Efɛ. 2

Korɩmmã̀ da mǝ̃ǝ̃lǝ̃ǝ̃-i

Ɲimãã-lǝ, ɲi yáá ɲĩ̀ĩ kurǝǝ ɲì yuɔrɔm'n cɔ̃mmã nã, nǝ̃ ɲì gaacĩɛ̃ya'n cɔ̃mmã nã,

2 gàá mãã ɲi yáá ɲì ce-ga fufodii, ǹ-vaa nǝ̃ cuu wáà tammã, nǝ̃ fãngãn'n yuuntiiw mãã drɔgu wù tammã, wùú mãã yuflǝw mãã wù ce mããcemmã kuɔkuɔgu cɔ̃nhlataaba sǝ̃ǝ̃nã.

3 Yì min, yi yáá bàá tam-i, yi wáà yi vaa nǝ̃ yì yisɩnã cɔ̃mbɩblammã, nã̀ã wa yi yáá yì ce dìí mãã dɩ̀ dwal yì cãndɩ nã nǝ̃ yì kãnɩmmã nã; nã̀ã ba yi yáá yì saa nǝ̃ hyadũũgu cwaa'n dɩgaliɛ tammã ǹ-vaa nǝ̃ yì cosǝri.

4 Nǝ̃ Dũnnũ hujãn'n sɔ̃llɩ̀ bṹũlã́.

Yì cɔ̃mmã̀ dwállá wù nã nǝ̃ dwalɩmgǝ̃ngããmã,

5 gùú cíé hãmĩĩ mãã yì yáá yìi kurǝǝ yì yuɔrɔm'n cɔ̃mmã nã, wú ce yí ver ǹ-ba nũmǝ̃nãw nǝ̃ Kɩrsaw; wù níé ɲì yiɛ-i ǹ-kor-ɲã́ã̀.

6 Wù pĩ́ĩlã́ ǹ-hiil-yáà kúúgɩ nã nǝ̃ Kɩrsaw, nã̀ã ce yí jiraa nǝ̃-yǝ Dũnnũ suɔgu, Yesu Kɩrsaw nã.

7 Wù cíé dɩ̀-lǝ, ǹ-da ǹ-pɩgaa wù mǝ̃́gará ǹ-ne yì yiɛgu dugɔ nĩĩgu mãã wù kusufɩnfaagɩ nã, Yesu Kɩrsaw nã, gùú bãnɲã nã mãã ɲã̀ ga jo.

8 Sulammã nã, Dũnnũẁ níé ɲì yiɛ-i ǹ-kor-ɲã́ã̀, ɲì hũɔ̃m'n cɔ̃mmã nã.

Dɩ̀ sáa hlǝ ɲimãã nã sǝ, Dũnnũ hãl-i.

9 Ɲì gaacie'n cɔ̃m nã sǝ, curo'n báa ji da ǹ-buusa wù hla nã.

10 Sulammã nã, wùú mlã-yáà; wù nǝ̃́ǝ̃lã́-yáà Yesu Kɩrsaw nã, gaaciefɩnfiɛ'n cɔ̃mmã nã, gàá mãã Dũnnũẁ túɔ́ ǹ-tɩgɩnǝ̃ǝ̃ gà nã ǹ-kra, yí ba yì ce-ga.

Yahudyaba nǝ̃ bàá mãã bà sǝ ba, bà ce kuugɩ dɩn-i Kɩrsaw nã

11 Gùú cíé, ɲi saa ɲí ba ɲì kãnãã dɩ̀ nã wà haasǝgu, ɲi sáá Yahudyaba ǹ-vaa nǝ̃ ɲì huumã.

Bàá mãã bà ne wà ba síilǝ́, nã̀ã wa bà síilǝ́ bà cãndɩ nã nǝ̃ curo'n blɩ'n nãkruɔgu, bá ba bà be-ɲã́ã̀ cwaabaa mãã bà sáa sii.

