Efɛ. 4

Dũnnũ Yuflǝẁ ce yí gbǝ nã

Mã́ã mãã kasoduuntiiw Yitiiw nã, mǝ̃̀ hã-ɲã́ã̀ nǝ̃ hyagbǝ̃ngbãndi, wà ɲí ba ɲì wáà ǹ-vaa gùú belli mãã Dũnnũẁ bíé-ɲã́ã̀.

2 Hɩ́rrǝ̀ ɲì hla nã, nǝ̃ ɲí blariɛ ɲì hla nã nǝ̃ hyafɛ̃gǝgu, ɲí hũɔ̃ ɲì ɲĩɛ̃ cɔ̃mmã ɲì ɲĩɛ̃ nã dwalɩmmã nã.

3 Dũnnũ Yuflǝw mãã wù dii gùú gbǝlli mãã ɲì sǝ̃ǝ̃gɩ nã, gbǝ̃́ǝ̃lã̀ ɲí ba dɩ̀ nã, ǹ-ta sɩsɩrãmmã nã mãã mã̀ dii-ɲã́ã̀ ɲì ɲĩɛ̃ nã.

4 Cãndɩ dɩn-i dìɛ nǝ̃ Yuflǝw dɩnw; nĩĩgɩ-i Dũnnũẁ bíé-ɲã́ã̀ ɲí ba nǝ̃ nãkrɔpiɛsuɔgɩ dɩngu ɲì bellɩ nã.

5 Yitiiw dɩn-i dìɛ, nǝ̃ hũɔ̃mã dɩnmã, nǝ̃ ɲĩɛ̃mã dɩnmã,

6 nǝ̃ Dũnnũw dɩnw mãã cwaaba min Tǝw.

Wú nǝ̃ yì min yuugɩ nã, nã̀ã ba wù ta yì min nã wù ce mããcemmã, nã̀ã ba yì min nã.

7 Nǝ̃ Dũnnũẁ níé curo wo curo'n yiɛ, ǹ-vaa nǝ̃ Kɩrsaẁ hlã-yǝ nǝ̃ wù guuhãgǝgu nĩĩguu mãã.

8 Gùú cíé bá waa wà: «Wù gáa yuguraa drɔgu, wù júó nǝ̃ kasoduuntaaba, nã̀ã hã cwaaba nǝ̃ ɲããhãnɲã.»

9 Nǝ̃ ba-ń wa wu yúguráa, gɩ̀ yuugɩ-i wà danii?

Nã́ã̀ gɩ̀ sǝ̃n pɩgaa wà wu hɩ́rrǝ́ ɲũũrũũ taara sǝ haasǝ-ì?

10 Wùú mãã wù hɩ́rrǝ́, wùú yúguráa ǹ-ga ba drɔkuɔlɩ min yuugɩ nã, ǹ-da ǹ-yu cuuw min.

11 Wùú kárrá badaaba nã, bá ba wù tĩɛ̃taaba, nã̀ã kra badaabá ba wù tanhiilaaba, nǝ̃ badaabá ba bà tu Yesu cɔ̃ndudwalɩmmã nã, nã̀ã kra badaabá ba Kɩrsa bluu'n wanciinããba nǝ̃ bà kaltaaba.

12 Wù cíé-dǝ, ǹ-da ǹ-tɩgɩnǝ̃ǝ̃ Kɩrsa bluuba nã wù mããcemmã nã, bá da ǹ-ce Kɩrsa cãn'n bluubá kã nǝ̃ yiga Dũnnũ cɔ̃mmã nã,

13 fuwɔ ǹ-ce yì min, yì hũɔ̃mã́ juo gbǝ nã, nǝ̃ yì Dũnnũ Bíɛ́'n fǝ̃ǝ̃mã́ gbǝ nã, nǝ̃ yí ba cwaabaa mãã bà yigasǝrɩ̀ káaláa, Kɩrsa cɔ̃mmã̀ã jalliɛ bà nã gbɩla gbɩla.

14 Gɩ̀-lǝ gɩ̀ nã, yi síì ba tãnkuurbii hlo, bàá mãã kalɩm'n plaagà mũũ gà tuu-ba nã́ã́ hũnpiir-i, nã̀ã ba gà fiir gà tuu-ba nǝ̃ cwaa'n kalɩmmã nã́ã́ saluu-i.

Bà ta bà fǝ̃ǝ̃rǝ̃mmã nã, ǹ-vuu ǹ-dii-ba vaalammã.

15 Nǝ̃ yi-ń ba yì waa sulammã dwalɩmmã nã, yi ji vãnãã cɔ̃mmã min nã ǹ-kã Kɩrsa yiɛgu, wùú mãã yuugu.

16 Wùú nã-i, cãndɩ min dɩ̀ cíé diikukuudi, ǹ-mǝ̃gaa ǹ-blǝ dɩ̀ ɲĩɛ̃, nã̀ã jãn dɩ̀ ɲĩɛ̃ nã ǹ-vaa nǝ̃ kukuun'n jalɩm'n sɔsǝ'n pyalli.

Gɩ̀-lǝ gɩ̀ nã, sɔsǝrɩ min, dɩ́ ba dɩ̀ ce dɩ̀ mããcemmã ǹ-vaa nǝ̃ dɩ̀ sùɔ́gu, nã́ã́ dɩ̀ mãã dɩ̀ saa nĩĩgu.

