Kor. dĩɛ̃l 15

Yesu Kɩrsa nĩĩm'n cɔ̃mmã

Mã́ã cwanãã, mǝ̃̀ wáalá gùú cɔ̃ndudwalɩmmãã mãã nǝ̃-ɲã́ã̀ ɲí hũɔ̃-mã, nã̀ã vaa ɲì hla mã̀ cɔ̃mmã nã, mǝ̃̀ jo mǝ̃̀ ji tu mã̀-i nǝ̃-ɲã́ã̀ hlo.

2 Ɲi-ń ba ɲĩ̀ĩ hũɔ̃-mã nã́ã́ mǝ̃̀ wáalá-mã nǝ̃-ɲã́ã̀ gùú tammã, ɲì kórrá mã̀ã́ cɔ̃m nã-i; mã̀ã́ cɔ̃m nã́ã̀ ba mã̀ sǝ, ɲì hũɔ̃mã̀ yáá mã̀ ji ba mǝ̃ǝ̃lǝ̃ǝ̃-i.

3 Mǝ̃n díɛ́ dìí mãã nũɔ̃sǝn dǝllìi, mǝ̃̀ hlã-ɲã́ã̀ nǝ̃ dɩ̀-i mǝ̃́ wa: Kɩrsaẁ kúú hãmĩĩ gaacĩɛ̃ya'n cɔ̃m nã-i nã́ã́ dɩ̀ yállá Dũnnũ cãwan'n sɛbɛba nã gùú tammãã.

4 Wù kúú bá dii wù pĩɛ̃ndi nǝ̃ gɩ̀ bãnɲã̀ siɛlnã yuugu, wú nĩĩ, ǹ-vaa nǝ̃ Dũnnũ cãwan'n sɛbɛbà wáalá dìi.

5 Dũnnũẁ pĩ́ĩlã́ ǹ-hiil-yǝ kúúgɩ nã nnĩĩ nã, wú pɩgaa wù hla ǹ-ja Piɛrw, nã̀ã ga ver ǹ-pɩgaa wù hla ǹ-ja Nũɔ̃sɔ̃nǝ̃bahǝ̃ǝ̃lba.

6 Gɩ̀ furũũgɩ nã wù pɩ́gará wù hla ǹ-ja wù duunãtaabaa mãã yin dɩngu, bà yáá bà ji hi cwa tũndii gundii tuuguu nǝ̃ kuugɩ́ piɛ.

Badaabà kurǝǝ bà sǝ̃ǝ̃nã, nǝ̃ ǹ-ji vaa nǝ̃ jimããgu bà cindɩ́ nìɛ nũmǝ̃nãw.

7 Bà-lǝ bà dǝl'n furũũgɩ nã, wú pɩgaa wù hla ǹ-ja Yakubaw nǝ̃ tĩɛ̃taaba min.

8 Bà-lǝ bà furũũgɩ nã, wú pɩgaa wù hla nǝ̃ mã́ã yo, mã́ã mãã nã́ã́ caaliiw nǝ̃n húulá nǝ̃ hyarsǝrɩ sàa suu.

9 Mǝ̃n-lǝ mã́ã-i Yesu tĩɛ̃taaba min wuusaalw, mǝ̃n sǝ̃n saa bá ba bà be-m Yesu tĩɛ̃tii, nã̀ã wa mǝ̃̀ cúɔlá Dũnnũ Igɩlisɩ taaba.

10 Nǝ̃ Dũnnũ diifɩnfar'n cɔ̃mmã nã, wù cíé mǝ̃́ ba, mǝ̃̀ mã́ã gùu tii nnĩĩ.

Wù sáa piɛ wù nãkrɔfɩnfaagu mǝ̃̀ drɔ mǝ̃ǝ̃lǝ̃ǝ̃, mǝ̃̀ cíé mããcemmãã ǹ-hã-yǝ ǹ-ɲǝ̃ǝ̃ Yesu tĩɛ̃taaba min, nǝ̃ mã́ã hla'n fãngãã sáa ce-mã nǝ̃ Dũnnũ níé mǝ̃̀ yiɛgu mǝ̃́ gbǝ̃ǝ̃ ǹ-ce-mã.

11 Gɩ-ń dwal gɩ́ ba wà mã́ã wáalà Dũnnũ cãwandi ǹ-ja cwaaba yindagǝ nã bàá wáalà-dǝ ǹ-ja-ba, yì min yi waa cɔ̃mmã̀ dɩnmã-i nǝ̃ ɲimãã yo ɲi cúú mã́ã̀ nã-i.

