Efɛ. 5

Ɲì mãã Dũnnũ tãnkuuraaba mãã wù cituubiiba, bláà ɲì suɔr-yǝ,

2 nǝ̃ ɲí tuu Kɩrsa nǝ̃ǝ̃li ǹ-ba ɲi wáà dwalɩmmã nã, wùú mãã yì cɔ̃mmã̀ dwállá wù nã, wú hã Dũnnũw nǝ̃ wù yuugu yì cɔ̃mmã nã, ǹ-ba nã́ã́ kuuguu mãã bà bũũ Dũnnũw nǝ̃-gǝ, nǝ̃ siimãã mãã nǝ̃ hũũdwaluugu Dũnnũw saa.

3 Nǝ̃ durkũmsǝri, nǝ̃ dɩgaa ya'n plaaga min, nǝ̃ sǝ̃nyuyisɩri, ɲã báa da ɲì sǝ̃ǝ̃nã gbal gbal, nã́ã́ dɩ̀ mãã dɩ̀ saa nǝ̃ Kɩrsa bluuba nĩĩguu mãã.

4 Cãwaahãrĩɛ̃ga, nǝ̃ baahãrsǝ'n cãwanĩɛ̃ga, yindagǝ nã cãwaabɩbliɛga báa da ɲì sǝ̃ǝ̃nã — nã̀ã wa gà sáa saa — nǝ̃ bláà ɲì waa cãwanĩɛ̃gaa mãã gà dũũ kwayaw Dũnnũw nã.

5 Nã̀ã wa ɲi fǝ̃́ǝ̃lã́ wà durkũmnããba, nǝ̃ dɩgannãba, yindagǝ nã bàá mãã kuu'n sǝ̃n yu bà yisɩri — dɩ̀ yuugɩ-i wà siijãnããba — bà síì tuu sùɔ́gu Kɩrsa yuuntasǝrɩ nã, nǝ̃ Dũnnũ dǝllɩ nã.

6 Bláá ya curoẃ vuuraa ɲì nã nǝ̃ cãwanĩɛ̃gaa mãã gà sǝ nǝ̃ yuu, nã̀ã wa gùú cɔ̃mmã nã-i, Dũnnũ hyadũũgɩ́ ba gɩ̀ jo cɔ̃nhlataaba nã.

7 Bláá tuu guɔ nǝ̃-ba cɔ̃m nã,

8 nã̀ã wa ɲi-ń ba ɲi yáá dudũũmã nã haasǝgu, yindiɛ ɲí nǝ̃ gbɩgbaam nã-i Yitiiw nã.

Bláà ɲì wáà gbɩgbaam'n cwaa'n tammã!

9 Nã̀ã wa gbɩgbaamã mãã mã̀ ce dìi curo'n blɩ'n hiɛga nã, dɩ̀-lǝ dɩ̀-i kusufɩnfaa'n plaaga min, nǝ̃ sũɔ̃lɩmmã, nǝ̃ sulammã.

10 Fǝ̃́ǝ̃lã̀ ɲí pyariɛ dìí mãã dɩ̀ dwal Yitiiw nã,

11 bláá ba ɲì tuu guɔ dudũũm'n yaga nã mãã gà sǝ̃n ce cɔ̃nhuhorɩm, nǝ̃ bláà ɲì curuɔ gà nã.

12 Nã̀ã wa gɩ̀ cwaabaa mãã bà ŋmǝ̃ǝ̃rǝ̃ǝ̃ bà ce dìi, dɩ̀ waamã nǝ̃ mã̀ hla, mã̀ ce ciiri;

13 nǝ̃ gbɩgbaamã mãã mã̀ curuɔ kuu wo kuu nã, gɩ̀ curuɔ gbaa, nã̀ã wa kuu wo kuuw mãã gɩ̀ curuɔ gɩ̀ tammã, gbɩgbaam-i.

14 Gùú cíé bá waa wà: «Suro, yíi mãã duɔsǝmmã nã, suro ń hlǝ cugutaaba sǝ̃ǝ̃nã, Kɩrsaẁ ji hiil gbɩgbaamã ǹ-hã-n.»

15 Mǝ̃́garà ɲí blǝ ɲì hla nã, nǝ̃ ɲi mãã ɲi wáà gùú tammã: bláá ba ɲì wáà nã́ã́ baahãrãã-i, nǝ̃ bláà ɲì wáà nã́ã́ cɔ̃nfǝ̃ǝ̃rǝ̃ǝ̃-i:

16 ɲǝ̃́ǝ̃lã̀ ɲí blǝ bǝ̃ǝ̃gu, nã̀ã wa yunɲã́ nǝ̃ ɲã̀ã bla.

