Efɛ. 6

Tãnkuuraa ɲimãã, bláà ɲì nɔ̃ ɲì hã ɲì huutaaba [Yitiiw nã,] nã̀ã wa dìí sáalà dɩ́ ce.

2 Ɲi saa ɲí ba ɲì bũũ ɲì tǝba nǝ̃ ɲì ɲũba, dɩ̀-i Musa hlũũ'n nǝ̃ǝ̃ldĩɛ̃lãdii mãã nũɔ̃'n pãllɩ́ pya dɩ̀ nã,

3 ǹ-da ǹ-ce ɲí ba dudwalɩmmã nã, nǝ̃ ɲí da biicin ɲũũrũũgu.

4 Nǝ̃ tiiba ɲimãã yo, bláá ce ɲì tãnkuuraa'n hiɛgá dũ, nǝ̃ vállà-ba ɲí gbǝ bà nã, nǝ̃ ɲí tu bà nã nǝ̃ tullii mãã dɩ̀ hlǝ Yitiiw nã.

5 Lwɛ ɲimãã, bláà ɲì nɔ̃ ɲì hã ɲì taaba cuuw nã, ɲí ba ɲì sɔ̃ bà nã, nã̀ã ba ɲí mǝ̃gaa ɲì bũũ-ba dugɔ nǝ̃ hyakaalagǝgu, nã́ã́ ɲí nɔ̃ ɲí hã Kɩrsa-i.

6 Bláá ba ɲì ce-dǝ bà yin dɩndɩn nã, nã́ã́ yircaaraabaa mãã bà ce-dǝ nĩĩgu, ǹ-da ǹ-dwal cwaaba nã; nǝ̃ bláà ɲì nɔ̃ ɲì hã-ba Kɩrsa lwɛ'n tammã, bàá mãã bà ce Dũnnũ kusuugu nǝ̃ bà hiɛga min.

7 Bláà ɲì ce mããcemmã ɲì hã-ba nǝ̃ kusufɩnfaagu, nã́ã́ ɲi ce ɲí hã Yitii-i, nǝ̃ ɲi sǝ̃n ce ɲí hã cwaa sǝ,

8 nã̀ã ba ɲĩ̀ĩ fǝ̃ǝ̃ wà curo wo curo, wùú ba lɔw yindagǝ nã wù sǝ lɔ, wùú nǝ̃ wù hla, wù cíé gùú diifɩnfaari, Yitiiẁ ga pã-yǝ nǝ̃-dǝ.

9 Lwɛntaa ɲimãã yo, bláà ɲì ce dìí tuugɩ-i ɲì hã-ba, nǝ̃ ɲí ya hurɩmmã́ ba, nã̀ã wa bà Tiiw nǝ̃ ɲimãã yo ɲì yow, wú nàa Dũnnũ suɔgu, nã̀ã ba wù sǝ̃n pyariɛ curow nã.

Dũnnũ bluu'n byarcewariɛga

10 Ǹ-faal, mã́ã cwanãã, díyà fãngããgu Yitiiw nã, nǝ̃ wù fãngãã'n pyãluugu.

11 Túulà Dũnnũ byarcewariɛga min ɲì hla'n drɔ, ǹ-da ǹ-gbǝ̃ǝ̃ ǹ-hiraa kwelle tiilǝtii'n fǝ̃ǝ̃rǝ̃mmã yuunã.

12 Nã̀ã wa, yi sǝ narɩmmã nã nǝ̃ curo, nǝ̃ yí nǝ̃ narɩmmã nã nǝ̃ yuuntasǝ-i, nǝ̃ fãngããsǝri, nǝ̃ cuu wáà dudũũm'n yuntaaba, nǝ̃ tãntɔ̃nããbaa mãã drɔkuɔlɩ nã.

13 Gùú cíé, túulà Dũnnũ byarcewariɛga min, ǹ-da ǹ-gbǝ̃ǝ̃ ǹ-suro yubɩblaagɩ yuunã, nã̀ã hiraa kwelle gùú nã mãã ɲì cíé cɔ̃mmã min.