Cugutaa'n pĩĩm'n cɔ̃mmã

12 Yi-ń ba yi waa Dũnnũ cãwandi yì ja cwaaba, yi waa wà Kɩrsaw nĩ́ĩlã́ ǹ-hlǝ cugutaaba sǝ̃ǝ̃nã.

Nǝ̃ gɩ̀ ba danii ɲì sǝ̃ǝ̃nã cwaadaabá ba bà waa wà Dũnnũw sɩga pĩĩ cugutaaba?

13 Dũnnũw-ń ba wù síì pĩĩ cugutaa-lǝ, Kɩrsa yo wù sáa nĩĩ.

14 Nnĩĩ-lǝ Kɩrsaw-ń ba wù sáa nĩĩ, hãmĩĩ wáalá gùú Dũnnũ cãwandii mãã ǹ-ja cwaaba, dɩ̀ cíé mǝ̃ǝ̃lǝ̃ǝ̃-i nǝ̃ ɲimãã yo ɲì hũɔ̃mã́ ba mǝ̃ǝ̃lǝ̃ǝ̃.

15 Ǹ-pya dɩ̀-lǝ dɩ̀ nã, yì mãã wà Kɩrsaẁ nĩ́ĩlã́ ǹ-hlǝ kuugɩ nã, gɩ-ń ba wà ɲi waa sulam-i wà Dũnnũw sɩgaa pĩĩ cugutaaba, gɩ̀-lǝ hãmĩĩ cíé kwasǝnãã-i Dũnnũ hlũũgɩ nã.

16 Gɩ-ń ba wà Dũnnũw sɩga pĩĩ cugutaaba, Kɩrsa yo, wù sáa nĩĩ.

17 Nǝ̃ gɩ-ń ba wà Kɩrsaw sáa nĩĩ, ɲì hṹɔ̃lã́ wù cɔ̃mmã̀ mǝ̃ǝ̃lǝ̃ǝ̃-i, ɲì gaacĩɛ̃yagá nìɛ ɲì yuunã dìɛ dìɛ.

18 Bàá nǝ̃n hṹɔ̃lã́ wù cɔ̃mmã nã̀ã ku, bàá yo Dũnnũẁ sɩga kor-ba.

19 Gɩ-ń ba cuu wáà dɩndɩn nã-i yi cúú Kɩrsa furũũgɩ nã, yì hujãncɔ̃mmã̀ máalá cwaaba min mǝ̃gãmmã.

20 Nǝ̃ sulammã nã Kɩrsaw nĩ́ĩlã́ ǹ-hlǝ cugutaabà sǝ̃ǝ̃nã.

Wùú dĩ́ɛ̃lã́ ǹ-hlǝ kuugɩ nã, ǹ-da ǹ-pɩgaa wà cugutaa yo bà ji hlǝ gɩ̀ nã.

21 Kúúgɩ̀ mãã gɩ̀ jã́nnã́ cuu curoẁ dɩn cɔ̃mmã nã, curoẁ dɩn cɔ̃mmã nã-i cugutaa'n pĩĩm yo mã̀ ji ce.

22 Cwaaba min bà mãã bà hlǝ́rá Adɩmãw nã, gùú cíé bá ba bà kurǝǝ; gùú tammã̀ dɩnmã-i bàá mãã Yesu Kɩrsa bɩgaaba, bá ba bà ji da fɩraa nũmǝ̃nãsǝri,

23 nǝ̃ Dũnnũẁ ji pĩĩ ǹ-hiil bà min kúúgɩ nã ǹ-vaa nǝ̃ bà bǝ̃ǝ̃-i: Yesu Kɩrsaw dĩ́ɛ̃lã́ ǹ-hlǝ kuugɩ nã, nǝ̃ bàá nǝ̃n hṹɔ̃lã́ wù cɔ̃mmã, bàá yo bà ji hlǝ gɩ̀ nã wù jol'n bǝ̃ǝ̃gu.

24 Gɩ̀ furũũgɩ nã, cuu tãl'n bǝ̃ǝ̃gɩ̀ ji hi.

Kɩrsaẁ ji bǝ̃ǝ̃lǝ̃ǝ̃ cuu wáà yuuntasǝrɩ nã, nǝ̃ wù fãngããgɩ nã, nǝ̃ tãntɔ̃nãã'n fãngããgɩ nã, nã̀ã dii Yuuntasǝri Tiiyǝ Dũnnũ nãkruɔgɩ nã.