Mã̀-lǝ mã̀ã́ cíyà cãndɩ́ ba dɩ̀ vǝ̃ǝ̃, nã̀ã ba dɩ̀ kã nǝ̃ yiga dwalɩmmã nã.

Nũmǝ̃nãsǝflããri Kɩrsaw nã

17 Mǝ̃̀ mãã mǝ̃̀ waa dìi, nã̀ã ba mǝ̃̀ waa mǝ̃̀ dĩĩ dɩ̀ nã Yitiiw nã, dɩ̀-i nnĩĩ: ɲi sǝ̃n saa ɲí ba ɲì wáà hlo nã́ã́ bàá mãã bà sáa fǝ̃ǝ̃ Dũnnũw, nǝ̃ bà kãnɩmmã́ ba mã̀ sǝ nǝ̃ yuu.

18 Bà cɔ̃nfǝ̃ǝ̃gǝgɩ̀ sáa kaalaa, nǝ̃ bá ba noraaba ǹ-vaa nǝ̃ Dũnnũ nũmǝ̃nãsǝri, nã̀ã wa bà yunɲã̀ gbǝ̃ǝ̃, gùú cíé bá naa cɔ̃nfǝ̃ǝ̃gǝgu bà hla nã.

19 Bà jáa ba bà sǝ̃n fǝ̃ǝ̃ bà pyariɛ diifɩnfaari diibɩblaarɩ nã hlo, nã̀ã dii bà hla circɔ̃mmã nã, ǹ-ba bà sɔ̃ bà ce dɩgaa'n plaaga min.

20 Nǝ̃ ɲimãã-lǝ, ɲi sáa kal Kɩrsa cɔ̃mmã ǹ-fǝ̃ǝ̃-mã nnĩĩ sǝ.

21 Mǝ̃̀ ne wà ɲi nṹɔ̃́ wùú cɔ̃m-i, nǝ̃ bá ba bàa kal-ɲã́ã̀ nǝ̃ wù cɔ̃mmã, ǹ-vaa nǝ̃ sulammã mãã Yesuw nã.

22 Bà kállá-ɲã́ã̀ wà ɲí nǝ̃nǝ̃ǝ̃ ɲì tamcũncurɔmmã nã, mã̀ã́ mãã mã̀ vaa nǝ̃ ɲì cosǝcũncuruɔdi, nã̀ã ba mã̀ bǝ̃ǝ̃lǝ̃ǝ̃ mã̀ hla nã, nã̀ã wa mã̀ yisɩnã cɔ̃mbɩblammã̀ vuuraa mã̀ nã;

23 nǝ̃ ɲí ya Dũnnũ Yuflǝẃ hã-ɲã́ã̀ nǝ̃ cɔ̃nfǝ̃ǝ̃flĩɛ̃gu,

24 nǝ̃ ɲí dii cosǝflããri ɲì hla nã, dìí mãã Dũnnũẁ nǝ̃́ǝ̃lã́-dǝ ǹ-vaa nǝ̃ wù tammã, sũɔ̃lɩmmã nǝ̃ yiyalɩmmã nã mãã mã̀ hlǝ sulammã nã.

25 Gùú cíé, nǝ̃́nǝ̃̀ǝ̃ kwasǝrɩ nã, nǝ̃ curo wo curo, wú ba wù waa sulammã nǝ̃ wù nãcurow, nã̀ã wa yì min, yi cíé cãndi dɩn sɔsǝ-i.

26 Ɲì hiɛga-ń dũ, bláá ce diicĩɛ̃rǝdi.

Bláá ya bǝ̃ǝ̃gɩ́ jãn ǹ-hi-ɲã́ã̀ hyadũũgɩ nã,

27 nǝ̃ ɲi báa ya tiilǝtiiẃ da wanjirammã ɲì nã.

28 Wùú nǝ̃n yáá wù ŋmã, wú ya ŋmãllɩ́ ba; nǝ̃ wú dii wù hla ǹ-ba wù ce mããcemmã nǝ̃ wù hla'n nãkrɔnɲã kaalammã nã, ǹ-ba wù ji da ǹ-hã wùú mãã duɔbaasǝrɩ nã.

29 Bláá ya cãwaahãrããdɩ́ hlǝ ɲì nũɔ̃gɩ nã; bláà ɲì waa cãwaahuhoriɛgaa mãã gà ce cwaabá kã nǝ̃ yiga, ǹ-vaa nǝ̃ bà dugɔnããba, nã̀ã ba gà ce mããfɩnfammã gà nɔ̃taaba nã.

30 Bláá ce Dũnnũ Yuflǝ yigagɩ́ ɲǝ̃ǝ̃, wùú mãã Dũnnũẁ túulá-yǝ ǹ-nɩsɩ ɲì nã nǝ̃ wù nɩsɩmmã, ɲì hiilɩm'n yuu'n cɔ̃mmã nã diibɩblar'n nãkruɔgɩ nã.

31 Híilà hyacoruugu, hyadũpiirǝgu, hyadũũgu, nãlɛ̃mmã, yirbǝ̃ǝ̃lǝ̃gǝgu, nǝ̃ blasǝ'n plaaga min ɲì sǝ̃ǝ̃gɩ nã.

32 Bláà nǝ̃ kusufɩnfaagu, nǝ̃ ɲí ba ɲì sɔ̃ ɲì ɲĩɛ̃ hujãndi; bláà ɲì ce ɲì ɲĩɛ̃ dũndɔw, nã́ã́ Dũnnũẁ cíé ɲì dũndɔw Kɩrsaw nã gùú tammã.