndi, mǝ̃̀ nũmǝ̃nãsǝrɩ nã, yindagǝ nã mǝ̃̀ kúúgɩ nã.

21 Nã̀ã wa Kɩrsaw-i mǝ̃̀ nũmǝ̃nãsǝri, nǝ̃ mǝ̃̀ hlǝmmã̀ ba kúúgɩ nã.

22 Nǝ̃ mǝ̃̀ mããcem'n cɔ̃mmã nã, gɩ-ń ba gɩ̀ pyar dugɔ mǝ̃́ ba nũmǝ̃nãw ɲũũrũũgu nnĩĩ, mǝ̃̀ sáa fǝ̃ǝ̃ mǝ̃̀ mãã mǝ̃̀ ji ne ǹ-hiil gùu.

23 Mǝ̃́ nǝ̃ mã̀ã nǝ̃ǝ̃ ǹ-cɔ nã gɩ̀ cɔ̃mmã hǝ̃ǝ̃lmã nã: dɩ́ nǝ̃ mǝ̃̀ hiɛga nã, mǝ̃́ maar ǹ-ga ba nǝ̃ Kɩrsaw, gùú búɔlá nã dugɔ.

24 Nǝ̃ ɲimãã cɔ̃mmã nã, gɩ̀ cíé nũɔ̃sǝn cɔ̃m-i mǝ̃́ hǝ̃ǝ̃sǝ nũmǝ̃nãw ɲũũrũũgu nnĩĩ.

25 Mǝ̃̀ mãã mã̀ã piɛ mǝ̃̀ nãkruɔgu dɩ̀-lǝ dɩ̀ nã, mǝ̃̀ fǝ̃́ǝ̃lã́ wà mǝ̃ ji ba dìɛ, yí ba yì min nǝ̃-ɲã́ã̀, ǹ-da ǹ-ce ɲí kã nǝ̃ yiga nǝ̃ ɲí ba dudwalɩmmã nã ɲì hũɔ̃mã nã.

26 Mǝ̃̀ jollɩ nã ǹ-ga ba ɲì tuɔra, dɩ̀ ga ce ɲí mǝ̃gaa ǹ-ba ɲì bũũ ɲì hla Yesu Kɩrsaw nã mǝ̃̀ cɔ̃mmã nã.

Ǹ-tuu Kɩrsa nǝ̃ǝ̃li

27 Nǝ̃ bláà ɲì wáà dɩndɩn ǹ-vaa nǝ̃ Kɩrsa cɔ̃ndudwalɩmmã.

Gɩ̀-lǝ gɩ̀ nã, mã̀ã kã ɲì nãã wo, mǝ̃̀ sɩraa nǝ̃-ɲã́ã̀ wo, mǝ̃̀ ji ba mǝ̃̀ nɔ̃ bà waa ɲì cɔ̃mmã, wà ɲí nǝ̃ ɲĩ̀ĩ hiraa dɩ̀ dɩndɩ nã yuflǝw dɩnw nã, ǹ-ba ɲì ce byaari nǝ̃ hiɛga dɩnga hũɔ̃m'n cɔ̃mmã nã, mã̀ã́ mãã mã̀ saa nǝ̃ Yesu cɔ̃ndudwalɩm'n cɔ̃mmã,

28 ǹ-ba ɲi síì ya ɲì kuurǝǝbá dii gbǝrsǝri ɲì nã cɔ̃m nã.

Bà-lǝ bà saa, gɩ̀ pɩgaa bà guumã, nǝ̃ ɲimãã saa, gɩ̀ pɩgaa korɩmmã; nǝ̃ gɩ̀ hlǝ́rá Dũnnũ nã-i.

29 Sulammã nã, Dũnnũẁ níé ɲì yiɛgu, ǹ-ce ɲí hũɔ̃ Kɩrsa cɔ̃mmã, nã̀ã ver ǹ-ce ɲí ba ɲì ywar wù cɔ̃mmã nã,

30 ǹ-ba narɩmmã dɩnmã nã mãã ɲi yáá ɲì da-m mã̀ nã, nǝ̃ kuɔkuɔgu, ɲi jáa fǝ̃ǝ̃ wà mǝ̃́ nìɛ mã̀ nã yugo yugo.