Gal. 1

Galasii taa'n sɛbɛw

Polẁ yállá gùú sɛbɛw ǹ-hã Galasii yiɛ'n Igɩlisɩ taaba

Polẁ fyãn Galasii taaba

Mã́ã Pol, mã́ã mãã Yesu Kɩrsa tĩɛ̃tiiw, gɩ̀ sáa ce nã́ã́ mǝ̃ nǝ̃ cwaa'n tĩɛ̃r nã-i nǝ̃ curo'n tĩɛ̃r nã-i, nǝ̃ Yesu Kɩrsaba nǝ̃ Tiiyǝ Dũnnũw mãã wù pĩ́ĩlã́ ǹ-hiil-yǝ cugutaaba sǝ̃ǝ̃nã, mǝ̃́ nǝ̃ bàá tĩɛ̃r nã-i.

2 Mǝ̃̀ cwanããba minẁ mãã dìɛ nǝ̃-m nhlíɛ̀, yi plii yì yal sɛbɛ wáà yì min nǝ̃ bà-i, yì tĩɛ̃ yì hã Galasii yiɛ'n Igɩlisɩ taaba min:

3 Yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu.

4 Kɩrsaẁ díilá wù hla bá jãn-yǝ nǝ̃ siimã hãmĩĩ gaacĩɛ̃ya'n cɔ̃mmã nã, ǹ-da ǹ-hiil-yáà kuɔkuɔ cuu cwaa'n gaabɩbliɛga nã ǹ-vaa nǝ̃ wùú mãã yì Dũnnũw, nã̀ã ba yì Tǝw wù kusuugu.

5 Wùú sáalà nǝ̃ bũũmã fɩraa!

Kwaya.

Yesu cɔ̃ndudwalɩmmã nǝ̃ mã̀ dɩn-i

6 Mã́ã cwanãã, halle ǹ-da wà Dũnnũw níé ɲì yiɛgu nã̀ã be-ɲã́ã̀ Kɩrsa cɔ̃mmã nã, ɲi gǝ́ǝráa ǹ-ver ɲì furũũgu ǹ-hã-yǝ, nã̀ã yiil ǹ-ba ɲì ne gɩ̀ dǝ'n cɔ̃ndudwalɩmdamã.

Ɲì diicerǝ díɛ̀dɩ̀ túgulǝ́ǝ mǝ̃̀ nã ǹ-car.

7 Gɩ ba nã́ã́ cɔ̃ndudwalɩmdamã níɛ̀-ì?

Gbal-i, mãdam'n sɩriɛ!

Nǝ̃ gɩ̀-i nnĩĩ, badaba-i bàa suro ǹ-ba bà gaala ɲì hiɛga nã.

Gùú cɔ̃ndudwalɩmmãã mãã mã̀ waa Kɩrsa cɔ̃mmã, bá ba bà caa bá veraa mã̀ nã.

8 Wudiɛw-ń juo tu gɩ̀ dǝ'n cɔ̃ndudwalɩm nǝ̃-ɲã́ã̀, mã̀ã́ mãã mã̀ sǝ sùɔ́gɩ dɩn nǝ̃ hãmĩĩ túú mã̀ã́ nǝ̃-ɲã́ã̀, Dũnnũẃ piɛ wù nãkrɔbɩblaagu gɩ̀ tii drɔ, halle gɩ-ń ba wà hãmĩĩ-i, yindagǝ nã wà mɛlɛgɛdiɛ hlǝ́rá drɔguu ǹ-jo!

9 Yi wáalá dɩ̀-i ǹ-ta nnĩĩ, nǝ̃ mǝ̃̀ ver ǹ-tu-dǝ nǝ̃-ɲã́ã̀ kuɔkuɔgu wà gùú tii wu-ń juo tu gɩ̀ dǝ'n cɔ̃ndudwalɩm nǝ̃-ɲã́ã̀, mã̀ã́ mãã mã̀ sǝ sùɔ́gɩ dɩn nǝ̃ mã̀ã́ mãã ɲi hṹɔ̃lã́-mã, Dũnnũẃ piɛ wù nãkrɔbɩblaagu gɩ̀ tii drɔ!

10 Yindiɛ, gɩ́ ba nã́ã́ mǝ̃ yal mǝ̃̀ caa cwaa-i bá ba bà wa mǝ̃́ fǝ̃ǝ̃ mǝ̃̀ ce-ì?

Nĩĩgu sǝ!

Mǝ̃̀ caa Dũnnũ-i wú ba wù wa mǝ̃́ fǝ̃ǝ̃ mǝ̃̀ ce.

Dàa gɩ́ ba nã́ã́ mǝ̃ caa mǝ̃̀ cɔ̃m-i mã́ ba mã̀ dwal cwaaba nã-ì?

Dìí sǝ.

Mǝ̃ nã́ã̀ ba mǝ̃̀ caa mǝ̃̀ cɔ̃mmã́ dwal cwaaba nã, mǝ̃̀ sáá mǝ̃̀ ji ba Kɩrsa mããcierw.