25 Nã̀ã wa gɩ̀ saa Kɩrsaẃ jiraa yuuntasǝrɩ nã ǹ-ji da Dũnnũẁ wùu ji dii wù ɲããtaaba wù nãkruɔgɩ nã.

26 Gùú ɲããtiiw mãã wù ji bǝ̃ǝ̃lǝ̃ǝ̃ wù nã ǹ-faal, wɩ̀-i kúúgu.

27 Gɩ̀-i, bá yal Dũnnũ sɛbɛw nã wà Dũnnũw kárrá wù nã ɲinɲã min yuugɩ nã.

Nǝ̃ ba-ń wa Dũnnũẃ kárrá Yesuw nã ɲinɲã min yuugɩ nã, dɩ̀ kaalaa wà Dũnnũẁ mãã wù kárrá wù nã ɲì yuugɩ nã, wú sǝ wù-lǝ wù yuugɩ nã.

28 Dũnnũw-ń ji kra Biɛnĩĩw nã ɲinɲã min yuugɩ nã, Biɛnĩĩẁ ji ba wù nɔ̃ wù hã Dũnnũw nǝ̃n kárrá wù nã ɲã̀ yuugɩ nã.

Gɩ̀-lǝ gɩ̀ nã Dũnnũẁ mãã Tiiyǝw, wù ji ba ɲinɲã min yuugɩ nã.

29 Kã́nã̀ã bàá mãã bà ce bá ɲĩɛ̃-ba cugutaa'n cɔ̃mmã nã ɲi ne.

Ɲi kãn wà ba ce-dǝ hamã nã-ì?

Gɩ-ń ba wà sulam-i Dũnnũw sǝ̃n pĩĩ cugutaaba, hamã nã-i bá ba bà ce bá ɲĩɛ̃-ba bà cɔ̃mmã nã?

30 Dàa nǝ̃ hãmĩĩ-lǝ bii gùu ce bǝ̃ǝ̃ wo bǝ̃ǝ̃ yi-ń ce yí ba yì caa yí naa yì yunɲã?

31 Mã́ã cwanãã yuu wo yuu mǝ̃̀ da kuugu nǝ̃ mǝ̃̀ yinɲã.

Nǝ̃ sulammã nã, ɲi mãã Yitii Yesu Kɩrsa bluuba, gɩ̀-i, mǝ̃́ ba mǝ̃̀ ce kweyi-kweyiw ɲì cɔ̃mmã nã.

32 Mǝ̃n kã́ã́ yí nar Efɛsɩ lǝri nǝ̃ gùú cwaabaa mãã bàa bla nã́ã́ mǝ̃yɩrǝǝ-i, gɩ́ ba nã́ã̀ mǝ̃́ cíé-dǝ cwaa'n yinelacɔ̃m nã-i, dɩ̀ yáá dɩ̀ ji pyar bii dugɔ-i ǹ-hã-m?

Nnĩĩ-lǝ, Dũnnũw-ń ba wù sǝ̃n pĩĩ cugutaaba, yáà yí ba yì wuu wuuri nǝ̃ yi ba yì ɲũɔ̃ ɲããɲũɔ̃nɲã, nã̀ã wa yi-ń ku dɩ̀ tĩ́ɛ̃́-i.

33 Bláá ce ɲí vuu ɲì hla, curo nǝ̃n ba ǹ-jiraa nǝ̃ cobalw, yíi yo ǹ ga juo ba cobal-i.

34 Díyà yiɛ nǝ̃ ɲí nǝ̃nǝ̃ǝ̃ gaacĩɛ̃yaga nã nǝ̃ ɲí ba cosũɔ̃lbaba, dɩ̀-lǝ dìí sáalá.

Nã̀ã wa badaabá nìɛ ɲì sǝ̃ǝ̃nã bà sǝ bàa fǝ̃ǝ̃ Dũnnũw.

Mǝ̃n waa dɩ̀-lǝ ɲimãã hla'n circɔ̃m nã-i.

Dũnnũẁ pĩĩ cãndarǝ wù hiil-dǝ kúúgɩ nã

35 Nǝ̃ cwaadaabà ji wa bá ce yugummã̀ã wà Dũnnũw ji pĩĩ cugutaaba danii tam-i?

Nǝ̃ wu-ń ga pĩĩ-ba, bà ji ba nǝ̃ cãnĩɛ̃ haga-ì?

36 Baahãrãã cíé gɩ̀-lǝ gɩ̀ yugummã̀ã!

Nǝ̃-ń dũũ dũblɩri, dɩ̀ síì gbǝ̃ǝ̃ ǹ-pa ǹ-hlǝ nã́ã̀ dɩ̀ sáa hwar haasǝ.

