Efɛ. 3

Polw mãã wù yu gùú fuugu

Gùú cíé mã́ã Pol mã́ã̀, mǝ̃́ ba mǝ̃̀ cirǝ̃ǝ̃ Dũnnũw nã.

Mã́ã̀mã kasoduuntiiw Yesu Kɩrsa cɔ̃mmã nã, ɲimãã mãã ɲi sǝ Yahudyaba ɲì saa.

2 Dũnnũẁ níé mǝ̃̀ yiɛgu ǹ-dii gùú mããcemmã mǝ̃̀ nãkruɔgɩ nã, ǹ-kã ɲì yiɛgu, dɩ̀ káaláa, ɲi nṹɔ̃́ mã̀ cɔ̃mmã nã.

3 Dũnnũẁ fɩ́rrǝ́ gɩ̀ cɔ̃nŋmǝ̃ǝ̃rǝ̃mmã nã nǝ̃-m, nã́ã́ mǝ̃̀ yállá-mã ǹ-ta nĩĩguu mãã nǝ̃ cãwaayiidaga.

4 Ɲi-ń ba ɲi kal-ga, ɲi ji fǝ̃ǝ̃ mǝ̃̀ díɛ́ gùú cɔ̃nfǝ̃ǝ̃gǝgu mãã Kɩrsa cɔ̃nŋmǝ̃ǝ̃rǝ̃mmã nã.

5 Gùú brǝnnɔ̃nɲã nǝ̃n tíɛ́, Dũnnũẁ sáa pɩgaa-ɲã nǝ̃ gɩ̀ cɔ̃mmã, nã́ã́ Dũnnũ Yuflǝẁ cúgurǝ́ wù tĩɛ̃taa'n yinɲã nǝ̃ wù tanhiilaabaa mãã wù níé hiil-ba bà dǝ, bá fǝ̃ǝ̃-mã nĩĩguu mãã kuɔkuɔgu.

6 Gɩ̀ cɔ̃nŋmǝ̃ǝ̃rǝ̃mmã-i nnĩĩ: bàá mãã bà sǝ Yahudyaba, bà tuu sùɔ́gu bà min nǝ̃ Yahudyaba, bà mãã cãndɩ dɩndi nǝ̃ bàá mãã.

Ǹ-ta Yesu cɔ̃ndudwalɩmmã nã, bà tuu guɔ Dũnnũ nũɔ̃'n pãllɩ dɩndɩ nã, Yesu Kɩrsaw nã.

7 Mǝ̃̀ jáa ba mããcierw mãã wù tu mã̀ nã, ǹ-vaa nǝ̃ Dũnnũẁ níé mǝ̃̀ yiɛgu nǝ̃ gùú hãlli, ǹ-ta wù fãngããgɩ nã mãã gɩ̀ ce mããcemmã.

8 Halle ǹ-da wà mã́ã-i Kɩrsa bluuba min wuusaalw, Dũnnũẁ níé mǝ̃̀ yiɛgu, mǝ̃́ ba mǝ̃̀ tu Kɩrsa ɲããfɩnfanɲã mãã dugɔ, curo'n sɩga hi ɲã̀ taari, nǝ̃ bàá mãã bà sǝ Yahudyaba,

9 nã̀ã kaalaa mã̀ nã [nǝ̃ cwaaba min] bá fǝ̃ǝ̃ gùú cɔ̃nŋmǝ̃ǝ̃rǝ̃mmãã mãã mã̀ã cĩĩ Dũnnũw nã fuwɔ fɩraa, wùú mãã [wù tíɛ́ Yesu Kɩrsaw nã] ǹ-nǝ̃ǝ̃ ɲinɲã min, wù mãã wù ce-mã nĩĩgu.

10 Nĩĩgɩ-i bà minw mãã nǝ̃ yuuntasǝri, nǝ̃ fãngããsǝri drɔkuɔlɩ nã, bà fǝ̃ǝ̃ Dũnnũ nũɔ̃sǝn cɔ̃nfǝ̃ǝ̃gǝguu mãã tamcin kuɔkuɔgu, ǹ-ta Igɩlisɩ taaba nã,

11 ǹ-vaa nǝ̃ wù yáá wùu blǝ dìi wù kusuugɩ nã fuwɔ fɩraa, nã̀ã ce dɩ́ suu Yitii Yesu Kɩrsaw nã.

12 Kɩrsaw nã, yì hũɔ̃m'n cɔ̃m nã-i, hlũũgɩ́ ciɛl yí ba yì kuganãã Dũnnũw nã, nǝ̃ hiɛgaa mãã gàa jiraa.

13 Gɩ̀-i, mǝ̃̀ mãã mǝ̃̀ da gùú ywaruuguu mãã ɲì cɔ̃mmã nã, mǝ̃̀ sǝ̃n caa ɲì cãnĩɛ̃gá karaa gɩ̀ cɔ̃mmã nã; gɩ̀ hã-ɲã́ã̀ nǝ̃ bũũm-i.

Polẁ cirǝ̃ǝ̃ Dũnnũw nã wù hã Efɛsɩ lǝntaaba

14 Gùú cíé mǝ̃́ ba mǝ̃̀ kuulǝǝ [Yitii Yesu Kɩrsa] Tǝ yigagɩ nã,

15 wùú mãã plaaga min, gà da gà yiiri wù nã, drɔkuɔli nǝ̃ ɲũũrũũgɩ nã.

16 Ǹ-vaa nǝ̃ wù faaguu mãã dugɔ, mǝ̃̀ cirǝ̃ǝ̃ wù nã wú ta wù Yuflǝw nã ǹ-hã-ɲã́ã̀ nǝ̃ fãngããguu nǝ̃ pyãluugu ɲì hiɛga nã,

17 fuwɔ ǹ-ce Kɩrsaẃ jiraa ɲì hiɛga nã, ǹ-ta ɲì hũɔ̃mã nã.

Mǝ̃̀ cirǝ̃ǝ̃ ɲí nǝ̃ǝ̃ ɲũmǝ̃nǝ̃ǝ̃ba, nã̀ã hiraa kwelle dwalɩmmã nã,

18 ǹ-da ǹ-gbǝ̃ǝ̃ ǹ-kã ɲí fǝ̃ǝ̃ nǝ̃ Kɩrsa bluuba min, Kɩrsa dwalɩmmãã mãã mã̀ã hanãã nã̀ã daa nĩĩguu mãã, nã̀ã ba mã̀ã nu nã̀ã haar,

19 nǝ̃ ɲí fǝ̃ǝ̃ dwalɩm mã́ã̀ mãã mã̀ ta guufǝ̃ǝ̃gǝgɩ min nã, ǹ-da ǹ-ce Dũnnũ dũnnũsǝrɩ min dɩ́ ba ɲì nã ǹ-jalliɛ.

20 Wù fãngããguu mãã gɩ̀ ce mããcemmã yì nã, wù ji ta gùú nã-i ǹ-ce ǹ-maa kuu wo kuuw mãã yi cirǝ̃ǝ̃ gɩ̀ nã, yindagǝ nã yi kãn gɩ̀ cɔ̃mmã;

21 wù saa nǝ̃ bũũmã Igɩlisɩ taaba sǝ̃ǝ̃nã, nǝ̃ Yesu Kɩrsaw nã, brǝnnɔ̃nɲã min saa, fuwɔ fɩraa!

Kwaya!