Efɛ. 1

Efɛsɩ taa'n sɛbɛw

Polẁ yállá gùú sɛbɛw ǹ-hã Efɛsɩ lǝ'n Igɩlisɩ taaba

Fyãnuugu

Mã́ã Pol, mã́ã̀ mãã Yesu Kɩrsa tĩɛ̃tiiw, ǹ-vaa nǝ̃ Dũnnũ kusuugu, mã́ã yállà sɛbɛ wáà mǝ̃̀ hã Kɩrsa bluubaa mãã Efɛsɩ lǝri, nã̀ã ba yalntaaba Yesu Kɩrsaw nã.

2 Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu!

Gùú ɲinɲã mãã ɲã hlǝ Dũnnũw nã, yí ba yì da-ɲã Kɩrsaw nã

3 Yáà yí ba yì bũũ Dũnnũw, wɩ̀-i, Yitii Yesu Kɩrsa Dũnnũw nǝ̃ wù Tǝw.

Wùú píɛlá wù nãkrɔfɩnfaagu yì drɔ, ǹ-hã-yáà nǝ̃ Dũnnũ suɔ'n ɲinhuhoranɲãã mãã ɲã̀ hlǝ Dũnnũ Yuflǝw nã.

Wù hlã-yáà nǝ̃ gɩ̀ ɲinɲã Kɩrsaw nã.

4 Dũnnũẁ tíɛ́ wùú nã-i ǹ-ne ǹ-hiil-yáà, nǝ̃ cuuw ji da wù nǝ̃ǝ̃, yí da ǹ-ba yiyalɩmmã nã, ǹ-ba yi sǝ nǝ̃ yuɔrɔmmã wù yinɲã nã.

Yì cɔ̃mmã̀ dwállá Dũnnũw nã,

5 gùú cíé wú tɔ ǹ-kra dɩ̀ nã ǹ-ce yí ba wù tãnkuuraaba Yesu Kɩrsaw nã.

Dìí yáá dɩ̀ dwal wù nã wù kusuugɩ nã,

6 yí da ǹ-bũũ wù níé yì yiɛgu nĩĩguu mãã wù cituublɩw nã.

Gɩ́ nǝ̃ faa'n gbɩgbaamã.

7 Yesu twammãã mãã mã̀ tṹnṹũ, mã̀ cɔ̃mmã nã, Dũnnũẁ híilá-yáà diicĩɛ̃rǝ'n nãkruɔgɩ nã, nã̀ã ce yì yuɔrɔm'n dũndɔw Kɩrsaw nã, ǹ-vaa nǝ̃ wù níé yì yiɛgu dugɔ nĩĩguu mãã.

8 Dũnnũẁ níé yì yiɛgu dugɔ, nǝ̃ wù cɔ̃nfǝ̃ǝ̃gǝgɩ min mãã gùu bũũ.

9 Wù fɩ́rrǝ́ gùú cɔ̃nŋmǝ̃ǝ̃rǝ̃mmãã mãã wù kusuugɩ nã nǝ̃-yáà, ǹ-vaa nǝ̃ dìí mãã dɩ̀ dwal wù nã, wù yáá wùu tɩgɩnǝ̃ǝ̃ dɩ̀ nã ǹ-kra Kɩrsaw nã,

10 ǹ-ba wù ji ce dɩ́ suu dɩ̀ bǝ̃ǝ̃gɩ nã.

Dɩ̀-i, wù tɩ́gɩrǝ́ gùú ɲinɲã min, wú ba wù ji kra Kɩrsaw nã ɲã̀ yuugɩ nã, ǹ-tuu drɔkuɔl'n ɲinɲã nã, ǹ-ga kra ɲũũrũũ ɲinɲã nã.

11 Kɩrsaw nã, yi cíé sɔtuuraa-i, nã̀ã wa Dũnnũẁ túɔ́ ǹ-ne ǹ-hiil-yáà ǹ-vaa nǝ̃ dìí mãã wù blǝ́rá-dǝ wù kusuugɩ nã, nã̀ã ba wù ce cɔ̃mmã min ǹ-vaa nǝ̃ wù hyárá dìí nã, nã̀ã ba wù caa-dǝ,

12 ǹ-da ǹ-ce hãmĩĩ mãã yi dĩ́ɛ̃lã́ ǹ-piɛ yì nãkruɔgu Kɩrsaw nã, yí ba yì bũũ Dũnnũ yiiri.

