Gal. 2

Polba nǝ̃ Yesu tĩɛ̃taa'n dɩgaliɛw

Bii nũɔ̃sɔ̃ nǝ̃ gà nnǝ̃ǝ̃ dɩ̀-lǝ dɩ̀ furũũgɩ nã, mǝ̃́ ver ǹ-kã Serusalɛmgu ǹ-tu, yí nǝ̃ Barnãbasɩw.

Mǝ̃̀ yáá mã̀ã tuu Titɩ yo, wú kã yí ta.

2 Dũnnũẁ mãã wù yáá wùu pɩgaa-m nǝ̃-dǝ wà mǝ̃́ kã, gùú cíé mǝ̃́ ver ǹ-kã gɩ̀ sùɔ́gɩ nã.

Mǝ̃̀ gáa hi, mã́ã̀, nǝ̃ Yesu cwaa'n yigantaaba, yí kãã da yì ɲĩɛ̃ yì dǝ.

Mǝ̃́ tuu ǹ-pɩgaa-ba nǝ̃ mǝ̃̀ mãã mǝ̃̀ waa gùú cɔ̃ndudwalɩmmã nã mãã mǝ̃̀ ja bàá mãã bà sǝ Yahudyaba.

Sulammã nã, mǝ̃̀ sáá mǝ̃̀ caa mǝ̃̀ cíé gùú susɔ̃lli, nǝ̃ mǝ̃̀ mãã mǝ̃̀ ce dìi, dɩ ji ba mǝ̃ǝ̃lǝ̃ǝ̃.

3 Halle Titɩw mãã yi yáá waalɩ nã yì min nǝ̃-yǝ, wùú mãã Grɛkɩ tabiɛw, bà sáa guur-yǝ wà wú ce bá síì-yǝ.

4 Nǝ̃ kwasǝnããbaa mãã wa Kɩrsa bɩgaaba-i nǝ̃-ba, bà ŋmã́ã́ ǹ-jãn yi sǝ̃ǝ̃nã.

Bà-lǝ bà wa wú saa wú síì.

Bà ŋmã́ã́ ǹ-jãn yi sǝ̃ǝ̃nã, ǹ-da ǹ-ne fǝ̃ǝ̃ yi mãã yìi da yi hla nã nĩĩgu Yesu Kɩrsaw nã.

Bà caa bá ce yí ba lwɛba Yahudyaba hlũũgɩ nã.

5 Yi sáa hũɔ̃ nǝ̃-ba halle fiyãã yo, ǹ-da ǹ-ce ɲí ba Yesu cɔ̃ndudwalɩmmã nã, mã̀ã́ mãã sulammã.

6 Halle Igɩlisɩ yigantaabaa mãã nũɔ̃sǝn taaba, bà sáa wa mǝ̃́ piɛ kuu ǹ-maa mǝ̃̀ mãã mǝ̃̀ waa dìí.

Bà-lǝ bà mãã nǝ̃ gùú wanhirammãã mãã Igɩlisɩw nã, mã̀ã́ sǝ nũɔ̃sǝn cɔ̃mmã mǝ̃n saa, nã̀ã wa mǝ̃̀ fǝ̃́ǝ̃lã́ wà Dũnnũw sǝ̃n pyariɛ curo nǝ̃ curo nã.

7 Sulammã nã, bàá nǝ̃ bà hla bà fǝ̃́ǝ̃lã́ wà Dũnnũ hlã-m nǝ̃ gɩ̀ tĩɛ̃ri wà mǝ̃́ waa wù cɔ̃ndudwalɩmmã nǝ̃ bàá mãã bà sǝ Yahudyaba, nã́ã́ wù hlã Piɛrw nǝ̃-dǝ nĩĩguu mãã wà wu waa-mã ǹ-ja Yahudyaba.