37 Nǝ̃-ń ce ń tuu dũkɩkam-i ǹ-dũũ-mã gɩ̀ ji gbǝ̃ǝ̃ ce wà ń dṹũlã́ kuuruu-i, yindagǝ nã dũmdamã, nǝ̃ ǹ sǝ̃n dũũ dũm'n tuu sǝ nǝ̃ gɩ̀ hla do!

38 Gɩ̀ furũũgɩ nã, Dũnnũw-ń ce wú ce dɩ́ pa ǹ-ba tuugu, ǹ-ba nã́ã́ wù-lǝ wù mãã wù caa-dǝ nĩĩguu mãã.

Nǝ̃ dũblɩ wo dũblɩ nǝ̃ dǝ'n tuu.

39 Dũnnũẁ nǝ̃́ǝ̃lã́ nũmǝ̃nãsǝ'n ɲin yo ɲã̀ cãnĩɛ̃gá ba gà dǝ gà dǝ nnĩĩ-i.

Wù nǝ̃́ǝ̃lã́ curo'n cãndɩ dǝ, kwasǝnɲin'n dǝllɩ dǝ, nã̀ã nǝ̃ǝ̃ tɩtraa yo bà dǝllɩ dǝ.

40 Drɔɲinɲã nǝ̃ ɲũrũũɲinɲã́ nìɛ; nǝ̃ drɔɲin'n faagɩ̀ sǝ sùɔ́gɩ dɩn nǝ̃ ɲũrũũɲin'n kuugu.

41 Bǝ̃ǝ̃'n caalammã sǝ sùɔ́gɩ dɩn nǝ̃ hyargaa'n mǝ̃gãmmã, ŋmĩɛ̃ yo gá ba gà caalaa gà dǝ'n tam.

Halle ŋmĩɛ̃ga nǝ̃ hla, gà sǝ̃ǝ̃nã, gà caalammã́ nǝ̃ mã̀ã yiɛlaa mã̀ ɲĩɛ̃ nã.

42 Cugutaa'n pĩĩmã̀ ji ba nnĩĩ-i, Curoẁ mãã wu-ń ku nǝ̃ bá dii-yǝ, wù pĩɛ̃ndɩ-ń ce dɩ́ hwar; nǝ̃ gùú bǝ̃ǝ̃guu mãã Dũnnũẁ ga pĩĩ-yǝ kúúgɩ nã, wù ji ba nǝ̃ cãndii mãã dɩ̀ sǝ̃n ku ǹ-da.

43 Wu-ń ce wú ba mǝ̃nkurnĩĩ wù diim'n bǝ̃ǝ̃gu nã̀ã bla, nǝ̃ wù nĩĩm'n bǝ̃ǝ̃gu wù ba nǝ̃ fãngããgu nã̀ã ba wù fa.

44 Ba-ń dii wù pĩɛ̃ndi hlɔ̃mmã nã, dɩ̀-lǝ cãnkũɔ̃m-i.

Nǝ̃ wù nĩĩmã nã wù hlǝ nǝ̃ cãndii mãã Dũnnũ Yuflǝẁ hlã-yǝ nǝ̃-dǝ.

Yi-ń ba nǝ̃ cãndii mãã dìi ba cãnkũɔ̃mãã, yi saa yí fǝ̃ǝ̃ wà Dũnnũ Yuflǝw mãã wù hã-yáà nǝ̃ gùú mãã nã́ã́ cãn-i wà gùú yo gɩ́ nìɛ.

45 Gɩ̀-i, dɩ́ yal wà: «Adɩmãw mãã Dũnnũẁ dĩ́ɛ̃lã́ ǹ-nǝ̃ǝ̃-yǝ, wú hlã-yǝ nǝ̃ nũmǝ̃nãsǝri»; nǝ̃ gùú Adɩmãẁ mãã wù júó ǹ-faal, wù-lǝ wɩ̀-i Yuflǝw mãã wù hã cwaaba nǝ̃ nũmǝ̃nãsǝri.

46 Dũnnũ Yuflǝw mãã wù hã-yáà nǝ̃ gùú mãã nã́ã́ cãn-i, gɩ̀-lǝ gɩ̀ sǝ̃n jo dĩɛ̃lãmmã nã, yi-ń ce yí ba nǝ̃ curo'n blɩ'n cãnkɩkaarɩ-i haasǝ nã̀ã ji da yí ba ba nǝ̃ gùú mãã Dũnnũ Yuflǝẁ hã-yáà nǝ̃-gǝ.