13 Wù-lǝ wù nã, ɲimãã yo, ɲi gáa nɔ̃ sulam'n cãwandi, dìí mãã Yesu cɔ̃ndudwalɩmmãã mãã mã̀ kor-ɲã́ã̀, ɲí hũɔ̃ wù cɔ̃mmã, nǝ̃ Dũnnũẃ nɩsɩ ɲì nã nǝ̃ wù Yuflǝw mãã wù yáá wùu pã wù nũɔ̃gu wù cɔ̃mmã nã.

14 Dũnnũ Yuflǝẃ nǝ̃ wùu kra, ǹ-ba wù pɩgaa ɲinhuhoranɲãã mãã yì sùɔ́gu, ǹ-ba wù fennãã gùú nã mãã Dũnnũẁ ji hiil wù bɩgaaba nãkrɔnɲã nã, nã̀ã ce wù yiirɩ́ bũũ.

Polẁ cirǝ̃ǝ̃ Dũnnũw nã wù hã Efɛsɩ lǝntaaba

15 Gùú cíé, mã́ã yo, mǝ̃̀ gáa nɔ̃ ɲì hũɔ̃m'n cɔ̃mmã Yitii Yesu nã, nã̀ã ya Kɩrsa bluuba min, bà cɔ̃mmã́ dwal ɲì nã,

16 mǝ̃̀ dũũ kwayaw pyandiɛ mǝ̃̀ hã Dũnnũw ɲì cɔ̃mmã nã, mǝ̃-ń ba mǝ̃̀ kãnãã ɲì cɔ̃mmã nã mǝ̃̀ cirǝ̃mmã nã.

17 Mǝ̃̀ cirǝ̃ǝ̃ wà Yitii Yesu Kɩrsa Dũnnũw, wùú mãã Tiiyǝw mãã nǝ̃ faa'n gbɩgbaamã, wú hã-ɲã́ã̀ nǝ̃ yigakaalagǝgu, nã̀ã pɩgaa-ɲã́ã̀ nǝ̃ wù cɔ̃mmã ɲí fǝ̃ǝ̃-yǝ.

18 Mǝ̃̀ cirǝ̃ǝ̃ wù nã wú cugur ɲì yinɲã, ɲí da ǹ-fǝ̃ǝ̃ nãkrɔpiɛsuɔguu mãã ɲĩ̀ĩ da-gǝ wù bellɩ nã, nã̀ã ce ɲí fǝ̃ǝ̃ sùɔ́guu mãã nǝ̃ faagu dugɔ wù ga ce ɲí tuu-gǝ ɲì min nǝ̃ Kɩrsa bluuba,

19 nã̀ã ce ɲí fǝ̃ǝ̃ wù fãngããguu mãã gɩ̀ bũũmã̀ ta ɲinɲã min nã, nã̀ã ba gɩ̀ ce mããcemmã, gɩ̀ hã hãmĩĩ mãã yì hṹɔ̃lã́ wù cɔ̃mmã.

Sulammã nã, fãngãã gúɔ̀, wù híilá-gǝ nǝ̃ wù pyãluugɩ min,

20 ǹ-dii-gǝ Kɩrsaw nã, gùú nã mãã wù pĩ́ĩlã́ ǹ-hiil-yǝ kúúgɩ nã, nã̀ã ce wú jiraa Dũnnũ nãdĩĩyiɛgu Dũnnũ suɔgɩ nã,

21 ǹ-ba yuuntasǝrɩ min yuugɩ nã; nã̀ã ba fãngããsǝrɩ min yuugɩ nã, nǝ̃ fãngãnɲã min yuugɩ nã; nã̀ã ba yuntaaba min yuugɩ nã.

Cwaabaa mãã bà ji gbǝ̃ǝ̃ ǹ-be gùú yiriɛga minw mãã kuɔkuɔ cuuw nã, nǝ̃ gùú cuuw nã mãã wù ga jo, wú nǝ̃ gà yuugɩ nã.

22 Wù díilá ɲinɲã min wù vyanɲã taara, nã̀ã kra wù nã Igɩlisɩ taa'n yuugɩ nã,

23 bàá mãã wù cãndi.

Kɩrsa dũnnũsǝrɩ́ nǝ̃ bà nã, nǝ̃ wú ba wù yu ɲinɲã min, nã̀ã ba ɲã̀ min nã.