12 Kã́nã̀ã dɩ̀ nã wà gɩ̀-lǝ gɩ̀ bǝ̃ǝ̃gu, ɲi sáá nǝ̃ Kɩrsaw, nã̀ã ba ɲi sáá nǝ̃ yuɔr Isɩrayɛl yiɛgu, nǝ̃ Dũnnũẁ yáá wùu pã wù nũɔ̃gu gùú twanɲũɔ̃gǝ'n cɔ̃mmã nã, ɲì nũɔ̃gɩ̀ sáá gɩ̀ nã, nǝ̃ ɲí ba ɲi sáá nǝ̃ nãkrɔpiɛsuɔgu, nã̀ã ba ɲi sáá nǝ̃ Dũnnũw cuuw nã.

13 Nǝ̃ yindiɛ, Yesu Kɩrsaw nã, ɲimãã mãã ɲi yáá ɲĩ̀ĩ hal Dũnnũw nã haasǝgu, Kɩrsa twammã̀ cíé ɲí kuganãã wù nã.

14 Sulammã nã, wɩ̀-i yì sɩsɩrãmmã, wùú mãã wù cíé Yahudyaba nǝ̃ bàá mãã bà sǝ ba, bá ba kuugu dɩngu.

Wù hlã-ba nǝ̃ wù cãndi kuugɩ nã, ǹ-hɩr dofũũlii mãã dɩ̀ yáá dɩ̀ buruɔ bà nã, dìí mãã blabaɲĩɛ̃nw.

15 Wù sórrá Musa hlũũgu, nǝ̃ gɩ̀ hlũũ'n nǝ̃ǝ̃yagaa nǝ̃n kárrá, nǝ̃ dìí nǝ̃n yállá ǹ-kra ǹ-da ǹ-ce wù-lǝ wù nã, Yahudyaba nǝ̃ bàá mãã bà sǝ ba, bá ba nǝ̃ cosǝflããri dɩndi; wù díilá sɩsɩrãmmã nĩĩgɩ-i.

16 Wù yáá wù caa wú dii gbǝlli bà hǝ̃ǝ̃lba sǝ̃ǝ̃nã nǝ̃ Dũnnũw, ǹ-ta gbǝl'n daagɩ nã ǹ-gbǝ bà nã cãndi dɩndɩ nã, nã̀ã ta gɩ̀ nã ǹ-bǝ̃ǝ̃lǝ̃ǝ̃ blabaɲĩɛ̃nw nã.

17 Wù júó ǹ-ji tu sɩsɩrãm'n cɔ̃mmã nã nǝ̃ ɲimãã mãã ɲi yáá ɲĩ̀ĩ hal, nǝ̃ bàá mãã bà yáá bàa kuganãã.

18 Sulammã nã, ǹ-ta wù-lǝ wù nã, hlũũgɩ̀ cíɛlá gɩ̀ baahǝ̃ǝ̃lba min saa, ǹ-hã yì min, yí ba yì kuganãã Tiiyǝw nã, Dũnnũ Yuflǝw dɩnw nã.

19 Gɩ̀ sùɔ́gɩ nã, ɲi sǝ niɛriɛ hlo, yindagǝ nã, cwaabaa mãã bàa jo norsǝri; ɲi cíé Dũnnũ yiɛntaa-i ɲì min nǝ̃ Kɩrsa bluuba, ɲi cíé Dũnnũ suɔntaaba.

20 Ɲi cíé duuguu mãã bàa fũũ gɩ̀ taari tĩɛ̃taaba drɔ nǝ̃ Dũnnũ tanhiilaaba, nǝ̃ Yesu Kɩrsaw nǝ̃ wù hla, wù ba gɩ̀ dojir'n tɩntãndi.

21 Wùú nã-i duugɩ min, gɩ̀ mǝ̃gaa gɩ̀ mã, ǹ-ba gɩ̀ suro gɩ̀ ba Dũnnũ bũũduuguu mãã yalla, Yitiiw nã.

22 Wùú nã-i ɲimãã yo, ɲi tuu guɔ mãl díɛ́ nã, ɲì min nǝ̃-ba ǹ-ba Dũnnũ wanjirammã, ǹ-ta wù Yuflǝw nã.