Gal. 3

Hũɔ̃m'n cɔ̃mmã dàa Musa hlũũgu?

Eh!

Galasɩ yiɛntaa ɲimãã, halii vúulá ǹ-gbǝ̃ǝ̃ ɲì nã ǹ-dii baahãrsǝ díɛ̀dɩ tuugu ɲì yunɲã nã?

Nã̀ã da yi wáalá dɩ́ kaalaa nǝ̃-ɲã́ã̀ wà bá gbǝ́ǝ́ Yesu Kɩrsaw daagɩ nã.

2 Mǝ̃n caa mǝ̃́ yugu-ɲã́ã̀ nǝ̃ cɔ̃mmã diindamã-i: Dũnnũẁ hlã-ɲã́ã̀ nǝ̃ wù Yuflǝẁ Musa hlũũ'n waam'n cɔ̃m nã-i dàa, ɲi mãã ɲì nṹɔ̃́ wù cɔ̃ndudwalɩmmã nã̀ã hũɔ̃-mã gùú cɔ̃m nã-ì?

3 Gɩ ba nã́ã́ ɲì baahãrsǝrɩ̀ híí gɩ̀ sùɔ́gu-ì?

Ɲí du cɔ̃mmã nã nǝ̃ Dũnnũ Yuflǝw, ǹ-ji ba ɲì caa ɲí faal-mã nǝ̃ ɲì hla fãngããgu.

4 Gɩ ba nã́ã́ Dũnnũẁ cíé gùú cɔ̃ngǝ̃ngãmmã ǹ-hã-ɲã́ã̀ mã̀ min mã jáa ba mǝ̃ǝ̃lǝ̃ǝ̃-ì?

Kwasǝ-i dɛ, mã̀ síì gbǝ̃ǝ̃ ǹ-ba mǝ̃ǝ̃lǝ̃ǝ̃.

5 Dũnnũw mãã wù hã-ɲã́ã̀ nǝ̃ wù Yuflǝw, nã̀ã ba wù ce cɔ̃nnuromcin ɲì sǝ̃ǝ̃nã, gɩ́ ba nã́ã́ wú ce-dǝ Musa hlũũ'n waam'n cɔ̃m nã-ì?

Dìí sǝ, nǝ̃ wù ce-dǝ wà ɲi mãã ɲi nṹɔ̃́ Yesu cɔ̃mmã nã̀ã hũɔ̃-mã.

6 Ibramã cɔ̃m yo mã̀ wáalá nnĩĩ-i Dũnnũ cãwan'n sɛbɛw nã.

Dɩ̀ wáalá wà: «Ibramãẁ yáá wùu hũɔ̃ Dũnnũ cɔ̃mmã, gùú cíé Dũnnũẃ ce wú ba cosũɔ̃lyǝw wù yinɲã nã.»

7 Gɩ̀ sùɔ́gɩ nã, fǝ̃́ǝ̃lã̀ wà bàá mãã bàa hũɔ̃ Dũnnũ cɔ̃mmã, wà bà-i Ibramã furũntaaba.

8 Dũnnũ cãwan'n sɛbɛbà yáá bàa waa-dǝ ǹ-tã wà Dũnnũw ji ce bàá mãã bà sǝ Yahudyaba bá ba cosũɔ̃lbaba bà hũɔ̃m'n cɔ̃m nã-i.

Sulammã nã, cɔ̃ndudwalɩm mã́ã̀mã̀ wáalá nǝ̃ Ibramãw wà: «Yíi cɔ̃mmã nã-i Dũnnũẃ ba wù ji piɛ wù nãkrɔfɩnfaagu coplaaga min nã.»

9 Nĩĩgɩ-i, curo wo curo mãã wùu hũɔ̃ Dũnnũ cɔ̃mmã, nã́ã́ Ibramãẁ yáá wùu hũɔ̃-mã nĩĩguu mãã, Dũnnũẁ ji piɛ wù nãkrɔfɩnfaagu gɩ̀ tii drɔ, nã́ã́ wù píɛlá-gǝ Ibramãw drɔ nĩĩguu mãã.

10 Bàá mãã bà wa bà-lǝ bá wáà Musa hlũũ'n sɛbɛ-i, bà cɔ̃mmã̀ bǝ̃́ǝ̃lǝ̃́ǝ̃.

Nã̀ã wa dɩ̀ yállá wà: «Curo wo curo mãã wù sǝ̃n wáà Musa hlũũ'n sɛbɛ cãwanĩɛ̃ga min min, gɩ̀ tii'n cɔ̃mmã̀ bǝ̃́ǝ̃lǝ̃́ǝ̃.»

11 Nǝ̃ dɩ̀ káaláa wà Musa hlũũ'n waamã̀ síì gbǝ̃ǝ̃ ǹ-ce Dũnnũẃ ce curo ń ba cosũɔ̃lyǝw wù yinɲã nã, nã̀ã wa dɩ́ nàa dìi yal wà: «Gùú tiiw-ń hũɔ̃ Dũnnũ cɔ̃mmã, cosũɔ̃lyǝ-i, gɩ̀-lǝ gɩ̀ tammã, wù ji ba nũmǝ̃nãw.»