17 Gùú cíé, ɲi sǝ̃n saa ɲí ba baahãrããba, nǝ̃ ɲi saa ɲí fǝ̃ǝ̃ Yitii'n kusuugu mãã gùu.

Fǝ̃ǝ̃-ǹ-ɲĩɛ̃ blǝmmã

18 Bláá ba ɲì ɲũɔ̃ ɛrsɛ̃ kwãmmã́ ba mã̀ blǝ-ɲã́ã̀: gɩ̀-lǝ gɩ̀ dii curow dɩgaa'n yaga nã.

Nǝ̃ bláà ɲì ya Dũnnũ Yuflǝẃ ba ɲì yuugɩ nã:

19 bláà ɲì taa saburba nǝ̃ ɲì ɲĩɛ̃; bláà ɲì hyar Dũnnũ bũũm'n hlãnɲã, nǝ̃ hlãnɲãã mãã Dũnnũ Yuflǝẁ ce ɲí ba ɲì hyar-ɲã; nǝ̃ ɲí ba ɲì bũũ Yitiiw nǝ̃ ɲì hiɛga min;

20 bláà ɲì dũũ kwayaw ɲi hã Tiiyǝ Dũnnũw pyandiɛ cɔ̃mmã min nã, Yitii Yesu Kɩrsa yiirɩ nã.

21 Díilà ɲì hla ɲí hã ɲì ɲĩɛ̃ Kɩrsa yigasɔ̃llɩ nã.

22 Canãã ɲimãã, díilà ɲì hla ɲí hã ɲì blaba nã́ã́ ɲi díilá ɲì hla ǹ-hã Yitii-i,

23 nã̀ã wa blanĩĩw-i cijal'n yuugɩ nã, nã́ã́ Kɩrsaw mãã Igɩlisɩ taa'n yuugɩ nã gùú tammã, bàá mãã wù cãndi, nã̀ã ba bà Kortiiw.

24 Igɩlisɩ taabà mãã bàa dii bà hla ǹ-hã Kɩrsaw gùú tammã, canãã yo, bà saa bá dii bà hla ǹ-hã bà blaba cɔ̃mmã min nã.

25 Blanãã ɲimãã, yáalà ɲì canãã'n cɔ̃mmã́ dwal ɲì nã, nã́ã́ Igɩlisɩ taa'n cɔ̃mmã̀ dwállá Kɩrsaw nã gùú tammã.

Wù hṹɔ̃lã́ ǹ-hã-ba nǝ̃ wù yuugu,

26 ǹ-da ǹ-kra-ba bà dǝ ǹ-hã Dũnnũw bà perɩm'n furũũgɩ nã, nǝ̃ bà calli nǝ̃ hũmmã nǝ̃ Dũnnũ cãwandi,

27 ǹ-ce gùú Igɩlisɩ taaba mãã bà faagùu ba faagu, bá pɩgaa bà hla nǝ̃-yǝ, ǹ-ba bà sǝ nǝ̃ dɩgaa, bà sǝ nǝ̃ fĩɛ̃nãm'n sùɔ́, nǝ̃ gɩ̀ ɲin'n tuugu, nã̀ã kra bà nã bà dǝ ǹ-hã Dũnnũw, bà ba bà sǝ nǝ̃ yuɔrɔm.

28 Nĩĩgɩ-i, blanããbà saa bá ya bà canãã'n cɔ̃mmã́ dwal bà nã, nã́ã́ bà hla'n cãn-i.

Wùú mãã wù ciɛ'n cɔ̃mmã̀ dwal wù nã, wù hla'n cɔ̃m dwállá wù nã.

29 Nã̀ã wa curo'n sɩriɛ, wùú mãã wù hla'n cãn'n cɔ̃mmã̀ã bla wù nã.

Nǝ̃ wù val-dǝ, nã̀ã ba wù mǝ̃gaa-dǝ, nã́ã́ Kɩrsaw mãã wù ce-dǝ nĩĩguu mãã wù hã Igɩlisɩ taaba,

30 nã̀ã wa yi cíé wù cãn'n sɔsǝ-i, [dìí mãã dìi ce nǝ̃ wù cãnkũɔ̃mã nǝ̃ wù kukuunɲã].

31 «Gùú cíé, bibiɛẁ ji ba wu-ń ce wú pyar wù tǝw bá nǝ̃ wù ɲũw nã, ǹ-ga ɲǝ̃gãr wù ciɛw nã, gɩ̀ cwaaba hǝ̃ǝ̃lbá ba sùɔ́gɩ dɩngu.»

32 Cɔ̃nŋmǝ̃ǝ̃rǝ̃m mã́ã̀, mããgǝ̃ngããm-i; nǝ̃ mǝ̃̀ wa mã́ waa Kɩrsa cɔ̃m-i nǝ̃ Igɩlisɩ taa'n cɔ̃mmã.

33 Dɩ-ń ba tam wo tam, curo wo curo, wú ya wù ciɛ'n cɔ̃mmã́ dwal wù nã nã́ã́ wù hla'n cɔ̃m-i, nǝ̃ cijal yo, wú ba wù bũũ wù blaw.