Dũnnũẁ be Polw wù kra wù nã wù mããcemmã nã

11 Mã́ã cwanãã, mǝ̃̀ caa ɲí fǝ̃ǝ̃ wà mǝ̃n wáalá gùú cɔ̃ndudwalɩmmãã mãã nǝ̃-ɲã́ã̀, mã̀ sáa hlǝ curo'n blɩ nã sǝ.

12 Ǹ-pya dɩ̀-lǝ dɩ̀ nã, mǝ̃̀ sáa da gɩ̀ cɔ̃ndudwalɩmmã yindagǝ nã ǹ-kal-mã nǝ̃ curo'n blɩ yo wùú saa sǝ, nǝ̃ Yesu Kɩrsaẃ nǝ̃ wù hla, wùú pɩ́gará-m nǝ̃-mã.

13 Mǝ̃n yáá Yahudyaba hlũũgɩ nã fufodii, ɲimãã nǝ̃ ɲì hla ɲi nṹɔ̃́ mǝ̃̀ cɔ̃mmã nã, mǝ̃̀ yáá gùú kuuguu mãã.

Mǝ̃̀ yáá mǝ̃̀ cuɔl Dũnnũ Igɩlisɩ taaba mǝ̃̀ sǝ̃n hiraa.

Mǝ̃̀ yáá mǝ̃̀ caa mǝ̃́ ce cɔ̃mmã min ǹ-guu bà nã.

14 Yahudyaba hlũũgɩ nã, mǝ̃̀ yáá mǝ̃̀ nãbrǝntaacin'n yigagɩ nã yì nũɔ̃gɩ nã, nã̀ã wa mǝ̃̀ sáá mǝ̃̀ hũɔ̃ mǝ̃̀ tǝvũnvãnãã'n hlũũ'n cɔ̃mmã nã.

15 Nǝ̃ mǝ̃n wáalá mǝ̃̀ ji huu, Dũnnũẃ nǝ̃ wù kusufɩnfaagɩ nã, wú ne ǹ-hiil-m, ǹ-kra mǝ̃̀ nã mǝ̃̀ dǝ.

Gɩ̀ jáa saa wù nã, wú be-m,

16 ǹ-pɩgaa-m nǝ̃ wù Bíɛ́'n cɔ̃mmã, mǝ̃́ da ǹ-tu wù cɔ̃ndudwalɩmmãã nǝ̃ bàá mãã bà sǝ Yahudyaba.

Gùú bǝ̃ǝ̃gɩ dɩngu dàa, mǝ̃̀ sáa kuganãã curo nã ǹ-yugu-yǝ nǝ̃ cɔ̃m,

17 mǝ̃̀ sáa yuguraa Serusalɛmgu ǹ-ga yugu bàá mãã bà cíé Yesu tĩɛ̃taaba mǝ̃̀ yiga nã nǝ̃ cɔ̃m, mǝ̃́ paa ǹ-car ǹ-ta Arabuba yiɛgu, nã̀ã ga fǝ̃ǝ̃ ǹ-ver ǹ-jo Damãsɩ lǝri hlo.

18 Biiga siɛl furũũgɩ nã-i dìi, mǝ̃́ yuguraa ǹ-kã Serusalɛmgu, yí kãã fǝ̃ǝ̃ yì ɲĩɛ̃ nǝ̃ Piɛrw, nã̀ã ba dàa wù kuugɩ nã ǹ-ce bãn ywargǝ.

19 Mǝ̃̀ yisɩrɩ sáa taa Yesu tĩɛ̃tiidiɛ nã, nã́ã́ Yitii'n hǝ̃ǝ̃ Yakubaw dɩn sǝ.

20 Mǝ̃̀ mãã mǝ̃̀ yal kuu wo kuu mǝ̃̀ hã-ɲã́ã̀ nnĩĩ, Dũnnũw dɩn díyà-m, mǝ̃̀ sǝ̃n bǝr kwasǝ sǝ.

21 Gɩ̀ furũũgɩ nã-i, mǝ̃́ kãã suro ǹ-maar Siirii yiɛgu nǝ̃ Siliisɩ yiɛgɩ nã.

22 Nǝ̃ Suude yiɛ'n Igɩlisɩ taaba minw mãã Kɩrsaw nã, bà sáá bàa hi ǹ-da-m nǝ̃ bà yinɲã ǹ-da.

23 Bà yáá bà nɔ̃ dìí dɩn mãã dìi ya wà gùú biɛẁ mãã wù yáá wù cuɔl-ba fufodii, nã̀ã ba wù caa wú ce cɔ̃mmã min ǹ-bǝ̃ǝ̃lǝ̃ǝ̃ Yesu hũɔ̃m'n cɔ̃mmã nã, wà wùú gáa ver ǹ-ba wù waa Yesu cɔ̃mmã kuɔkuɔgu.

24 Nã̀ã ba bà bũũ Dũnnũw mǝ̃̀ cɔ̃mmã nã.