8 Nã̀ã wa Dũnnũẁ cíé mããcemmã-i Piɛrẃ ba Yesu tĩɛ̃tiiw Yahudyaba sǝ̃ǝ̃nã, mã́ã yo wù cíé mããcemmã-i mǝ̃̀ nã, mǝ̃́ ba Yesu tĩɛ̃tiiw bàá mãã bà sǝ Yahudyaba bà sǝ̃ǝ̃nã.

9 Yakubaba nǝ̃ Piɛrw, nǝ̃ Yuhanãw, bàá mãã Igɩlisɩ taabà yáá bà ne bá ba Igɩlisɩ yuugu, bàá nǝ̃ bà hla bà fǝ̃́ǝ̃lã́ wà Dũnnũ níé mǝ̃̀ yiɛguu nã̀ã dii-m mããcem mã́ã̀mã nã.

Gɩ̀-i, bá fǝ̃ǝ̃ ǹ-dii bà nãkrɔnɲã ǹ-hã mã́ã̀ nǝ̃ Barnãbasɩw ǹ-pɩgaa wà yi waa yaldiin-i.

Hãmĩĩ nǝ̃ bà-lǝ, yi gbǝ́ǝ́ dɩ̀ nã wà hãmĩĩ ji kãã waa Yesu cɔ̃ndudwalɩmmã nǝ̃ bàá mãã bà sǝ Yahudyaba, nǝ̃ bà-lǝ bá kãã waa nǝ̃ Yahudyaba.

10 Bà círǝ̃́ǝ̃ yì nã dɩn-i, wà yí ba yì kãnãã Serusalɛm Igɩlisɩ ywartaaba nã.

Dɩ̀-lǝ dɩ̀ cellɩ̀ yáá mǝ̃̀ hiɛga nã ǹ-tã.

Polẁ pɩgaa Piɛrw nǝ̃ wù yuɔrɔmmã

11 Gɩ̀-lǝ gɩ̀ furũũgɩ nã, Piɛrẁ gáa jo Ãtiyɔsɩ lǝri, mǝ̃̀ sáa hũɔ̃ nǝ̃-yǝ cwaaba min yinɲã nã, nã̀ã wa wù yáá wù ce dìí mãã, dɩ̀ sáá dìi saa gbal gbal.

12 Sulammã nã, gùú nã mãã bàá mãã bà hlǝ́rá bà Yakuba bà yiɛgu, bà sáá bàa hi ǹ-hi Ãtiyɔsɩ lǝri, Piɛrẁ yáá wù wuu wuuri nǝ̃ bàá mãã bà sǝ Yahudyaba.

Nǝ̃ bà-lǝ bà gáa juo hi, wú fa ǹ-hiil wù hla bà sǝ̃ǝ̃nã, ǹ-ba wù sǝ̃n wuu wuuri nǝ̃-ba, ǹ-ba wù sɔ̃ bàá mãã bà waa síìm'n cɔ̃mmã bà nã.

13 Yahudyaba dɩgaliɛẁ mãã Kɩrsa bɩgaaba, bàá yo, bá suro ǹ-ba gùú kusunɲãhǝ̃nhãl gaaciega nã-i Piɛr tammã, fuwɔ ǹ-ce Barnãbasɩ nǝ̃ wù hla wùú yo, wú juo kã bá ba bà ce gùú dɩ̀ dɩndɩndɩ-i.

14 Mǝ̃̀ jáa da wà bá sǝ̃n wáà ǹ-vaa nǝ̃ Yesu cɔ̃ndudwalɩm'n hlũũ'n sulammã, mǝ̃́ suro ǹ-waa nǝ̃ Piɛrw cwaaba min yinɲã nã wà: «Yíi mãã Yahudya bíɛ́w, yíǹ ba ǹ ce nã́ã́ Yahudya sǝ nǝ̃-n, ǹ sǝ̃n wáà Yahudyaba hlũũgu, yíǹ ba danii ń ver wà ń guur bàá mãã bà sǝ Yahudyaba, bá wáà Yahudyaba hlũũgu?»

Yì hũɔ̃mãã kórrà-yáà

15 Hãmĩĩ, Yahudyaba-i nǝ̃-yáà.

Yahudyabaa húulá-yáà.