14 Hyárà kwelle: díilà sulammã́ ba ɲì cãngbaagu ɲì nĩɛ̃lɩ nã; díilà sũɔ̃lɩmmã́ ba ɲì dǝ̃ngũũcĩĩbyarceɲinɲã;

15 díilà samǝ̃gasǝrɩ́ ba nã́ã́ viɛtaan-i ɲì vyanɲã nã, ɲí ba ɲí tu sɩsɩrãm'n cɔ̃ndudwalɩmmã;

16 Cɔ̃mmã min nã, túulà hũɔ̃mã́ ba nã́ã́ byarcekuugu mãã gɩ̀ cĩĩ-ba, gùú mãã gɩ̀ ji ce ɲí gbǝ̃ǝ̃ ǹ-dĩĩ diibɩblar'n cũɔ̃nɲã minw mãã ɲã̀ã tii;

17 Hṹɔ̃lã̀ korɩmmã́ ba nã́ã́ kwal'n hucuu-i ɲì saa, nǝ̃ ɲí hũɔ̃ Dũnnũ Yuflǝ dãngunãw, wùú mãã Dũnnũ cãwandi.

18 Ǹ-ta Dũnnũ Yuflǝw nã, bǝ̃ǝ̃ wo bǝ̃ǝ̃, bláà ɲì ce cirǝ̃m'n plaaga min nǝ̃ jiɛrɛmmã.

Bláà nũmǝ̃nãw, ɲí vaa ɲì hla dɩ̀ nã, nǝ̃ ɲí ba ɲì ce cirǝ̃mmã ɲí hã Kɩrsa bluuba min.

19 Bláà ɲì ce cirǝ̃mmã ɲì hã mã́ã́ yo, ǹ-da ǹ-ce, mǝ̃-ń haa mǝ̃̀ nũɔ̃gu, Dũnnũẃ hã-m nǝ̃ cãwan, mǝ̃́ da hyagbǝ̃ngbãndi ǹ-ba mǝ̃̀ pɩgaa cɔ̃nŋmǝ̃ǝ̃rǝ̃mmã mãã Yesu cɔ̃ndudwalɩmmã nã.

20 Mã̀ã́ cɔ̃mmã nã-i, mǝ̃́ ba jɔrgɔba nã, mã́ã mãã Dũnnũẁ kárrá mǝ̃̀ nã mǝ̃́ ba mǝ̃̀ pɩgaa wù cɔ̃mmã.

Bláà ɲì ce cirǝ̃mmã, mǝ̃́ da hyagbǝ̃ngbãndi ǹ-ba mǝ̃̀ waa-mã, nã́ã́ mǝ̃̀ mãã mǝ̃̀ saa mǝ̃́ ce-dǝ nĩĩgu.

Fyãnuugu

21 Mǝ̃̀ mãã mǝ̃̀ caa ɲimãã yo, ɲí fǝ̃ǝ̃ mǝ̃̀ cɔ̃mmã mãã nĩĩgu, nã̀ã fǝ̃ǝ̃ mǝ̃̀ mãã mǝ̃̀ ce dìi, mǝ̃̀ cwanĩĩ Tisikɩw mãã mǝ̃̀ cituublɩw, nã̀ã ba mããcierw mãã yalntiiw Yitiiw nã, wù ga taa mã̀ min ǹ-ja-ɲã́ã̀.

22 Mǝ̃̀ blǝ́rá-dǝ mǝ̃̀ kusuugɩ nã, ǹ-tĩɛ̃-yǝ ɲì nãã, wú da ǹ-ce ɲí fǝ̃ǝ̃ dìí mãã yì nã, nã̀ã hã-ɲã́ã̀ nǝ̃ hyagbǝ̃ngbãndi.

23 Tiiyǝ Dũnnũw, bá nǝ̃ Yitii Yesu Kɩrsaw, bá hã yì cwanããba nǝ̃ hyasɩrãgǝgu, nǝ̃ dwalɩmmã, nǝ̃ hũɔ̃mã!

24 Bà minw mãã Yitii Yesu Kɩrsa cɔ̃mmã̀ dwal bà nã, Dũnnũẃ ne bà yiɛgu nǝ̃ dwalɩmmãã mãã fɩraa!