12 Gɩ̀ sùɔ́gɩ nã Musa hlũũ'n waalɩ̀ sǝ̃n saa dɩ́ gbǝ nǝ̃ Yesu cɔ̃m'n hũɔ̃mã, nã̀ã wa dɩ́ nàa dìi yal wà: «Curoẁ saa wú wáà Musa hlũũ'n cãwanĩɛ̃ga min-i nã̀ã ji ba nũmǝ̃nãw.»

13 Nǝ̃ cwaabà mãã bà sáa ji hi dɩ̀-lǝ dɩ̀ nã sǝ, bà cɔ̃mmã̀ bǝ̃́ǝ̃lǝ̃́ǝ̃, gɩ̀-i, Kɩrsaẃ hũɔ̃ ǹ-ya bá bǝ̃ǝ̃lǝ̃ǝ̃ wù nã hãmĩĩ suɔnãw, wù sǝ̃́ǝ̃lã́ ǹ-hiil-yáà Musa hlũũ'n bǝ̃ǝ̃lǝ̃m mã́ã̀ nã, nã̀ã wa dɩ́ nàa dìi yal wà: «Ba-ń nũũ curo wo curo mãã daagɩ nã ǹ-ko-yǝ, gɩ̀ tii'n cɔ̃mmã̀ bǝ̃́ǝ̃lǝ̃́ǝ̃.»

14 Yesu Kɩrsaẁ cíé dɩ̀-lǝ, ǹ-da ǹ-ce bàá mãã bà sǝ Yahudyaba, bàá yo bá da gùú nãkrɔfɩnfaaguu mãã Dũnnũẁ píɛlá-gǝ Ibramãw nã, nǝ̃ yi da ǹ-da Dũnnũ Yuflǝw yì hũɔ̃m'n cɔ̃mmã nã, nã́ã́ Dũnnũ yáá wùu pã wù nũɔ̃guu wa wu ji hã-yáà nǝ̃-yǝ nĩĩguu mãã.

Musa hlũũgu nǝ̃ Dũnnũ nũɔ̃'n pãlli

15 ^aMã́ã cwanãã, ǹ-vaa nǝ̃ cwaa hãmĩĩ gaaciega, curow-ń haa wù nũɔ̃gu ǹ-waa dìí nã̀ã ku, curo'n síì gbǝ̃ǝ̃ ǹ-suro gɩ̀ cãwandi, yindagǝ nã ǹ-piɛ kuu dɩ̀ nã.

16 Nǝ̃ Dũnnũẁ plã wù nũɔ̃guu nǝ̃ Ibramã-i nǝ̃ wù huɔnblɩw, nǝ̃ bà sáa waa wà «nǝ̃ wù huɔnbii-i», nã́ã́ ba ja Ibramã huɔnbiicin-i, nǝ̃ bà ja wù dɩndɩn-i, wà wù huɔnblɩw, wɩ̀-i Kɩrsaw.

17 Nǝ̃ mǝ̃n mãã mǝ̃̀ caa mǝ̃́ waa dìí mãã dɩ̀-i nnĩĩ: Dũnnũẁ plã wù nũɔ̃gu gɩ́ ce bii tũndii nǝ̃ bii gur nǝ̃ nũɔ̃sɔ̃ nǝ̃ Musa hlũũgɩ ga da gɩ́ jo.

Gɩ̀ sùɔ́gɩ nã, Musa hlũũgɩ̀ síì gbǝ̃ǝ̃ ǹ-suro Dũnnũ nũɔ̃'n pãlli dɩ́ ba dɩ̀ síì ba cɔ̃m nã.

18 Gɩ nã́ã̀ ce nã́ã́ Musa hlũũ'n cɔ̃m nã-i yí ba yì ji da guɔ Dũnnũ ɲinɲã nã, yi saa yì ji da guɔ ɲì nã Dũnnũ nũɔ̃'n pãl'n cɔ̃mmã nã.

Nǝ̃ yíǹ fǝ̃ǝ̃ Dũnnũẁ mãã wù plã wù nũɔ̃gu nǝ̃ Ibramãw, gùú cíé wú ne wù yiɛgu.

Musa hlũũ'n diicerǝdi

19 Dɩ-ń ba gɩ̀-lǝ gɩ̀ tammã, Dũnnũẁ tĩ́ɛ̃lã́ Musa hlũũgɩ́ jo hadi nã-i?

Wù tĩ́ɛ̃lã́ gɩ́ jo, ǹ-da ce yí fǝ̃ǝ̃ gàá mãã gaacĩɛ̃yaga.

Wù tĩ́ɛ̃lã́ gɩ́ jo ǹ-ji ba gɩ̀ fennãã fuwɔ Ibramã huɔnblɩ wáà mãã Dũnnũw plã wù nũɔ̃gu nǝ̃-yǝ wù jollɩ nã dìi.