47 Dũnnũẁ nǝ̃́ǝ̃lã́ Adɩmã dĩɛ̃lw nǝ̃ hlɔ̃m-i; nǝ̃ Adɩmãba hǝ̃ǝ̃lnãẁ hlǝ́rá drɔ-i ǹ-jo.

48 Ɲũũrũũtaabà hlǝ wùú mãã Dũnnũẁ túulá hlɔ̃mmãã ǹ-mã-yǝ nǝ̃ drɔtaabá ba bà hlǝ wùú mãã wù hlǝ́rá drɔguu ǹ-jo.

49 Gùú tammãã mãã yi hlǝ curow mãã Dũnnũẁ nǝ̃́ǝ̃lã́-yǝ nǝ̃ hlɔ̃mmã, gùú tammã dɩnmã-i yi ji ba yi hlǝ wùú mãã wù hlǝ́rá drɔguu ǹ-jo.

50 Mã́ã cwanãã mǝ̃̀ mãã mǝ̃̀ caa mǝ̃́ waa dìí, dɩ̀-i nnĩĩ: Curo'n síì gbǝ̃ǝ̃ ǹ-jãn Dũnnũ Yuuntasǝ'n gbɩgbaamã nã nǝ̃ cãnkũɔ̃m kɩkam mã́ã̀, nǝ̃ gùú ɲinɲãã mãã ɲã̀ hwar, ɲã̀ síì gbǝ̃ǝ̃ kã ɲã́ ba nǝ̃ ɲã̀ã́ mãã ɲã̀ sǝ̃n hwar ɲã̀ min.

51 Yáà mǝ̃́ juo fɩr cɔ̃nŋmǝ̃ǝ̃rǝ̃mdamã ǹ-ja-ɲã́ã̀: yì min yi síì kurǝǝ nǝ̃ yì min yi ji veraa

52 yin dɩndɩngu, yin'n suumã nǝ̃ ɲã̀ cugurɩmmã nã, yenfaalarǝdɩ̀ ji bu.

Nã̀ã wa dɩ-ń ji bu, Dũnnũẁ ji pĩĩ cugutaaba, bá ba nǝ̃ gùú cãndii mãã dɩ̀ sǝ̃n hwar, nǝ̃ hãmĩĩ mãã nũmǝ̃nãw yì cãnĩɛ̃gá vérrá.

53 Sulammã nã, cãndii mãã dɩ̀ hwar, dɩ̀ saa dɩ́ ver ǹ-ba cãndii mãã dɩ̀ sǝ̃n hwar, nǝ̃ cãndii mãã dɩ̀ ku dɩ̀ saa dɩ́ ver ǹ-ba dìí mãã dɩ̀ sǝ̃n ku.

54 Cãndii mãã dɩ̀ hwar, dɩ̀-lǝ dɩ-ń ga juo ver ǹ-ba cãndii mãã dɩ̀ sǝ̃n hwar, nǝ̃ cãndii mãã dɩ̀ ku dɩ́ ver ǹ-ba dìí mãã dɩ̀ sǝ̃n ku, gɩ̀-lǝ gɩ̀ nã, dìí nǝ̃n yállá, dɩ̀ ji suu.

Dɩ́ nàa dìi yal wà: «Dũnnũẁ gbǝ̃́ǝ̃lã́ kuugɩ nã, wù gúulá gɩ̀ nã!»

55 Kúú'n fãngããgɩ-i haa-ì?

Kuugɩ̀ yáá gɩ̀ ko cwaaba nǝ̃ gùú tãmmã, mã́ nàa haa-ì?

56 Diicĩɛ̃rǝ'n cɔ̃mmã nã-i kuugɩ́ ba nǝ̃ fãngããgu, gɩ̀ ko cwaaba, nǝ̃ diicĩɛ̃rǝdɩ̀ da fãngããgu cwaaba drɔ Musa hlũũ'n cɔ̃m nã-i.

57 Nǝ̃ Dũnnũ yiirɩ́ bũũ, ǹ-da wà wu cíé yí gbǝ̃ǝ̃ kuugɩ nã Yitii Yesu Kɩrsa cɔ̃mmã nã.

58 Gɩ̀ sùɔ́gɩ nã, mã́ã cwanãã ɲimãã mãã mǝ̃̀ cituubiiba, hyárrà dɩ̀ dɩndɩ nã, nǝ̃ ɲí ba nǝ̃ kɩkǝmmã, ɲí ba ɲì kã nǝ̃ yiga Yitii'n mããcemmã nã.

Fǝ̃́ǝ̃lã̀ wà ɲi mãã ɲì ce gùú mããcemmãã mãã ɲì hã Yitiiw wà mã́ sɩga ba mǝ̃ǝ̃lǝ̃ǝ̃.