Gɩ̀ sǝ nã́ã́ yi hlǝ́rá bàá mãã bà sǝ̃n fǝ̃ǝ̃ Dũnnũw bàá nã-i.

16 Nǝ̃ yi fǝ̃́ǝ̃lã́ wà Dũnnũw sǝ̃n ce curoẃ ba cosũɔ̃lyǝw Musa hlũũ'n wáàm nã sǝ, nǝ̃ fuwɔ Yesu Kɩrsa cɔ̃m'n hũɔ̃m nã dɩn nã-i.

Hãmĩĩ yo, yi hṹɔ̃lã́ Yesu cɔ̃mmã, ǹ-da ǹ-ba cosũɔ̃lbaba yì hũɔ̃m'n cɔ̃mmã nã Kɩrsaw nã, nǝ̃ Musa hlũũ'n wáàm nã sǝ.

Nã̀ã wa Musa hlũũ'n waamã̀ síì gbǝ̃ǝ̃ ǹ-ce Dũnnũẃ ce curo ń ba cosũɔ̃lyǝw wù yinɲã nã.

17 Nǝ̃ gɩ-ń ba gùu ba wà Kɩrsa hũɔ̃m'n cɔ̃m nã-i yí ba cosũɔ̃lbaba Dũnnũ yinɲã nã, ba-ń ver ǹ-wa diicĩɛ̃rǝntaa-i nǝ̃-yáà, cwaa'n dɩgaliɛ tammã, gɩ́ ba nã́ã́ Kɩrsa díilá-yáà diicĩɛ̃rǝ nã-ì?

Gbal-i dɩ̀ káaláa wà wu sáa jo dìí nã sǝ!

18 Gɩ̀ sùɔ́gɩ nã, mǝ̃-ń ver ǹ-mã gùú mãã mǝ̃̀ hɩ́rrǝ́-gǝ, mǝ̃̀ hlã mǝ̃̀ hla nǝ̃ yuɔrɔm-i.

19 Sulammã nã, Musa hlũũgɩ̀ cíé mǝ̃́ ku gɩ̀ kusunã, gɩ̀ sǝ̃n saa mǝ̃́ wáà-gǝ hlo, ǹ-da ǹ-ba nũmǝ̃nãw Dũnnũ saa.

Bà gbǝ́ǝ́ Kɩrsaẁ gùú daagɩ nã mãã, mǝ̃̀ kã́ã́ bá gbǝ-m yì min nǝ̃-yǝ, yí kurǝǝ yì min nǝ̃ Kɩrsaw gɩ̀ daagɩ nã.

20 Mǝ̃́ nìɛ nũmǝ̃nãw, nǝ̃ nũmǝ̃nãsǝ díɛ̀dɩ, dɩ̀ sǝ̃n hlǝ mã́ã nã sǝ nǝ̃ mǝ̃̀ hla, Kɩrsaw hlã́ã̀-m nǝ̃-dǝ, nã́ã́ wù-lǝ wù mãã wù caa mǝ̃́ ba nĩĩguu mãã.

Mǝ̃́ nǝ̃ nũmǝ̃nãw Dũnnũ Bíɛ́'n hũɔ̃m'n cɔ̃m nã-i.

Mǝ̃̀ cɔ̃mmã̀ dwal wù-lǝ wùú nã-i, wú hã-ba nǝ̃ wù yuugu mǝ̃̀ cɔ̃mmã nã.

21 Dũnnũẁ mãã wù níé mǝ̃̀ yiɛgu, mǝ̃n síì hla dɩ̀-lǝ, nã̀ã wa Musa hlũũ'n cɔ̃m nã nã́ã̀ ba, Dũnnũẃ ba wù ce curoẃ ba cosũɔ̃lyǝw, gɩ̀ sùɔ́gɩ nã, Kɩrsaẁ kuu mǝ̃ǝ̃lǝ̃ǝ̃-i.