Mɛlɛgɛbaa júó ǹ-ji tu Dũnnũ hlũũgu ǹ-ja Musaw, wù-lǝ wú ja cwaaba nǝ̃-gǝ.

Wù-lǝ wùú yáá yɔtiiw cwaaba nǝ̃ Dũnnũ sǝ̃ǝ̃gɩ nã.

20 Nǝ̃ ba-ń ba bà waa yɔtii'n cɔ̃mmã sùɔ́ wo sùɔ́, bà pɩgaa wà wú nǝ̃ cwaaba hǝ̃ǝ̃l sǝ̃ǝ̃nã-i.

Nǝ̃ Dũnnũ-lǝ, wù yáá wù pã wù nũɔ̃gu nǝ̃ Ibramãw gùú nã mãã, curo'n sáá tĩɛ̃tii bà sǝ̃ǝ̃gɩ nã.

Wù cíé-dǝ nǝ̃ wù hla-i.

21 Gɩ ba nã́ã́ Musa hlũũgɩ̀ ji car Dũnnũw plã wù nũɔ̃gu dìí nã-ì?

Gbal-i dɩ̀ káaláa wà gɩ síì car-dǝ.

Dũnnũẁ hlã cwaaba nǝ̃ gùú hlũũguu mãã, gɩ nã́ã̀ ba gɩ̀ hã-ba nǝ̃ nũmǝ̃nãsǝri, gɩ nã́ã̀ gɩ̀ gbǝ̃ǝ̃ gɩ̀ ce bá ba bà cosũɔ̃lbaba Dũnnũ yinɲã nã gɩ̀ waam'n cɔ̃mmã nã.

22 Nǝ̃ gɩ̀-i nnĩĩ, Dũnnũ cãwan'n sɛbɛbà waa wà cwaaba min bá nǝ̃ diicĩɛ̃rǝ'n nãkruɔ nã-i.

Dɩ́ nǝ̃ nnĩĩ-i, ǹ-da ce Dũnnũẃ hã bàá mãã bà hũɔ̃ Yesu Kɩrsa cɔ̃mmã nǝ̃ wù plã wù nũɔ̃gu dìí nã mãã, bà hũɔ̃m'n cɔ̃mmã nã.

23 Gùú nã mãã Yesuẁ sáa wùu hi ǹ-jo yí ba yì ji da ǹ-hũɔ̃ wù cɔ̃mmã, yi yáá nã́ã́ kasoduuntaa-i Musa hlũũ'n nãkruɔgɩ nã, fuwɔ Dũnnũw ga juo pɩgaa-yáà nǝ̃ yi mãã yì saa yí hũɔ̃ Yesu cɔ̃mmã nĩĩguu mãã.

24 Nĩĩgɩ-i, yi yáá Musa hlũũ'n nãkruɔgɩ nã nã́ã́ kaltii-i wùú mãã wù pɩgaa wù ja-yáà nǝ̃ hlũfɩnfaagu fuwɔ ǹ-ji da Kɩrsaẁ yà ga jo, ǹ-da ce yí ba cosũɔ̃lbaba yì hũɔ̃m'n cɔ̃mmã nã.

25 Nǝ̃ yindiɛ, yi mãã yì hṹɔ̃lã́ Yesu cɔ̃mmã, yi sǝ Musa hlũũ'n nãkruɔgɩ nã hlo.

26 Nã̀ã wa ɲi mãã ɲì hṹɔ̃lã́ Yesu cɔ̃mmã, ɲì min ɲi cíé Dũnnũ tãnkuuraa-i.

27 Sulammã nã, bà mãã bà ɲĩɛ̃-ɲã́ã̀, ɲi cíé curoẁ dɩn-i nǝ̃ Kɩrsaw, ɲí nǝ̃ nã́ã́ Kɩrsa-i.

28 Gɩ̀ sɩraa nǝ̃ Yahudya, gɩ̀ sɩraa nǝ̃ Grɛkɩ, yindagǝ nã wà lɔ-i nǝ̃-n, yindagǝ nã lɔ sǝ nǝ̃-n, gɩ̀ sɩraa nǝ̃ bibiɛ, gɩ̀ sɩraa nǝ̃ cijal, nã̀ã wa ɲì min ɲi cíé curow dɩn-i Yesuw nã.

29 Nǝ̃ ɲi-ń ba Kɩrsa bɩgaaba, gɩ̀ pɩgaa wà Ibramã huɔnbii-i nǝ̃-ɲã́ã̀, gɩ̀-lǝ gɩ̀ nã ɲimãã yo ɲi ji da guɔ gùú ɲinɲã nã mãã Dũnnũẁ plã wù nũɔ̃gu nǝ̃ Ibramãw wà wu ji hã wùú nǝ̃ wù nũɔ̃ntaaba nǝ̃-ɲã.